Akóintekena japredika kyreʼỹ

SAPYʼÁNTEPA nekaneʼõ ha nanekyreʼỹvéi repredika hag̃ua? Ñanekangyse ningo oĩ jave oñemoĩva ñanderehe, jajepyʼapyeterei, ñanderasykatu ha nosẽporãi jave ñandéve mbaʼeve. Péro Jesús ehémplo ñanemokyreʼỹeterei. Haʼe ningo ogueropuʼaka umi mbaʼe ijetuʼuvéva jepe, “oikuaágui ohasa asy rire ipyʼarory ha ovyʼataha” (Heb. 12:​2, BNP). Haʼe oikuaa ohechaukáramo Satanás ijapuha, ombovyʼataha Jehovápe (Pro. 27:11).

Ñande ñambovyʼáta avei Jehovápe akóinte japredika kyreʼỹramo. Péro, mbaʼépa jajapóta oiméramo umi provlemaita jarekóva ñanemokangyhína japredika hag̃ua? Krystyna, peteĩ ermána ijedámava heʼi: “Pyʼỹinte chekaneʼõ ha chekangy. Heta vése ajepyʼapyeterei, cherasykatu ha nachekyreʼỹvéi apredika hag̃ua”. Mbaʼépa ikatu jajapo japredika kyreʼỹ hag̃ua ñaneprovléma hetáramo jepe?

Jasegi umi proféta ehémplo

Akóinte japredika kyreʼỹ hag̃ua ñañehaʼãvaʼerã ñapensa umi proféta yma guaréicha. Pór ehémplo Jeremías okyhyjevaʼekue Jehová omoĩrõ guare chupe iprofétaramo. Péro haʼe ojerovia rupi Jehováre, cuarenta áño pukukue ojapo hembiaporã ijetuʼuetéva omeʼẽvaʼekue chupe (Jer. 1:6; 20:​7-11).

Hénrykpe omokyreʼỹeterei Jeremías ehémplo. Haʼe heʼi: “Setenta áño rupíma apredika ha sapyʼánte chekangy oĩ rupi nohenduséi ha nomombaʼéiva pe marandu porã. Upéicha jave apensa Jeremías rehe, mbaʼeichaitépa haʼe ohayhu Jehovápe ha ojerovia hese. Ha upéva omombarete ha omokyreʼỹvaʼekue chupe osegi hag̃ua omombeʼu Ñandejára rembipota” (Jer. 1:17). Pe proféta ehémplo omokyreʼỹ avei Ráfałpe. Upévare heʼi: “Chemanduʼa meme mbaʼéichapa Jeremías nopensaivaʼekue ijehénte, ojerovia guei Jehováre ha ojapo heʼíva chupe okyhyjeʼỹre avavégui”.

Isaías haʼe avei peteĩ proféta, ha iñehémplo hetaiterei kristiánopema oipytyvõ opredika kyreʼỹ hag̃ua. Jehová heʼi proféta Isaíaspe umi Israelgua nohendumoʼãiha voi chupe: ‘Embopyʼahatã koʼã tetãygua ani hag̃ua oike mbaʼeve ipyʼapýpe. Ha emboty ijapysakuéra ani hag̃ua ohendu’. Heʼisépa upéva pe proféta ojapo reitamaha Jehová ojeruréva chupe? Nahániri, Ñandejára ndeʼíri upéva. Isaíaspe oñemeʼẽrõ guare hembiaporã, haʼe heʼi: ‘Ápe che aime, chemondo chéve!’ (Isa. 6:​8-10, ÑÑB). Ha ojapopaite Jehová heʼíva chupe. Ndépa reime avei rejapo hag̃uáicha upéicha? Reñehaʼãmbaitépa repredika kyreʼỹ?

Akóinte japredika kyreʼỹ hag̃ua, ndovaléi ñamboguapyeterei ñandejehe oĩramo nañanerenduséiva ha ijarhélva ñandéve predikasionhápe, Isaías ojapovaʼekue upéicha. Rafał omombeʼu mbaʼépa oipytyvõ chupe anive hag̃ua ikangy. Haʼe heʼi: “Oĩramo oñeʼẽ vaíva chéve predikasión rehe, añehaʼã ani apensaiterei upévare. Ñande ningo ndaikatúi voi jaovliga ñande rapichakuérape ohendu hag̃ua pe marandu porã”. Anna heʼi avei: “Che añehaʼã ani apensa umi mbaʼe chemokangýtavare. Añemboʼe ha alee pe téysto káda diagua asẽ mboyve apredika. Upéva ningo tuicha chepytyvõ”.

