Javyʼaiterei ñaipytyvõramo ñande rapichápe oservi hag̃ua Jehovápe

‘Tapeho aipóramo ha pejapo chupekuéra che remimboʼéramo.’ (MAT. 28:19.)

1-3. a) Mbaʼéichapa oñeñandu heta ñane ermáno omboʼévo la Biblia hapichápe? b) Mbaʼe mbaʼépa jahecháta koʼág̃a?

 PETEĨ ermána oikóva Estados Unídospe ha opredikáva umi oñeʼẽvape hindi, heʼi: “Tres mése rupíma amboʼeʼaína la Biblia peteĩ família Pakistanguápe. Rojepokuaaitereíma ningo ojuehe. Che resay pororopa apensávo oho jeytaha hikuái hetãme. Péro avyʼaiterei aipytyvõ haguére chupekuéra oikuaa hag̃ua Jehovápe”.

² Ha ñande, ñañeñandúmapa avei péicha jastudiávo la Biblia ñande rapichándi? Jesús ha hemimboʼekuéra ovyʼaitereivaʼekue omboʼévo hapichakuérape Ñandejára heʼíva. Peteĩ jey Jesús omondo 70 hemimboʼépe opredika hag̃ua ha ou rire vyʼapópe omombeʼu hikuái umi mbaʼe ojapovaʼekue. Ohendúvo upéva Jesús ovyʼaiterei avei (Luc. 10:​17-21). Koʼág̃a hetaiterei oĩ ojapovahína vyʼápe ko tembiapo. Ha pe áño 2007-pe, káda més  ojestudia la Biblia seis millones y medio tapichándi voi.

³ Péro oĩ umi ermáno ndostudiáiva gueteri avavéndi. Ótro katu aréma ndotopavéi peteĩ ostudiaséva. Upévare jahechamína koʼã mbaʼe: Mbaʼérepa heta vése ijetuʼu jastudia hag̃ua ñande rapichándi? Mbaʼéichapa ikatu ñakonsegi peteĩ estúdio? Mbaʼérepa iporã ñañehaʼãmbaite jajapo Jesús heʼivaʼekue: ‘Tapeho aipóramo ha pejapo chupekuéra che remimboʼéramo’? (Mat. 28:19).

Mbaʼépa ikatu ñanemokangy

4, 5. a) Mbaʼépa ojapo heta hénte ojepredikávo chupekuéra? b) Mbaʼépa ijetuʼu jepi heta ñane ermanokuérape?

⁴ Heta lugárpe umi hénte oguerohory ñande livrokuéra ha ostudiase voi hikuái la Biblia. Pór ehémplo peteĩ ermáno Australiaygua oho hembirekóndi opredika hag̃ua Zámbiape. Upéi omombeʼu: “Añete ningo ojeʼevaʼekue oréve. Ko tetãme hetaiterei oĩ ostudiaséva la Biblia. Igustoiterei japredika kállere. Umi hénte oñembojajoa orerendápe ha ojerure umi rrevísta oikotevẽva”. Upépe doscientos mil tapicha rupi ostudia la Biblia 2007-pe. Ikatu voi jaʼe káda ermáno orekoha peteĩ estudiánte jepe.

⁵ Péro oĩ avei umi lugár saʼihápe umi oipotáva ñande lívro térã ostudiaséva la Biblia. Mbaʼérepa? Ndopytái voi hikuái hógape térã noñeʼẽséi rrelihiónre. Heta oĩ okakuaámava voi rrelihionʼỹre, térã ndoikuaasevéiva mbaʼeve ohechávo umi rrelihión japu rembiapo vai. Ótrope katu umi pastór japu ombotavy ha oheja rei (Mat. 9:36). Upévare haʼekuéra noñeʼẽséi la Bíbliare avavéndi.

6. Mbaʼérepa heta ñane ermáno ndopredikavéi yma guaréicha?

⁶ Oĩ avei umi ermáno naikyreʼỹvéiva ambue mbaʼére. Ikatu oime hasy térã ijedáma ha upévare ndaikatuvéima opredika yma guaréicha. Ótro katu heʼi nomboʼekuaaiha. Ojogua hikuái Moiséspe. Jehová heʼírõ guare chupe oho hag̃ua oñeʼẽ pe faraón ndive, haʼe heʼi: “Ái, che Jára, yma guive koʼág̃a peve, che nañeʼẽporãi ha nacheñeʼẽsyryrýi” (Éxo. 4:​10, ÑÑB). Heta vése ikatu jaʼe upéva jakyhyjégui ñasẽ vaírõ g̃uarã. Ikatu ñaimoʼã ndaikatuiha ñaporomboʼe porã ha upévare nañaipytyvõmoʼãiha avavépe ojevautisa hag̃ua. Koʼã mbaʼére sapyʼánte nañañehaʼãi voi ñaporomboʼe. Mbaʼéichapa ikatu ñakambia?

