¿Mbaʼéichapa héra Ñandejára? Ñandejára voi heʼi: “Che hína Jehová, péicha che réra” (Isaías 42:8). Ñandejára réra oĩ 7.000 véserupi la Bíbliape. Upéicharõ jepe heta traduksión bíblicape noñemoĩri la héra síno oñemoĩnte “Señór” térã “Ñandejára”. Haʼe ningo oipota ñañeamiga hese, upévare ñanemokyreʼỹ jaipuru hag̃ua héra (Salmo 105:1).

Mbaʼéicha oñehenói avei Jehovápe. La Biblia oñeʼẽ jave Jehováre oipuru jepi koʼã palávra: “Ñandejára”, “Todopoderóso”, “Ñande Apohare”, “Ñande Ru”, “Señór” ha “Ogovernáva opa mbaʼe”. La Biblia ohechauka Ñandejára siervokuéra oñemboʼérõ guare chupe oipuru hague pe héra porãite ha avei koʼã título (Daniel 9:4).

 Mbaʼeichagua persónapa Ñandejára. Ndaikatúi ningo jahecha Jehovápe pórke haʼe peteĩ espíritu (Juan 4:24). La Biblia heʼi: “Ni peteĩ persóna núnka ndohechái Ñandejárape” (Juan 1:18). La Biblia ohechauka avei haʼe orekoha sentimiénto. Umi persóna ojapóva ikatu omoñeñandu vai chupe, péro haʼe avei “oguerohory umi ojapóvape iporãva” (Proverbios 11:20; Salmo 78:40, 41).

Umi mbaʼe porã orekóva Ñandejára. Ñandejára nomboykéi avavépe, tahaʼe haʼéva ikostúmbre térã ipaís (Hechos 10:34, 35). Haʼe ningo “peteĩ Dios oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre” (Éxodo 34:6, 7). Ñandejára oreko 4 kualida iporãitereíva ojekuaa porãvéva hese.

Podér. Jehová ningo haʼe “Ñandejára Todopoderóso”, upévare ikatu okumpli enteroite mbaʼe oprometéva (Génesis 17:1).

Arandu. Ndaipóri ótro iñaranduvéva Ñandejáragui. Upéicha rupi la Biblia heʼi hese: “Haʼe añoite hína pe iñarandúva” (Romanos 16:27).

Hustísia. Ñandejára siémpre ojapo la oĩ porãva. Haʼe ningo “hekoitépe ojapo opa mbaʼe” ha “arakaʼeve naiñinhústoiva” (Deuteronomio 32:4).

Mborayhu. La Biblia heʼi: “Ñandejára ningo mborayhu” (1 Juan 4:8). Ndahaʼéi ojapónteva umi mbaʼe mborayhúpe síno haʼe voi hína pe mborayhu. Haʼe ojapo entéro mbaʼe ñanderayhúgui ha umíva ñanepytyvõ heta hendáicha.

Ikatu jaiko Jehová amígoramo. Ñandejára hína ñande Ru yvagapegua, haʼe ningo ñanderayhueterei (Mateo 6:9). Jajeroviárõ hese ikatúta jaiko iñamígoramo (Salmo 25:14). Ñandejára ningo oipota ñañemoag̃ui hese ha ñañemboʼe chupe, ñaneinvita ‘ñamoĩ hag̃ua ipópe entéro mbaʼe ñandepyʼapýva, pórke haʼe ojepyʼapy ñanderehe’ (1 Pedro 5:7; Santiago 4:8).

Jesús ndahaʼéi Ñandejára. Ñandejára okrea vaʼekue direktoite Jesúspe ha ndaipóri ótro haʼeichagua. Upévare la Bíbliape ojeʼe haʼeha Ñandejára Raʼy (Juan 1:14). Upe rire Jesús ombaʼapo Jehovándi “peteĩ konstruktór ivaletereívaicha” ha oipytyvõ itúape ojapo hag̃ua entéro mbaʼe (Proverbios 8:30, 31; Colosenses 1:15, 16).

 Jesucristo núnka ndeʼíriva haʼeha Ñandejára. Upéva rangue haʼe heʼi Jehováre: ‘Aju hérape, ha haʼe chembou’ (Juan 7:29). Oñemongetárõ guare peteĩ idisípulandi Jesús ohenói Jehovápe “che Ru ha che Jára” ha “pende Ru ha pende Jára” (Juan 20:17). Jesús omanórõ guare Jehová omoingove jey chupe oguapy hag̃ua ideréchape yvágape ha omeʼẽ chupe tuicha autorida (Mateo 28:18; Hechos 2:32, 33).

Jesucristo ñanepytyvõkuaa ñañemoag̃uive hag̃ua Ñandejárare

Jesús ou ko yvy ape ári ñanemboʼe hag̃ua mbaʼeichagua persónapa Itúa. Jehová heʼi vaʼekue Jesúsre: “Kóva hína che Raʼy ahayhuetéva, pehendúke chupe” (Marcos 9:7). Ndaipóri Jesúsgui oikuaa porãvéva Ñandejárape. Upévare haʼe heʼi: “Che añoite aikuaa porã che Túape. Ha che amombeʼuséramo peteĩ persónape mávapa che Túa, upéva oikuaa porãta avei chupe” (Lucas 10:22).

Jesús osegi Ñandejára ehémplo opa mbaʼépe. Jesús ningo ojapo entéro mbaʼe Itúa ojapoháicha upévare ikatu heʼi: “Upe chéve cherecháva ohecháma avei pe Túape” (Juan 14:9). Jesús oipytyvõ umi héntepe oñemoag̃ui hag̃ua Ñandejárare, pórke la heʼíva ha ojapóva ohechauka mbaʼéichapa Itúa ohayhu umi héntepe. Haʼe heʼi: “Che hína pe tape, pe añetegua ha pe oporomoingovéva. Che rupive añoite ikatu oñeg̃uahẽ pe Túa rendápe” (Juan 14:6). Haʼe heʼi avei “umi Ñandejára siérvo teete oadorataha [Jehovápe] haʼe oipotaháicha. Haʼekuéra ohejáta pe espíritu sánto ogia chupekuéra ha osegíta umi enseñánsa verdadéra. Añetehápe Ñandejára voi oheka umichagua persónape oadora hag̃ua chupe” (Juan 4:23). Epensamíntena, Jehová oheka hína umi persóna ndeichagua, oikuaaséva máva añetehápe haʼe.