Oĩ vése haʼetéva kuri la oñeindikáva upeichaha. Ha pe jaleéva Hebreos 12:16-pe haʼete ku okoinsidíva upévandi. Ko téxto heʼi Esaú ndovalorái hague “umi mbaʼe oúva Ñandejáragui”, ha peteĩ pláto tembiʼúre omeʼẽ hague iñermáno Jacóbpe “pe derécho oguerekóva umi taʼýra ypykue”. Ko téxto haʼete kuri la oindikáva Jacob okonsegírõ guare “pe derécho oguerekóva umi taʼýra ypykue”, oreko hague avei pe oportunida oikóvo chugui pe Mesías antepasádo (Mat. 1:2, 16; Luc. 3:23, 34).

Péro jaleévo unos kuánto rreláto bíblico, jahechakuaa ndahaʼeiha pe família ypykuéguinte la ikatúva ou pe Mesías. Jahechamína unos kuánto ehémplo:

Jacob (Israel) raʼy ypykue ningo haʼe vaʼekue Rubén, Lea memby. Upéi, Jacob ifamília vaʼekue avei Raquel ndive, pe hembireko ohayhuvéva, ha pe ijypykue haʼe vaʼekue José. Rubén opekárõ guare ojepeʼa chugui pe derécho orekóva umi taʼýra ypykue ha oñemeʼẽ Josépe (Gén. 29:31-35; 30:22-25; 35:22-26; 49:22-26; 1 Crón. 5:1, 2). Péro pe Mesías ndoúi kuri Rubén ni José familiarégui, síno Judágui, Lea memby cuatroha (Gén. 49:10).

 Lucas 3:32-pe oñemensiona 5 kuimbaʼe haʼéva pe Mesías antepasádo. Amalisia enterovéva hikuái haʼe vaʼekue taʼýra ypykue. Por ehémplo, Boaz raʼy haʼe vaʼekue Obed, ha Obed raʼy katu Jesé (Rut 4:17, 20-22; 1 Crón. 2:10-12).

Upe rire ou David, haʼéva avei pe Mesías antepasádo. Péro David ndahaʼéi vaʼekue Jesé raʼy ypykue, síno pe imitãvéva umi 8 itaʼýra apytépe (1 Sam. 16:10, 11; 17:12; Mat. 1:5, 6). Upéicha avei, David raʼy Salomón ndahaʼéi vaʼekue pe taʼýra ypykue (2 Sam. 3:2-5).

Péro upéva ndeʼiséi pe taʼýra ypykue ndorekoiha peteĩ priviléhio iñimportánteva. Upe persónape ningo ojerrespeta vaʼekue, ha normálmente opyta kómo kavésa de família itúa rendaguépe. Avei pe taʼýra ypykue oereda el dóvle umi propieda iñermanokuéra apytépe (Gén. 43:33; Deut. 21:17; Jos. 17:1).

Pe derécho orekóva umi taʼýra ypykue ikatu vaʼekue oñemeʼẽ ótro iñermánope. Por ehémplo, Abrahán omosẽrõ guare itaʼýra Ismaélpe, pe derécho orekóva umi taʼýra ypykue opyta Isaácpe (Gén. 21:14-21; 22:2). Ha jaʼéma haguéicha, pe derécho ojepeʼa vaʼekue avei Rubéngui ha oñemeʼẽ Josépe.

Koʼág̃a ñañeʼẽmi jey Hebreos 12:16 rehe. Upépe Pablo heʼi: “Pende apytépe noĩri vaʼerã ni peteĩ hekovaíva, ni avave nomombaʼéiva umi mbaʼe oúva Ñandejáragui, ojapo haguéicha Esaú. Haʼe peteĩ pláto tembiʼúre omeʼẽ vaʼekue pe derécho oguerekóva umi taʼýra ypykue”. ¿Mbaʼépa la omboʼese vaʼekue Pablo?

Koʼápe ningo Pablo noñeʼẽi kuri Mesías antepasadokuérare. Oñeʼẽ mboyve umi mbaʼe oĩvare Hebreos 12:16-pe, heʼi kuri umi kristiánope osegi hag̃ua oguata “derechoite pe tape porãre”, ani ág̃a ndohupytyvéi mbaʼe “Ñandejára mbaʼeporã ijojahaʼỹva”. Upéva ikatu kuri oiko hesekuéra oúramo hekovai (Heb. 12:12-16). Ojapóramo upéva, ojoguáta hikuái Esaúpe, pórke haʼe nomombaʼéi kuri “umi mbaʼe oúva Ñandejáragui”. Upéva heʼise ndovalorái hague umi mbaʼe isagrádova.

Esaú oiko vaʼekue umi patriárka tiémpope, ha ikatu voi kuri sapyʼánte oreko pe priviléhio oikuaveʼẽvo sakrifísio ifamiliakuéra rehehápe (Gén. 8:20, 21; 12:7, 8; Job 1:4, 5). Péro haʼe omotenonde hete rembipotánte, ha péicha rupi un pláto tembiʼúre okambia pe priviléhio orekóva umi taʼýra ypykue. Ikatu oime haʼe ojehekyise pe sufrimiénto ohaʼarõvagui Abrahán desendientekuérape (Gén. 15:13). Esaú oúrõ guare omenda mokõi kuña ndoadoráivare Jehovápe, ohechauka avei nomombaʼeiha umi mbaʼe isagrádova, ha upéva káusare heta ombosufri ituakuérape (Gén. 26:34, 35). Ndojoguaiete Jacóbpe, pórke haʼe omenda kuri peteĩ kuña oadorávare Ñandejára añeteguápe (Gén. 28:6, 7; 29:10-12, 18).

¿Mbaʼépa jaʼekuaa upéicharõ? Jahechakuaa pe Mesías antepasadokuéra apytépe oĩ hague avei la ndahaʼéiva taʼýra ypykue. Umi judío oikuaa porã upéva, por ehémplo ohechakuaa hikuái Cristo oúta hague David familiarégui, ha jaikuaaháicha David haʼe vaʼekue Jesé raʼy pahague (Mat. 22:42).