Ñañehaʼãramo katuete javyʼáta

TUVAKUÉRA ojapomantevaʼerã pe Aty Jastudia Hag̃ua Ñande Rogayguándi, ‘omongakuaa ha ohekomboʼe hag̃ua ifamíliape Ñandejára oipotaháicha’ (Efe. 6:4). Péro jaikuaa umi mitã sapyʼaitépe ikueraiha, mbaʼépa ikatu ojapo upéicharõ tuvakuéra umi mitã oñatendeve hag̃ua? Jahechamína ojapóva mokõi família Estados Unidosgua.

George, Californiagua heʼi: “Che rembirekóndi roñehaʼãmbaite rostudia ore famíliandi igústo hag̃uáicha. Sapyʼánte roñemondémi umi hénte yma guaréicha rohechauka hag̃ua heʼíva pe lívro Istória oĩva Ñandejára Ñeʼẽme. Upearã rojapómi espáda guaʼu, ajaka ha ambue mbaʼe. Avei rohuga hag̃ua, peteĩva ohaʼanga Jehová siérvo yma guarépe ha umi ótro heʼi mávapepa oñehaʼanga. Avei roporandu ojupe heta mbaʼe oĩva la Bíbliape ha ogana upe hetave ombohovái porãva. Rojapo avei kartóngui pe árka de Noé, térã rohai mbaʼe áñopepa oikovaʼekue umi istória oĩva la Bíbliape. Rodivuha Jehová siervokuéra raʼanga ha umi mbaʼe roleéva Iñeʼẽme. Koʼág̃a rodivuhasehína pe armadúra omombeʼúva Efesios 6:11-17, upéi káda uno omombeʼúta mbaʼépa heʼise peteĩ párte. Koʼã mbaʼe tuicha orepytyvõ igustove hag̃ua ore estúdio”.

Debi oikóva Míchiganpe, heʼi: “Che membykuñaʼi orekórõ guare 3 áño, noñatendeseivaʼekue orerehe romboʼe jave chupe. Péro peteĩ jey alee aja chupe Isaac ha Rebeca káso ajagarra mokõi muñéko ha haʼe chupe peteĩ haʼeha Rebeca ha pe ótro Isaac. Upépe katu oñatende porãvéma cherehe! Upe guive pyʼỹi aiporu koʼã muñéko, ha aleepa riremi chupe peteĩ istória haʼe odiparáma oheka ihugetekuéra térã ambue mbaʼe ikatúva aiporu aleévo chupe ambue istória. Ojeporekángo hese ohekaramoguáicha pláta yvyguy! Chemanduʼa peteĩ jey roiporu hague sapatu ryrukue ha peteĩ kordón pytã, rorrepresenta hag̃ua Rahab róga ha pe pióla oñemosaingóva iventánare. Avei rolia typycha ývare peteĩ mbói guaʼu orekóva un métro rasa, rorrepresenta hag̃ua pe mbói ojejapovaʼekue kóvregui omombeʼúva Números 21:4-9. Opa mbaʼe roiporúva roñongatupa peteĩ vosa lónape. Che ménandi ropuka jepi hese rohechávo ojeporekaha pe vosápe ihugetekuérare ha oñepyrũ omombeʼu umi istória haʼe oikuaamiháichante”.

Mitã ñemongakuaa ningo ijetuʼuhína. Upévare pyʼỹi pembostudiavaʼerã chupekuéra, ndahaʼéi káda semánante. Péicha pepokóta ikorasõre ha haʼekuéra oserviséta Jehovápe ipyʼaite guive. Pestudiáramo pende rogayguándi peipytyvõta chupekuéra, péro oĩ gueteri heta mbaʼe ikatúva pejapo oñakãrapuʼãve hag̃ua hikuái Jehová servísiope.