Áño 1920 rire che tuakuéra oikuaa pe añetegua. Upérõ ningo haʼekuéra nomendái gueteri. Che katu anase vaʼekue 1939-pe. Chemitãrõ guare roiko vaʼekue Inglatérrape, ha aha che tuakuérandi rreunionhápe, upe rire añanota pe Eskuéla del Ministério Teokrátikope. Koʼag̃aite peve chemanduʼa primera ves apartisipárõ guare pe eskuélape. Upérõ areko vaʼekue 6 áñonte ha ajupi vaʼerã peteĩ káha ári ahupyty hag̃ua pe atríl. Che ningo chenerviosoiterei ahechávo enterove umi kakuaa oĩva pe auditóriope.

Che túa oskrivi peteĩ kuatiáre peteĩ presentasión isensíllova aipuru hag̃ua predikasiónpe. Che areko vaʼekue 8 áñonte añepyrũrõ guare apredika cheañoite. Avyʼaiterei kuri peteĩ karai oleérõ guare pe kuatia, ha pyaʼe voi oasepta pe lívro “Sea Dios veraz”. Upepete asẽ adipara pe kállere aha amombeʼu che túape. Pe predikasión ha umi rreunión chembovyʼaiterei vaʼekue ha chepytyvõ aservise hag̃ua Jehovápe de tiémpo kompléto.

Che añepyrũ vaʼekue ahayhu la Biblia heʼíva che túa ojapórõ guare peteĩ suskripsión chéve g̃uarã arresivi hag̃ua pe rrevísta Ñemañaha. Og̃uahẽre umi rrevísta ore vusónpe, che pyaʼéma voi ajagarra aleepaite umíva. Amás día ningo ajeroviave vaʼekue ahávo Jehováre, ha upéva chemomýi añemeʼẽ hag̃ua chupe.

Áño 1950-pe che ha che família roĩ vaʼekue de delegádo pe asambléa héravape “Aumento de la Teocracia” ojejapo vaʼekue Nueva Yórkpe. Pe jueves 3 de agóstope g̃uarã pe téma haʼe kuri “Día del misionero”. Upe díape ermáno Carey Barber, upe rire oservi vaʼekue pe Kuérpo Governántepe, omeʼẽ pe diskúrso de vautísmo. Omohuʼãvo idiskúrso haʼe ojapo umi mokõi porandu umi ojevautisasévape, upépe che añemboʼy  ha haʼe: “¡Si!”. Upérõ che areko vaʼekue 11 áñonte, péro apilla adesidi hague peteĩ mbaʼe iñimportantetereíva. Upéicharõ jepe, che akyhyjeterei vaʼekue aike hag̃ua pe ýpe, pórke upérõ ndaytakuaáiti vaʼekue. Che tio oho chendive pe piléta oĩha meve ha heʼi chéve: “Ani ejepyʼapy, osẽ porãmbátango”. Añetehápe pyaʼeterei oikomi opa mbaʼe ha ni ndahupytyjepéi pe piléta rugua. Peteĩ ermáno chejagarra chevautisa ha pe ótro katu cheguenohẽ jeýma pe pilétagui. Upe día iñimportantetéva guive koʼág̃a peve Jehová osegi chegia aha hag̃ua tape porãre.

Atermina rire che koléhio ajapose vaʼekue che prekursorádo. Péro umi che profesorkuéra chemboliga aha hag̃ua universidápe, ha amo ipahápe ajapo upéva. Péro pyaʼe voi ahechakuaa ndaikatumoʼãiha chefiél Jehovápe akontinuáramo umi che estúdio, upémarõ adesidi ahejatanteha. Añemboʼe Jehovápe, ha askrivi peteĩ kárta umi che profesorkuérape aexplika porã hag̃ua chupekuéra ahejataha pe universida opávo pe primer áño. Ajerovia rupi Jehováre che pyʼaite guive, pyaʼe voi añepyrũ che prekursorádo.

Añepyrũ aservi de tiémpo kompléto julio de 1957-pe pe siuda héravape Wellingborough. Che aservise kuri peteĩ prekursór iñexperiénsiavandi, upémarõ ajerure umi ermáno oĩvape Betel de Lóndrespe heʼi hag̃ua chéve mávandipa ikatu aservi. Haʼekuéra heʼi chéve ikatuha ambaʼapo ermáno Bert Vaisey ndive. Haʼe chemboʼe hetaiterei mbaʼe. Ko ermáno ningo ikyreʼỹeterei vaʼekue predikasiónpe, ha chepytyvõ areko hag̃ua peteĩ prográma ajapo porã hag̃ua che aktivida predikasiónpe. Pe kongregasiónpe roĩ vaʼekue éntre 8 ermánonte: Che, ermáno Bert ha 6 ermána ijedáva. Che ningo ajeprepara ha apartisipa vaʼerã kuri entéro umi rreuniónpe, ha upéva chepytyvõ akonfiave hag̃ua Jehováre. Avei akomentávo areko vaʼekue heta oportunida ahechauka hag̃ua ajeroviaha hese.

