¿REIKUAÁPA algún ermáno térã ermána ova vaʼekue ótro paíspe oservi hag̃ua oĩvehápe nesesida? Pyʼỹinte oime vaʼerã ñahendu oĩha Testígo ojapóva upéva. Péro ñañeporandumína: “¿Mbaʼépa omomýi chupekuéra oho hag̃ua oservi ótro paíspe? ¿Mbaʼéichapa ojeprepara hikuái upearã? ¿Ndépa ikatúne avei rejapo upéva?”. Jahejána unos kuánto ermáno ha ermána oservíva ótro paíspe torresponde ñandéve koʼã pregúnta.

¿Mbaʼépa penemokyreʼỹ raʼe peservi hag̃ua ótro paíspe oĩvehápe nesesida? Amy, koʼág̃a orekóva 35 áñorupi, ova Estados Unídosgui. Haʼe omombeʼu: “Heta áñore, siémpre apensa aservívo peteĩ país oĩhápe nesesida ojepredika hag̃ua, péro haʼete chéve núnka ndaikatumoʼãiva ahupyty upéva”. ¿Mbaʼépa oipytyvõ Ámype okambia hag̃ua opensa lája? Haʼe heʼi: “Áño 2004-pe, peteĩ matrimónio oservíva Belícepe cheinvita aha hag̃ua hendapekuéra aservi kómo prekursóra por un mes. Ahasa porãiterei hendivekuéra, ha chegusta pe prekursorádo. Un áño upe rire, ava Ghánape aservi hag̃ua kómo prekursóra”.

Stephanie ova avei Estados Unídosgui, ha koʼág̃a oreko 30 áño potárupi. Haʼe heʼi: “Che ningo cheresãi ha namantenéi vaʼerã avavépe. Upévare che posivilida omeʼẽ aservive hag̃ua Jehovápe”. Stephanie ojepyʼamongeta rire, ohechakuaa ikatuha ombaʼapove Jehová servísiope, ha upévare ova Ghánape. Filip ha Ida katu ova Dinamárcagui. Haʼekuéra peteĩ matrimónio oservíva de prekursór, ha mokõivéva oreko 60 áñorupi. Filip ha Ida siémpre ovase vaʼekue peteĩ lugár oĩveháme nesesida, ha upévare oñehaʼãmbaite ohupyty iméta. Filip omombeʼu: “Oñepresentárõ guare pe oportunida, haʼete voi Jehová heʼíva oréve: ‘Peho katu’”. Áño 2008-pe, Filip ha Ida ova Ghánape ha oservi hikuái upépe mas de 3 áño.

 Hans ha Brook ningo peteĩ matrimónio ova vaʼekue avei Estados Unídosgui. Haʼekuéra oreko 35 áñorupi ha oservi de prekursór. Año 2005-pe, oiko rire pe urakán Katrina, Hans ha Brook heta oipytyvõ ha okonsola umi héntepe. Upéi, mokõivéva omyenyhẽ isolisitu ombaʼapo hag̃ua pe konstruksión internasionálpe, péro noñeinvitái chupekuéra. Hans omombeʼu: “Peteĩ asambleahápe rohendu peteĩ diskúrso oñeʼẽva rréi David rehe. Chupe noñepermitíri kuri omopuʼã pe témplo, upémarõ oñehaʼã oipytyvõ ambue hendáicha. Ko ehémplo orepytyvõ rohechakuaa hag̃ua ikatunteha avei rokambia ore méta” (1 Crón. 17:1-4, 11, 12; 22:5-11). Brook heʼi: “Jehová oipota rojapo ótra kósa”.

Hans ha Brook ohendu heta experiénsia porã ohasa vaʼekue iñamigokuéra oservíva ótro paíspe. Koʼã mbaʼe omokyreʼỹ chupekuéra oservi hag̃ua kómo prekursór oĩvehápe nesesida. Áño 2012-pe oho hikuái Ghánape, ha opyta oservi upépe 4 mésere peteĩ kongregasión de lenguáhe de séñaspe. Upéi oho jey hikuái Estados Unídospe, péro umi mbaʼe ohasa vaʼekue Ghánape, omokyreʼỹ chupekuéra osegi hag̃ua omotenonde Ñandejára Rréino. Upe rire Hans ha Brook oipytyvõ avei ojejapórõ guare pe sukursál de Micronesia.

