Ko yvy tuichakuére oĩ heta ermáno opredika kyreʼỹva tuicha hasýramo jepe. Péicha oiko Dalia rehe, oikóva Vilna, Lituániape.

Dalia oreko 35 áño rupi. Chupe ningo ojagarravaʼekue derrame cerebral, upévare onase guive ndoguatái ha noñeʼẽporãi. Upéicha rupi ifamiliakuéra añoite ontende umi mbaʼe heʼíva. Dalia oiko isy Galina ndive, oñangarekóva hese. Ohasáramo jepe hetaiterei mbaʼe ijetuʼu ha oipyʼapýva chupe, Dalia akóinte ikyreʼỹ. Mbaʼéicha rupi piko upéva?

Isy omombeʼu: “Áño 1999-pe, che príma Apolonija orevisita, haʼe ningo testigo de Jehová. Rohechakuaa oikuaaitereiha umi mbaʼe omboʼéva la Biblia. Dalia heta mbaʼe oporandu chupe ha upéi oñepyrũma ostudia. Sapyʼánte aguapými hendivekuéra amombeʼu hag̃ua che prímape mbaʼépa heʼi che memby. Ahechávo oipytyvõitereiha chupe umi mbaʼe oaprendéva, amo ipahápe che avei astudia la Biblia”.

Ontendevévo mbaʼépa omboʼe la Biblia, oĩ peteĩ mbaʼe Dalia oikuaaséva ha oipyʼapýva chupe, upévare oporandu Apoloníjape: “Che ningo tuicha cherasy, mbaʼéichapa ikatúta apredika?” (Mat. 28:19, 20). Haʼe ombopyʼaguapy chupe heʼívo: “Ani rekyhyje; Jehová nepytyvõta”. Ha upeichaite ningo oiko.

Mbaʼéichapa Dalia opredika? Heta hendáicha, pór ehémplo omog̃uahẽ hapichakuérape pe marandu porã kárta rupive. Upearã oipytyvõ chupe ermanakuéra ohaívo umi mbaʼe haʼe heʼíva. Avei opredika omondóvo mensáhe iteléfono rupive. Tiémpo porã jave katu, ermanokuéra kongregasionpegua ogueraha chupe kálle ha plasaha rupi opredika hag̃ua.

Dalia ha isy oñakãrapuʼã porã ha ojevautisa noviembre 2004-pe. Upe rire, áño 2008-pe oñepyrũ Vílnape peteĩ grúpo oñeʼẽva polákope ha odesidi oho hikuái oipytyvõ hag̃ua upépe. Ko ermána ojehayhuetéva heʼi: “Oĩ més ajepyʼapyetereiha ndaikatúi haguére gueteri asẽ predikasiónpe. Péro añemboʼe Jehovápe ha katuete oĩ heʼíva chéve amoirũ hag̃ua chupe”. Mbaʼéichapa Dalia oñeñandu ohasa rupi koʼã mbaʼére? Haʼe heʼi: “Che mbaʼasy ningo ombyai che rete, péro che akã nahániri. Avyʼaiterei ikatu haguére añeʼẽ Jehová rehe che rapichakuérape”.