Ikatu revyʼa, jepe nderasykatu

EPENSAMÍNA peteĩ árape repáyvo reñeñandu vaietereiha térã nderasykatuha, ha reipotántema opa jey upe día oñepyrũ mboyve voi. Ikatu reñeñandu Job oñeñandu haguéicha, haʼe heʼivaʼekue: ‘Iporãve amano mbaʼe, péicha ahasa asy rangue’ (Job 7:15). Ha mbaʼépa ikatu oiko upe situasión ipukuetereíramo?

Upéva ohasavaʼekue Mefibóset, Jonatán raʼy. Orekórõ guare cinco áño ‘hoʼa ha opyta ikarẽ’ (2 Sam. 4:4). Tiémpo rire ojeʼe hese otraisiona hague itúva amígo rréi Davídpe ha ojepeʼapalénto chugui umi mbaʼe orekóva, ha upéva oiméne omoñeñandu vaivéntema chupe. Upéicharõ jepe, haʼe akóinte ovyʼa ha oheja ñandéve peteĩ ehémplo porã ombohováivo imbaʼasy, umi japu ojeʼéva hese ha ambue mbaʼe vai ohasáva (2 Sam. 9:6-10; 16:1-4; 19:24-30).

Apóstol Pablo avei oheja ñandéve ehémplo neporãva, peteĩ jey ohaivaʼekue ‘orekoha peteĩ ñuatĩ oikutu ha ombohasa asýva chupe’ (2 Cor. 12:7). Upe “ñuatĩ” ningo oiméne peteĩ mbaʼasy aréma orekóva térã umi mbaʼe vai ojeʼéva hese apóstol haguére. Tahaʼe haʼeháicha, upe provléma noñesolusionái ha upévare ogueropuʼakámante imbaʼasy térã hemimbyasy oikove aja pukukue (2 Cor. 12:9, 10).

Umi mbaʼasy naipohãiva ha oporomokangýva ombohasa asy avei Ñandejára rembiguaikuérape. Pór ehémplo, Magdalena orekórõ guare 18 áño umi doktór heʼi chupe orekoha lupus eritematoso sistémico, peteĩ mbaʼasy ohundíva ohóvo ñande retepy. Haʼe omombeʼu: “Akyhyjeterei ningo kuri, ha a más día cherasykatuve; añepyrũ cheprovléma che pyʼápe, che juruñembyaipa ha nombaʼapoporãvéi che tiroide”. Izabela ohasáva katu idiferénte, ndojekuaaguasúigui hese imbaʼasy. Haʼe omombeʼu: “Chemitã guive aguereko depresión. Upéicha rupi sapyʼánte akyhyjeterei, ndarrespiraporãi ha chembopyʼahasyete. Ha koʼã mbaʼe chemokaneʼõiterei jepi”.

Jahechakuaa mbaʼe situasiónpepa ñaime

Opaichagua mbaʼasy ikatu ñandeguereko asy ha ñanemyangekói. Oiméramo ñañeñandu upéicha, iporãta jaguapy ha jajepyʼamongeta ñane situasiónre. Sapyʼánte ijetuʼu jahechakuaa hag̃ua ndaikatumoʼãveimaha jajapo heta mbaʼe. Magdalena heʼi: “Che provléma ningo ivaive ohóvo. Pyʼỹinte chekangyeterei ha ndaikatúi ni apuʼã che rupágui. Che mbaʼasy ndahiʼórai, upéicha rupi ndaikatúi añekompromete mbaʼevépe. Ha añeñandu vaivéntema ndaikatúi haguére ajapo heta mbaʼe Jehová servísiope yma guaréicha”.

Zbigniew omombeʼu: “A más día pe artritis reumatoide chembopilaʼive ha ombyai ohóvo umi che kangue ojoajuha, sapyʼánte irurupa jave mbaʼevete voi ndaikatúi ajapo. Ha upéva chemoñeñandu vaieterei”.

 Ndaʼareguasúi umi doktór heʼi Bárbarape orekoha tumor cerebral progresivo. Haʼe omombeʼu: “Sapyʼánte aime porãháguinte añeñandu vaiete jey. Chekangypa, pyʼỹi cheakãrasy ha ndaikatúi añatende are mbaʼevére. Upéi ahechakuaa ndaikatumoʼãveimaha ajapo heta mbaʼe, upévare akambiámante heta mbaʼe che rekovépe”.

Koʼã ehémplo ningo Jehová rembiguaikuéra rembiasakue ohechaukáva iñimportanteveha chupekuéra ojapo Hembipota. Ojerovia hikuái ipyʼaite guive Ñandejárare ha upévare Haʼe oipytyvõ chupekuéra (Pro. 3:5, 6).

Mbaʼéichapa Jehová oporopytyvõ?

