¿OÑEHUNDÍTAPA ÑANE PLANÉTA?
Umi kaʼaguy
UMI SIENTÍFIKO okompara umi kaʼaguy ñane pulmón rehe, pórke umi yvyramáta omopotĩ pe áire oĩva ñane planétape ñane pulmón ojapoháicha. Umi yvyramáta oipyte pe dióxido de karvóno haʼéva peteĩ gas ñanembyaíva ha ojapo chugui oxíheno. La majoría umi plánta ha animalkuéra oĩva ñane planétape oiko umi kaʼaguýpe, haimete el 80 por ciento voi. Umi kaʼaguy odesapareséramo ivaipaitéta ñane situasión.
Heta kaʼaguy odesaparese
Káda áño ojeity hetaiterei yvyramáta ojeguereko hag̃ua yvy oñeñemitỹ hag̃ua. Ha umi 75 áño ohasa vaʼekuépe ojeity rupi hetaiterei yvyramáta odesapareséma alamita umi kaʼaguy oĩva ko múndope.
Peteĩ kaʼaguy oñehundi vove, oñehundi avei kompletoite umi plánta ha animalkuéra mimi oĩ vaʼekue upépe.
Ñane planéta oĩ preparádo siémpre ojeikove hag̃ua pype
Umi kaʼaguy umi hénte ohundipa vaʼekue, ikatu ijeheguiete oñepyrũ jey heñói ha opuʼã. Umi ekolohísta oñesorprende mbaʼéichapa pyaʼe ojerrekupera jey ijeheguiete umi kaʼaguy, hiʼarive opyta iporãve jey la anteve guarégui. Jahechamína mbaʼéichapa oiko upéva:
-
Heta kaʼaguy ojeity oñeñemitỹ hag̃ua ha upéi ojeheja reíma. Ha unos kuánto investigadór ostudia mbaʼépa oiko peichagua yvýgui. Peteĩ estúdiope oñeanalisa 2.200 terréno oĩva América ha África Occidentálpe. Upe estúdio ohechauka 10 áñope pe yvy ikatumaha ojerrekupera jey ha oñepyrũ peteĩ kaʼaguy pyahu.
-
Pe rrevísta Science heʼi umi investigadorkuéra okalkulaha 100 áñope umi kaʼaguy ojeitypa vaʼekue ikatutaha ojerrekupera jey ijeheguiete, ha oreko jey umi yvyramáta ha animalkuéra oĩ haguéicha voi anteve.
-
Ramoite Brasílpe unos kuánto sientífiko ohechakuaa umi kaʼaguy pyaʼeve ojerrekuperaha ijeheguínte, ñakomparáramo umi kaʼaguy la hénte voi oñehaʼãvare hese okakuaa jey hag̃ua.
-
Pe rrevísta National Geographic oñeʼẽ avei upévare ha heʼi umi investigadór oñesorprendeterei hague, pórke koʼã lugárpe 5 áñopente ijeheguiete oñepyrũ jeýma osẽ umi yvyramáta avave noñotỹiramo jepe.
¿Mbaʼépa ojejapo oñesolusiona hag̃ua upe provléma?
Ko múndo tuichakuére heta hénte oñehaʼã hína oprotehe umi kaʼaguy ha ombaʼapo hikuái ojerrekupera jey hag̃ua umi oñehundíma vaʼekue. Peteĩ infórme omeʼẽva pe Naciones Unidas heʼi koʼã mbaʼe ojejapóva rupive umi 25 áño ohasa vaʼekuépe mas del 50 por ciento saʼiveha umi kaʼaguy ojeitýva.
Péro tekotevẽ ojejapo hetave mbaʼe. Peteĩ infórme heʼi umi áño ohasa vaʼekuépe umi vóske tropikál osegiha odesaparese (Organización Forest Watch).
Pe léi oproivíramo jepe, heta emprésa oitykapa léntoma umi yvyramáta oĩva umi sélva tropikálpe. Péicha ojejapo oñevende hag̃ua ha ojejapo chugui hetaiterei pláta.
Oĩ hénte ombaʼapóva ojeprotehe hag̃ua umi kaʼaguy, haʼekuéra oitýrõ algúno umi yvyramáta, oñotỹma hendaguépe ótro.
¿Mbaʼe esperánsapa omeʼẽ la Biblia?
“Ñandejára Jehová a omoheñói opaichagua yvyramáta hiʼa porãva ha ikatúva ojeʼu” (Génesis 2:9).
Entéro umi kaʼaguy oĩ preparádo ojerrekupera jey hag̃ua ijeheguiete ha oñemantene porã hag̃ua, pórke ñande Kreadór odiseña umi kaʼaguy upéicha. Haʼe oipota ojeprotehe ha ojepuru porã umi kaʼaguy ikatu hag̃uáicha umi animál ha opa mbaʼe oikovéva osegi oñemantene porã.
La Biblia heʼi Ñandejára nopermitimoʼãiha umi hénte osegi ohundi pe naturalésa omyenyhẽ hag̃ua ivolsíllonte. Haʼe nopermitimoʼãi ñane planéta oñehundi. Ehechamína ko rrevísta páhina 15-pe pe artíkulo hérava, “Ñandejára opromete ñane planéta iporãmba jeytaha”.
a Ñandejára héra Jehová (Salmo 83:18).
