Mbaʼépa jajapovaʼerã akóinte jareko hag̃ua ñane amígo?

‘Kóva ajerure peẽme: Pejoayhúkena.’ (JUAN 15:​17, JMP.)

1. Mbaʼérepa Jesús remimboʼekuéra tekotevẽvaʼekue oñoamigoite?

 PE PYHARE Jesús omano mboyve, heʼi hemimboʼekuérape oñangareko hag̃ua ojuehe. Ha upe mboyvemi heʼi avei chupekuéra ojoayhu rupi hikuái ojekuaataha chupekuéra hemimboʼéramo (Juan 13:35). Jesús remimboʼekuéra ningo tekotevẽvaʼekue oñoamigoite ohasáta rupi hikuái heta mbaʼe ijetuʼúva. Avei Jesús omeʼẽmbotaitéma chupekuéra hembiaporã iñimportantetereíva. Umi kristiáno ypykue ningo oñehaʼãmbaitevaʼekue ojapo Jesús heʼíva. Ha ohayhuetereígui Ñandejárape ha iñermanokuérape, ojekuaa chupekuéra opárupi.

2. a) Mbaʼépa ñañehaʼã jajapo ha mbaʼérepa? b) Mbaʼépa ñambohováita ko artíkulope?

² Javyʼaiterei ningo ñaime haguére peteĩ organisasión osegívape umi kristiáno ypykue ehémplo. Ha Jesús heʼi haguéicha ñañehaʼã jatrata mborayhúpe ñane ermanokuérape. Jaikuaa ningo upéva ijetuʼuha jajapo hag̃ua ko ára pahápe. Avavéma voi ndohayhuvéi hapichápe ha ndojeroviavéi hese (2 Tim. 3:​1, 3). Heta oĩ oiporavóva iñamigorã umi iplátavante térã oñoamígo guaʼúnte hikuái. Péro ñande jaiko hag̃ua Jesús remimboʼéramo ndajajapoivaʼerã upéicha. Upéicharõ, mávapepa jahayhuvaʼerã jareko hag̃ua peteĩ amigoite? Mbaʼépa tekotevẽ jajapo jajuhu hag̃ua  ñane amigorã? Ha mbaʼépa jajapovaʼerã akóinte ñane amígo hag̃ua? Mbaʼéicha javépa jahejamavaʼerã peteĩ ñane amígope? Ko artíkulope ñambohováita koʼã porandu.

Mávapepa jahayhuvaʼerã jareko hag̃ua peteĩ amigoite?

3, 4. Mbaʼépa ojapovaʼerã umi oñoamigoitéva akóinte oiko porã hag̃ua oñondive ha mbaʼérepa?

³ Umi oñoamigoitéva ohayhúramo Jehovápe akóinte oiko porãta oñondive. Rréi Salomón ohaivaʼekue: ‘Peteĩ rehe ikatu oimeraẽva ipuʼaka, mokõiramo katu, ikatuve ojepytaso. Ha upéi peteĩ pióla ojejapóva mbohapýgui ndosói oimeháicha rei’ (Ecl. 4:12). Upévare Jehová akóinte oĩvaʼerã ñanendive ñande oñoamigoite hag̃ua ñane angirũ ndive.

⁴ Jaikuaa ningo umi ndoservíriva Jehovápe ikatuhánte avei oreko iñamigoite. Péro mokõivéva ohayhúramo Jehovápe akóinte ojogueraha porãta ha ojepytasóta ojoykére. Pór ehémplo, ojoavy jave hikuái, Ñandejára Ñeʼẽ ikatúta oipytyvõ chupekuéra oiko porã jey hag̃ua. Ha umi Ñandejárare ndaijaʼéiva omoingovaise jave chupekuéra katu, ndaikatumoʼãi ipuʼaka hesekuéra. Ymaite guive jahechakuaa Ñandejára siervokuéra oñangarekoha ojuehe ha notraisionaiha iñermanokuérape ojejukátaramo jepe chupekuéra upévare (jaleemína 1 Juan 3:16).

