¡AJÉPA IPORÃITE KO ESPERÁNSA! Ñande Apohare oipota jaiko pára siémpre ko yvy ape ári. Upéicharõ jepe, oĩ heta opensáva arakaʼeve ndaikatumoʼãiha jahupyty upéva, pórke enterovéva ñamanónte vaʼerã voi algúna ves. Ha oĩ avei heʼíva ikatuha jaiko pára siémpre yvágape ñamano rire. ¿Ndépa mbaʼe repensa?

Redesidi mboyve mbaʼépa regueroviáta, roinvita rehechami hag̃ua mbaʼéichapa la Biblia ombohovái koʼã porandu: Jahechávo mbaʼeichaitépa jajejapo porãiterei vaʼekue, ¿mboy tiémpopa jaiko vaʼerã? ¿Maʼerãpa Ñandejára ojapo vaʼekue ko yvy ha umi yvyporakuérape? ¿Ha mbaʼérepa ñamano?

Ñañekomparáramo umi animál ha plánta rehe, jahechakuaa ñande yvypóra tuichaiterei ñanediferenteha. ¿Mbaʼérepa jaʼe upéva? La Biblia heʼi Ñandejára ñandeapo hague ijoguaháramo (Génesis 1:26, 27). ¿Mbaʼépa heʼise upéva? Heʼise hína ñande avei jarekoha umi kualida porã orekóva Ñandejára, por ehémplo ikatu japorohayhu ha ñandehústo.

Hiʼarive, ñandeapo vaʼekue ikatu hag̃uáicha ñapensa ha jaikuaa hag̃ua mbaʼépa oĩ porã térã mbaʼépa oĩ vai. Avei ñandeapo vaʼekue jaikuaase hag̃uáicha chupe ha jaikose hag̃uáicha iñamígoramo. Ha jajogua rupi Ñandejárape ikatu avei jahechakuaa mbaʼeichaitépa iporã ko univérso ha umi mbaʼe oĩva pype, avei umi árte, músika ha umi poesía. Péro peteĩ mbaʼe iñimportantetereíva ñande añoite jaguerekóva haʼe hína pe kapasida ñamombaʼeguasu hag̃ua Ñandejárape. Opa koʼã mbaʼére ikatu jaʼe ñande yvypóra tuichaiterei ñanediferenteha umi animál ha plánta oĩvagui ko yvýpe.

Ñande ningo jaguereko pe kapasida jasegi hag̃ua ñaaprende jaikove aja entéro, ha la oimérire Ñandejára oipota jaiko 70 térã 80 áñonte, ¿mbaʼérepa oiméne ñandeapo jareko hag̃ua upe kapasida? Haʼe ningo ñandeapo upéicha pórke oipota vyʼápe jaiko pára siémpre ko yvy ape ári.

Oĩ opensáva Ñandejára nañandeapói hague voi jaiko hag̃ua pára siémpre ko yvy ape ári. Haʼekuéra heʼi yvyporakuéra oĩha ko múndope ojeprova hag̃ua chupekuéra, ikatu hag̃uáicha ojehecha mávapa omerese oho oiko Ñandejárandi yvágape. Ha upéva haʼéramo siérto, Ñandejára káusare oiko hína entéro mbaʼe vai oĩva ko múndope. Péro Ñandejára ndahaʼeiete upeichagua. La Biblia heʼi voi hese: “Haʼe hína Ñandejára nopyrũiva iñeʼẽre ha  ikatúvare jajerovia, ha arakaʼeve naiñinhústoiva; haʼe ihústo ha hekojoja opa mbaʼépe” (Deuteronomio 32:4).

La Biblia heʼi porã ñandéve maʼerãpa Ñandejára ojapo vaʼekue ko yvy: “Pe yvága Jehová mbaʼe hína, péro ko yvy haʼe omeʼẽ yvyporakuérape” (Salmo 115:16). Upeichaite, Ñandejára ojapo vaʼekue ko yvy porãite ikatu hag̃uáicha jaiko pype pára siémpre. Ha omoĩmbaite voi pype opa mbaʼe ñaikotevẽva ikatu hag̃uáicha jadisfruta ha isentído hag̃ua ñandéve la ñande rekove (Génesis 2:8, 9).

