Mbaʼe mbaʼépa ñanemboʼe Santiago ha Pedro kuatiañeʼẽ
Jehová Ñeʼẽ ningo oikove
Mbaʼe mbaʼépa ñanemboʼe Santiago ha Pedro kuatiañeʼẽ
OHASA rire 30 áño rupi Pentecostés áño 33 guive, Jesús ermanoanga hérava Santiago ohai peteĩ kárta “umi doce trívu” Israelguápe. Koʼãva hína umi kristiáno ohótava yvágape (Sant. 1:1). Santiago omombaretese umi kristiáno jerovia ikatu hag̃ua ogueropuʼaka hikuái umi mbaʼe vai oikóva. Avei omeʼẽ chupekuéra konsého osolusiona hag̃ua heta provléma oĩva umi kongregasiónpe.
Apóstol Pedro katu ohai umi ermánope peteĩ kuatiañeʼẽ, pe mburuvicha Romaygua hérava Nerón oñepyrũ mboyve opersegi kristianokuérape áño 64-pe. Pedro oipota haʼekuéra omombarete ijerovia ha omokyreʼỹ chupekuéra upearã. Upe riremínte ohai jey ótro kuatiañeʼẽ. Pedro oipota imanduʼa meme hikuái Ñandejára Ñeʼẽ heʼívare, ha heʼi avei hiʼag̃uimaha Jehová ára. Katuete ou porãitereíta ñandéve Santiago ha Pedro kuatiañeʼẽ (Heb. 4:12).
ÑANDEJÁRA OMOARANDU UMI ‘OJERURÉVAPE JEROVIÁPE’
Santiago ohai: ‘Ovyʼavaʼerã pe kuimbaʼe ogueropuʼakáva ojepyʼaraʼã jave; osẽ porãramo oñemeʼẽvaʼerã chupe pe tekove tapia g̃uarã’. Jehová ñanemoarandúta jagueropuʼaka hag̃ua umi provléma, péro upearã ‘jajerurevaʼerã chupe jeroviápe’ (Sant. 1:5-8, 12, BNP).
Santiago heʼi umi oporomboʼéva kongregasiónpe iñarandu ha ojeroviavaʼerãha. Upéi heʼi ñane kũ michĩramo jepe ikatuha ombyaipaite ñande rete. Omombeʼu avei mbaʼe mbaʼépa ikatu ñanemoĩ vai Jehovándi. Ha heʼi mbaʼépa ikatu ojapo peteĩ kristiáno ikangýramo ijerovia (Sant. 3: 1, 5, 6; 5:14, 15)
Porandukuéra:
2:13, ÑÑB. Mbaʼérepa Santiago heʼi ‘pe oporoporiahuverekóva natekotevẽiha okyhyje huísio áragui’? Ág̃a Jehová ñandehusga vove imanduʼáta jaiporiahuvereko hague ñande rapichápe ha ñaneperdonáta Jesús sakrifísio rupive (Rom. 14:12). Upévare iporãitereíta ñañehaʼãramo jaiporiahuvereko ñande rapichakuérape.
4:5. Mbaʼe téystorepa oñeʼẽ koʼápe Santiago? Haʼe ningo noñeʼẽi peteĩ téystorente. Oiméne imanduʼa Génesis 6:5; 8:21; Proverbios 21:10; ha Gálatas 5:17 ñanemboʼévare.
5:20. Mávapa hína pe ojesalváva ñemanógui? Santiago heʼi ‘pe ombojevýva hembiapo vaívape hape vaígui, oipeʼaha hekove ñemanógui’. Haʼe ningo noñeʼẽihína pe kristiáno oporopytyvõvare, oñeʼẽ guei pe hembiapo vaíva rekove rehe oñembyasy ha okambia rire. Jaʼekuaa pe kristiáno oipytyvõha chupe oĩ porã hag̃ua Jehová renondépe ha upéicha ikatu oiko opa ára g̃uarã. Upévare “ojeheja rei heta tembiapo vaikue”, koʼãva hína upe hembiapo vaíva ojapovaʼekue.
Mbaʼépa ñanemboʼe:
1:14, 15. Pe tembiapo vai ningo oñepyrũ ñapensávo mbaʼe vaíre. Upévare naiporãmoʼãi jaikóramo ñapensa umívare. Upéva rangue jajepyʼamongetavaʼerã umi mbaʼe iporãvare (Fili. 4:8).
2:8, 9. Oĩramo omombaʼevéva hapichápe ipláta haguére térã ambue mbaʼére oñemoĩ Ñandejára léi tuichavévare: jahayhuvaʼerãha ñande rapichápe. Upévare umi kristiáno teépe g̃uarã enterove peteĩchante.
2:14-26. Ñande ningo ‘jajesalva jajerovia haguére’, ndahaʼéi jajapógui Moisés Léi heʼíva térã kristianokuéra léi. Péro tekotevẽ avei jajapo Ñandejára rembipota, ndahaʼéi jaʼentevaʼerã jajeroviaha (Efe. 2:8, 9, BNP; Juan 3:16).
