Anase vaʼekue Ciudad Mántepe, upe lugár iporãiterei ha opyta estádo de Tamaulípaspe (México). Umi hénte upepegua hory ha ipojera. Péro lastimósamente ipeligrosoiterei avei upépe, pórke oĩ heta mafióso ha grúpo ojededikáva otrafika dróga, árma ha umícha.

Roime vaʼekue 4 ermáno, ha che hína pe segundo. Che tuakuéra chevautisa pe iglésia katólikape ha apurahéi jepe pe kórope. Che akyhyje vaʼekue Ñandejára chekastiga ha chemondórõ g̃uarã pe infiérnope, upévare añehaʼã ajapo iporãva.

Arekópe 5 áño ore túa orereja rei. Upéva hasyeterei kuri chéve ha ahekaiterei voi chupe. Enterove ningo rohayhueterei chupe ógape, upévare nantendéi mbaʼérepa osẽ oho rei. Upe guive mama ndopytaguasuvéi ógape, pórke ombaʼapómante vaʼerã oremantene hag̃ua.

Che ajaprovecha upévare, ha upéicha rupi ndahaguasuvéi eskuélape ha añehunta umi mitãrusu tuichavévare chehegui. Upépe añepyrũ apita, chejurukyʼa, chemonda ha aaprende avei aporombyepoti hag̃ua. Che arekoseterei vaʼekue umi héntepe che poguýpe, upévare aaprende aipuru hag̃ua árma ha avei añorairõ hag̃ua heta hendáicha. Aju cheviolentoiterei voi. Pyʼỹi roñohaʼã vaʼekue mbokápe ore kontrariokuérandi, ha heta vése oimoʼã voi hikuái amanomaha, apytámi ajepyso pe kállere ha cheruguypa hína upépe. ¡Hetaite anga ambohasa asy mamáme! Haʼe oúmi vaʼerã chejagarra ha apúrope chegueraha ospitálpe.

Arekópe 16 áño, orevisita peteĩ che kakuaa irũngue hérava Jorge. Haʼe heʼi oréve haʼeha testígo de Jehová ha omombeʼuseha oréve peteĩ mbaʼe iñimportánteva. Ha oñepyrũ oexplika oréve la Biblia rupive umi mbaʼe ogueroviáva. Upérõ primera ves alee la Biblia, ha avyʼaiterei aikuaávo mbaʼéichapa héra Ñandejára ha avei umi mbaʼe oipotáva ñandéve g̃uarã. Jorge heʼi ikatuha oremboʼe la Biblia, ha ore roasepta.

Yma akyhyjeterei vaʼekue Ñandejáragui, pórke apensa haʼe omondoha umi héntepe pe infiérnope osufri hag̃ua. Péro tuicha chepyʼaguapy aikuaávo la Biblia nomboʼeiha upéva (Salmo 146:4; Eclesiastés 9:5). Ahechakuaa  Ñandejára ñanderayhuha peteĩ túaicha, ha oipotaha pe iporãvéva ñandéve g̃uarã.

Asegívo astudia la Biblia, ahechakuaa tekotevẽha akambia heta mbaʼépe. Añehaʼãmante vaʼerã kuri anivéma hag̃ua cheviolénto ha cheumildeve hag̃ua. Tuicha chepytyvõ pe konsého oĩva 1 Corintios 15:33-pe, upépe heʼi umi júnta vai ohundiha umi mbaʼe porã jajepokuaáva jajapo. Ahechakuaa akambiámante vaʼerãha che juntakuéra, ha añepyrũ aheka che amigorã pe kongregasiónpe. Umi hénte oĩva upépe ndoikói oñombyepoti térã ojahéi ojuehe iprovléma jave oñondive, síno oñehaʼã pyʼaguapýpe porãnte osolusiona pe provléma, heʼiháicha la Biblia.

Opokoiterei avei cherehe la heʼíva Romanos 12:17-19. Upépe heʼi: “Avavépe ani pemyengovia ivaíva ivaívape. [...] Peñehaʼãmbaitékena peiko pyʼaguapýpe enterove pende rapichakuéra ndive. Ani peñevenga [...]. Ñandejára Ñeʼẽme ojehai voi: ‘Che añevengáta ha amyengoviáta chupekuéra hembiapo vaikuére, heʼi Jehová’”. Ahechakuaa Jehová itiempoitépe osolusionataha umi provléma ha haʼe ohecha porãveháicha. Mbeguekatúpe akambia ha nacheviolentovéima yma guaréicha.