Aha kuri peteĩ tiémpore kárselpe ndajaposéi haguére pe servísio militár, ha asẽ rire upégui aikuaa Bárbarape, peteĩ prekursóra espesiál. Romenda 1959-pe, ha roĩ kuri roho hag̃uáicha oimeraẽ lugár roñeasignahápe. Ñepyrũrã roho Láncashirepe, opytáva noroéste gotyo Inglatérrape. Upéi enero de 1961-pe añeinvita aha hag̃ua pe Eskuéla del Ministério del Rréinope, ojejapóva Betel de Lóndrespe ha oduráva un mes. Opa rire pe eskuéla, añesorprendeterei kuri añenombrárõ guare superintendénte de sirkuíto. Dos semánare arresivi entrenamiénto peteĩ superintendénte de sirkuíto ikatupyrývagui pe siuda héravape Birmingham, ha oñepermiti Bárbarape oremoirũ. Upéi roiméma preparádo roho hag̃ua ore asignasiónpe umi lugár héravape Lancashire ha Cheshire.

Agosto de 1962-pe, roime aja de vakasión, rorresivi peteĩ kárta pe sukursálgui. Hyepýpe rotopa umi solisitu roho hag̃ua Eskuéla de Galaádpe. Roñemboʼe rire Jehovápe, Barbara ha che romyenyhẽ umi solisitu, ha pyaʼe romondo jey pe sukursálpe ojerure haguéicha hikuái. Upe rire, 5 mése haguépe rohóma hína kuri Brooklyn, Nueva Yórkpe, roasisti hag̃ua Galaádpe pe kláse número 38-pe. Umi 10 mése aja roaprende hetaiterei mbaʼe la Bíbliagui.

 Galaádpe roaprende heta mbaʼe Ñandejára Ñeʼẽgui ha iñorganisasióngui, péro avei mbaʼéichapa oservi hína Jehovápe umi ñane ermáno ha ermanakuéra oĩva ko múndo tuichakuére. Roreko rupi 20 áño rasamínte, ikatu vaʼekue roaprende heta mbaʼe umi ore kompañerokuéragui. Chéve g̃uarã peteĩ priviléhio vaʼekue ikatu haguére ambaʼapo káda día Betélpe ermáno Fred Rusk ndive, haʼéva peteĩva umi instruktór. Chugui ningo aaprende vaʼekue siémpre jajasegura vaʼerãha umi konsého ñameʼẽva oñemopyenda porãha la Biblia heʼívare. Pe eskuéla aja, oĩ vaʼekue umi ermáno ikatupyrýva ojapóva oréve diskúrso, ha umíva apytépe oĩ vaʼekue Nathan Knorr, Frederick Franz ha Karl Klein. Hetaite mbaʼe roaprende avei ermáno Alexander Macmíllangui. Haʼe ningo iñumildeterei ha idiskúrsope oremboʼe mbaʼéichapa Jehová ogia vaʼekue ipuévlope pe situasión ijetuʼuetérõ guare áño 1914 guive oñepyrũ meve 1919.

Opávo ohóvo pe eskuéla, ermáno Knorr heʼi chéve ha Bárbarape roñeasignataha roservi hag̃ua Burúndipe, opytáva Áfricape. Rodipara ningo roho pe vivliotéka oĩvape Betélpe, rohecha hag̃ua pe Anuáriope mboy puvlikadórpa oĩ Burúndipe. Péro tuicha roñesorprende, pórke ndorotopái upe informasión moõvete. Upépe rohechakuaa rohotaha peteĩ território núnka ndojepredikái haguépe, oĩva peteĩ kontinénte ndoroikuaaguasúivape. Upe moméntope rojepyʼapyeterei, péro roñemboʼe rire Jehovápe ore pyʼaite guive tuicha orepyʼaguapy.

Pe ore asignasión pyahúpe opa mbaʼénte idiferénte: Pe klíma, umi hénte oiko lája ha pe idióma. Koʼág̃a roaprende vaʼerã francés, ha rotopa vaʼerã peteĩ lugár roiko hag̃ua. Dos día rog̃uahẽ rire ou orevisita Harry Arnott, peteĩva umi ore kompañerokue Galaádpe. Haʼe oho jey hína kuri iñasignasiónpe Zámbiape, péro opyta orepytyvõ rotopa hag̃ua peteĩ óga roiko hag̃ua, ha upévagui oiko pe primera kása misionál. Umi autoridakuéra ndoikuaái vaʼekue mbaʼevete testígo de Jehovágui ha pyaʼe voi oñemoĩ orerehe hikuái. Roñepyrũ javete rodisfruta ore asignasiónpe, umi autoridakuéra heʼi oréve ndaikatumoʼãiha ropyta norokonsegíriramo peteĩ permíso de traváho. Rombyasýramo jepe, rosẽmante Burúndigui ha roho Ugándape.

