Akóinte cherembiapo heta Jehová organisasiónpe

Omombeʼu Vernon Zubko

AKAKUAA kampáñape namombyrýi Stenen-gui peteĩ puévlo oĩva Saskatchewan-pe (Canadá). Che ermána ypykue héra Aurellia ha umi che ermáno imitãvéva katu Alvin, Allegra ha Daryl. Che tuvakuéra Fred ha Adella oñehaʼãmbaitevaʼekue orepytyvõ roñemoag̃ui hag̃ua Jehováre ha omoĩ hag̃ua oréve ore remikotevẽ. Koʼág̃a peve roagradese chupekuéra orerekomboʼe haguére Ñandejára rapére.

Che ru ningo unhído vaʼekue ha opredikámi kyhyjeʼỹme. Ombaʼápo jejopymivaʼerã oremantene hag̃ua ha oikuaauka opavavépe haʼe Testigoha. Haʼe katuete omombeʼu mbaʼépa Ñandejára rembipota. Tuichaiterei chepytyvõ ahechávo mbaʼeichaitépa ohayhu Jehovápe ha ipyʼaguasu ojapo hag̃ua hembipota. Haʼe heʼími chéve: “Akóinte ne rembiapo hetáramo Jehová organisasiónpe, heta provlémagui rejeíta”.

Pyʼỹinte ropredika Stenen kállere ha umi lugár oĩvape ijerére. Péro chéve ijetuʼu jepi upéva, oĩgui káda puévlope umi oñembohorýva ore imitãvéva rehe. Peteĩ jey, arekórõ guare ocho áño añemboʼy jave peteĩ eskínape aikuaveʼẽ hag̃ua La Atalaya ha ¡Despertad! ou chéve una partída mitãrusu. Oipeʼa hikuái chehegui che sombréro pyahu ha omoĩ peteĩ póste akãre. Haʼetépe peteĩ ermáno oñatendevahína cherehe ohecha mbaʼépa oiko ha ou oporandu chéve: “Vern, mbaʼépa ojapo nderehe hikuái?”. Pyaʼéko umi mitãrusu okañymba upégui. Ha ndaigústoiramo jepe upe ahasavaʼekue, chemboʼe apredika jave kállere ndapytaivaʼerãha pósteicha peteĩ hendápe. Umi mbaʼe ahasavaʼekue chemitãme chembopyʼaguasu ikatu hag̃uáicha apredika ogaha rupi.

Che ermáno Alvin ndive rojevautisa mayo 1951-pe, arekórõ guare 13 áño. Upérõ Jack Nathan ojapo pe diskúrso de vautísmo, ha oremokyreʼỹ ani hag̃ua roheja ohasa un més jepe roñeʼẽʼỹre Jehováre. * Ore famíliape ningo romombaʼeterei pe prekursorádo ha ropensa voi iporãveha opa mbaʼégui. Upévare 1958-pe amohuʼã rire che koléhio, ava Winnipeg-pe (Manitoba) ajapo hag̃ua che prekursorádo. Che ru ningo ovyʼa ambaʼapo haguére hendive. Péro haʼe ha che sy akóinte chemokyreʼỹvaʼekue ajapo hag̃ua prekursorádo ha ovyʼa hikuái adesidi haguére ava upearã.

Ava ha ajuhu che irũrãmi

Pe áño 1959-pe ojejerure voluntário oho hag̃ua opredika Quebec-pe. Upémarõ che  aha upépe ha aservi de prekursór Montreal-pe. Upéva ijetuʼuvaʼekue chéve tekotevẽgui aaprende francés ha ajepokuaa heta mbaʼére. Tuicha chepytyvõ peteĩ superintendénte heʼivaʼekue chéve: “Aníkena ere: ‘Che aiko haguépe ndojejapói péicha’” (1 Cor. 9:22, 23).

Ag̃uahẽrõ guare Quebec-pe, cheañoite ajapovaʼekue che prekursorádo. Péro febrero de 1961-pe ajuhu che irũrãmi, amenda Shirley Turcotte rehe, ko kuñataĩme aikuaavaʼekue Winnipeg-pe. Haʼe ha ihentekuéra ohayhu avei Jehovápe. Upérõ naimoʼãivaʼekue mbaʼeichaite pevépa chemombarete ha chepytyvõta.