Siémpre chemanduʼa la oiko vaʼekuére peteĩ pyhare ahakuévo ógape. Unos kuánto mitãrusu ou cheataka. Chepatotéro tiémpope haʼekuéra ore kontrário vaʼekue. Pe líder chenupã che lómorupi ha osapukái: “¡Eñedefendépy!”. Upepete añemboʼe mbykymi Jehovápe ha ajerure chupe tachepytyvõ ani hag̃ua arreaksiona vai. Ambyepotiseterei chupe, péro ajejoko ha adiparánte chuguikuéra. Al día sigiénte, atopa pe líderpe haʼeño. Arrenegaiterei ha añevengase hese, péro ajerure jey Jehovápe tachepytyvõ añekontrola hag̃ua. Haʼe oñemboja cherehe ha heʼi: “Chediskulpána kuehe guarére. Haʼe porãta ndéve, chéngo aikose avei ko nde reikoháicha ha astudiase la Biblia”. Upéva chesorprendeterei. ¡Haʼetépe narreaksionavaíri raʼe! Upéicha rupiete haʼe oñepyrũ avei ostudia la Biblia.

Ambyasýramo jepe, che sy ha che ermanokuéra ou ndostudiasevéi la Biblia. Péro che ajedesidíma kuri asegitaha ajapo upéva, ha ndahejamoʼãi kuri mbaʼeve ni avave chejoko. Aikuaa porã vaʼekue ajeheʼa vaʼerãha umi oservívare Ñandejárape. Che ningo ahayhu chupekuéra haʼerõguáicha che família tee ha upéva chepytyvõ añeñandu porãve hag̃ua. Añehaʼã meme aiko la Biblia heʼiháicha, ha áño 1991-pe ajevautisa ha oiko chehegui testígo de Jehová.

Yma cheamargádo ha cheviolénto vaʼekue, ha arekose umi héntepe che poguýpe. Péro Ñandejára Ñeʼẽ rupive tuichaiterei akambia. Koʼág̃a amombeʼu pe mensáhe oĩva la Bíbliape umi cherendusévape, ha pe mensáhe ombopyʼaguapy chupekuéra. Koʼág̃a 23 áñorema aipurupaite che tiémpo Ñandejára servísiope, ha upéva tuichaiterei mbaʼe chéve g̃uarã.

Peteĩ tiémpore ambaʼapo de voluntário pe sukursál orekóvape umi testígo de Jehová Méxicope. Aime aja upépe aikuaa peteĩ mitãkuña iguapaitereívape hérava Claudia, ha romenda áño 1999-pe. Aagradeseterei Jehovápe omeʼẽ haguére chéve peteĩ che irũrã siémpre oĩva che ykére.

Roservi vaʼekue oñondive peteĩ kongregasión de lengua de señas mexicánape, ha roipytyvõ umi nohendúivape oikuaa hag̃ua Jehovápe. Upéi ojejerure oréve rova hag̃ua Belícepe romboʼe hag̃ua la Biblia umi héntepe. Ko paíspe roiko sensillove, péro roguerekopaite la roikotevẽva rovyʼa hag̃ua. Ni michĩmi norombyasýi rodesidi haguére roju koʼápe.

Kon el tiémpo che sy ostudia jey la Biblia ha ojevautisa. Koʼág̃a che ermáno majór, hembireko ha ifamiliakuéra haʼéma avei testígo de Jehová. Che sosiokuéra yma guare apytépe oĩ avei cherendu vaʼekue apredikávo chupekuéra ha odesidi oservi Ñandejárape.

Ambyasýramo jepe, che hentekuéra apytépe oĩ voi omanóva iviolénto káusare. Ha che nakambiáirire provávlemente amanóma vaʼerãmoʼã avei haʼekuéraicha. Aagradeseterei Jehovápe chepytyvõ haguére añemoag̃ui hag̃ua hese ha isiervokuérare, haʼekuéra ipasiénsia ha ipyʼaporã chendive ha chemboʼe aiko hag̃ua la Biblia heʼiháicha.