Mbaʼépa jareko ñane korasõme

7. Mbaʼérepa Jesús opredikasevaʼekue?

⁷ Ñepyrũrã tekotevẽ jahecha mbaʼépa jareko ñane korasõme. Jesús heʼivaʼekue: ‘Ñande juru oñeʼẽ upe ñande pyʼapýpe henyhẽvagui’ (Luc. 6:​45, JMP). Ha mbaʼépa oreko Jesús ikorasõme? Haʼe ojepyʼapyeterei umi héntere. Upévare omboʼese chupekuéra Ñandejára heʼíva. Ohechávo mbaʼéichapa ikangy umi hudiokuéra jerovia, oiporiahuvereko chupekuéra. Ha heʼi hemimboʼekuérape: “Heta pe ñemitỹngue [...]. Upéva rehe pejerurevaʼerã pe kóga járape tombouve mbaʼapohára omonoʼõ hag̃ua” (Mat. 9:​36-38, JMP).

8. a) Mbaʼérepa iporã ñanemanduʼa? b) Mbaʼépa heʼi peteĩ kuñakarai ostudiáva la Biblia?

⁸ Ñapensamíntena mbaʼechaitépa ñanepytyvõ pe ermáno ñanemboʼevaʼekue la Biblia. Upéicha jahechakuaáta tuicha ikatuha ñaipytyvõ avei ñande rapichakuérape. Peteĩ kuñakarai ohai Betélpe: “Ahayhueterei ningo umi testígo oúvape chemboʼe la Biblia. Che aikuaase voi hetaiterei mbaʼe ha upévare mbeguekatu oho ore estúdio. Péro haʼekuéra ipasiénsia cherehe ha chemboʼe umi mbaʼe oikuaáva.  Aagradese Jehová ha Jesúspe ombou haguére chupekuéra”.

9. Mbaʼe rehépa ojesarekovaʼekue Jesús ha mbaʼéichapa ikatu jajapo upéva?

⁹ Ñanemanduʼavaʼerã avei Jesús opredika hague hetápe, péro ndahetái umi ojapóva haʼe heʼíva (Mat. 23:37). Ha oĩ voi umi hemimboʼe upéi ohejavaʼekue chupe (Juan 6:66). Upéicharamo jepe Jesús ndeʼíri ndovaleiha pe marandu haʼe omyerakuãva. Jepe ndaopavavéi omombaʼe ko marandu, haʼe ojesareko umi ohendúvare chupe. Ombojoja chupekuéra umi kogaty otyarõmbáva rehe oĩva oñembyaty hag̃uáicha, ha ovyʼa opredikávo (jaleemi Juan 4:​35, 36). Upévare ñapensa rangue nosẽiha ñandéve mbaʼeve, iporãve ñapensa jatopataha gueteri ñanerenduséva. Mbaʼépa ñanepytyvõta ñapensa hag̃ua péicha?

Ñañotỹramo katuete heñóita

10, 11. Mbaʼépa ikatu jajapo akóinte javyʼa hag̃ua predikasiónpe?

¹⁰ Pe oñemitỹva ojerovia osẽ porãtaha chupe hemitỹngue. Péicha avei japredika jave jajeroviavaʼerã ikatuha jatopa peteĩ tapicha ostudiaséva. Péro ñañehaʼãramo jepe ikatu ndajatopái umi héntere hógape japredika jave, térã jaha jeývo javisita umi ñanerenduvaʼekuépe. Koʼã mbaʼére ikatu ñanekangy. Upéicharõ iporãvénepa nañasẽvei japredika? Nahániri. Oĩ gueteri heta ñande rapicha oikuaáva Jehovápe ojepredikágui chupe hógape.

¹¹ Akóinte javyʼa hag̃ua predikasiónpe tekotevẽ avei japredika ótro hendáicha. Pór ehémplo, ñañehaʼãmapa japredika kállere térã negosioha rupi? Ikatúnepa japredika teléfonope térã jajerure umi héntepe  iteléfono número ñañeʼẽve hag̃ua hendivekuéra upe rire? Jajapóramo péicha, katuete jatopáta umi ohenduséva pe marandu porã ha javyʼáta.