Ore rokyhyje kuri roike hag̃ua Ugándape visaʼỹre, péro rokonfia avei Jehováre ha upéva orembopyʼaguapy.  Peteĩ ermáno canadiense oservíva Ugándape oexplika ore situasión peteĩ kuimbaʼe ombaʼapóvape inmigrasiónpe. Ha oñemeʼẽ oréve unos kuánto mése ikatu hag̃uáicha rokonsegi ore dokumentokuéra ropyta hag̃ua roiko Ugándape. Upépe rohechakuaa Jehová orepytyvõha hína.

Uganda ningo idiferentete vaʼekue Burúndigui. Oĩramo jepe 28 Testígonte, ojepredikáma hína kuri Ugándape, ha pe territóriope rotopa heta oñeʼẽkuaáva inglés. Upéicharõ jepe, pyaʼe rohechakuaa roipotáramo ore estudiantekuéra oprogresa, tekotevẽha roaprende peteĩva jepe umi idióma indíhena oñeñeʼẽva upépe. Oréngo roñepyrũ kuri ropredika pe siuda de Kampala jerére, ha upépe hetaiterei hénte oñeʼẽ pe idióma luganda, upémarõ rodesidi roaprendetaha upe idióma. Heta áño haguépe ae ningo roñeʼẽkuaa kuri upe idióma, péro upéva tuichaiterei orepytyvõ ropredika porãve hag̃ua umi héntepe. Upépe ae rohechakuaa mbaʼépa tekotevẽ oaprende porãve umi ore estudiantekuéra, ha haʼekuéra ohechakuaávo mbaʼeichaitépa roñeinteresa hesekuéra, okonfiavéma orerehe ha omombeʼu oréve mbaʼéichapa oñeñandu oaprende rire umi mbaʼe omboʼéva la Biblia.

Ore ningo rovyʼaiterei roipytyvõ haguére umi héntepe oikuaa hag̃ua Jehovápe, ha koʼýte rovyʼave rorresivírõ guare peteĩ priviléhio norohaʼarõietéva: Roservi de superintendénte de sirkuíto pe país tuichakuére. Pe sukursál de Kenia omeʼẽ oréve instruksión roviaha hag̃ua Uganda tuichakuére roheka hag̃ua umi lugár oñekotevẽvehápe umi prekursór espesiál. Heta vése umi hénte umi lugarpegua orerresivi porãiterei, hiʼarive haʼekuéra núnka noñeʼẽiva peteĩ testígo de Jehovándi. Umi hénte ningo imbaʼeporãiterei ha vyʼápe orerresivi, tembiʼu jepe oprepara oréve hikuái.

Upéi roñepyrũma rojapo ótro viáhe. Trénpe aviaha 2 día Kampala guive puérto de Mombasa peve, oĩva Kéniape. Ha upégui aviaha várkope Seychelles peve, haʼéva peteĩ grúpo de ísla oĩva oséano Índicope. Upe rire, áño 1965 guive 1972 peve, Barbara chemoirũ aha jave avisita umi ísla Seychelles. Upe tiémpope upe lugárpe oĩ vaʼekue mokõi puvlikadórnte, péro upe rire oiko chugui peteĩ grúpo, ha tiémpo rire peteĩ kongregasión. Upéi rovisita avei umi ermáno oĩvape Eritrea, Etiopía ha Sudánpe.

Ugándape pe situasión pyaʼe voi okambia pórke peteĩ grúpo militár ojapo gólpe de estádo, ha haʼekuéra oñepyrũ ogoverna. Heta áñore ningo ijetuʼueterei vaʼekue la situasión. Upéva chemboʼe iporãha jasegi pe konsého Jesús omeʼẽ vaʼekue heʼírõ guare: “Pemeʼẽ Césarpe la okorrespondéva chupe” (Mar. 12:17). Upe rire ojejerure entéro extranhéro oikóvape Ugándape oñanota hag̃ua pe komisaría ag̃uive opytávape hógagui. Ore pyaʼe voi oreñeʼẽrendu ha roho rojapo upéva. Unos kuánto día rire, che ha ótro misionéro roime kuri Kampálape ha roviaha hína áutope, ha orejoko pe polisía sekréta. Tuichaiterei ningo roñemondýi. Haʼekuéra oreakusa ore haʼeha espía, ha oregueraha pe komisaría sentrálpe. Upépe roexplika chupekuéra ore haʼeha misionéro ha rojapoha pyʼaguapýpente la ore traváho. Avei romombeʼu chupekuéra roñeanotáma hague, péro haʼekuéra nopenái orerehe. Upémarõ unos kuánto polisía armádo oregueraha pe komisaría oĩvape pe kása misionál ypýpe. Upépe peteĩ polisía oikuaáva roñeanotáma hague, heʼi chupekuéra opoi hag̃ua orehegui. Tuichaiterei ningo orepyʼaguapy upe moméntope.

