JEHOVÁ siervokuéra ningo jaguereko peteĩ istória iñimportánteva ikatúva ñaaprende ñane puvlikasionkuéra rupive, péro ikatu avei ñaaprende fóto, kárta, tembiasakue ha ambue mbaʼe rupive ohechaukáva mbaʼéichapa japredika ha ñamombaʼeguasu Jehovápe. Péro, mbaʼépepa ñanepytyvõkuaa koʼã mbaʼe ha mbaʼérepa tekotevẽ jaikuaa ñande istória? Yma umi isrraelíta omoakãva hogapy omboʼevaʼerã ifamiliakuérape Jehová léi ha umi mbaʼe porã ojapovaʼekue ‘ikatu hag̃uáicha ojerovia avei Ñandejárare’ (Sal. 78:1-7, ÑÑB).

Yma guivéma umi investigasión ojejapóva iñimportanteterei oiko hag̃ua Jehová rembipota. Pór ehémplo, Jehová siervokuéra enemígo oñehaʼãmbaitérõ guare ani hag̃ua oñemopuʼã jey pe témplo Jerusalénpe, oñeivestiga umi archívo oĩva Ecbátana, Médiape, ha ojetopa peteĩ dokuménto rréi Ciro heʼihápe oñemopuʼã jey hag̃ua pe témplo (Esd. 6:1-4, 12). Upéicha rupi, Jehová oipotaháicha, pe témplo oñemopuʼã jey. Lucas ohekavaʼekue avei umi informasión oĩvaʼekue itiémpope “ohesaʼỹijo porãmbaite hag̃ua koʼã mbaʼe iñepyrũ guive” (Luc. 1:1-4, NM).

Koʼág̃a rupi, pe Cuerpo Gobernante omombaʼeterei avei ñande istória. Omombeʼúvo mbaʼérepa  tekotevẽ oñeñangareko, oñedokumenta ha ojekuaauka ñande istória, peteĩva ijapyteguikuéra heʼi: “Jaikuaa hag̃ua moõ gotyópa jaha, tekotevẽ jaikuaa moõguipa jaju”. Upévare Brooklynpe (Nueva York) oñemoñepyrũ pe departaménto Archivos de Redacción omoakãva pe Comité de Redacción.

PE “ÁLBUM” HA ÑANE ERÉNSIA

Pyaʼeterei ningo ohasa pe tiémpo, ha enterovénte ñañongatuséta umi rrekuérdo oguerekóva ñane família, ajépa? Upévare Archivos de Redacciónpe oñembaʼapo ikatu hag̃uáicha oñeñangareko ha oñedokumenta umi rrekuérdo oguerekóva ñane organisasión. Umi fóto oĩvare upépe jaʼekuaa ñane “álbum”, térã erénsia. Ha umi mbaʼe oñeñongatúva apytépe oĩ avei umi ñane puvlikasión ypykue, umi ñane ermanokuéra ohasavaʼekue ha hetave mbaʼe iñimportánteva. Opa koʼã mbaʼe ñanepytyvõ jaikuaave hag̃ua ñande istória ha jajeroviave hag̃ua Jehová organisasión rehe.

Oñemokyreʼỹ enterovépe ohecha hag̃ua umi mbaʼe Archivos de Redacción oikuaaukátava ko rrevísta Ñemañaha ñahesaʼỹijóva rupive, pe párte heʼihápe “Manduʼarã”. Pór ehémplo, peteĩ artíkulo osẽtavape oñembohováita koʼã porandu: “Mbaʼépa pe “auroramóvil”? Máva mávapa oiporurakaʼe? Arakaʼe ha maʼerãpa ojeporuvaʼekue?

Peteĩ álbumpe jarekoháicha ñane família rrekuérdo, pe Archivos de Redacciónpe ojeguerekóva ohechauka heta mbaʼe ñanderehe ha umi ermáno oĩva ñande mboyve: ohechauka ojerovia hague hikuái, ipyʼaguasu ha ovyʼa hague oservívo ñande Ru yvagapeguápe, ohechauka umi mbaʼe ijetuʼúva ombohovaivaʼekue hikuái ha mbaʼéichapa Jehová akóinte oisãmbyhy ha oipytyvõ ipuévlope (Deu. 33:27). Jajeroviaiterei Jehová ohovasataha ko tembiapo ojejapóva oñeñangareko hag̃ua ñande istória rehe, ko mbaʼe ñanemoag̃uive ojuehe ha ñanemombarete jajapo hag̃ua Jehová rembipota.

[Taʼanga ha rrekuádro oĩva páhina 31-pe]

Ambue mbaʼe

Umi puvlikasión, DVD ha hetave informasión ojeprepara aja oñepresenta hag̃ua, umi ohaíva, artísta, umi oinvestigáva ha ambue, oñehaʼã ohesaʼỹijo umi archívo oĩva. Upévare Archivos de Redacción oñehaʼã ombyaty ha oñangareko umi mbaʼe oúva rehe sukursalkuéragui, umi departaménto oĩva Betélpe, kongregasionkuéra, umi institusión ha ambue tapichágui. Jahechamína umi mbaʼe ojapóva:

Oñekonsegi ha oñehesaʼỹijo. Archivos de Redacción pyʼỹinte orresivi heta mbaʼe. Umíva apytépe umi família heta áñorema oservíva Jehovápe omeʼẽte térã oiporuka ambue mbaʼe. Koʼã mbaʼe oñehesaʼỹijo ha oñembojoja rupi ojuehe, jaikuaa porãve ñande istória ha umi ñande rapicha ohasavaʼekue.

Oñemohenda porã. Hetaiterei mbaʼe ningo oĩ pe Archivos de Redacciónpe, umíva apytépe orekómava 100 áño rasa. Oĩ diferénte lája, tuicháva ha michĩva, upévare oñemohenda porã vaʼerã ikatu hag̃uáicha pyaʼe ojetopa ojehechase vove.

Oñemyatyrõ ha oñeñangareko. Umi lívro ha umi mbaʼe ikatúva oñembyai rei oñemyatyrõ ha oñeñangareko hese. Upearã, umi dokuménto, fóto, osẽvaʼekue diáriope, pelíkula ha umi gravasión, oñembohasa komputadórape. Upéicha rupi ojeporúta vove ojehekántema komputadórape ha natekotevẽvéima ojepoko hese.

Oñembyaty ha oñeñongatu. Umi mbaʼe oñemoĩva pe archívope oñembyaty, oñemohenda porã ha oñeñangareko hese ani hag̃ua okañy térã ombyai chupe lus ha umeda. Oñemoñepyrũ peteĩ archívo komputadórape ikatu hag̃uáicha pyaʼe ojetopa umi mbaʼe porã ñande istória rehegua opytámava manduʼarã.

[Nóta oĩva taʼanga ndive páhina 32]

1) Kartél “Foto-Drama de la Creación” rehegua. 2) Registro de suscripciones. 3) Kóche iparlánteva. 4) Rrevísta Ñemañaha 15 de abril de 1912 ape. 5) Órden ojegueraha hag̃ua préso J. F. Rutherford-pe. 6) WBBR micrófono. 7) Fonógrafo. 8) Maletín lívro ryru. 9) Nóta ohaivaʼekue ermanokuéra. 10) Telegrama ojeguerahaukavaʼekue J. F. Rutherford-pe.