Apóstol Pablo oikuaa porã vaʼekue mbaʼeichaitépa ikatu oporoperhudika umi informasión japu térã propagánda oúva Satanásgui. Péro umi kristiáno itiempopegua ndohechakuaái la pelígro. Por ehémplo, oĩ vaʼekue kristiáno Coríntope ojeroviaitereíva ijehe ha opensa voi núnka ndoʼamoʼãiha Satanás ñuhãme, pórke oimoʼã ijerovia mbaretetereiha (1 Cor. 10:12). Upévare Pablo heʼi chupekuéra: “Péro pe mbói ombotavy haguéicha Évape iletrádo rupi, péicha avei akyhyje oĩrõ g̃uarã omongyʼáva umi mbaʼe pepensáva, ha oipeʼa pende pyʼapýgui pe mborayhu añetegua ha ipotĩva peñandúva Crístore” (2 Cor. 11:3).

Koʼã mbaʼe Pablo heʼi vaʼekue ñanemboʼe ñañatende vaʼerãha ha ani jajerovia ñandejehe. Jahechakuaa vaʼerã ipeligrosoha umi propagánda oúva Satanásgui, péicha ikatúta ñañangareko ñandejehe ani hag̃ua umi mbaʼe operhudika ñane ménte.

Pe propagánda ñañeʼẽha haʼe hína umi informasión ndasiertopáiva térã ijapúva, ojepurúva oñembotavy hag̃ua umi héntepe ýrõ odomina hag̃ua opensa lája ha ojapóva hikuái. Peteĩ lívro oñeʼẽva ko témare heʼi umi propagánda haʼeha informasión “naiporãiva, oporoperhudikáva ha ndaihústoiva”. Avei oñembojoja umi “japúre, oipuru vaívare pe añetegua, oporombotavývare, oporodominávare, [ha] okontrolasévare ñane ménte” (Propaganda and Persuasion).

 Umi propagánda ningo ipeligrosoiterei pórke mbeguekatúpe ikatu odomina ñapensa lája jahechakuaaʼỹre. Ikatu voi ñakompara peteĩ gas ivenenósovare ndaikatúiva jahecha ni ñahetũ. Peteĩ persóna ostudiáva yvyporakuéra lája, hérava Vance Packard heʼi umi propagánda ombaʼapoha ñanderehe “heta hendáicha ñañemeʼẽʼỹre enkuénta”. Ótro karai ostudiáva koʼã mbaʼe heʼi umi propagánda ojapoukaha umi héntepe umi mbaʼe ipeligrósova ha naisentídoiva. Haʼe heʼi avei peichagua informasión omomyiha hetápe ojuka hag̃ua hapichápe ótro rrása haguérente, omoñepyrũ hag̃ua gérra, ha omboligaha heta persónape opersegi hag̃ua hapichápe irrása térã irrelihión káusare (Easily Led—A History of Propaganda).

Ñapensamíntena, yvypóra ñandeichagua ikatúramo ñanembotavy umi propagánda rupive, koʼytevéntema Satanás ojapokuaa upéva. Haʼe ningo ostudia yvyporakuéra lája oiko ñepyrũ guive hikuái ko yvy ape ári. Hiʼarive, koʼág̃a Satanás oreko ipoguýpe “ko múndo kompletoite”, ha ikatu oipuru oimeraẽ mbaʼe ijapu hag̃ua yvyporakuérape (1 Juan 5:19; Juan 8:44). Haʼe oipuru umi propagánda ikatu hag̃uáicha “omohesatũ chupekuéra” ha péicha ombotavy hína ko múndo kompletoitépe (2 Cor. 4:4; Apoc. 12:9). ¿Mbaʼéichapa nde ikatu rejehekýi koʼã mbaʼe vaígui?

Jesús omboʼe vaʼekue peteĩ mbaʼe isensíllova jagerrea hag̃ua umi propagánda kóntrape. Haʼe heʼi: “Peikuaáta pe añetegua ha pe añetegua penemosãsóta” (Juan 8:31, 32). Peteĩ gérrape, umi soldádo tekotevẽ oikuaa mbaʼe informasiónpa ikatu oguerovia, pórke iñenemigokuéra omosarambi meme japu ombotavy hag̃ua chupekuéra. Upéicharõ, ¿mbaʼeichagua informasiónpa ikatu reguerovia? La Bíbliape retopáta umi mbaʼe reikotevẽva regerrea hag̃ua Satanás propagánda kóntrape (2 Tim. 3:16, 17).

