Ñamombaʼékena pe Moisés tuichavévape

‘Ñandejára oguenohẽta pende apytégui peteĩ proféta cheichagua. Peneñeʼẽrendúke chupe.’ (HECH. 3:22.)

1. Mbaʼérepa Jesucristo ndaijojahái?

 OJAPÓMA dos mil áño rupi onase hague peteĩ mitã iñimportantetereíva. Upe pyharépe oĩ ovecha rerekua ohenduvaʼekue mbaʼéichapa heta ánhel vyʼápe opuraheijoa Jehovápe (Luc. 2:​8-14). Upéi ko mitã okakuaa ha ikariaʼy, ha orekópe 30 áño oñepyrũ peteĩ tembiapo ipukúva 3 áño ha 6 mése. Ndahetáiramo jepe upe tiémpo, haʼe omboʼevaʼekue tuichaiterei okambia yvyporakuéra rekove. Peteĩ karai síglo 19-pegua hérava Philip Schaf heʼi: “Ñamoĩramo jepe oñondive entéro ifamósova oikovaʼekue ko yvy ape ári ndaipóri ohupytýva ko kuimbaʼépe. Jepe haʼe ndohaíri ni peteĩ kuatiañeʼẽ mbykymi, ojehai hetaiterei lívro, diskúrso, purahéi ha ñemboʼe oñeʼẽva hese, ha ojejapo avei hetaiterei taʼanga chugui”. Ko kuimbaʼe ijojahaʼỹva ningo Jesucristo.

2. Mbaʼépa ohai Jesús rehe apóstol Juan?

² Apóstol Juan ningo ohai Jesús rekovekue ha opakuévo ikuatiañeʼẽ heʼi: “Hetaitereive mbaʼe Jesús ojapovaʼekue. Ha ñamoĩmbátarõ kuatiáre opa umi mbaʼe haʼe ojapovaʼekue, ko yvy ári ndaijapamoʼãi umi kuatia omombeʼútava hembiapokue” (Juan 21:25). Juan oikuaa ndaikatumoʼãiha ohaipaite opa mbaʼe Jesús heʼi ha ojapovaʼekue umi 3 áño ha 6 mése aja. Upéicharamo jepe umi mbaʼe ohaíva hetaiterei mbaʼe ñanemboʼe.

3. Mbaʼéichapa ñantende porãvéta Jesús ojapovaʼekue?

³ La Bíbliape oĩ irundy kuatiañeʼẽ omombeʼúva Jesús rekovekue. Péro oĩve heta párte omyesakãva haʼe ojapovaʼekue, ha ikatúva omombarete ñande jerovia. Pór ehémplo, Ñandejára Ñeʼẽ omombeʼu Jesús ou mboyve oĩ hague kuimbaʼe hekoporãva, orrepresentáva haʼe ojapótava okumpli hag̃ua itúva rembipota. Ñahesaʼỹijóramo koʼã párte ñantende porãvéta haʼe ojapovaʼekue.

Kuimbaʼe hekoporãva orrepresentavaʼekue Jesúspe

4, 5. Máva mávapa orrepresentavaʼekue Jesúspe? Ha mbaʼépepa ojojogua Jesús ha koʼã kuimbaʼe?

⁴ Ñandejára Ñeʼẽme heʼi Moisés, David ha Salomón orrepresenta hague Jesúspe. Koʼã kuimbaʼe ojapóva ohechauka Jesús haʼeha Ñandejára rembiporavo ha oisãmbyhytaha Jehová goviérno. Upéicharõ jahechami mbaʼépepa ojojogua Jesús ha koʼã kuimbaʼe ha mbaʼépa ikatu ñaaprende chuguikuéra.

⁵ La Biblia ohechauka Moisés oñeʼẽ hague Jehová rérape, oipytyvõ umi Israelguápe oñemoag̃ui hag̃ua Ñandejárare ha omosãso chupekuéra. Jesús ojapo avei koʼã mbaʼe. David katu ñepyrũrã oñangareko ovecháre ha upéi oiko chugui peteĩ mburuvicha pyapy mbaretépe ipuʼakáva umi oñemoĩvare hese. Ha Jesús ningo haʼe avei peteĩ mburuvicha imbaretéva ha oñangarekóva ijovechakuérare (Eze. 37:​24, 25). Salomón iñeʼẽrendu tiémpope Jehovápe, iñaranduvaʼekue. Haʼe oisãmbyhy aja umi Israelgua oiko pyʼaguapýpe (1 Rey. 4:​25, 29). Upéicha avei Jesús iñarandueterei ha ojeʼe hese haʼeha ‘Mburuvicha pyʼaguapy reruha’ (Isa. 9:​6, ÑÑB). Jahechaháicha Jesús ojogua heta mbaʼépe koʼã Ñandejára siérvope. Péro umi mbaʼe Jesucristo  ojapovaʼekue iñimportanteve oiko hag̃ua Jehová rembipota. Ñepyrũrã jahechami mbaʼépepa ojojogua Jesús ha Moisés. Péicha ñantendevéta Ñandejára Raʼy ojapóva.