5. Mbaʼérepa ojogueraha porã rakaʼe Rut ha Noemí?

⁵ Jaipotáramo ñane amigoiterã jaiporavovaʼerã umi ohayhúva Jehovápe. Pór ehémplo, Rut ha Noemí ningo oñoamigaitevaʼekue ha la Biblia imanduʼa porãiterei hesekuéra. Jahechakuaa upéva Rut heʼívare Noemípe: ‘Ne retã che retãrã, nde Jára che Jararã avei. Ñandejára tachemaldesi rohejáramo, pe mano añoite ningo ñandepeʼavaʼerã ojuehegui’ (Rut 1:​16, 17, ÑÑB). Jahechakuaa mokõivéva ohayhueterei hague Ñandejárape ha upévare ojogueraha porãha hikuái. Ha Jehová ohovasa chupekuéra.

Mbaʼépa tekotevẽ jajapo jajuhu hag̃ua ñane amigorã?

6-8. a) Mbaʼépa tekotevẽ jajapo oñoamigoite hag̃ua ñande rapichándi? b) Mbaʼépa ikatu jajapo ñanembaʼeporã hag̃ua ñande rapichándi?

⁶ Jahechakuaa ningo Rut ha Noemí oñoamigaite hague, péro ndahaʼéi péicha péichante ohupytyvaʼekue hikuái upéva. Mbaʼépa upéicharõ tekotevẽ jajapo oñoamigoite hag̃ua ñande rapichándi? Tekotevẽ ningo mokõive jahayhu Jehovápe, ñañehaʼãmbaite jajogueraha porã ha jagueropuʼaka heta mbaʼe. Jaikuaa ningo umi oñoermánova ha oservíva Jehovápe jepe ijetuʼuha upéva. Haʼekuéra avei oñehaʼãvaʼerã oñoamigoite hag̃ua. Jahechamína koʼág̃a mbaʼe mbaʼépa ikatu ñanepytyvõ jajuhu hag̃ua ñane amigoiterã.

⁷ Ñande raẽ ñañehaʼãvaʼerã. Apóstol Pablo ningo omokyreʼỹvaʼekue umi iñamígo Romayguápe ‘imbaʼeporã hag̃ua hapichakuérandi’ (Rom. 12:13). Ha mbaʼéichapa ñande jajapóta upéva? Heta mbaʼéko ikatu jajapo michĩmimi ñande rapichakuéra  rehehápe. Ha ñandete voi jajapovaʼerã (jaleemína Proverbios 3:27). Ikatu ningo ñanembaʼeporã ñane ermanokuéra ndive ñakonvidárõ chupekuéra okarumi hag̃ua ñanendive. Iporãta voi jajepokuaáramo ñainvita jepi mayma ermáno kongregasionpeguápe.

⁸ Jajuhuvéta avei ñane amigorã ñañembojáramo ñainvita diferénte ermánope opredika hag̃ua ñanendive. Ajépa akóinte jaguerohoryve ñande rapichápe ñahendúramo mbaʼéichapa oñeʼẽ Jehováre umi héntepe.

9, 10. Mbaʼépa ñanemboʼe apóstol Pablo ehémplo, ha mbaʼéichapa ikatu jajapo avei upéicha?

⁹ Ñañehaʼãkena hetavépe jahayhu (jaleemína 2 Corintios 6:​12, 13). Hasýpa ndéve rejuhu hag̃ua ne amigorã kongregasiónpe? Upéicharõ oiméne reipotareína ne amigorã ndegustopeguánte. Ñapensamíntena apóstol Pablo ehémplore. Haʼe ningo ñepyrũrã ni nopensaivaʼekue oreko iñamígoramo umi ndahaʼéivape hudío. Péro upe rire oiko chugui ‘Ñandejára remimbou ambue tetãnguérape’ ha upéicha rupi hetavépema ohayhu (Rom. 11:13).

¹⁰ Pablo ningo ndoiporavoivaʼekue avei ijaveguápente iñamigorã. Jaikuaaháicha iñamígo Timoteo imitãitevevaʼekue chugui ha ndahaʼéi ni ivallegua. Koʼág̃a rupi avei kongregasiónpe heta ermáno imitãva iñamigoite umi ermáno ijedámava. Pór ehémplo Vanessa, peteĩ kuñataĩ 20 áño arimi orekóva ningo heʼi: “Areko peteĩ che amíga ahayhuetereíva ha 50 árima orekóva. Chupe ningo amombeʼu opa mbaʼe ikatúva amombeʼu peteĩ cheaveguápe. Haʼe ningo akóinte ojepyʼapy cherehe”. Mbaʼéichapa Vanessa ojuhu peichagua iñamigarã? Haʼe heʼi: “Che ndaguapýi ahaʼarõ ojeju cherendápe, che voi añemoĩ añemoag̃ui che rapichakuérare”. Ha ñande avei ñañehaʼãramo jareko ñane amigorã umi ndahaʼéivape ñandeavegua, Jehová katuete ñanderovasáta.

