Oñeporandúva jepi

Peteĩ mitã omanóramo isy retepýpe, oikove jeýnepa Ñandejára múndo pyahúpe?

Oiméramo ñande ndajahasái gueteri ko mbaʼe vaietére, hasy lénto ñantende hag̃ua mbaʼéichapa oñeñandu umi ohasavaʼekue koʼã mbaʼe. Heta sy ha túva ningo oñembyasyeterei pe mitã onaséramo heʼõngue térã pe sy imembykuáramo. Pór ehémplo, peteĩ kuñakarai cinco vése imembykua rire oreko jey mokõi mitã hesãiva. Ombovyʼáramo jepe chupe umi mitã, haʼe ndahesaráiri umi omanovaʼekuégui. Ko kuñakarai omanoha ára peve imanduʼa mboy áñopa orekovaʼerãmoʼã umi mitã oikovérire. Upévare heta oĩ oñeporandúva: Ág̃a og̃uahẽ vove Ñandejára múndo pyahu, ikatúnepa oikove jey umi mitã omanóva onase mboyve?

Añetehápe ndajaikuaái, pórke la Biblia ndeʼíri oikove jeýtapa hikuái. Péro Ñandejára Ñeʼẽme oĩ heta párte ikatúva ñanepytyvõ ñañeñandu porãmie hag̃ua.

Ñepyrũrã jahechami koʼã mokõi porandu: 1) Arakaʼe guivépa pe mitã oñepyrũ oikove, onase rire térãpa oĩ ypy guive isy retepýpe?, ha 2) Mbaʼéichapa Jehová ohecha pe mitã neʼĩrava onase; peteĩ yvypóra oikovévaicha térãpa ndoapói chupe mbaʼevéramo? Ñandejára Ñeʼẽ ombohovái ñandéve koʼã porandu.

Moisés Léi ohechauka pe mitã oikoveha oĩ ypy guive isy retepýpe. Upévare yma oĩramo ojukáva peteĩ mitã onase mboyve, ojejuka avei chupe. Pe léi heʼi voi: “Tomeʼẽ hekove hapicha rekove rehe” (Éx. 21:​22, 23). a Upéicharõ pe mitã oĩva isy retepýpe haʼénte avei peteĩ yvypóra oikovéva. Upévare hetaiterei kuña ndoitykái imemby oikuaágui ivaietereiha Ñandejára renondépe.

Jahechaháicha pe mitã oñepyrũ oikove oĩ ypy guive isy retepýpe. Upéicharõ, omombaʼépa Jehová pe mitã rekove? Pe léi angete jahecháva ningo heʼi ojejukavaʼerãha umi ojukáva peteĩ mitã neʼĩrava onase. Péva ohechauka Ñandejára omombaʼetereiha pe mitã rekove. Oĩ avei ambue téysto ohechaukáva mbaʼéichapa Jehová omombaʼe umi mitã nonaséiva gueteri. Pór ehémplo rréi David ohaivaʼekue: ‘Che sy ryepýpe cheapo ñepyrũ vaʼekue [...]. Anase mboyve nde cherechamavaʼekue ha nde kuatiápe oĩmbáma mbaʼéichatapa che rekove’ (Sal. 139:​13-16; Job 31:​14, 15).

Avei peteĩ mitã onase mboyve, Jehová ohecháma mbaʼéichatapa ág̃a tuicha rire ha mbaʼépa ikatúta ojapo. Pór ehémplo, Isaac rembireko, Rebeca orekótarõ guare hemélo, umíva oñepyrũ oñorairõ isy retepýpe. Upérõ Jehová heʼi mbaʼépa ojapóta hikuái tuicha rire. Ha heʼíneraʼe upéva opillágui mbaʼeichaguátapa umi mitã (Gén. 25:​22, 23; Rom. 9:​10-13).

