OMENDÁVAPE G̃UARÃ
3. Pejorrespeta
¿MBAʼÉPA HEʼISE?
Umi omendáva ojorrespetáramo ojepyʼapy pe ótro oñandúvare noĩriramo jepe de akuérdo peteĩ mbaʼépe. Pe lívro Diez claves para transformar tu matrimonio heʼi: “Umi matrimónio noñemohatãi káda uno heʼívapente. Upéva rangue osegi oñemongeta porã umi provlémare, ojapysaka porã ojuehe ha ohecha mbaʼépa okonvenivéta mokõivévape”.
MBAʼÉPA HEʼI LA BIBLIA: “Pe oporohayhúva [...] nopensái ijehénte” (1 Corintios 13:4, 5).
“Arrespeta rupi che rembirekópe amombaʼeterei chupe ha ndajaposéi mbaʼeve ikatúva omoñeñandu vai chupe ha ombyai la ore matrimónio” (Miguel).
¿MBAʼÉREPA IÑIMPORTÁNTE?
Ména ha tembireko ndojorrespetáiramo ikatu oñepyrũ ojokritika, oñembohory ojuehe térã ojotrata vai, ha umi expérto heʼi koʼã mbaʼe haʼeha peteĩ señál pe matrimónio ojedivorsiataha hína.
“Reapoʼíramo ne rembirekópe térã ejepokuaárõ eñembohory hese, haʼe oúta ndojeroviavéi ijehe ha nokonfiamoʼãvéima nderehe” (Brian).
¿MBAʼÉPA IKATU REJAPO?
EJEPYʼAMONGETA HAG̃UA
Eñatendemi una semánare mbaʼéichapa eñeʼẽ ha etrata ne ména térã ne rembirekópe ha upéi eñeporandumi:
-
¿Mboy vésepa akritika chupe, ha mboy vésepa haʼe chupe ojapo porãha álgo?
-
¿Mbaʼéichapa ahechauka raʼe arrespetaha chupe?
PEÑEMONGETA HAG̃UA OÑONDIVE
-
¿Mbaʼe jaʼe térã jajapóva jepi ohechauka jajorrespetaha?
-
¿Mbaʼe jaʼéva térã jajapóva jepi ohechauka ndajajorrespetaiha?
¡ETANTEAMÍNA!
-
Káda uno ojapo vaʼerã peteĩ lísta peskrivihápe 3 kósa peipotahápe pene rembiayhu ohechauka penderrespetaha. Upéi pemeʼẽ ojupe pende lísta ha peñehaʼã pejapo pe ótrope ogustáva.
-
Ejapo peteĩ lísta reskrivihápe umi kualida porã orekóva ne rembiayhu ha ndegustáva, upéi ere chupe mbaʼeichaitépa emombaʼe umíva.
“Ajapóva rupive ahechauka che ménape aipotaha ovyʼa ha amombaʼetereiha chupe. Heta vése oĩ umi mbaʼe jaʼéva térã jajapóva haʼetéva naiñimportánteiva, péro umívape ikatu jahechauka avei japororrespetaha” (Megan).
Sapyʼánte ñande ikatu ñapensa japororrespetaha péro la iñimportánteva hína ñane ména térã ñane rembireko oñandúpa ojerrespetaha chupe.
¿MBAʼÉPA HEʼI LA BIBLIA? “Pehechaukákena upéicharõ peiporiahuvereko ha pehayhuha pende rapichápe, penembaʼeporã, peneumílde, peikoha pyʼaguapýpe ha penepasiensiaha” (Colosenses 3:12).