11. Mbaʼépa ñanemboʼe Jonatán ha David oñoamigoite hague?

¹¹ Ñadefendékena ñane amígope. Rréi Salomón ohaivaʼekue: ‘Pe angirũ opa araitépe oporohayhu, ha ñanepehenguéicha ñanepytyvõ jajejopy vai jave’ (Pro. 17:​17, ÑÑB). Ko téysto ohaírõ guare, Salomón oiméne imanduʼáraʼe mbaʼéichapa itúva David ha Jonatán oñoamigoitevaʼekue (1 Sam. 18:1). Jonatán ningo rréi Saúl raʼy hína, ha katuete itúva oipotáneraʼe haʼe omanda hendaguépe. Péro Jonatánpe g̃uarã oĩ porã Jehová omoĩ Davídpe rréiramo. Jonatán ndahaʼeivaʼekue itúvaicha ombopyʼarasýva chupe David. Jonatán  ningo ndaipochýi avei Davídpe ojeguerohory haguére ni ndogueroviái umi japu Itúva heʼíva David rehe (1 Sam. 20:​24-34). Ha ñandépa jajoguañaína Jonatánpe? Javyʼápa ñane amigokuérape oñeʼẽmeʼẽ jave priviléhio kongregasiónpe? Ñaipytyvõ ha ñambopyʼaguapýpa ñane amigokuérape ohasa asy jave? Mbaʼépa jajapo oñeñeʼẽ vai jave ñandéve hesekuéra? Jagueroviántemapa ojeʼéva térãpa ñadefende chupekuéra, Jonatán odefende haguéicha iñamígope?

Mbaʼéicha javépa jahejamavaʼerã peteĩ ñane amígope?

12-14. a) Mbaʼépa odesidivaʼerã peteĩ ostudiáva la Biblia? b) Mbaʼéichapa ikatu ñaipytyvõ umi estudiántepe ñande ñaimémava kongregasiónpe?

¹² Heta vése ningo peteĩ ostudiáva la Biblia oñepyrũvaʼerã odesidi okambiátapa iñamigokuéra. Ikatu voi ovyʼa iñamigokuéra ndive, péro umíva nomombaʼéi Ñandejára Ñeʼẽ. Upévare pe estudiánte ohechakuaa ogueraha vaitaha chupe osegíramo ojeheʼa hesekuéra ha tekotevẽha oheja chupekuéra (1 Cor. 15:33). Upéicharõ jepe, pe estudiánte ikatu oimoʼã otraisionaha iñamigokuérape.

¹³ Nderehe oikóramo upéicha, rehechakuaavaʼerã umi ne amígo añetehápe ojepyʼapýva nderehe ovyʼataha ohechávo reñehaʼã reiko porãve. Ha ikatu voi oikuaase avei hikuái Jehovápe. Péro oñeʼẽ vaíramo nderehe ‘ndereikovéima rupi hendivekuéra hekovaípe’, ohechaukáta hikuái ndahaʼeiha amígo porã (1 Ped. 4:​3, 4). Upéicha oikóramo haʼekuéra hína la ne traisionáva, ndahaʼéi nde.

¹⁴ Umi ne amigokuéra nderejapáramo, katuete kongregasiónpe rejuhúta avei ne amigoiterã (Gál. 6:10). Koʼã mbaʼe oiko rupi ñande ñaimémava kongregasiónpe ñañeporanduvaʼerã: “Aikuaa piko umi estudiánte oúvape rreunionhápe? Ajeheʼápa hesekuéra ha amokyreʼỹ chupekuéra?”.

15, 16. a) Mbaʼépa jajapovaʼerã peteĩ ñane amigoite ohejáramo Jehovápe? b) Mbaʼéichapa ikatu jahechauka Jehovápe jahayhuha?