Jahechamína avei Juan Bautista káso. Ñandejára Ñeʼẽ heʼi: ‘Ohendúvo María maitei, Elisabet oñandu omyiha pe mitã hyépe, ha haʼe henyhẽ espíritu sántogui’ (Luc. 1:41). Koʼápe Lucas oñeʼẽvo pe mitã oĩvare Elisabet retepýpe oiporu peteĩ ñeʼẽ griégo ikatúva ojeporu avei oñeñeʼẽ jave peteĩ mitãraʼýre. Upe ñeʼẽ oiporu avei omombeʼu hag̃ua Jesús oĩ hague mymba okaruhápe onase riremi (Luc. 2:​12, 16; 18:15).

 Upéicharõ, heʼípa la Biblia idiferenteha peteĩ mitã neʼĩrava onase ha peteĩ onase ramóva? Nahániri. Ha umi sientífiko koʼag̃agua ohechauka upeichaha. Pór ehémplo umi espesialísta heʼi peteĩ mitã oĩva isy retepýpe ikatuha oñandu oikóva okápe. Upévare umi hyeguasúva ojepokuaaiterei imembýre oĩ aja hetepýpe.

Ñapensami avei oĩha mitã onaséva itiempopeʼỹ. Ñamoĩ chupe peteĩ onaséva péicha mbykymínte oikoveha. Ha ambue mitã katu oho porã hese, péro onase mboyvemi omano isy retepýpe. Ikatúpa jaʼe pe onaséva itiempopeʼỹ ha upéi omano ikatuha oikove jey ha pe ótro katu nahániri?

Upéicharõ, la Biblia heʼi porãiterei ñande rekove oñepyrũha ñaime ypy guive ñande sy retepýpe. Avei Jehová omombaʼeterei pe mitã onaseʼỹva rekove ha ohecha chupe peteĩ kakuaáicha. Upévare heta kristiáno heʼi naiporãiha jaʼe umi mitã omanóva onase mboyve ndaikatumoʼãiha oikove jey. Ikatu opensa hikuái: “Oiméramo umi mitã omanóva onase mboyve ndaikatumoʼãi oikove jey, piko mbaʼéicha jaikóta jaʼe oĩ vaiha ojeityka mitã?”.

Yma ko rrevístape ojeʼevaʼekue hasy lentoha oñemoingove jey hag̃ua umi mitã omanóva onase mboyve. Pór ehémplo peteĩ pártepe oporandu: “Omoingove jeýtapa Ñandejára pe mitã isy retepýpe?”. Péro upéi pe Cuerpo Gobernante heta ostudia, ojepyʼamongeta ha oñemboʼe ha péicha ontende ndaiporiha mbaʼeve ikatúva ojoko Jehovápe. Jesús heʼi voi: “[Ñandejárape] g̃uarã ndaipóri mbaʼeve ikatuʼỹva ojapo” (Mar. 10:27). Jesúsre oikovaʼekue ohechauka upeichaha. Ñandejára ningo oguerova hekove yvágagui ha omoĩ peteĩ vírhen retepýpe. Ñande yvypóra jaʼéta voi péva ndaikatuiha ojejapo.

Heʼisépa upéva umi mitã omanóva onase mboyve oñemoingove jeytaha? Jaʼéma haguéicha la Biblia ndeʼíri “oikovéta” térã “ndoikovemoʼãi”, ha upévare naiporãi ñañemohatã peteĩ mbaʼépe. Oĩta katuete ningo heta mbaʼe ñañeporandúva ha ndaikatumoʼãiva oñembohovái. Upévare naiporãi jaiko jakarkulapa rei mbaʼépa la oikótava. Ñande jaikuaa porã ñaína Jehová ñanderayhueterei ha ñandeporiahuverekoha (Sal. 86:15). Haʼe katuete oipeʼase ñandehegui opaichagua temimbyasy ñañandúva omano haguére peteĩ jahayhúva (Job 14:​14, 15). Jajeroviakuaa Jehová katuete ojapotaha opa mbaʼe hekopete, ha oipeʼáta opa mbaʼe vai ko múndo aña ojapóva ñanderehe. Upearã omoĩ Itaʼýra Jesucrístope ‘ombyai hag̃ua aña ojapovaʼekue’ (1 Juan 3:8).

[Nóta]

[Nóta oĩva taʼanga ndive páhina 13]

Jehová oipeʼáta ñandehegui opaichagua mbaʼembyasy oguerúva ko múndo aña