Aníkena ñapensa ñanderasyha ñaime vai rupi Ñandejára renondépe (Lam. 3:33). Ñanemanduʼavaʼerã mbaʼeichaitépa Job ohasa asy vaʼekue, ‘hekoporã ha hekopotĩramo’ jepe (Job 1:8). Ñandejára ningo ndojapói mbaʼe vai oporombohasa asy hag̃ua (Sant. 1:13). Opaichagua mbaʼasy, tahaʼe umi ndaikatúiva oñemonguera térã depresión, oheja ñandéve ñande ru ha ñande sy ypykue, Adán ha Eva (Rom. 5:12).

Jehová ha Jesús arakaʼeve ndohejareimoʼãi umi hekojojávape (Sal. 34:15). Jahasa jave umi mbaʼe ijetuʼúva jahecha porãvéntema Ñandejára ñanepytyvõ ha oñangarekoha ñanderehe (Sal. 91:2). Upéicharõ, mbaʼépa ñanepytyvõta akóinte javyʼa hag̃ua jarekóramo jepe peteĩ mbaʼasy ndokueraséiva?

Ñañemboʼevaʼerã: Ojapo haguéicha Ñandejára siervokuéra yma guare, ñande avei jahejavaʼerã ñande Ru yvagapegua pópe umi mbaʼe ñandepyʼapýva (Sal. 55:22). Jajapóramo upéicha ‘Ñandejára omeʼẽta ñandéve ipyʼaguapy tuichavéva opa ikatu vaʼerãgui ñahaʼarõ’. Ha pe pyʼaguapy ‘oñangarekóta ñande pyʼapy ha ñane remiandúre’ (Fili. 4:6, 7). Magdalena ogueropuʼaka peteĩ mbaʼasy ijetuʼúva oñemboʼe rupi ipyʼaite guive Ñandejárape. Haʼe heʼi: “Amombeʼupaite rupi Jehovápe chepyʼapýva, añeñandu porãve ha avyʼa jey. Koʼág̃a ae antende porã mbaʼépa heʼise ñadepende Jehováre káda día” (2 Cor. 1:3, 4).

Jehová ikatu ombohovái ñandéve ñane ñemboʼe ijespíritu sánto, Iñeʼẽ ha ermanokuéra  rupive. Ha ndojapóirõ jepe peteĩ milágro ñanemonguera hag̃ua, ikatu ñanemoarandu ha ñanemombarete ñambohovaikuaa hag̃ua opaichagua situasión ijetuʼúva (Pro. 2:7). Ñandejára Ñeʼẽ heʼi voi omeʼẽtaha ñandéve pe ‘puʼaka tuichavéva yvypóra puʼakágui’ (2 Cor. 4:7).

Ñane hentekuéra: Oĩrõ mborayhu ha pyʼaguapy ñande rogapýpe ikatúta jagueropuʼaka peteĩ mbaʼasy. Ha ñane hentekuéra oĩramo jepe ñanepytyvõ hag̃uáicha ijetuʼuve jave, ñanemanduʼavaʼerã haʼekuéra ohasa asyha avei ha ikatuha oñeñandu vai ñandéicha. Upévare ñañemboʼérõ oñondivepa oĩta pyʼaguapy ñande rogapýpe (Pro. 14:30).

Barbara heʼi imembykuñanguéra ha ambue mitãkuña ikongregasionguáre: “Haʼekuéra katuete chepytyvõ asẽ hag̃ua predikasiónpe. Ikyreʼỹ rupi hikuái chembopyʼarory”. Zbigniew omombaʼeterei oipytyvõ haguére chupe hembireko, ha heʼi: “Che rembireko ojapopalénto umi tembiapo ogapypegua. Avei chepytyvõ añemonde hag̃ua, ha ogueraha chéve che kartéra roho jave rreunionhápe ha predikasiónpe”.

Ermanokuéra: Jajeheʼáramo umi ermánore ñanemokyreʼỹ ha ñanekonsoláta. Péro mbaʼépa oiko peteĩ ermáno hasýva ndaikatúiramo oho rreunionhápe? Magdalena omombeʼu: “Kongregasiónpe ojegrava chéve umi rreunión chepytyvõ hag̃ua. Avei umi ermáno oho jepi chevisita ohecha hag̃ua mbaʼépa ikatu ojapo cherehehápe, ha ombou jepi chéve kárta chemokyreʼỹva. Aikuaávo imanduʼa ha ojepyʼapyha cherehe hikuái chepytyvõ agueropuʼaka hag̃ua che mbaʼasy”.

Izabela omombeʼu: “Kongregasiónpe areko heta sy ha túva cherendu ha chentendéva. Umi ermáno ningo che família, hendivekuéra chepyʼaguapy ha avyʼa”.

