Amáske jaikuaa umi kualida porã orekóva peteĩ ñande rapicha, jaikuaa mbaʼeichagua persónapa haʼe ha ñañemoag̃uive hese. Upéicha avei, amáske jaikuaa umi kualida porã orekóva Ñandejára, jaikuaa porãvéta mbaʼeichagua persónapa haʼe ha ñañemoag̃uivéta hese. Ñandejára ningo hetaiterei kualida porã oreko, ha umíva apytépe oĩ cuatro kualida ojekuaa porãvéva hese. Umíva hína: podér, arandu, hustísia ha mborayhu.

“¡Áina Ñandejára Jehová regovernáva opa mbaʼe! Nde ningo rejapo vaʼekue pe yvága ha ko yvy, ndepoderosoiterei ha ndepyapy mbarete rupi” (JEREMÍAS 32:17).

Pe kreasión ohechauka ñandéve mbaʼeichaitépa Ñandejára ipoderóso. Por ehémplo, ¿mbaʼépa reñandu jepi resẽ jave kuarahýpe? Katuete reñandúta hakuha. Ha pe kuarahy ningo Ñandejára okrea vaʼekue ipodér rupive. ¿Ndépa reikuaa mbaʼeichaitépa ipoderóso pe kuarahy? Pe kuarahy mbytetépe ningo la temperatúra ohupyty 15.000.000 °C, ha káda segundo pe kuarahy oprodusi hetave enerhía ikatúvagui oprodusi cientos de millones de vómba atómika okapu jave.

Péro pe kuarahy michĩeterei hína ñakomparátaramo hetaiterei ótro estrélla oĩvare ko univérsope. Umi sientífiko heʼi peteĩva umi estrélla tuichavéva oĩva ko univérsope hérava UY Scuti 1.700 vése tuichaveha pe kuarahýgui. Pe UY Scuti oñemoĩramo pe kuarahy lugárpe, ko ñane planéta opytátama hyepýpe ha ohasapáta umi dos planéta oĩva upe rire entéro. Jaikuaávo koʼã mbaʼe, tuicha ñanepytyvõ  ñantende porãve hag̃ua mbaʼérepa Jeremías heʼi Ñandejára ipodér rupive ojapo hague pe yvága ha ko yvy, térã ko univérso kompletoite.

¿Mbaʼéichapa ñanevenefisia Ñandejára podér? Ñande rekove ningo odepende entéro mbaʼe Ñandejára okrea vaʼekuére, por ehémplo pe kuarahy ha entéro mbaʼe orekóva ko yvy. Ñandejára oipuru avei ipodér ñanepytyvõ hag̃ua káda únope. ¿Mbaʼéichapa ojapo upéva? Síglo primérope por ehémplo Ñandejára omeʼẽ vaʼekue podér Jesúspe ojapo hag̃ua milágro. La Biblia heʼi: “Umi siégo ohecha jey, ndoguatáiva oguata, iléprava okuera, ohenduʼỹva ohendu, omanóva oñemopuʼã jey” (Mateo 11:5). ¿Ha mbaʼéicha ñandéve ñanepytyvõ ko tiémpope? La Biblia heʼi: “Haʼe omombarete umi ikaneʼõvape”. Ha heʼi avei: “Umi orekóva esperánsa Jehováre imbarete jeýta” (Isaías 40:29, 31). Ñandejára ningo ikatu omeʼẽ ñandéve “pe podér ijojahaʼỹva” ikatu hag̃uáicha ñambohovái porã térã ñaaguanta umi provléma ha entéro mbaʼe oñepresentáva ñandéve (2 Corintios 4:7). Katuete oiméne reñemoag̃uiseve koʼág̃a Ñandejárare reikuaa rire mbaʼéichapa haʼe mborayhúpe oipuru ipodér ñanepytyvõ hag̃ua.

“¡Hetaite mbaʼe porã ningo rejapo Jehová! Ko yvy henyhẽte ne rembiapokuégui. Umíva ohechauka mbaʼeichaitépa nearandu” (SALMO 104:24).

Amáske ñaaprendeve pe kreasióngui, ñanemopirĩmba jahechávo mbaʼeichaitépa Ñandejára iñarandu. Oĩ voi peteĩ párte de la siénsia hérava biomimetismo térã biomimética. Upépe umi sientífiko ostudia Jehová kreasiónre ha okopia chugui heta mbaʼe omehora hag̃ua umi mbaʼe odiseñáva. Haʼekuéra ojapo umíva ofavrika hag̃ua umi mbaʼe isensillovéva jepe, por ehémplo umi pegaménto, térã odiseña hag̃ua umi mbaʼe ikomplikadovéva, por ehémplo peteĩ avión.