3:13-17, BNP. Pe ‘arandu oúva Ñandejáragui’ ningo tuichaiteve opa ‘arandu yvy arigua, mymba ha demónio rehegua’. Upévare jaheka meme vaʼerã Ñandejára arandu haʼeramoguáicha pláta yvyguy (Pro. 2:1-5).
3:18. Pyʼaguapýpe jaikuaaukavaʼerã Ñandejára goviérno ojapótava. Upévare tekotevẽ ñaneumílde ha ñandepyʼaporã, anítei ñañorairõ ha jajodiskutise.
‘PEJEJOKO HATÃ PENDE JEROVIA REHE’
Pedro omomanduʼa iñermanokuérape orekoha hikuái “peteĩ esperánsa tapia g̃uarãva”: ohóta yvágape oisãmbyhy. Heʼi chupekuéra: ‘Peẽ ningo ñemoñare ojeporavo pyre, saserdóte mburuvicha guasúpe g̃uarã, peteĩ tetã imarangatúva’. Avei oñemoñeʼẽ chupekuéra iñeʼẽrendu hag̃ua ha heʼi: ‘Peikojoa oñondive peiko vaiʼỹre, pejoaju oñondive ha pejoayhu oñoermánoicha’ (1 Ped. 1:3, BNP, 4; 2:9; 3:8).
“Og̃uahẽmahína ára opa mbaʼe opa hag̃ua”, [oñehundi hag̃ua Jerusalén ha itémplo]. Upévare Pedro heʼi iñermanokuérape: “Peneakã porãke ha peñemboʼe katuete”. Heʼive avei: ‘Peñemoakãguapy ha peñeñangarekóke. Peñemoĩ Satanás rehe, pejejoko hatãvo pende jeroviáre’ (1 Ped. 4:7; 5:8, 9, ÑÑB).
Porandukuéra:
3:20-22. Mbaʼéichapa pe vautísmo ñanepytyvõ jajesalva hag̃ua? Tekotevẽramo jepe jajevautisa, ndahaʼéi upéva la ñandesalváva. ‘Jesucristo oikove jey rupi’ ñande ikatu jajesalva. Upéicharõ umi ojevautisáva ojeroviavaʼerã Ñandejára raʼy omano ha oñemoingove jey hague, ha upévare añoite ikatuha jajesalva. Avei ojeroviavaʼerã Jesús ‘oĩha Ñandejára akatúape’ ha orekoha autorida omanóva ha oikovévare. Pe vautísmo oñerrepresentavaʼekue yma ‘8 yvypóra ojesalvárõ guare ýgui’.
4:6. Mávapa hína umi ‘omanóva’ oñemoherakuãvape pe marandu porã? Koʼãva ningo oikovaʼekue ‘ku omanoramoguáicha naiñeʼẽrendúigui Ñandejárape ha hembiapo vaígui’ (Efe. 2:1). Ohendúvo pe marandu porã haʼete oikove jeýva hikuái ikatu haguére oñemoag̃ui Jehováre.
Mbaʼépa ñanemboʼe:
1:7. Ñande jerovia imbarete hag̃ua jahasavaʼerã heta mbaʼe ijetuʼúvare. Peichagua jerovia ñanepytyvõta “jahupyty hag̃ua pe tekove tapia g̃uarãva” (Heb. 10:39, ÑÑB). Aníkena jaguevi oĩramo provléma ijetuʼúva.
1:10-12. Yma ningo umi ánhel ontendesevaʼekue heta mbaʼe profetakuéra ohaíva umi ohótavare yvágape. Péro koʼã mbaʼe hesakã kongregasión oñepyrũ rire ae (Efe. 3:10). Ñañehaʼãkena ñande avei ñantende umi mbaʼe ‘ipypukuvéva’ oĩva Ñandejára Ñeʼẽme (1 Cor. 2:10).
2:21. Jesús ningo ñane ehémplo, ha haʼe ojapo haguéicha, ñaimevaʼerã ñamano hag̃uáicha ñañemoĩvo Jehová goviérno ykére.
5:6, 7. Ñamombeʼúramo Jehovápe umi mbaʼe ñandepyʼapýva, haʼe ñanepytyvõta ñamotenonde hag̃ua hembipota ha ani hag̃ua jajepyʼapyeterei ñane remikotevẽre (Mat. 6:33, 34).
‘ÑANDEJÁRA ÁRA OG̃UAHẼTA’
Pedro ohai: ‘Profetakuéra ningo noñeʼẽivaʼekue ijehegui reínte. Nahániri. Ñandejára rérape guei oñeʼẽ, espíritu sánto ohechaukaháicha chupekuéra’. Jajesarekóramo Ñandejára Ñeʼẽre nañapenamoʼãi umi “mboʼehára japu” rehe térã ambue tapicháre (2 Ped. 1:21; 2:1-3).