Umi ohasáva situasión ijetuʼúva noñemohaʼeñoivaʼerã, síno oñehaʼãvaʼerã oho meme rreunionhápe (Pro. 18:1). Péicha ojapóramo tuichaiterei omokyreʼỹta hapichakuérape. Ñepyrũrã pe hasýva ikatu otĩ omombeʼu hag̃ua umi mbaʼe oikotevẽva. Péro umi ermáno  ovyʼáta omombeʼu porãramo chupekuéra, ikatu hag̃uáicha oipytyvõ chupe ‘mborayhúpe ha tovamokõiʼỹre’ (1 Ped. 1:22). Oimérõ nde rehasareína upe situasión, mbaʼére piko neremombeʼúi ermanokuérape reikotevẽtaha ndeguerahavaʼerã rreunionhápe, resẽseha hendivekuéra predikasiónpe térã remombeʼuseha chupekuéra umi mbaʼe ndepyʼapýva? Nemanduʼavaʼerã avei ndovaleiha rejopyeterei ermanokuérandi, síno reagradesevaʼerã chupekuéra nepytyvõ haguére.

Ñapensákena iporãvare: Ñanderehénte odepende jagueropuʼaka hag̃ua vyʼápe umi mbaʼasy okueraʼỹva. Ñañembyasy ha jajepyʼapyetereíramo ikatúma ñapensa vaipa ha ndajahechavéi mbaʼeve iporãva. La Biblia heʼi: ‘Pe ipyʼaguasúva ipuʼaka imbaʼasy rehe, péro mávapa ikatu oipytyvõ ipyʼakangývape?’ (Pro. 18:14, ÑÑB).

Magdalena omombeʼu: “Ajapo opa ikatúva pono apensaiterei che provlémare, ha añehaʼã avyʼa añeñandu porãmi jave. Avei alee jepi umi ermáno hasy vaíva rembiasakue oñehaʼãva iñeʼẽrendu Ñandejárape, ha upéva chemokyreʼỹeterei”. Izabela katu imbarete oikuaávo Jehová ohayhu ha omombaʼeha chupe. Haʼe omombeʼu: “Ahechakuaa ikatuha aipytyvõ hetápe aservívo Jehovápe, ha upéva chemokyreʼỹ asegi hag̃ua aikove. Avei areko peteĩ esperánsa iporãitereíva che renonderãme”.

Zbigniew heʼi: “Areko guive ko mbaʼasy ahechakuaa tekotevẽha añemomirĩ, cheñeʼẽrendu, chearandu, cheakãguapy ha avei aporoperdonavaʼerãha che pyʼaite guive. Vyʼápe aservi Ñandejárape ha ndaikói añembyasy, ha chekyreʼỹ voi katu añakãrapuʼãve hag̃ua Jehová servísiope”.

Aníkena nderesarái Jehová oikuaaha opa mbaʼe rehasáva ha ndeporiahuverekoha. Nemanduʼákena: ‘Ñandejára ningo hekojoja ha ndahesaraimoʼãi umi rejapovaʼekuégui ha mborayhu rehechaukavaʼekue héra rehehápe’ (Heb. 6:10). Ejeroviákena ko promésa ojapóvare umi omombaʼévape chupe: ‘Arakaʼeve ndorohejamoʼãi ha arakaʼeve noromotyreʼỹmoʼãi’ (Heb. 13:5, ÑÑB).

Ha peichahágui nderevyʼavéiramo, rejepyʼamongetantevaʼerã mbaʼéichapa reikóta ág̃a múndo pyahúpe. Koʼẽrõitéma ningo ndete rehecháta umi mbaʼe porã oguerútava Ñandejára Rréino ko yvy ape ári.

[Taʼanga ha rrekuádro oĩva páhina 28-pe]

Akóinte opredika hasykatúramo jepe

“Ndaikatuvéima aiko cheaño kállere, upévare che rembireko térã peteĩ ermáno chemoirũ predikasiónpe. Aikuaa de memória umi téysto ha mbaʼépa haʼéta apredika jave.” (Jerzy, ndohechavéimava.)

“Apredika jepi pór teléfono, avei pór kárta ha askrivi meme umi oikuaasevévape la Bíbliagui. Añeinterna jave katu aheja che rupa ykére peteĩ Biblia ha puvlikasión. Upéva heta vésema chepytyvõ añemongeta hag̃ua che rapichakuérandi.” (Magdalena, orekóva lupus eritematoso sistémico.)

“Avyʼa ningo apredika jave ogahárupi, péro nañeñanduporãi jave, aiporu teléfono apredika hag̃ua.” (Izabela,orekóva depresión.)

“Avyʼa ajapo jave rrevisíta ha amoirũvo umi ermánope ojapo hag̃ua ijestúdio. Ha añeñandu porãve jave, aha apredika ogahárupi.” (Barbara, orekóva tumor cerebral.)

“Agueraha peteĩ rrevísta ryru ivevyimíva. Ha asegi apredika agueropuʼakaha peve.” (Zbigniew, orekóva artritis reumatoide.)

[Nóta oĩva taʼanga ndive páhina 30]

Umi imitãva ha ijedáva ikatu oporomokyreʼỹ