Ezequiel proféta vaʼekue avei ha haʼe omomarandu umi hudío oĩvape Babilonia poguýpe (Eze. 2:6). Haʼe nomombeʼúiramo mbaʼépa Ñandejára ojapóta, ojekulpáta chupe umi iñañáva omanovaʼekuére. Upévare Jehová heʼi chupe: “Ndéve ajeruréne huguykue repy” (Eze. 3:​17, 18).

 Henryk oñehaʼã avei Ezequiel ojapo haguéicha, upévare heʼi: “Che káusare ndaipotái ni peteĩ che rapicha omano. Hetaiterei ningo oĩ ikatu vaʼerã gueteri ojesalva” (Hech. 20:​26, 27). Ha Zbigniew opensa avei upéicha: “Ezequiel osegi ojapo hembiapo ha nopenái la hénte heʼívare. Upéva chepytyvõ ahecha hag̃ua predikasión ñande Apohare ohechaháicha”.

Aníkena nderesarái nereimeiha neaño

Japredika jave ningo nañaiméi ñaneaño. Enterove ‘ñambaʼapo Ñandejára rembiapópe’, apóstol Pablo ojapo haguéicha (1 Cor. 3:9). Ha jahecha haguéicha Krystyna heta vése ikangyvaʼekue, upévare heʼi: “Akóinte ajerure Jehovápe omeʼẽmínte hag̃ua chéve ipuʼaka, ha haʼe katuete oĩva che ykére”. Upeichaite, ñaikotevẽ ningo Ñandejára espíritu sánto akóinte japredika kyreʼỹ hag̃ua (Zac. 4:6).

Japredika jave Ñandejára espíritu ñanepytyvõ ñanembaʼeporã, ñanepasiénsia, ñandepyʼaguapy ha javyʼa hag̃ua (Gál. 5:​22, 23). Upéva ñanepytyvõ jagueropuʼaka hag̃ua opa mbaʼe ha jasegi japredika. Henryk heʼi: “Predikasión ningo chepytyvõ cherekoporãve hag̃ua: aaprende chepasiénsia, chembaʼerechakuaa ha ani hag̃ua chekangy oimeháicha rei.” Akóintekena japredika kyreʼỹ ijetuʼúramo jepe umi mbaʼe jahasáva. Upéicharõmante ikatúta ñamoheñói ñande rekovépe umi mbaʼe porã Jehová espíritugui oúva.

Jehová oiporu hiʼanhelkuérape omoakã hag̃ua ko tembiapo ijojahaʼỹva (Rev. 14:6). La Bíbliape heʼi yvágape oĩha “hetaiterei” ánhel (Rev. 5:11). Haʼekuéra oĩ Jesús poguýpe ha oipytyvõ Ñandejára siervokuérape ko yvy ape ári. Ñanemanduʼápa ko mbaʼére japredika jave?

Anna heʼi: “Tuichaiterei ningo ñanemokyreʼỹ jaikuaávo umi ánhel oĩha ñanendive japredika jave ha jajepyʼamongetávo upévare. Amombaʼeterei ningo mbaʼéichapa ñanepytyvõ hikuái. Jehová ha Jesús ningo oiporu chupekuéra ñanepytyvõ hag̃ua.” Aje piko tuichaite mbaʼe jaservi Jehovápe koʼã ánhel ykére!

Upéicha avei tuichaiterei mbaʼe jaikuaa heta ermánope ha jaservi Jehovápe hendivekuéra. Ha oimevaʼerã nde rehasámava koʼápe heʼíva: ‘Iérro niko iérrope jey oñehaimbeʼe, yvypóra katu oñehekomboʼe hapicha ndive oñemongetávo’ (Pro. 27:17).

Japredikáramo ñane ermanokuérandi ñaaprendéta heta hendáicha japredika hag̃ua ha ñandekatupyryvéta. Elżbieta heʼi: “Apredika jave diferénte ermánondi, ahechauka ahayhuha chupekuéra ha umi che rapicha apredikávape”. Ñandékena ñañehaʼã avei ani japredika peteĩndi meme. Upéicha jajapóramo jaikuaavéta heta ermánope ha javyʼavéta.