¹⁵ Ijetuʼu avei peteĩ ñane amígo ofalláramo Jehovándi. Upévare ojekorrehivaʼerã chupe ha ikatu voi oñemosẽ kongregasióngui. Peteĩ ermána ningo omombeʼu oñeñandu vai hague peteĩ iñamigaite ohejárõ guare Jehovápe. Haʼe heʼi: “Haʼetévaicha voi omano mbaʼéva chéve g̃uarã. Che ningo aimoʼãkuri che amíga ojerovia mbareteha Jehováre, péro ndaupeichaietéraʼe. Oime piko oservíraʼe Jehovápe ihentekuérape ombovyʼa hag̃uánte? Upéva chemopensa ha ajepyʼamongeta aikuaa hag̃ua mbaʼérepa che aserviʼaína Jehovápe”. Mbaʼéichapa ko ermána ombohovái ko provléma? Haʼete heʼi: “Amoĩ Jehová pópe umi mbaʼe chepyʼapýva. Ha adesidi avei ahayhu chupe aikuaágui mbaʼeichaguápa haʼe, ndahaʼéi omeʼẽgui chéve che amigorãnte”.

¹⁶ Akóinte jaiko hag̃ua Ñandejára amígoramo, ndovaléi jajeheʼa umi ohayhúvare ko múndo reko. Santiago ningo ohaivaʼekue voi: ‘Ndapeikuaái piko peẽ umi yvypóra reko ohayhúva Ñandejára enemigoha? Oimeraẽ oikoséva yvypóra reko ohayhúvaramo, oiko chugui Ñandejára enemígo’ (Sant. 4:​4, BNP). Jahechauka hag̃ua Jehovápe jahayhuha jajeroviavaʼerã haʼe akóinte ñanepytyvõtaha, koʼýte jajepytaso haguére ijykére japerdéramo peteĩ ñane amígo (jaleemína Salmo 18:25). Pe ermána ñañeʼẽ hague ningo heʼi: “Che ahechakuaa ndaikatuiha jaovliga avavépe ohayhu hag̃ua Jehovápe ni ñandéve. Upéva ningo  káda uno jadesidivaʼerã”. Upéicharõ, mbaʼépa ikatu jajapo akóinte ñane amígo hag̃ua umi ojepytaso mbaretéva Jehová ykére?

Mbaʼépa jajapovaʼerã ñane angirũ akóinte ñane amigoite hag̃ua?

17. Mbaʼéichapa ñañeʼẽvaʼerã ñane amigokuérape?

¹⁷ Ñañemongetáramo ñane angirũ ndive akóinte ñane amigoitéta. La Bíbliape ningo jalee Rut ha Noemí, David ha Jonatán, Pablo ha Timoteo oñoamigoite hague. Ha jahechakuaa haʼekuéra oñemongeta hague oñondive ha ojorrespeta avei hikuái. Apóstol Pablo omombeʼu mbaʼéichapa ñañeʼẽvaʼerã ñande rapichakuérape heʼívo: ‘Pene ñeʼẽ taiporã ha taijuky’. Ko téystope heʼihína mbaʼéichapa ñañeʼẽvaʼerã umi ndoservírivape Jehovápe (Col. 4:​5, 6). Chupekuéra tekotevẽramo jarrespeta, koʼýte jarrespetavaʼerã umi ñane amígo kongregasionpeguápe.

18, 19. a) Mbaʼépa repensavaʼerã ne amígo oñemoñeʼẽ jave ndéve? b) Mbaʼépa ñanemboʼe umi ansiáno Efesoygua?

¹⁸ Ñande ningo jarrespetavaʼerã ñane amígope ñañemongeta jave hendive. Péro ndajakyhyjeivaʼerã jaʼe hag̃ua la ñapensáva, jaikuaa rupi ñane amígo omombaʼetaha upe jaʼéva chupe. Rréi Salomón heʼi voi: ‘Mbaʼe hyakuã porãva ombovyʼa ñane korasõ ha ñane angirũ oñemoñeʼẽramo ñandéve heʼẽ asy’ (Pro. 27:9). Ndépa upéicha repensa ne amígo oñemoñeʼẽ jave ndéve? (Jaleemína Salmo 141:5.) Peteĩ ne amígo heʼíramo ndéve ojepyʼapyha upe rejapóvare, mbaʼépa eréta chupe? Eagradesétapa chupe ha rehechakuaa nderayhúgui heʼiha ndéve? Térãpa ndepochýta hendive?