Roho ropredika heta hendápe

Dos áño romenda haguépe roñenombra prekursór espesiál ha roho roservi Rimouski-pe (Quebec). Oikévo primavéra, sukursál heʼi oréve roho hag̃ua ropredika peteĩ lugár héravape Gaspé, opytáva kuarahy resẽ gotyo Canadápe. Ore romyasãivaʼerã pe marandu porã ikatuhápe guive rog̃uahẽ (Ecl. 11:6). Rokarga ore kóchepe mil rrevísta ha cuatrociento lívro rupi, ore rembiʼurã ha ore aokuéra, ha rojeʼói ropredika hag̃uáicha un més. Ha ropredika rohóvo umi puevloʼi uperupiguápe. Peteĩ rrádio upepegua oavisa og̃uahẽha testigokuéra ha heʼi umi héntepe ani hag̃ua ojagarra ipuvlikasionkuéra. Péro umi hénte ontende vai pe notísia, ha oimoʼã pe rrádio omopropagandaha ñane puvlikasionkuéra ha upévare ohejajoaite hikuái umi lívro ha rrevísta.

Upe tiémpope heta hendápe Quebec-pe oñepermitiramo testigokuérape opredika, upévare sapyʼánte orejoko umi polisía. Ha upéicha oiko orerehe ropredika jave peteĩ távape, upépe haimete káda ógape roheja rohóvo puvlikasión, ha upeichahágui ou peteĩ polisía ha heʼi oréve roho hag̃ua hendive komisaríape, ha rohómante. Oiko upéva pe avogádo upe tavapegua oguenohẽ rupi peteĩ órden anive hag̃ua ropredika. Péro upe árape ndaipóri umi polisiakuéra ruvicha, upémaramo ahechauka pe avogádope peteĩ dokuménto rogueruvaʼekue sukursálgui oĩva Toronto-pe, upe dokuménto omyesakã rorekoha derécho ropredikávo. Olee ha upéi heʼi: “Che nacheprovlemaséi, pe paʼi la heʼíva chéve ajapo hag̃ua”. Roipotágui umi hénte ohechakuaa ore predikasión ndojeproiviriha, roho jey pe polisía orejoko haguetépe ha rosegi ropredika.

Upéi pe ótro día roho jey roñeʼẽ hag̃ua umi polisía ruvichándi, haʼe katu ipochyeterei upe oikovaʼekuére ha ohenói teléfonope pe avogádope ha ojaʼo porã chupe. Upéi heʼi oréve oĩ jeýrõ oremolestáva rohenóinte hag̃ua chupe ha haʼete ohotaha ohecha. Noroiméiramo jepe orevállepe ha apenaite roñeʼẽ francés, umi hénte imbaʼeporã ha oreguerohory. Upéicharõ jepe roñeporandu: “Og̃uahẽnepa pe ára oservívo hikuái Jehovápe?”. Heta áño rire roho jey roipytyvõ oñemopuʼã hag̃ua Salón del Reino upe lugárpe, ha rotopa heta hénte ropredikavaʼekuépe oiko hague chuguikuéra testígo. Añetehápe Jehová haʼe pe ‘omongakuaavaʼekue’ ijeroviakuéra (1 Cor. 3:6, 7).

Jehová omeʼẽ oréve peteĩ jopói

Che rajy Lisa onase 1970-pe. Haʼe ningo peteĩ jopói Jehová omeʼẽvaʼekue oréve ha rovyʼaiterei heseve. Shirley ha Lisa ombaʼapovaʼekue chendive romopuʼã hag̃ua heta Salón del Reino. Lisa omohuʼãrõ guare ikoléhio heʼi oréve: “Peẽ pehejavaʼekue pende prekursorádo cherehehápe, upévare che koʼág̃a adesidi ajapóvo che prekursorádo”. Veinte áño haguépe, Lisa osegi gueteri iprekursorádo, koʼág̃a katu iména Sylvain ndive. Haʼekuéra ohóma oñondive ombaʼapo konstruksiónpe tetã ambuépe. Ha ikatu hag̃uáicha rojapo hetave mbaʼe Jehová servísiope,  che ha che rogayguakuéra roñehaʼã rohupyty roikotevẽmívante. Ndacheresaráiriva Lisa heʼivaʼekuégui omoñepyrũrõ guare iprekursorádo. Añetehápe haʼe chemokyreʼỹ ajapo jey hag̃ua che prekursorádo 2001 guive ha asegi koʼag̃aite peve. Pe prekursorádo chepytyvõ akóinte ajerovia hag̃ua Jehováre opa mbaʼe ajapóvape, ha aiko hag̃ua vyʼápe umi mbaʼe arekomívarente.