Añetehápe Satanás oikuaa upéva. Upéicha rupi ojevale ko múndore ñanderesarea hag̃ua, ha pono jalee ha jastudia la Biblia. Aníkena jaheja ñanembotavy “umi ñuhã” oiporúva pe Aña (Efes. 6:11). Nañañekontentái vaʼerã umi mbaʼe ñaaprende vaʼekuére ñepyrũrãnte. Ñañehaʼãmbaitékena jaikuaave hag̃ua jahávo umi mbaʼe hypyʼũvéva oĩva la Bíbliape (Efes. 3:18). Noam Chomsky, haʼéva peteĩ profesór heʼi: “Ani ñaimoʼã oiketanteha ñane akãme umi mbaʼe siertoguáva. Ñandete ñañehaʼã vaʼerã jaheka umíva”.  Upéicha avei, ñandete jaheka vaʼerã pe añetegua ñahesaʼỹijo porãvo káda día Ñandejára Ñeʼẽ (Hech. 17:11).

Ani ñanderesarái Satanás ndoipotaiha ñapensa hekópe porã ni ñahesaʼỹijo mbaʼeve. ¿Mbaʼérepa? Pórke heʼiháicha peteĩ lívro umi propagánda ombaʼapo porãve umi héntere, noñemoĩrirõ opensa hese hikuái (Media and Society in the Twentieth Century). Upévare, ani regueroviántema entéro mbaʼe rehendúva (Prov. 14:15). Ñandejára omeʼẽ ndéve “pe arandu” remombarete hag̃ua nde jerovia (Prov. 2:10-15, TNM; Rom. 12:1, 2).

Umi soldádo ojesareko memérõ umi propagándare, térã umi informasión japúre ikatu hína okyhyje ha noñorairõsevéi. Umi propagánda ikatu voi omoingo vai ha omoñorairõ umi soldádope ikamarádandi. Avei, koʼãichagua informasión káusare ikatu peteĩ soldádo oñemohaʼeño itrópagui. Peteĩ henerál alemán heʼi vaʼekue Alemania operde hague pe primera gérra mundiál, pórke umi propagánda omosarambíva iñenemigokuéra haʼete ku omongetéva umi soldádope. Koʼág̃arupi avei Satanás oipuru koʼã mbaʼe ani hag̃ua kristianokuéra oiko peteĩ ñeʼẽme. Haʼe oñehaʼã omoingo vai ermanokuérape, ýrõ omopensa chupekuéra Jehová organisasión iñinhustoha térã ojavyha, oñemomombyry hag̃ua hikuái kongregasióngui.

Aníkena jaheja umi propagánda ñanembotavy. Jasegi umi konsého oĩva la Bíbliape ha jaiko peteĩ ñeʼẽme ñane ermanokuérandi. Ñandejára Ñeʼẽ ñanemokyreʼỹ jasegi hag̃ua ñaporoperdona ñande pyʼaite guive ha ñasolusiona pyaʼe porã oimeraẽ provléma jarekóva ñane ermánondi (Col. 3:13, 14; Mat. 5:23, 24). La Biblia heʼi avei ani hag̃ua ñañemomombyry kongregasióngui (Prov. 18:1). Ñañehaʼãmbaitékena ikatu hag̃uáicha ñaĩ preparádo ñandepuʼaka hag̃ua Satanás propagándare. Ñapensamína pe última ves peteĩ ermáno ojapórõ guare algúna kósa ñanembopochýva, ¿ñarreaksionápa Ñandejárape ogustaháicha, térãpa Satanáspe ogustaháicha? (Gál. 5:16-26; Efes. 2:2, 3).

Peteĩ soldádo ndojeroviáiva imburuvicháre ndaikatumoʼãi oñorairõ porã. Upévare iñenemigokuéra oipuru umi propagánda omokangy hag̃ua umi soldádope anive hag̃ua okonfia la omoakãvare chupekuéra. Peichahágui imburuvichakuéra ojavýrõ, umi enemígo oaprovecha ha  heʼi: “Peẽ ningo ndaikatúi pejerovia koʼãichaguáre” térã, “pejapórõ la heʼíva peñehundíta”. Satanás peichaite avei ojapo. Haʼe ndoipotái jajerovia umi Jehová oipurúvare ñanemoakã hag̃ua.

