JAIKUAAHÁICHA, enterovéva javyʼase, péro koʼã ára pahápe ijetuʼueterei la situasión ha hasyeterei “jagueropuʼaka hag̃ua” (2 Tim. 3:1). Heta oĩ ndovyʼavéiva pórke ojetrata vai chupekuéra. Ótro katu hasy, operde itraváho térã omano chugui peteĩ persóna ohayhúva. Ñandejára siervokuéra jepe ikatu ou oñedesanima ha mbeguekatúpe ndovyʼavéi. Oimérõ nde rehasa hína ko situasiónre, ¿mbaʼéichapa ikatu revyʼa jey?

Ikatu hag̃uáicha ñarresponde ko pregúnta, ñepyrũrã tekotevẽ ñantende porã mbaʼépa heʼise javyʼaha, ha mbaʼéichapa heta persóna osegi ovyʼa ombohováiramo jepe heta provléma. Upéi jahecháta mbaʼéichapa ikatu jasegi javyʼa ha mbaʼépa jajapo vaʼerã javyʼave hag̃ua.

Japukapa reíramo ndeʼiséi javyʼaha katuete. Por ehémplo, peteĩ persóna okaʼu jave ikatu opukapa rei, péro ojera rire imanduʼa jey iprovlemakuérare ha ndopukaveiete. Peichagua persóna ningo sapyʼaitemínte iporãmba chupe entéro mbaʼe, péro amo ipahápe ndovyʼái (Prov. 14:13).

¿Mbaʼépa upéicharõ heʼise javyʼaha? Heʼise ñande pyʼaite guive ñañeñandu porãha jareko térã ñahaʼarõ haguére peteĩ mbaʼe porã. Heʼise avei javyʼaha iporã térã ivaíramo jepe ñane situasión (1 Tes. 1:6). Peteĩ tapicha ningo ikatu oñeñandu vai hína, ha upéicharõ jepe ovyʼa. Por ehémplo, umi apóstolpe oñembyepoti vaipaite vaʼekue oñeʼẽ haguére Jesús rehe, péro la Biblia heʼi haʼekuéra osẽ hague “pe Sanedríngui vyʼapópe, Ñandejára ohejágui ojeapoʼi chupekuéra Jesús réra rehehápe” (Hech. 5:41). Jaikuaaháicha, umi apóstol ndahaʼéi oipoʼo haguére la ovyʼáva, síno osegi haguére ifiél Ñandejárape.

Ñande ningo nañagueronaséi pe vyʼa, ni ndajavyʼamoʼãi ñandejehegui reínte. ¿Mbaʼérepa jaʼe upéva? Pórke pe vyʼa ou Ñandejára espíritu sántogui, ha pe espíritu ñanepytyvõ ñamonde hag̃ua pe “teko pyahu”, por ehémplo pe vyʼa (Efes. 4:24; Gál. 5:22). Javyʼa jave ningo ñambohovái porãve umi situasión ijetuʼúva.

Jehová ojapórõ guare ko yvy ndoipotái vaʼekue oiko umi mbaʼe vai jahecháva koʼág̃a, síno oipota kuri iporãvante ñandéve g̃uarã. Péro ohecháramo jepe mbaʼéichapa umi hénte hembiapo vai, noñedeprimíri upe haguére, síno osegi ovyʼa. La Biblia heʼi hese: “Upe lugár oĩháme ojehecha mbaʼeichaitépa haʼe ipoderóso ha ovyʼa” (1 Crón. 16:27). Jehová ovyʼa avei ohecha jave isiervokuéra ojapoha iporãva (Prov. 27:11).

¿Mbaʼéichapa ikatu jasegi Jehová ehémplo? Ani jajepyʼapyeterei nosẽiramo ñandéve peteĩ mbaʼe ñahaʼarõ haguéicha. Ñañehaʼã guei jahecha umi mbaʼe porã jarekómava, ha  pyʼaguapýpe ñahaʼarõ tomehora ñane situasión. *