Mbaʼéichapa Moisés orrepresenta Jesúspe

6. Pedro heʼi haguéicha, mbaʼérepa tekotevẽ ñaneñeʼẽrendu Jesúspe?

⁶ Ohasa riremi Pentecostés arete áño 33-pe, Pedro ha Juan oho Ñandejára témplope ha upépe omonguera peteĩ oguataʼỹvape. Umi henteita “ohecharamojoa” upe oikóva ha apúrope oñemboja umi apóstol rendápe oporandu hag̃ua chupekuéra mbaʼéichapa ojapo hikuái pe mbaʼeguasuete. Upémarõ Pedro heʼi Jehová omeʼẽ hague chupekuéra puʼaka Jesucristo rupive. Upéi imanduʼa peteĩ profesíare oĩva Evréo Kuatiañeʼẽme ha heʼi oñekumpliha Jesúsre. Pedro heʼi: “Moisés heʼivaʼekue ñande rukuéra ypykuépe: ‘[Jehová] pende Jára oguenohẽta pende apytégui peteĩ [proféta] cheichagua. Peneñeʼẽrendúke chupe opa heʼívape’” (Hech. 3:​11, 22, 23; jaleemína Deuteronomio 18:​15, 18, 19).

7. Mbaʼérepa jaʼekuaa umi ohendúva Pédrope oikuaa porã hague upe profesía?

⁷ Umi hudío ohendúva Pédrope ningo omombaʼeterei Moiséspe ha oipotaitereíma og̃uahẽ pe proféta oñeprometevaʼekue. Upévare jaʼekuaa haʼekuéra oikuaa porã hague upe profesía (Deu. 34:10). Ikatu ningo jaʼe Moisés haʼe hague peteĩ mesías Ñandejára oiporavógui chupe. Péro pe proféta oútava Moisés rire haʼe pe Mesías tuichavéva, ‘Cristo, Ñandejára Rembiporavo’ (Luc. 23:35; Heb. 11:26).

Mbaʼépepa ojojogua Jesús ha Moisés

8. Mbaʼépepa ojojogua Moisés ha Jesús?

⁸ Jesús ha Moisés ojojogua heta mbaʼépe. Imitãme ojukasevaʼekue chupekuéra peteĩ mburuvicha aña (Éxo. 1:22–2:10; Mat. 2:​7-14). Mokõivénte osẽ Egíptogui heʼiháicha proféta Oseas: ‘Che ahayhuvaʼekue Israélpe imitãme, haʼe ningo che raʼy, ahenoivaʼekue Egíptogui’ (Ose. 11:1). Oseas imanduʼa Moisés omoakãrõ guare umi Israelguápe osẽ hag̃ua Egíptogui (Éxo. 4:​22, 23; 12:​29-37). Péro ko profesía oñekumpli avei upe rire, José ha María osẽvo Egíptogui Jesús ndive omano rire Rréi Herodes (Mat. 2:​15, 19-23).

9. a) Mbaʼe milágropa ojapo Moisés ha Jesús? b) Mbaʼe mbaʼépepa ojojoguave hikuái? (Ehecha heʼihápe “Mbaʼépepa ojojogua avei Moisés ha Jesús”, páhina 26-pe.)