Oĩramo nañanerenduséiva

12. Mbaʼépa ikatu jajapo umi hénte ndoikuaaséiramo mbaʼeve rrelihióngui?

¹² Mbaʼépa ikatu jajapo umi hénte ndoikuaaséiramo mbaʼeve rrelihióngui? Upéicha jave ikatu ñañeʼẽ umi mbaʼe oipyʼapývare chupekuéra. Apóstol Pablo heʼivaʼekue umi Corintoyguápe: ‘Aiméramo isrraelitakuéra apytépe aiko isrraelítaramo. Umi ndoikóivape Moisés léipe, aiko haʼekuéravaramo, aiméramo jepe Ñandejára léipe. Opavavépe aiko haʼekuéraicha’. Mbaʼérepa ojapo upéva? “Jahechápa ndahupytýi peteĩvapente jepe” (1 Cor. 9:​20-22, BNP). Ñande ikatu avei ñañeʼẽ umi mbaʼe enterovépe oipyʼapývare. Pór ehémplo mbaʼéichapa ikatu jaiko porãve ñande rogapýpe térã mbaʼéichapa ikatu javyʼave. Ñapensavaʼerã mbaʼéichapa ohenduséta hikuái pe marandu porã.

13, 14. Mbaʼépa ikatu jajapo javyʼave hag̃ua predikasiónpe?

¹³ Umi lugár oĩháme heta nañanerenduséiva, oĩ umi ermáno opredika kyreʼỹva gueteri. Mbaʼépa ojapo hikuái upearã? Oñehaʼã rupi oaprende ambue idióma. Pór ehémplo peteĩ ermáno ha hembireko ohecha opredikahápe hikuái oĩha hetaiterei chíno. Orekóramo jepe hikuái 60 áño rupi, pe ermáno omombeʼu mbaʼépa ojapo: “Ropensa iporãtaha roaprendéramo iñeʼẽnguéra. Upearã rostudiavaʼerã káda día, péro ideprovechoiterei oréve, koʼág̃a rorekóma heta estúdio”.

¹⁴ Ndaikatúiramo ñaaprende ambue idióma, jareko pe folléto Notísia Porã opavave Tapichakuérape g̃uarã, ikatúva jaiporu jatopa jave peteĩ oñeʼẽva ambue idióma. Avei ikatu jagueraha chupe lívro térã rrevísta iñeʼẽme. Tekotevẽ jahechakuaa heta vése ijetuʼutaha ñañontende hag̃ua hendivekuéra. Péro ani ñanderesarái: ‘Pe oñemitỹ hetáva, heta omonoʼõta’ (2 Cor. 9:6).

Enterove ñaipytyvõ

15, 16. a) Mbaʼérepa jaʼe enterove ñaipytyvõha peteĩ tapicha oservi hag̃ua Jehovápe? b) Mbaʼéichapa oipytyvõ umi ermáno ijedámava?

¹⁵ Peteĩ ñande rapicha oservi hag̃ua Jehovápe, enterove ñaipytyvõvaʼerã. Mbaʼére piko jaʼe upéva? Jesús heʼivaʼekue: “Peẽ pejoayhúramo, opavave ohechakuaáta peẽ haʼeha che remimboʼe” (Juan 13:35). Ha umi estudiánte ohóva rreunionhápe ohechakuaa jajoayhuha. Peteĩva heʼi: “Ahaseterei rreunionhápe. Enterove ningo cheguerohoryeterei!”. Jesús heʼivaʼekue oĩtaha avei oñemoĩva hemimboʼekuérare hogapýpe (jaleemi Mateo 10:​35-37). Péro kongregasiónpe jatopa ‘ermáno, ermána, sy, túva, tajýra ha taʼýra’ (Mar. 10:30).

¹⁶ Umi ermáno ha ermána ijedáva oipytyvõ avei umi ipyahúvape. Mbaʼéichapa? Jepe heta vése ndostudiái avavéndi, haʼekuéra heʼíva rreunionhápe omombarete umi ipyahúvape ojerovia hag̃ua Jehováre. Avei aréma oiko hikuái “tekojojápe” ha upéva enterove jaguerohory ha omokyreʼỹ hetápe oservi hag̃ua Jehovápe (Pro. 16:31).

Ani jajepyʼapy

17. Mbaʼépa ikatu jajapo ñaimoʼãramo ndaikatuiha ñamboʼe ñande rapichápe?

¹⁷ Mbaʼépa ikatu jajapo oiméramo ñaimoʼã ndaikatumoʼãiha ñamboʼe ñande rapichápe? Iporã ñanemanduʼa Jehová oipytyvõ hague Moiséspe omeʼẽvo chupe espíritu sánto. Ha omondo hendive  iñermáno Aarónpe (Éxo. 4:​10-17). Jesús heʼi avei hemimboʼekuérape espíritu sánto oipytyvõtaha chupekuéra opredika hag̃ua (Hech. 1:8). Ha nomondói chupekuéra haʼeño, mokõi mokõi katu (Luc. 10:1). Upéicharõ ijetuʼúramo ñandéve jastudia hag̃ua ñande rapichándi, jajerurevaʼerã Jehovápe tañanemoarandu ha tañanemombarete. Avei iporã jajerure peteĩ ermáno ikatupyrývape ñanepytyvõ hag̃ua. Jehová ningo oiporavo umi ‘ikangývape’, umi tapicha ko múndo nomombaʼéiva ojapo hag̃ua ko tembiapo iporãitéva. Ñapensávo upévare ñanekyreʼỹta ñamboʼe hag̃ua ñande rapichápe (1 Cor. 1:​26-29).