La Biblia omombeʼu avei heta Ñandejára siérvo yma guare ovyʼa hague ombohováiramo jepe heta provléma. Umíva apytépe oĩ Abrahán. Haʼe ningo heta ohasa asy vaʼekue ótra persóna káusare, ha sapyʼánte haimete vaʼekue voi ojejuka chupe (Gén. 12:10-20; 14:8-16; 16:4, 5; 20:1-18; 21:8, 9). Upéicharõ jepe haʼe osegi ovyʼa. ¿Mbaʼérepa? Pórke siémpre opensa umi mbaʼe porã ohupytýtavare pe múndo pyahúpe ogoverna vove pe Mesías (Gén. 22:15-18; Heb. 11:10). Jesús heʼi: “Pende ru Abrahán ovyʼaiterei vaʼekue ohaʼarõgui ohecha che ára” (Juan 8:56). Jasegíkena Abrahán ehémplo ha vyʼápe jajepyʼamongeta umi mbaʼe porã jahupytýtavare amo gotyove (Rom. 8:21).

Abrahán ojapo haguéicha, Pablo ha Silas ojepyʼamongeta meme vaʼekue Ñandejára promesakuérare. Upéicha rupi ojerovia mbarete hikuái ha osegi ovyʼa ohasáramo jepe heta situasión ijetuʼúva. Por ehémplo, peteĩ jey oñembyepoti vaipaite vaʼekue Pablo ha Sílaspe, ha upéi oñemoinge chupekuéra kárselpe. Upéicharõ jepe haʼekuéra “oñemboʼe ha opurahéi ombotuicha hag̃ua Ñandejárape” (Hech. 16:23-25). Pablo ha Silas osegi oaguanta umi situasión pórke opensa meme Ñandejára promesakuérare. Haʼekuéra oikuaa avei Jesús réra rehehápe ohasaha umi mbaʼe ha upévare ovyʼa hikuái. Jasegíkena Pablo ha Silas ehémplo, ha siémpre ñapensa umi mbaʼe porã ojehupytývare jasegi rupi ñandefiél Jehovápe (Filip. 1:12-14).

Ñane tiémpope avei heta ermáno ha ermána osegi ovyʼa ombohováiramo jepe heta situasión ijetuʼuetereíva. Por ehémplo, noviembre de 2013-pe, peteĩ yvytu hatãitereíva oñembohérava Haiyan ojapo sarambi Filipínaspe. Upérõ mas de 1.000 família de Testígo róga oñehundi. Peteĩ ermáno hérava George ha oikóva siuda de Taclóbanpe operdepaite vaʼekue la orekomíva. Haʼe heʼi: “Oikóramo jepe koʼã mbaʼe vaiete, umi ermanokuéra lomímonte ovyʼa. Ni ndorogueroviaséi mbaʼéichapa roñeñandu porã”. Jajepyʼamongetáramo umi mbaʼe porãita jarresivívare Jehovágui ha ñandeagradesídoramo, katuete jasegíta javyʼa jahasáramo jepe umi situasión ijetuʼuetereíva. ¿Mbaʼépa omeʼẽ avei ñandéve Jehová jasegi hag̃ua javyʼa?

Heta motívo ningo jareko javyʼa hag̃ua, péro la iñimportantevéva hína ñane amista Jehovándi. Ñande jaikuaa pe Rréi del univérsope, ha haʼe hína ñande Ru, ñane Amígo ha Ñandejára (Sal. 71:17, 18).

¿Mbaʼérepa ikatu avei javyʼa? Jaikove haguére ha ikatúgui jadisfruta heta mbaʼe porã (Ecl. 3:12, 13). Jehová ñanepytyvõ ñañemoag̃ui hag̃ua hese, upéicha rupi jaikuaa mbaʼépa haʼe oipota ñandéve g̃uarã ha mbaʼéichapa oipota jaiko (Col. 1:9, 10). Péro umi ndoikuaáiva Jehovápe idiferénte. Haʼekuéra ndoikuaái maʼerãpa jaikove. Apóstol Pablo heʼi vaʼekue: “‘Hesakuéra ndohechái, ni ijapysakuéra nohendúi, ni noimoʼãi hikuái umi mbaʼe Ñandejára oprepara vaʼekue umi chupe ohayhúvape g̃uarã’. Ñandejára oikuaauka ñandéve umi mbaʼe ijespíritu rupive” (1 Cor. 2:9, 10). Jahechaháicha, ñande javyʼa jaikuaa rupi Ñandejára rembipota ha umi mbaʼe porã haʼe ojapótava.