 Upe tiémpope, umi militár pyʼỹinte ojapo vaʼekue kontról umi rrútape. Péicha jave rojepyʼapyetereími vaʼerã, koʼýte umi soldádo oĩ jave tuichaite kaʼúre. Péro roñemboʼe rire Jehovápe, umi soldádo opermiti oréve rohasa ha upéva orembopyʼaguapy. Péro rombyasyeterei kuri 1973-pe oñemandárõ guare entéro misionéro extranhérope osẽ hag̃ua Ugándagui.

Upéi roñekambia jey de asignasión, ko vuéltape Costa de Marfílpe, opytáva oéste gotyo Áfricape. Upéva peteĩ kámbio tuicháva kuri oréve g̃uarã: Rojepokuaa vaʼerã umi hénte oiko lájare ha ikostumbrekuérare, roñeʼẽ jey vaʼerã francés tódo el tiémpo ha rojepokuaa vaʼerã roiko umi misionéro oúvandi diferénte paísgui. Péro rohecha mbaʼéichapa Jehová oregia, pórke rotopa umi persóna iñumíldeva, ipyʼaporãva ha pyaʼe voi oaseptáva umi notísia porã. Rojerovia rupi Jehováre, rohecha haʼe oregiaha roho hag̃ua tape porãre.

Upéi derrepentete osẽ Bárbarape orekoha kánser. Ore roviaha jepe Európape heta vése haʼe osegi hag̃ua itratamiénto, péro 1983-pe rohechakuaa rohejámante vaʼerãha ore asignasión Áfricape. Upéva ningo yvýre orereja kuri.

Roservi aja Betel de Lóndrespe, Barbara oempeorave ha upe rire omano anga chehegui. Pe família Betel ningo tuichaiterei chepytyvõ vaʼekue. Peteĩ matrimónio chepytyvõ voi ajadapta hag̃ua che situasión pyahúre ha asegi hag̃ua ajerovia Jehováre. Tiémpo rire aikuaa peteĩ voluntária oúvape ombaʼapo Betélpe. Haʼe héra Ann ha oservi vaʼekue de prekursóra espesiál. Haʼe ohayhu Jehovápe ha ohechauka ijerovia mbareteha. Che ha Ann romenda 1989-pe, ha upe guive roservi Betélpe.

Áño 1995 guive 2018 peve aservi de rrepresentánte de la sentrál mundiál (ymave oñehenói vaʼekue superintendénte de sóna), ha avisita amo 60 paísrupi. Káda visítape ahecha mbaʼéichapa Jehová oñangareko ipuévlore, tahaʼe haʼéva pe situasión ohasáva hikuái.

Áño 2017-pe ajapo jave peteĩva koʼã visíta, aha jey Áfricape. Avyʼaiterei ikatu haguére agueraha Ánnpe por primera ves Burúndipe. Rohecharamoiterei mbaʼeichaitépa koʼág̃a heta oĩ umi oservíva Jehovápe upépe. Pe mísma kálle che apredika haguépe ogahárupi 1964-pe, koʼág̃a oĩ peteĩ Betel iporãitereíva. Upépe oñeñatende umi mas de 15.500 puvlikadór oĩvare upe paíspe.

Avyʼaiterei kuri arresivírõ guare pe prográma oĩháme umi país avisita vaʼerã 2018-pe, pórke pe lístape ahecha oĩha Costa de Marfil. Rog̃uahẽrõ guare Abidjánpe, pe siuda tuichavéva oĩva upe paíspe, haʼete voi ku ag̃uahẽva che rógape. Rog̃uahẽ rire Betélpe amaña pe lísta telefónikare, ha ahechakuaa pe ermáno oikóva ore koty ykére haʼeha ermáno Sossou. Chemanduʼa haʼe oservi hague de superintendénte de siuda aimérõ guare Abidjánpe. Péro ajavy kuri, ótro Sossou ningo raʼe. Itaʼýrama la oservíva upépe.

Jehová ningo siémpre okumpli la oprometéva. Umi mbaʼe ijetuʼúva ahasa vaʼekue chemboʼe ñakonfiáramo Jehováre, haʼe añetehápe ñandegiaha jaha hag̃ua tape porãre. Koʼág̃a rosegise roguata ko tape porãre ñandeguerahávare pe múndo pyahúpe, jaikotahápe vyʼápe pára siémpre (Prov. 4:18).