18. Mbaʼépa ikatu ñanepytyvõ ani hag̃ua jajepyʼapy?

¹⁸ Ñapensáramo ndaikatumoʼãiha ñaipytyvõ avavépe, mbaʼépa ñanepytyvõta ani hag̃ua jajepyʼapyeterei? Tekotevẽ ñanemanduʼa peteĩ tapicha oservise hag̃ua Jehovápe nodependeiha ñanderehénte. Ndahaʼéi ningo peteĩ okosinávaicha, pe okosinávare odepende hétapa la tembiʼu. Péro ñamboʼévo ñande rapichápe ñanemanduʼavaʼerã oñekotevẽha mbohapy mbaʼe. Primero, Jehová voi oipytyvõvaʼerã chupekuéra (Juan 6:44). Upéi ñande ha umi ermáno ñañehaʼã ñamboʼe chupe ha ñaipytyvõ oho porã hag̃ua (jaleemi 2 Timoteo 2:15). Ha tercero katu, haʼe voi oñehaʼãvaʼerã ojapo umi mbaʼe oikuaáva (Mat. 7:​24-27). Ñambyasy ningo oĩramo peteĩ ndostudiasevéiva la Biblia, hiʼã ñandéve enterove oservi Jehovápe. Péro jaikuaa Jehová ohusgataha peteĩteĩme (Rom. 14:12).

Nañambyasymoʼãi arakaʼeve

19-21. a) Mbaʼéichapa ñanepytyvõ jastudiáramo ñande rapichándi? b) Mbaʼéichapa ohecha Jehová jajapóva chupe g̃uarã?

¹⁹ Jastudiáramo ñande rapichándi ñamotenondeñaína Jehová rembipota. Avei ñanemanduʼa porãve Ñandejára Ñeʼẽ heʼívare ha ñamombaʼeve. Pór ehémplo, Barak peteĩ prekursór heʼi: “Ñamboʼe hag̃ua ñande rapichápe jastudia porã vaʼerã Ñandejára Ñeʼẽ. Nañaipytyvõmoʼãi chupe ñande voi nañantendéiramo umi mbaʼe ñamboʼéva”.

²⁰ Ha oiméramo ndajastudiái avavéndi, heʼítapa Jehová ndovaleiha jajapóva chupe g̃uarã? Nahániri. Haʼe omombaʼeterei opa mbaʼe jajapóva ñamombaʼeguasu hag̃ua chupe. Japredikávo enterove ñaipytyvõ Ñandejárape ko tembiapópe. Péro javyʼaiteve jastudiávo ñande rapichándi, upéicha jahecha mbaʼéichapa Ñandejára omongakuaa pe ñañotỹvaʼekue (1 Cor. 3:​6, 9). Amy peteĩ prekursóra heʼi: “Jahechávo ñane estudiánte oñehaʼãha ojapo umi mbaʼe oaprendéva, jaagradese Jehovápe ñanepytyvõ haguére. Upéicha ñameʼẽ ñande rapichápe peteĩ rregálo iporãitereíva: oikuaa Jehovápe ha ikatu oikove opa ára g̃uarã”.

²¹ Ñañehaʼãramo jastudia ñande rapichándi, jajesarekóta Ñandejára rembipotáre ha jajeroviavéta jaikotaha pe múndo pyahúpe. Ha Jehová ñanevendesíramo ikatu ñaipytyvõ ñande rapichápe ojesalva hag̃ua (jaleemi 1 Timoteo 4:16). Upéva ningo ndaijojahái!

Ñanemanduʼápa?

• Mbaʼérepa ikatu ijetuʼu ñandéve jastudia ñande rapichándi?

• Mbaʼépa ikatu jajapo umi hénte nohenduséiramo pe marandu porã?

• Mbaʼérepa iporã ñañehaʼã ñamboʼe ñande rapichápe?

[Poarandu ñahesaʼỹijóva]

[Nóta oĩva taʼanga ndive páhina 9]

Ñañehaʼãpa japredika opáicha jatopa hag̃ua umi ipyʼaporãvape?