¿Mbaʼéichapa pejeprepara ikatu hag̃uáicha peho peservi oĩvehápe nesesida? Stephanie heʼi: “Alee rrevísta Ñemañaháme umi artíkulo oñeʼẽva umi ohóvare oservi umi lugár oñekotevẽhápe ajúda. * Upéi amombeʼu umi ansiáno che kongregasionguápe, pe superintendénte de sirkuítope ha hembirekópe mbaʼépa la ajaposéva. Ha iñimportanteveha, añemboʼe meme Jehovápe ha amombeʼu chupe mbaʼépa la che méta”. Stephanie oñehaʼãmbaite oiko sensillomie. Péicha ikatu kuri oaorra oho hag̃ua oservi ótro paíspe.

Hans omombeʼu: “Rojerure Jehovápe tohechaukami oréve moõpa ikatu  roho roservi. Romombeʼu chupe arakaʼe guivépa roĩ dispuésto rojapóvo la rodesidi vaʼekue”. Ko matrimónio omondo kárta 4 diferénte sukursálpe. Upéi, pe sukursál de Ghana orresponde chupekuéra. Upémarõ odesidi hikuái oho upépe, ha opensa ikatutaha opyta oservi upe lugárpe 2 mésere. Hans heʼi: “Rovyʼaiterei ningo rombaʼapo memévo umi ermáno upepeguándi, ha upévare rodesidi ropytave”.

George ha Adria ningo oreko 40 áño pota, ha oiko kuri Canadápe. Haʼekuéra ohechakuaa iñintensión porãnterõ ndohupytymoʼãiha mbaʼeve, síno tekotevẽha odesidi porã ikatu hag̃uáicha Jehová ovendesi chupekuéra. Upémarõ ojapo hikuái tekotevẽva guive ohupyty hag̃ua iméta. Ñepyrũrã, ohenói hikuái peteĩ ermána oho vaʼekuépe oservi Ghánape, ha oporandu chupe heta mbaʼe. Upéi oskrivi hikuái pe sukursál de Canadá ha de Ghánape. Adria heʼi: “Roñehaʼãma voi hína kuri roiko sensillove, péro koʼág̃a roñehaʼãvéntema”. Haʼekuéra ojapopa rire koʼã mbaʼe, oĩma preparádo oho hag̃ua oservi oĩvehápe nesesida. Áño 2004-pe ova hikuái Ghánape.

¿Mbaʼe situasiónpa pehasa peva rire, ha mbaʼéichapa pembohovái umíva? Ámype g̃uarã ijetuʼueterei vaʼekue pe techagaʼu. Haʼe heʼi: “Entéro mbaʼénteko idiferénte kuri chéve”. ¿Mbaʼépa oipytyvõ chupe? Amy omombeʼu: “Che hentekuéra pyʼỹinte cherenói, ha heʼi chéve omombaʼetereiha hikuái ikatu haguére aservi oĩvehápe nesesida. Upéva chepytyvõ siémpre apensa hag̃ua mbaʼérepa ava kuri koʼápe. Avei rojepokuaa roñekomunika por videollamáda. Péicha rojuecha rupi, ha haʼete chéve noroĩriva mombyry ojuehegui”. Amy  heʼi avei oheka hague ikongregasiónpe iñamigarã peteĩ ermána iñexperiénsiava. Ko ermána oipytyvõ chupe ojepokuaa hag̃ua umi kostúmbre upepeguáre. Amy heʼi avei: “Heta vése nantendéi mbaʼérepa umi hénte heʼi térã ojapo peteĩ mbaʼe. Péicha jave ko che amíga katuete chepytyvõ. Haʼe chemboʼe mbaʼépa ajapo vaʼerã ha mbaʼépa ndajapói vaʼerã, ha upéva ou porãiterei chéve ikatu hag̃uáicha vyʼápe aservi Jehovápe”.

George ha Adria ova ramóme Ghánape, ndorekói kuri heta komodida. Chupekuéra g̃uarã haʼete ku oikóva a lo yma. Adria heʼi: “Ndororekói lavarrópa, upévare roipuru válde rojohéi hag̃ua ore ao. Avei koʼág̃a hasypeterei roñekosinamba. Péro tiémpo rire, rohechakuaa umi mbaʼe ijetuʼúva oréve orepytyvõnteha roaprende hag̃ua heta mbaʼe ipyahúva”. Brook heʼi: “Ijetuʼúramo jepe umi situasión rohasáva kómo prekursór, rovyʼaiterei ha roñeñandu porã. Romombeʼupátarõ umi mbaʼe porã rohasa vaʼekue katu, orekoʼẽmbáta”.