⁹ Moisés ha Jesús ojapo avei heta milágro. Péicha ojehecha Jehová oipytyvõha chupekuéra. La Biblia heʼi Moisés haʼe hague pe yvypóra ojapo ypy vaʼekue milágro (Éxo. 4:​1-9). Haʼe heta vése oiporu y upearã. Pór ehémplo Jehová puʼaka rupive ojapo tuguy pe rrío Nílo ha umi ykua oĩvagui Egíptope. Avei ombojaʼo már Rojo ha onohẽ y peteĩ itágui oĩ aja desiértore (Éxo. 7:​19-21; 14:21; 17:​5-7). Jesús oiporu avei y ojapo hag̃ua heta milágro. Ñepyrũrã ojapo chugui víno peteĩ kasamientohápe (Juan 2:​1-11). Upéi katu omombytaite pe y pochy már Galileapegua. Ha peteĩ jey oguata voi y ári (Mat. 8:​23-27; 14:​23-25). Páhina 26-pe jahecháta ambue mbaʼe ojapovaʼekue Moisés ha Jesús.

Jesús oñeʼẽ Jehová rérape

10. a) Mbaʼe mbaʼépa ojapo umi proféta? b) Mbaʼérepa jaʼe Moisés haʼe hague peteĩ proféta?

¹⁰ Oĩ heta oimoʼãva umi proféta omombeʼunteha oikótava tenonderãme. Péro ndahaʼéi upévante ojapóva. Pór ehémplo, oñeʼẽ hikuái Jehová rérape, ha oikuaauka ‘umi mbaʼeguasueta Ñandejára ojapovaʼekue’ (Hech. 2:​11, 16, 17, BNP). Umi proféta omombeʼu oikótava tenonderãme, mbaʼéichapa oñekumplíta Jehová rembipota ha umi kastígo haʼe oguerútava. Upéicha ojapovaʼekue Moisés. Haʼe oikuaaukavaʼekue umi 10 plága vaiete oútava Egíptope. Avei oikuaauka umi Israelguápe umi Léi Ñandejára  omeʼẽvaʼekue sérro Sinaípe ha heʼi chupekuéra mbaʼépa Jehová rembipota. Péro ouvaʼerã peteĩ proféta tuichavéva Moisésgui.

11. Mbaʼérepa jaʼekuaa Jesús haʼe hague peteĩ proféta tuichavéva Moisésgui?

¹¹ Primer síglope peteĩ karai hérava Zacarías oñeʼẽ avei Ñandejára rérape. Haʼe ningo Juan Bautista túva, ha omombeʼu mbaʼépa Ñandejára ojapóta itaʼýra rupive (Luc. 1:76). Juan Bautista katu oikuaauka Jesucristo haʼeha pe proféta tuichavéva Moisésgui (Juan 1:​23-36). Jesús ningo heta vése omombeʼu oikótava tenonderãme, heʼi moõpa ojejukáta chupe, mbaʼéicha ha mávapa ojapóta upéva (Mat. 20:​17-19). Ha omombeʼu avei Jerusalén ha itémplo oñehunditaha (Mar. 13:​1, 2). Avei oĩ heta profesía Jesús heʼivaʼekue oñekumplíva koʼág̃a rupi (Mat. 24:​3-41).

12. a) Mbaʼéichapa Jesús omoñepyrũ pe predikasión? b) Mbaʼépa jajapoñaína ñahaʼanga hag̃ua Jesúspe?

¹² Jesús avei opredika ha oporomboʼe. Kyreʼỹme omoherakuã pe marandu porã ha oñeʼẽ Ñandejára goviérnore (Luc. 4:​16-21, 43). Umi mboʼehára apytépe ndaipóri Jesús rasaharã. Oĩ voi heʼíva hese: “Ndaipóri niko avave oñeʼẽva ko kuimbaʼe oñeʼẽháicha” (Juan 7:46). Haʼe ningo oguerovapa voi hemimboʼekuérare ikyreʼỹngue, ha upévare haʼekuéra omombeʼuse avei pe  marandu porã hapichakuérape. Péicha Jesús omoñepyrũ peteĩ tembiapo tuichaitereíva, ha iñasãiva oparupiete ko yvy ape ári koʼág̃a peve (Mat. 28:​18-20; Hech. 5:42). Pe áño ohasavaʼekuépe oĩ siete millón Testígo oiporúva 1.500.000.000 óra opredika ha omboʼe hag̃ua la Biblia hapichakuérape. Ha nde, rejapopareína ko tembiapo nde pyʼaite guive?

13. Mbaʼépa ñanepytyvõta jajesareko meme hag̃ua Jehová ojapótavare?

¹³ Jahecha Jehová ombou hague peteĩ proféta tuichavéva Moisésgui, ha péicha okumpli heʼivaʼekue. Mbaʼépa repensa ko mbaʼére? Ajépa nepytyvõ rejeroviave hag̃ua umi profesía ofaltávare oñekumpli. Upéicharõ, iporã jajepyʼamongeta Jesús ojapovaʼekuére. Upéva ñanepytyvõta ñaneakãporã ha jajesareko meme hag̃ua Jehová ojapótavare koʼẽrõite (1 Tes. 5:​2, 6).