Ñañangarekókena ñandejehe ñaneresãi ha ñaime porã hag̃ua Jehovándi

Jajeprepara porã vaʼerã ani hag̃ua ñaneateʼỹ japredika hag̃ua. Ñamoĩvaʼerã peteĩ óra jastudia hag̃ua ñaneañohápe ha japytuʼu porã. Upéicha, ñañangarekovaʼerã ñandejehe ñaneresãi ha ñaime porã hag̃ua Jehovándi.

La Bíbliape heʼi: “Ikatupyrýva rembiapo, mbaʼe porã memete” (Pro. 21:5). Zygmunt, koʼág̃a orekómava 88 áño, heʼi: “Chéngo ahechapa raẽ voi mbaʼéichapa ajapo porãvéta che rembiapo ha mbaʼéichapa aiporúta che tiémpo predikasionrã. Péicha ajapo rupi, che rembiapo osẽ porãve chéve”.

Jaikuaa porãramo Ñandejára Ñeʼẽme heʼíva ñanemombaretéta ha ñanepytyvõta japredikakuaa hag̃ua. Ñande rete ombaʼapo porã hag̃ua ningo jakaruvaʼerã, upéicha avei ñamombaretevaʼerã ñande jerovia japredika kyreʼỹ hag̃ua. Jastudia meméramo la Biblia, umi lívro ha rrevísta omeʼẽva jepi ñandéve ñaikotevẽve jave ‘pe tembiguái jeroviaha ha iñarandúva’, ñanembaretéta ha ñanekyreʼỹta japredika meme hag̃ua marandu porã (Mat. 24:​45-47).

Elżbieta heta mbaʼépe okambia opredika porãve hag̃ua. Haʼe heʼi: “Koʼág̃a saʼive ahecha téle, upévare ajeprepara porãve apredika hag̃ua.  Rolee jave la Biblia pyharekue, apensa umi che rapicha atopavaʼekuére predikasiónpe. Aheka umi téysto ha umi téma ikatu vaʼerã oipytyvõ chupekuéra”.

Japytuʼu porãramo ñanekyreʼỹvéta ha japredika porãvéta. Péro, jaiporúramo ñane tiémpo jaiko hag̃ua vyʼarã rapykuérinte ikatu ñaneateʼỹma japredika hag̃ua. Andrzej ningo opredika kyreʼỹ, ha heʼi: “Ndajapytuʼuporãiramo ningo nañameʼẽvéima mbaʼeve jajapo hag̃ua, ha upéva ndahasyiete ñanemokangy hag̃ua. Upévare añehaʼã ajapo ikatumíva ani hag̃ua oiko cherehe upéicha” (Ecl. 4:6).

Ñañehaʼãmbaitéramo jepe, saʼieterei oĩ ñande rapicha omombaʼéva pe marandu porã. Péro ñanemokyreʼỹeterei jaikuaávo Jehová ndahesaraimoʼãiha umi mbaʼe jajapóvagui jaservi hag̃ua chupe (Heb. 6:10). Oĩramo jepe noñemongetaséiva ñanendive jaha jave japredika, ikatu oñeʼẽhína hikuái ñane rembiapóre ñande rapykuerépema. Ikatu oiko yma Ezequiel tiémpope oikovaʼekue: umi hénte ‘oikuaa porã oĩ hague peteĩ proféta ijapytepekuéra’ (Eze 2:​5, ÑÑB). Hasýramo jepe japredika hag̃ua, hetaiterei mbaʼe porã jahupyty ñande ha umi ñanerendúva avei.

Zygmunt heʼi: “Predikasión ningo ñanepytyvõ ñanderekoporãve hag̃ua. Upéicha avei jahechauka jahayhuha Ñandejárape ha ñande rapichakuérape”. Ha Andrzej heʼi avei: “Tuichaite mbaʼe ningo japredika, pe ohendúva marandu porã ikatu hína ojesalva. Ko tembiapo ningo ndaijojahái ha arakaʼeve ndojejapomoʼãvéima peichaite peve”. Ñande avei ikatu jahupyty hetaiterei mbaʼe porã akóinte japredika kyreʼỹramo (2 Cor. 4:​1, 2).

[Nóta oĩva taʼanga ndive páhina 31]

Akóinte japredika kyreʼỹ hag̃ua, tekotevẽ ñañangareko ñandejehe ñaneresãi ha ñaime porã hag̃ua Jehovándi