Oñeguenohẽ Ñemañaha ingléspe ndahasýiva oñentende

ROVYʼAITEREI roikuaaukávo peẽme osẽtaha avei peteĩ rrevísta ingléspe ndahasýiva oñentende 15 de julio 2011 guive, péva ojeprováta un áño aja. Orekopaitéta umi artíkulo oñehesaʼỹijótava rreunionhápe ha ijáramo oñemoĩvéta avei pype ambue artíkulo. Mbaʼépa ojehupytyse ko rrevísta rupive? Oñepytyvõse heta testigos de Jehovápe oikumby porã hag̃ua pe tembiʼu Jehová omeʼẽva hiʼoraitépe.

Pór ehémplo Fiyi, Ghana, Kenia, Liberia, Nigeria, Papúa Nueva Guinea ha umi ísla Salomón-pe oñeñeʼẽve ingléspe. Ha ñane ermanokuéra oikóva upérupi ojapo umi rreunión ha opredika upe idiómape, hogapekuéra oñeʼẽramo jepe ambue idióma. Pe inglés oiporúva ñane puvlikasionkuéra sapyʼánte oiporu umi ñeʼẽ hasýva ontende hag̃ua umi ermáno. Oĩ avei heta ermáno ndoikóiva hetãme, upévare oñeʼẽmantevaʼerã ingléspe, jepe noñeʼẽporãi upe idióma. Ha ijetuʼuveha oĩ heta ermáno ndaikatúiva oñembyaty peteĩ kongregasión oĩvape iñeʼẽtépe.

Jaikuaaháicha, Ñemañaha haʼe pe mbaʼe iñimportantevéva Jehová oiporúva omeʼẽ hag̃ua ñandéve pe tembiʼu hiʼoraitépe. Upévare ojejapo peteĩ rrevísta oiporúva umi ñeʼẽ ndahasýiva oñentende, ikatu hag̃uáicha oipytyvõ opavave ñane ermánope oñeʼẽva inglés. Umi mbaʼe osẽtava ijapére idiferénteta, péro umi subtítulo, párrafo, porandu, rrekuádro ha taʼanga oĩva hyepýpe nokambiamoʼãi. Upéicha káda ermáno odesidíta mbaʼe rrevístapa oiporúta Ñemañaha Ñehesaʼỹijo jave. Oiméramo nde reñeʼẽ inglés, rehechasépa mbaʼe diferénsiapa oreko? Ko páhinape iguyetépe oĩ peteĩ ehémplo oñeguenohẽva pe primer artíkulo segundo párrafogui.

Heta ermáno ojerure Jehovápe: “Chemoarandu ha chemboʼemína umi ne Ñeʼẽ” (Sal. 119:73, S). Katuete ko rrevísta hetaitereípe oipytyvõta. Rojeroviaiterei oipytyvõtaha umi imitãvape ha umi noñeʼẽporãivape inglés ojeprepara porãve hag̃ua Ñemañaha Ñehesaʼỹijorã. Aguyjémante ndéve Jehová ‘rehayhu haguére ermanokuérape’ ha remeʼẽ haguére tembiʼu pe ‘tembiguái jeroviaha ha iñarandúva’ rupive! (1 Ped. 2:17; Mat. 24:45.)

Cuerpo Gobernante de los Testigos de Jehová