Jesús ñanemoag̃ui Jehováre

14. Mbaʼéichapa Moisés oipytyvõ umi Israelguápe oñemoag̃ui hag̃ua Jehováre?

¹⁴ Moisés ha Jesús oipytyvõ umi héntepe oñemoag̃ui hag̃ua Jehováre. Moisés rupive Ñandejára ojapo peteĩ kompromíso umi Israelguándi ha omeʼẽ chupekuéra iléi. Haʼekuéra iñeʼẽrendúrire Jehovápe, haʼe orekovaʼerãmoʼã chupekuéra imbaʼéramo (Éxo. 19:​3-8). Upe kompromíso oñepyrũ áño 1513-pe Jesús ou mboyve ha osegi síglo 1 peve.

15. Mbaʼérepa jaʼekuaa pe kompromíso ojejapóva Jesús rupive tuichaveha?

¹⁵ Áño 33-pe Jehová ojapo peteĩ kompromíso pyahu umi kristiáno yvágape ohótava ndive. Koʼãva hína ‘Israel Ñandejára mbaʼéva’ (Gál. 6:​16, JMP). Ñandejára ojapórõ guare pe kompromíso Moisés rupive, ohaivaʼekue iléi itáre. Pe kompromíso pyahu ojejapóva Jesús rupive katu iporãiteve. Ñandejára omoĩ iléi umi hénte korasõme (jaleemína 1 Timoteo 2:5 ha Hebreos 8:10). Upéicharõ umi ohótava yvágape Jehová mbaʼe hína. Haʼekuéra hembiapo porã ha oisãmbyhýta Jesús ndive (Mat. 21:43). Koʼã kristiáno añoite oike pe kompromíso pyahúpe, péro umi mbaʼe porã oguerúva upe kompromíso ohupyty hetaiteve tapichápe. Umíva apytépe hetaiterei omanovaʼekue ikatútava oikove jey tapia g̃uarã.

Jesús ñanemosãso

16. a) Mbaʼéichapa Jehová osalva umi Israelguápe Moisés rupive? b) Heʼiháicha Éxodo 14:​13, mávapa upe ñanerenohẽva jejopy vaígui?

¹⁶ Pe pyhare Israel osẽ mboyve Egíptogui, Ñandejára omondo peteĩ ánhel ojuka hag̃ua entéro taʼýra ypykue oĩva upe tetãme. Umi Israelgua família ikatu avei omano! Péro Moisés rupive Jehová heʼi chupekuéra ojuka hag̃ua peteĩ ovecharaʼy ha ohypýi huguýpe hokẽ márko (Éxo. 12:​1-13, 21-23). Upéi umi Israelgua osẽ upe tetãgui, ha vaikuépe ojecha umi soldádo Egiptoygua ohupytývo chupekuéra már Rojo renondépe. Pyaʼe porã Jehová osalva jey chupekuéra Moisés rupive. Haʼe ombojaʼo mbytépe pe y guasu umi hénte ohasa hag̃ua (Éxo. 14:​13, 21).

17, 18. Mbaʼérepa jaʼekuaa Jesús ojapóva tuichaveha Moisés ojapovaʼekuégui?

¹⁷ Koʼã milágro ningo tuicha mbaʼe, péro Jehová ojapóva itaʼýra rupive tuichave jey. Jesús rupive umi yvypóra iñeʼẽrendúva ikatu osẽ pekádo poguýgui (Rom. 5:​12, 18). Haʼe ‘ñanerenohẽ jejopy vaígui tapia g̃uarãma’ (Heb. 9:​11, 12). Jesús réra ningo heʼise voi: “Jehová ñandepeʼa ivaívagui”. Jesucristo oipeʼa ñandehegui umi mbaʼe  vai jajapovaʼekue yma ha ipohýiva ñandéve. Ha iporãveha katu, koʼẽrõitéma ikatúta jaikove vyʼápe. Ñandepeʼávo pekádo poguýgui Jesús ñanemoag̃ui Ñandejárare ha ñanepytyvõ ani hag̃ua ñanderupyty umi kastígo oguerútava (Mat. 1:21).