¹⁹ Apóstol Pablo ningo oñoamigoitevaʼekue umi ansiáno Efesoygua ndive. Umíva apytépe oĩ voi umi Pablo oikuaáva oiko ypy guive chuguikuéra kristiáno. Upéicharamo jepe, Pablo ipahaitéma oñembyatýrõ guare hendivekuéra oñemoñeʼẽ porã chupekuéra. Ipochyparakaʼe umi ansiáno? Nahániri, omombaʼeterei katu Pablo ojepyʼapy haguére hesekuéra ha hasẽ anga hikuái ndohechamoʼãvéima haguére chupe (Hech. 20:​17, 29, 30, 36-38).

20. Mbaʼépa ojapovaʼerã umi oñoamigoitéva?

²⁰ Umi ñane amigoitéva ningo ohendu ñañemoñeʼẽ jave chupekuéra, ha haʼekuéra avei oñemoñeʼẽvaʼerã ñandéve tekotevẽ jave. Péro ñañantendevaʼerã ani hag̃ua ñañentremete provléma ahénope. La Biblia heʼi voi ñandéve ‘jajepyʼapy hag̃ua ñane rembiapórente’ (1 Tes. 4:11). Ha jaikuaavaʼerã avei ‘peteĩteĩ jajechataha Ñandejára ndive’ (Rom. 14:12). Péro sapyʼánte tekotevẽta ñamomanduʼa ñane amígope mbaʼépa Jehová oipota jajapo (1 Cor. 7:39). Pór ehémplo, ikatu rehechakuaa peteĩ ne amígope ogustaha peteĩ kuñataĩ ndoservíriva Jehovápe. Mbaʼépa rejapóta? Rekirirĩtantepa ani hag̃ua ipochy nendive? Reñemoñeʼẽta katuete chupe ne amigoite rupi. Ha mbaʼépa rejapóta nohenduséiramo la eréva chupe? Upéicha oikóramo, remombeʼuvaʼerã ansianokuérape. Haʼekuéra ningo oñehaʼã oipytyvõ umi ojavývape. Upéva rejapo hag̃ua ningo nderekyhyjeivaʼerã ipochýrõ g̃uarã nendive. Ha nemanduʼavaʼerã mokõivéva pehayhúrõ Jehovápe ndaipochyʼaremoʼãiha nendive.

21. Mbaʼépa sapyʼánte enterove jajapo, ha mbaʼépa ñanepytyvõta jaiko porã hag̃ua oñoamigoitéicha?

²¹ (Jaleemína Colosenses 3:​13, 14.) Sapyʼánte ningo ñane amígo ipochy peteĩ mbaʼe jajapovaʼekuére. Ha ikatu avei haʼekuéra ojapo térã heʼi umi mbaʼe ñanembopochýva. Santiago ningo heʼimavaʼekue voi: “Opavave ñande jajavy heta mbaʼépe” (Sant. 3:​2, ÑÑB). Upévare, umi oñoamigoitéva ndahaʼéi umi ndojoavýiva, umíva ningo hína umi oñoperdonáva ipyʼaite guive. Péicha jahecha oñoamigoiteha umi oñoperdona ha oñemongetakuaáva oñondive. Ha pe mborayhu hína la ñanepytyvõtava jaiko porã hag̃ua ermanokuéra ndive ha ñane amigokuéra ndive.

Mbaʼépa rembohováita?

• Mbaʼéichapa ikatu jajuhu ñane amigoiterã?

• Mbaʼéicha javépa jahejamavaʼerã peteĩ ñane amígope?

• Mbaʼépa jajapovaʼerã ñane angirũ akóinte ñane amígo hag̃ua?

[Porandu ñahesaʼỹijóva]

[Nóta oĩva taʼanga ndive páhina 18]

Mbaʼérepa Rut ha Noemí oñoamigaitevaʼekue?

[Nóta oĩva taʼanga ndive páhina 19]

Mbaʼépa jajapo ñanembaʼeporã hag̃ua ñande rapichakuéra ndive?