Tekotevẽ japorohayhu, jajerovia ojuehe ha ñaneñeʼẽrendu

Che ahechakuaa Jehová omeʼẽha heta mbaʼe porã umi oĩvape oservi hag̃uáicha chupe haʼe oipotahápe. Amombaʼeterei ikatu haguére ambaʼapo Comité Regional de Construcción-pe, ha aipytyvõ ermanokuérape omopuʼã hag̃ua umi salón Quebec-pe ha ambue hendápe.

Umi ermáno ombaʼapóva oñemopuʼã hag̃ua salón, ikatu ndaikatupyrýi ojapo hag̃ua diskúrso, péro ivaleterei konstruksiónpe. Koʼã ermáno oñehaʼãmbaite ojapo hag̃ua hekopete hembiapo, ha ojekuaa hesekuéra ikatupyryha. Péicha Jehová ojokuái chupekuéra omopuʼã hag̃ua umi salón neporãva oñemombaʼeguasu hag̃ua chupe.

Sapyʼánte oĩ oporandúva chéve: “Mbaʼépa oñehaʼãrõ umi ombaʼapóvagui oñemopuʼã hag̃ua Salón del Reino?”. Umi mbaʼe ahasavaʼekuére ikatu haʼe tekotevẽha ohayhu Jehovápe, Jesúspe ha entéro ermanokuérape (1 Cor. 16:14). Tekotevẽ avei ojerovia ha iñeʼẽrendu. Ohecha jave oiko umi mbaʼe chupe ndogustáiva tekotevẽta osegi ojepytaso Jehová organisasión ykére. Ha iñeʼẽrendúramo ikyreʼỹta oipytyvõ jey hag̃ua ambue konstruksiónpe.

Aagradese Jehovápe

Che ru omano 1985-pe, péro koʼág̃a peve chemanduʼa heʼi hague chéve che rembiapo heta hag̃ua Jehová organisasiónpe. Che ru oiméne koʼág̃a peve ambue unhídoicha heta hembiapo yvágape (Rev. 14:13). Che sy katu orekóma 97 áño, ha orekógui apoplejía ndaikatuvéima oñeʼẽ porã. Péro ndahesaráiri la Biblia heʼívagui. Umi kárta ohaívape omoĩ umi téysto ha katuete oremokyreʼỹ rosegi hag̃ua roservi Jehovápe. Añetehápe rovyʼaiterei che ermanokuérandi roguereko haguére peichagua sy ha túva orerayhúva.

Aagradese avei Jehovápe omeʼẽ haguére chéve Shirley cheirũrãmi. Haʼe ndahesaráiri pe konsého omeʼẽvaʼekuégui chupe isy: “Ne ména Vern heta hembiapóta kongregasiónpe, ha ani repensa ndejehénte, rehejavaʼerã katu chupe oipytyvõ ermanokuérape”. Ojapóma cuarenta y nueve áño romenda hague, upérõ roʼevaʼekue ojupe oreg̃uaig̃ui ha oretuja peve roservitaha Jehovápe oñondive. Péro rohasáramo Ñandejára múndo pyahúpe, oremitã jeytaha oñondive ha rosegitaha roservi Jehovápe opa árare. Upévare ikatu haʼe roiporuha ore rekove ‘rombaʼapo kyreʼỹ hag̃ua Ñandejárape g̃uarã’ (1 Cor. 15:58). Ha Jehová akóinte oñangareko orerehe ha arakaʼeve ndohejái ofalta oréve mbaʼeve.

[Nóta]

[Nóta oĩva taʼanga ndive páhina 31]

“Ikatu hag̃uáicha rojapo hetave mbaʼe Jehová servísiope, che ha che rogayguakuéra roñehaʼã rohupyty roikotevẽmívante”