Oñeporandúva jepi

Mbaʼére piko Ezequiel 18:20 heʼi ‘peteĩ taʼýra ndopagamoʼãiha itúva rembiapo vaikuére’, ha Éxodo 20:5 katu heʼi Jehová ‘okastigataha taʼyrakuérape ituvakuéra hembiapo vai rupi’?

Ojoavýpa koʼã téysto? Nahániri. Upe ojehaíva Ezequiélpe ohechaukánte káda uno jajechataha Jehovándi opa mbaʼe jajapóvare. Ha Éxodope ojehaíva katu ohechauka peteĩ tapicha hembiapo vaíramo ojapo vaiha avei iñemoñarére.

Ezequiel kapítulo 18-pe oñeñeʼẽ umi mbaʼe káda uno japagavaʼerãre. Pór ehémplo versíkulo 4-pe heʼi: ‘Yvypóra hembiapo vaíva omanóne’. Péro upe rire heʼi avei “imarangatúva ojapóramo hekojojáva ha hekopeguáva [...] nomanomoʼãi” (Eze. 18:​5, 9). Upéicharõ opavave oikuaáva mbaʼépa oĩ porã ha mbaʼépa oĩ vai, oñembojovakéta Jehovándi “hembiapo ojerureháicha” (Eze. 18:30).

Upe oikovaʼekue Coré rehe omyesakãve ñandéve ojehaíva Ezequiélpe. Haʼe ningo Leví trivuygua ha oiko aja hikuái pe desiértore noñekontentái upe tembiapo ojapóvare Jehovápe g̃uarã, ha ojapose umi mbaʼe saserdotekuéra ojapóva. Upémarõ haʼe ha heta Isrraelíta opuʼã Moisés ha Aarón kóntrape, hiʼarive Jehová voi oiporavo chupekuéra. Upévare  Coré ha umi omoirũva chupe omanombaite (Núm. 16:​8-11, 31-33). Péro Coré raʼykuéra nomoirũi chupe, upévare ndopagái hikuái itúva rembiapo vaikuére. Haʼekuéra iñeʼẽrendu Jehovápe ha ojesalva (Núm. 26:​10, 11).

Upéicharõ, mbaʼéichapa ñantendekuaa heʼíva Éxodo 20:5? Ko téysto ningo oĩ umi Diez Mandamiento apytépe, Jehová omeʼẽvaʼekue umi isrraelítape omoĩ rire iléi. Ha heʼipa rire mbaʼe mbaʼépa ojapovaʼerã, heʼi hikuái: “Rojapóta opa mbaʼe heʼíva [Jehová]” (Éxo. 19:​5-8). Upe guive haʼekuéra Jehová puévloma, upévare umi mbaʼe oĩva Éxodo 20:​5-pe ojeʼe tetã Israélpe.

Umi isrraelíta iñeʼẽrendu aja ou porã enterovépe ha Jehová ohovasa chupekuéra (Lev. 26:​3-8). Péro omboykérõ guare hikuái Jehovápe ha omombaʼeguasu umi taʼanga guaʼúpe Haʼe ipochyeterei ha noñangarekovéi hesekuéra, upéicha rupi heta ohasa asy hikuái (Jue. 2:​11-18). Péro oĩ avei iñeʼẽrendúva chupe ha oñehaʼãmbaitéva ojapo haʼe ojeruréva, ijetuʼúramo jepe (1 Rey. 19:​14, 18). Oimevaʼerã katuete ohasa asy koʼã iñeʼẽrendúva oiko rupi umi hénte heko añáva paʼũme, upéicharamo jepe Jehová ohechauka ohayhuha chupekuéra ha ipyʼaporã hendivekuéra.

Ko tetã ningo hembiapo vaieterei ha ambue tetãygua jepe ohechakuaa mbaʼeichaitépa omongyʼa hikuái Jehová réra, upévare Ñandejára oheja umi Babiloniaygua ogueraha chupekuéra hembiguairã. Katuete káda uno ohasa asy upe haguére ha oñondivepa avei (Jer. 52:​3-11, 27). La Biblia omombeʼu hembiapo vaieterei rupi koʼã isrraelíta ombohasa asy hague iñemoñarenguérape mbohapyha térã irundyha peve, heʼi hagueichaite Éxodo 20:5.

Ñandejára Ñeʼẽ avei ohechauka mbaʼéichapa hembiapo vai rupi umi família omoakãva operhudika iñemoñarenguérape. Pór ehémplo Elí, umi saserdóte ruvicha, oheja itaʼyrakuéra ombaʼapo saserdóteramo ‘heko aña ha heko kyʼárõ jepe’ (1 Sam. 2:​12-16, 22-25). Jehová ipochyeterei ohechávo mbaʼéichapa Elí omombaʼeve itaʼyrakuérape, upévare ndohejavéi Elí ñemoñarégui oiko saserdóte ruvicha. Ha upéva oñekumpli ojepeʼárõ guare ipuésto Abiatárgui, Elí tataraniéto (1 Sam. 2:​29-36; 1 Rey. 2:27). Guehazí káso avei omyesakãvéta ñandéve Éxodo 20:5 heʼíva. Haʼe ningo Eliseo rembiguái ha ohechárõ guare Jehová omonguera hague Naamánpe Eliseo rupive, ojevale ipuéstore oipeʼa hag̃ua Naamángui pláta ha ambue mbaʼe. Upévare Jehová ipochyeterei ha heʼi: ‘Pe kuru vai Naamán mbaʼekue ováta nderehe ha ne ñemoñarenguéra rehe opa ára g̃uarã’ (2 Rey. 5:​20-27). Jahechaháicha Guehazí ñemoñarenguéra ohasa asy avei haʼe hembiapo vai rupi.

Jehová ningo ñande Apohare ha tekove Meʼẽha, upévare haʼe oikuaa mbaʼéichapa ñandekorrehivaʼerã. Ha jaikuaa porã ojapotaha tekojojápe ha ñane rembiapo ojerureháicha. Umi ehémplo jahechavaʼekue ohechauka porã ñandéve umi túva hembiapo vai rupi ikatuha ifamília ha iñemoñarenguéra ohasa asy. Péro jaikuaa avei Ñandejára ‘ohenduha umi ohasa asýva ipyahẽramo’ ha katuete oipytyvõ ha ombopyʼaguapytaha umi oñembyasývape ipyʼaite guive (Job 34:28).

[Nóta oĩva taʼanga ndive páhina 29]

Coré ha ambue opuʼãvaʼekue Moisés rehe opaga hembiapo vaikuére