¿Mbaʼérepa perrekomenda ótrope ova hag̃ua avei umi lugár oĩvehápe nesesida? Stephanie omombeʼu: “Añetehápe ningo igústo japredika peteĩ território oĩvehápe nesesida. Umi lugár rupi heta persóna oikuaase pe añetegua ha káda día voi ostudiase la Biblia. Chéverõ g̃uarã adesidi porãiterei ajúvo aservi peteĩ lugár oĩvehápe nesesida”. Áño 2014-pe Stephanie omenda Aaron rehe, ha koʼág̃a oservi hikuái sukursál de Ghánape.

Christine oreko haimete 30 áño, ha oservi kuri de prekursóra Alemániape. Haʼe oservi vaʼekue Bolíviape ova mboyve Ghánape. Ko ermána omombeʼu: “Aime rupi mombyry che famíliagui, siémpre ajerure Jehovápe tachepytyvõmi. Koʼág̃a añemoag̃uivéma Jehováre, ha ahechakuaa haʼeha peteĩ persóna rreál. Avei avyʼaiterei aime haguére Jehová puévlope, entéro ermáno oĩháme unído. Ahupytýma heta mbaʼe iporãva aservi rupi Jehovápe peteĩ lugár oĩhápe nesesida”. Ndaʼareiete Christine omenda Gideon rehe, ha oñondive osegi oservi hikuái Ghánape.

Filip ha Ida omombeʼu oipytyvõha iñestudiantekuérape oprogresa hag̃ua. Haʼekuéra heʼi: “Ymave roguereko vaʼekue 15 térã hetave estúdio bíblico, péro koʼág̃a roreko 10 rupínte, ikatu hag̃uáicha romboʼe porãve ha rodedikave tiémpo chupekuéra”. Filip omombeʼu: “Che astudia vaʼekue peteĩ mitãrusúndi hérava Michael. Haʼe ostudiaseterei voi ha siémpre ojeprepara porã. Upévare káda día rostudia, ha un mes haguépe rotermináma pe lívro ¿Mbaʼépa omboʼe la Biblia? Upéi, Míchaelgui oikóma puvlikadór no vautisádo. Pe primer día osẽrõ guare predikasiónpe, haʼe oporandu chéve: ‘¿Ikatúne piko chepytyvõmi ajapo hag̃ua che estúdio biblicokuéra?’. Upéva chesorprende. Michael oexplika chéve haʼe omoñepyrũ hague 3 estúdio bíblico, ha oipotaha aipytyvõ chupe okondusi porã hag̃ua”. Jahechaháicha, upe lugárpe oñekotevẽterei ajúda, pórke umi estudiánte jepe omboʼéma la Biblia ótrope.

Amy ensegída ohechakuaa upe lugár ova haguépe oñekotevẽtereiha ajúda. Haʼe omombeʼu: “Ag̃uahẽ riremínte Ghánape, roho ropredika peteĩ vílla michĩvape ha roheka umi persóna sórdape. Upépe rotopa 8 voi”. Tiémpo rire, Amy omenda Eric rehe ha oñondive oservi de prekursór espesiál peteĩ kongregasión de lenguáhe de séñaspe. Upe paíspe oĩ mas de 300 sórdo oaprendesevéva la Bíbliagui, ha umíva apytépe oĩ umi haʼémava puvlikadór. George ha Adria heʼi umi mbaʼe ohasáva Ghánape, oipytyvõ hague chupekuéra ontende hag̃ua mbaʼéichapa ombaʼapo umi misionéro. Haʼekuéra ovyʼaiterei oñeinvitárõ guare oho hag̃ua pe Eskuéla de Galaádpe, pe kláse 126-pe. Koʼág̃a George ha Adria oservi de misionéro Mozambíquepe.

Javyʼaiterei ningo jahechávo mbaʼéichapa heta ermáno ova ótro paíspe, ha ombaʼapo jejopy predikasiónpe umi ermáno upepeguándi (Juan 4:35). Ghánape, káda semána ojevautisa 120 persónarupi. Ojapo haguéicha umi 17 ermáno ñamensiona vaʼekue ko artíkulope, oĩ avei hetaiterei puvlikadór ko yvy tuichakuére kyreʼỹme ojeofreséva oservi hag̃ua oĩvehápe nesesida. Haʼekuéra odesidi ojapo upéva ohayhúgui Jehovápe. Katuete ningo koʼã ermáno ha ermána iguápova ombopyʼarory Jehovápe (Sal. 110:3; Prov. 27:11).