Pedro heʼi ‘ára pahávo ouvaʼerãha tapichakuéra oñembohorýva Ñandejára rehe’. Ha heʼi avei Jehová ára og̃uahẽtaha ku ‘mondaha ouháicha’. Omohuʼãvo ikuatiañeʼẽ Pedro ñanemokyreʼỹ ‘ñahaʼarõ ha jaipota hag̃ua ñande pyʼaite guive og̃uahẽ Ñandejára ára’ (2 Ped. 3:3, 10-12, BNP).
Porandukuéra:
1:19. Mávapa pe “mbyja koʼẽ”? Arakaʼépa opuʼã? Mbaʼéichapa jaikuaa upéva oikóma hague? Pe “mbyja koʼẽ” ningo Jesucristo oñepyrũ rire ogoverna (Rev. 22:16). Áño 1914-pe Jesús “opuʼã” peteĩ Rréicha ha oikuaauka koʼẽtĩmaha ha oñepyrũmaha peteĩ ára pyahu. Pedro ningo ohechavaʼekue Jesús rova ha ijao omimbipárõ guare, upéva ohechauka Jesúspe oñemoĩtaha rréiramo ha ikatuha jajerovia Ñandejára Ñeʼẽre. Ñañatendéramo koʼã ñeʼẽre jahechakuaáta pe Mbyja Koʼẽ opuʼãma hague.
2:4. Mbaʼépa hína pe Tártaro? Arakaʼépa ojepoi pype umi ánhel naiñeʼẽrendúivape? Tártaro ningo peteĩ kársel joguaha oñemoingehápe umi ánhelpe, péro ndahaʼéi yvyporakuérape g̃uarã. Upévare umi ánhel ndaikatúi ontende ni michĩmi Jehová ojapótava, haʼete iñypytũmbáva chuguikuéra. Umi oĩva pe Tártarope ndorekovéima esperánsa mbaʼeverã. Ñandejára opoi upépe umi ánhel naiñeʼẽrenduivaʼekue Noé tiémpope, ha opytáta hikuái upéicha og̃uahẽ meve pe ára oñehundi hag̃ua.
3:17. Mbaʼépa umi kristiáno oikuaamavaʼekue oiko mboyve voi? Koʼápe Pedro oñeʼẽ umi mbaʼe oikótavare tenonderã ha Jehová oikuaaukáva chupe ha ambue ohaivaʼekuépe la Biblia. Upéicharamo jepe umi kristiáno ndoikuaaivaʼekue opaite mbaʼe oikótava tenonderã. Péro oikuaáma mbaʼépa ohaʼarõ chupekuéra.
Mbaʼépa ñanemboʼe:
1:2, 5-7. Ñañehaʼãramo jajerovia mbareteve, jagueropuʼaka umi provléma ha jaiko Ñandejára oipotaháicha, jaikuaa porãvéta ‘Ñandejárape ha Jesucrístope’. Avei ñanekyreʼỹvéta ha ikatúta jaʼe koʼã mbaʼe ‘noĩreiriha ñande pype’ (2 Ped. 1:8, JMP).
1:12-15. ‘Jaikuaa ha jarovia añete hag̃ua’ Ñandejára Ñeʼẽ, tekotevẽ ñanemanduʼa meme heʼívare. Upévare iporã jastudia, jalee la Biblia ha jaha rreunionhápe.
2:2. Ñañatendevaʼerã ani jajapo ivaíva ha upévare ñamongyʼa Jehová réra ha iñorganisasión (Rom. 2:24).
2:4-9. Umi mbaʼe ojapovaʼekuére ymave Jehová ohechauka ‘oikuaaha mbaʼéichapa oipytyvõta umi imarangatúvape ojepyʼaraʼã jave, ha mbaʼéichapa ohejáta umi hekoañávape ojekastiga hag̃ua huísio árape’.
2:10-13. Jepe umi ansiáno ojavy naiporãi ñañeʼẽ vai hesekuéra (Heb. 13:7, 17).
3:2-4, 12, BNP. Jajesarekóramo ‘umi proféta marangatu’ ha Jesucristo ‘ñande Salvadór heʼivaʼekuére’, nañanderesaraimoʼãi Jehová ára hiʼag̃uimaha.
3:11-14, BNP. Maymáva ‘ñahaʼarõva ha jaipotáva ñande pyʼaite guive og̃uahẽ Jehová ára’ tekotevẽ 1) ñanderekopotĩ opa mbaʼépe; 2) jajapo meme Jehová oipotáva, pór ehémplo japredika ha ñamboʼe ñande rapichakuérape; 3) ñañehaʼãmbaite ‘ñanderekomarangatu’, ani ko múndo ñanemongyʼa; 4) ñañehaʼã ñanembaʼeporã opa mbaʼépe, ha 5) ñaime ‘pyʼaguapýpe’ Ñandejárandi, ñane ermanokuérandi ha ambue tapichakuérandi.