¹⁸ Koʼẽrõitéma jajeíta pekádo, mbaʼasy ha ñemano poguýgui. Hesakãve hag̃ua ñandéve mbaʼéichatapa upéva, ñanemanduʼami peteĩ mbaʼe oikovaʼekuére yma. Oĩvaʼekue peteĩ karai hérava Jairo ha omanomi chugui itajýra orekóva 12 áño. Upérõ Jesús oho pe karai rógape ha heʼi chupe: “Ani rekyhyje, ejeroviánte ha ojesalváta” (Luc. 8:​41, 42, 49, 50, ÑÑB). Oiménepa ovyʼaitéraʼe itúva ha isy Jesús omoingove jeýrõ guare pe mitãkuñaʼíme! Ñapensamíntena avei mbaʼeichaitépa javyʼáta ág̃a ‘umi omanóva ohendúvo’ Jesús ñeʼẽ ha oikove jey (Juan 5:​28, 29). Añetehápe Jesús ñanemosãso ha ñandepeʼa mbaʼe vaígui (jaleemína Hechos 5:31; Tito 1:4; Rev. 7:10).

19, 20. a)Mbaʼéichapa ñanepytyvõ jajepyʼamongetáramo pe Moisés Tuichavéva ojapovaʼekuére? b) Mbaʼépa jahecháta pe párte oúvape?

¹⁹ Ñande ikatu ñaipytyvõ ñande rapichakuérape ojesalva hag̃ua Jesús rupive. Upearã jaikuaauka Ñandejára Ñeʼẽ ha ñamboʼe umi héntepe (Isa. 61:​1-3). Upéicharõ, jajepyʼamongetákena hetaite mbaʼe ojapóvare ñanderehehápe pe Moisés Tuichavéva. Péicha ñande jerovia imbaretevéta ha ndajakyhyjemoʼãi ág̃a oñehundi vove ko múndo aña (Mat. 25:​31-34, 41, 46; Rev. 7:​9, 14).

²⁰ Jesús ojapo heta mbaʼeguasu Moisés ndaikatumoʼãiva ojapo; upévare ojeʼe hese Moisés Tuichavéva. Umi mbaʼe Jesús heʼi ha ojapovaʼekue ou porã entéro yvypórape ha ñandepeʼa ivaívagui tapia g̃uarã. Péro oĩve ambue kuimbaʼe oservíva Ñandejárape orrepresentavaʼekue Jesúspe. Pe párte oúvape jahecháta mbaʼérepa Jesucristo haʼe avei David ha Salomón tuichavéva.

Emyesakãmína

Mbaʼérepa jaʼe...

• ... Jesús haʼeha peteĩ proféta tuichavéva Moisésgui?

• ... Jesús ñanepytyvõ porãveha ñañemoag̃ui hag̃ua Jehováre?

• ... tuichaveha umi mbaʼe Jesús ojapóva ñanemosãso hag̃ua?

[Porandu ñahesaʼỹijóva]

[Taʼanga ha rrekuádro oĩva páhina 26-pe]

MBAʼÉPEPA OJOJOGUA AVEI MOISÉS HA JESÚS

◻ Mokõivéva oheja peteĩ puésto iñimportánteva oservi hag̃ua Jehová ha ipuévlope (2 Cor. 8:9; Fili. 2:​5-8; Heb. 11:​24-26)

◻ Mokõive Ñandejára rembiporavo térã “cristo” (Mar. 14:​61, 62; Juan 4:​25, 26; Heb. 11:26)

◻ Mokõivéva ou Jehová rérape (Éxo. 3:​13-16; Juan 5:43; 17:​4, 6, 26)

◻ Mokõive ndaipochyreíri (Núm. 12:3; Mat. 11:​28-30)

◻ Jehová omongaru hetápe Moisés ha Jesús rupive (Éxo. 16:12; Juan 6:​48-51)

◻ Mokõivéva hués ha léi meʼẽha (Éxo. 18:13; Mal. 4:4; Juan 5:​22, 23; 15:10)

◻ Mokõivéva omoakã Ñandejára puévlo (Núm. 12:7; Heb. 3:​2-6)

◻ Mokõive testigo de Jehová iñeʼẽrendúva (Heb. 11:​24-29; 12:1; Rev. 1:5)

◻ Omanóvo hikuái Jehová oñomi hetekue (Deu. 34:​5, 6; Luc. 24:​1-3; Hech. 2:31; 1 Cor. 15:50; Jud. 9)