Jahechamína mbaʼépa ojapo avei Jehová ñanderehehápe. Haʼe ningo ojapo tekotevẽva guive ikatu hag̃uáicha oñeperdona ñande pekádo (1 Juan 2:12). Jehová ñandeporiahuvereko rupi omeʼẽ ñandéve pe esperánsa jaiko hag̃ua peteĩ múndo pyahúpe, ha upéva ningo koʼẽrõitéma oñekumplíta (Rom. 12:12). Haʼe omeʼẽ avei ñandéve hetaiterei ermáno ha ermána, ikatu hag̃uáicha oñondivepa  ñamombaʼeguasu chupe (Sal. 133:1). La Biblia heʼi porã ñandéve Jehová oproteheha ipuévlope Satanás ha umi demóniogui (Sal. 91:11). Jajepyʼamongetáramo entéro koʼã vendisiónre, katuete javyʼavéta (Filip. 4:4).

¿Ikatúpa ovyʼave peteĩ kristiáno ovyʼámava voi? Jesús heʼi vaʼekue: “Koʼã mbaʼe amombeʼu peẽme pevyʼa hag̃ua che avyʼaháicha” (Juan 15:11). Ko téxto ohechauka porã siémpre ikatuha javyʼave. Pe vyʼa ningo ikatu ñakompara pe tatáre. Jaipotáramo hendyve ñamoĩve vaʼerã pype jepeʼa. Péicha avei, javyʼasevéramo jasegi vaʼerã jajerure Ñandejárape ijespíritu ha jajepyʼamongeta la Bíbliare, pórke Ñandejára Ñeʼẽ ojehai espíritu sánto rupive (Sal. 1:1, 2; Luc. 11:13).

¿Mbaʼépa ñanepytyvõta avei javyʼave hag̃ua? Jajapo meme vaʼerã umi mbaʼe Jehová oguerohorýva (Sal. 35:27; 112:1). ¿Mbaʼérepa jaʼe upéva? Pórke haʼe ñandeapo vaʼekue jajapo hag̃ua hembipota. La Biblia heʼi: “Rerrespeta vaʼerã Ñandejárape ha ejapo haʼe heʼíva. Péva hína pe ovligasión entéro persóna orekóva” (Ecl. 12:13). Añetehápe, ndaipóri ñanembovyʼave vaʼerã Ñandejára servísiogui. *

Javyʼáramo ndahaʼéi ñañeñandu porãtanteva, síno jahupytýta avei heta mbaʼe porã. Por ehémplo, vyʼápe jaservíramo Jehovápe ñaneprovléma hetáramo jepe, haʼe ovyʼáta avei ñandereheve (Deut. 16:15; 1 Tes. 5:16-18). Javyʼa añetéramo, ndajaikomoʼãi umi mbaʼerepy rapykuéri ha jajesakrifikavéta pe Rréino rehehápe (Mat. 13:44). Ha jahechávo umi mbaʼe porã jahupytýva ñambaʼapo kyreʼỹ rupi Jehová servísiope, ñañeñandu porãvéta ha avei ñambovyʼáta ñande rapichakuérape (Hech. 20:35; Filip. 1:3-5).

Ñañehaʼãramo javyʼave, ikatu avei ñaneresãive. La Biblia heʼi: “Revyʼáramo, upéva nepytyvõta neresãive hag̃ua” (Prov. 17:22). Peteĩ doktór Universidad de Nebraskagua (Estados Unidos), heʼi peteĩ mbaʼe ndojoavýiva la Bíbliandi. Haʼe heʼi: “Oiméramo koʼág̃a nde revyʼa hína umi mbaʼe rejapo ha reguerekóvare, ikatu hína neresãive amo gotyove”.

Jahechaháicha, koʼág̃a ijetuʼuetereíramo jepe heta mbaʼe, lomímonte ikatu javyʼa añete. Upearã jajerure vaʼerã Jehovápe ijespíritu sánto, jastudia la Biblia ha jajepyʼamongeta hese. Ha javyʼasevéramo katu, ñapensa vaʼerã umi mbaʼe porã Jehová omeʼẽmavare ñandéve, jasegi Ñandejára siervokuéra ehémplo ha ñañehaʼãmbaite jajapo Jehová oguerohorýva. Péicha oikóta ñanderehe Salmo 64:10 heʼíva. Upépe heʼi: “Umi ivuénova ovyʼaitereíta umi mbaʼe Jehová ojapóvare ha oñemoag̃uíta hese ojeprotehe hag̃ua”.