¿Mbaʼéichapa ikatu reñangareko ndejehe? Iporãitereíta ningo rejedesidíramo reñemantenetaha Jehová organisasión ykére. Esegíkena ndefiél ha eapoja umi persóna Ñandejára oipurúvape omoakã hag̃ua ipuévlope, iñimperféktoramo jepe hikuái (1 Tes. 5:12, 13). Umi apóstata ha ambue enemígo osegíta oataka ñane organisasión (Tito 1:10). Haʼetéramo jepe siertoha la heʼíva hikuái, ani reheja nderesarea pyaʼeterei (2 Tes. 2:2). Upéva rangue, esegi pe konsého Pablo omeʼẽ vaʼekue Timotéope: “Akóinte resegi vaʼerã umi mbaʼe reaprende vaʼekue, reikuaa porãgui mávapa nemboʼe umíva” (2 Tim. 3:14, 15). Jehová oipurúma 100 áñorupi pe tembiguái jeroviahápe ñanemboʼe hag̃ua pe añetegua, upéva ñanemomýi vaʼerã jajerovia hag̃ua hese (Mat. 24:45-47; Heb. 13:7, 17).

Satanás ñandeataka avei direktoite. Sapyʼánte oñehaʼã ñanemongyhyje. Umi mbaʼe oporomongyhyjéva ningo “ymaite guivéma ojepuru ojejapo hag̃ua propagánda” (Easily Led—A History of Propaganda). Peteĩ profesór Inglaterragua, hérava Philip Taylor heʼi umi asirio oguereko hague ipoguýpe iñenemigokuérape oipuru rupi umi propagánda ha oporomongyhyjégui. Upéicha avei Satanás ñanemomombyryse Jehovágui, ha upearã oipota jakyhyje pe persekusióngui, ñemanógui, ótro ñande rapichágui térã ambue mbaʼégui (Is. 8:12; Jer. 42:11; Heb. 2:15).

Aníkena jaheja Satanás ojapo koʼã mbaʼe ñanderehe. Jesús heʼi vaʼekue: “Ani pekyhyje umi ikatúvagui pendejuka, ha upéi ndaikatuvéima ojapo mbaʼeve” (Luc. 12:4). Ndajadudái vaʼerã ni michĩmi Jehová oñangarekotaha ñanderehe, omeʼẽtaha ñandéve “pe podér ijojahaʼỹva”, ha ñanepytyvõtaha ñaaguanta hag̃ua Satanás ñandeataka jave (2 Cor. 4:7-9; 1 Ped. 3:14).

Sapyʼánte ikatu ñañedesanima térã jakyhyje. Péro iporã ñanemanduʼa Jehová omokyreʼỹ hague Josuépe heʼívo: “Ani ndepyʼaju ni rekyhyje, pórke Jehová nde Jára oĩ nendive reho rehohápe” (Jos. 1:9, TNM). Oimérõ ñañekevranta ñaína, ensegída ñamombeʼu vaʼerã Jehovápe umi mbaʼe ñandepyʼapýva. Haʼe katuete okumplíta ko promésa: “Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare”. Añetehápe upéva ñanepytyvõta ani hag̃ua jaguerovia umi propagánda oúva Satanásgui (Filip. 4:6, 7, 13).

¿Ñanemanduʼápa pe propagánda oipuru vaʼekue rréi de Asiria mensahéro omongyhyje hag̃ua Ñandejára puévlope? Haʼe oipota kuri pe puévlo oguerovia avave ndaikatumoʼãiha odefende chupekuéra, ni Jehová ndaikatumoʼãiha ojapo upéva. Hiʼarive oasegura voi Jehová ojevale hague umi asíriore ohundi hag̃ua Jerusalén. Péro, ¿mbaʼépa heʼi Jehová? Haʼe heʼi pe rréi de Judápe: “Ani rekyhyje umi mbaʼe ojeʼe vaʼekuégui ndéve, umi mbaʼe heʼíva ndéve oñembohory hag̃ua cherehe pe rréi de Asiria siervokuéra” (2 Rey. 18:22-25; 19:6, TNM). Upéi, Ñandejára ombou hiʼánhelpe ha ojuka 185.000 asíriope peteĩ pyharépente (2 Rey. 19:35).

¿Rehechámapa peteĩ pelíkula ojehechaukahápe peteĩ persóna noñemeʼẽiha enkuénta oñembotavyseha chupe? Katuete ningo resapukaiséne raʼe chupe: “¡Ani reguerovia, ijapu ndéve!”. Upéicharõ, eñeimahinamína umi ánhelpe avei heʼi jave ndéve: “¡Aníkena reheja Satanás nembotavy!”.

Upévare, aníkena ñapena Satanás propagándare (Prov. 26:24, 25). Ñahendu guei Jehovápe ha entéro mbaʼe jajapóvape jahechauka jajeroviaha hese (Prov. 3:5-7). Haʼe ningo ñanderayhueterei ha ojerure asy ñandéve: “Nearandúkena che raʼy, ha embovyʼa che korasõ” (Prov. 27:11). Jajapóramo upéicha, Satanás ndaipuʼakamoʼãi ñanderehe ha japrotehéta ñane ménte.