“Pe yvága Jehová mbaʼe hína, péro ko yvy haʼe omeʼẽ yvyporakuérape” (Salmo 115:16)

La Biblia heʼi avei maʼerãpa Ñandejára ojapo vaʼekue yvyporakuérape. Epensamína ko mbaʼe Ñandejára heʼi vaʼekuére Adán ha Évape: “Penefamília retákena ha peñemboheta hetave ha pemyenyhẽ ko yvy ha peipuru. Pereko pende poguýpe [...] opaite animál oikóva yvy apére” (Génesis 1:28). Ñande ikatu jakuida ko yvýre ha jajapo chugui peteĩ paraíso, ¡ajépa iporãite upe priviléhio jarekóva! Adán ha Eva oreko kuri la posivilida oikóvo pára siémpre ifamiliakuérandi ko yvy ape ári, ndahaʼéi yvágape.

La Biblia omombeʼu peteĩ ánhel Ñandejára ojapo vaʼekue ojerrevela ha ombyaise hague pe propósito haʼe oreko vaʼekue yvyporakuérape g̃uarã, upévare oñehenói chupe Satanás. Péro, ¿mbaʼépa la ojapo vaʼekue?

Satanás omboliga Adán ha Évape haʼekuéra oñemoĩ hag̃ua avei Jehová kóntrape. Heʼi chupekuéra orekoha derécho odesidívo mbaʼépa iporã ha mbaʼépa ivai, ha upéva haʼeha peteĩ mbaʼe iporãitereíva Ñandejára omokañýva chuguikuéra. Adán ha Eva oguerovia Satanáspe ha péicha omboyke Ñandejárape. ¿Mbaʼépa oiko hesekuéra upévare? Jehová heʼi haguéicha, tiémpo rire haʼekuéra omano ha upéicha operde pe oportunida oreko vaʼekue hikuái oikóvo pára siémpre ko yvy ape ári peteĩ paraísope (Génesis 2:17; 3:1-6; 5:5).

Ymaiterei guive ha koʼág̃a peve yvyporakuéra osufri gueteri Adán ha Eva ojerrevela haguére. La Biblia heʼi voi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi” (Romanos 5:12). Upéicharõ koʼág̃a la hénte omano Adán ha Eva opeka haguére, ha upéva ndahaʼéi peteĩ “mistério” oúva Ñandejáragui térã álgo ndaikatúiva ñantende.

Adán ha Eva opekáramo jepe, koʼag̃aite peve Ñandejára nokambiái la ipropósito orekóva yvyporakuérape g̃uarã. Haʼe ningo ñanderayhueterei ha ihústo, upévare ñaneguenohẽse pe pekádo ha ñemano poguýgui. Apóstol Pablo heʼi voi: “¿Mbaʼéicha opaga ñandéve pe pekádo? Pekádo káusare ñamano. Péro Ñandejára orregala jeikove opaveʼỹva ñande Ruvicha Cristo Jesús rupive” (Romanos 6:23). Ñandejára ñanderayhúgui avei “omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Jesús voi oñekuaveʼẽ omano hag̃ua ñanderehehápe ikatu hag̃uáicha jarrekupera jey Adán operde vaʼekue. a

Ñandejára opromete haguéicha, koʼẽrõitéma ko yvýgui oikóta peteĩ paraíso. Ha nde rehupyty hag̃ua ko promésa porãite resegi vaʼerã ko konsého Jesús omeʼẽ vaʼekue: “Peikékena pe okẽ ipoʼívarupi; cháke tuicha hína pe tape oporogueraháva ñehundípe, ha heta umi upérupi ohóva. Péro michĩ pe okẽ ha ipoʼi pe tape oporogueraháva jeikove opaveʼỹvape, ha saʼi umi ojuhúva upe tape” (Mateo 7:13, 14). Upéicharõ nderehe odepende rehupyty hag̃ua koʼã mbaʼe, ¿mbaʼépa nde redesidíta?