Péro ñande rete ohechauka porãvéntema mbaʼeichaitépa Ñandejára iñarandu. Ñapensamína mbaʼéichapa oñeforma peteĩ mitã. Upéva oñepyrũ peteĩ sélula oñefekunda vaʼekuégui ha upe sélula orekopaitéma umi informasión tekotevẽva oñeforma hag̃ua pe mitã ha mbaʼe mbaʼépepa ojoguáta ituakuérape. Upéi upe sélula ojedividi ha oiko chugui hetave sélula ojojoguaitereíva, péro og̃uahẽ vove pe tiémpo, umi sélula oñepyrũ okambia ha osẽ jey chugui diferénte kláse de sélula. Umíva apytépe umi sélula oñeforma hag̃ua ñande ruguy, ñane sistéma nervióso ha ñane kangue. Upéi oñepyrũma oñeforma la hete ha oñepyrũma avei ofunsiona. Péicha, 9 mése haguépe, pe sélula peteĩmígui oikóma peteĩ mitã, ha pe mitã oñeformambárõ g̃uarã orekóma miles de millones de sélula. Heta persóna ohecha rire mbaʼeichaitépa iñarandu pe ojapo vaʼekue upe mbaʼe, heʼi pe salmísta heʼi haguéicha: “Ñandejára, nde ningo cheapo porãiterei, ha apensávo upévare che rorrespeta ha romombaʼeguasu” (Salmo 139:14).

¿Mbaʼéichapa ñanevenefisia Ñandejára arandu? Ñande Apohare oikuaa mbaʼépa ñaikotevẽ javyʼa hag̃ua. Haʼe iñarandueterei ha la Biblia rupive ikatu omeʼẽ ñandéve umi konsého ñanepytyvõtava. Por ehémplo, heʼi ñandéve: “Pesegíkena [...] peñoperdona pende pyʼaite guive” (Colosenses 3:13). Ajépa iporãite upe konsého. Umi expérto odeskuvri ke ñaporoperdonáramo jake porãveha ha ñanepytyvõ pono ojupipa ñane presión. Ñanepytyvõ avei  ani hag̃ua ñandejagarra depresión ha hetave ótro mbaʼasy. Ñandejára ningo ñane amígoicha ojepyʼapy ñanderehe ha siémpre omeʼẽ ñandéve umi konsého ñanepytyvõtava (2 Timoteo 3:16, 17). ¿Ndereipotáipa nde peichagua amígo?

“Jehová ningo ohayhu pe hustísia” (SALMO 37:28).

Ñandejára Todopoderóso ningo siémpre ojapo iporãva, haʼe ni mbaʼevéicharõ ndojapomoʼãi ivaíva (Job 34:10). Jehová siémpre oporohusga hekoitépe. Peteĩ salmísta heʼi vaʼekue: “Nde rehusgáta umi tetãme ha rejapóta hustísia” (Salmo 67:4). Ñandejára ikatu ohecha umi mbaʼe jarekóva ñane korasõme, upéicha rupi avave ndaikatúi ombotavy chupe. Haʼe oikuaapaite la siertogua ha hendaitépe oporohusga (1 Samuel 16:7). Haʼe ohechapaite hína umi inhustísia ha korrupsión oĩva ko múndope ha opromete koʼẽrõitéma ohunditaha ‘umi hénte iñañávape’ (Proverbios 2:22).

Péro upéva ndeʼiséi Ñandejára haʼeha peteĩ hués ipyʼahatãva ha okastigasénteva voi la héntepe. Tekotevẽ jave, haʼe katuete ñandeporiahuvereko. La Biblia heʼi voi ‘Jehová ñandeporiahuvereko ha ñanembyasyha’, umi iñañávape jepe haʼe oiporiahuvereko oñarrepentíramo ipyʼaite guive. Ajépa ihustoite Ñandejára (Salmo 103:8; 2 Pedro 3:9).

¿Mbaʼéichapa ñanevenefisia Ñandejára hustísia? Apóstol Pedro heʼi: “Koʼág̃a añetehápe antende Ñandejára otrataha enterovépe peteĩchante, haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hechos 10:34, 35). Ñandejárape g̃uarã ndaipóri iñimportantevéva ñande apytépe, upéicha rupi enterovete ikatu ñañevenefisia ihustísiagui. Enterovéva ikatu jaadora chupe, tahaʼe haʼéva ñande pire kolór, ñane retã, imboriahúva térã iplátava, ijestúdio porã térã ijestudioʼíva.

Ñande Apohare omeʼẽ avei ñandéve ñane konsiénsia pórke oipota ñantende ihustísia, térã umi mbaʼe haʼe heʼíva iporãha, ha ñañevenefisia umívagui. La Biblia heʼi ñane konsiénsia haʼeha peteĩ léi jarekóva ñane korasõme ha ñanepytyvõha jaikuaa hag̃ua oĩ porãpa térãpa oĩ vai pe jajapóva (Romanos  2:15). ¿Mbaʼéichapa ñanevenefisia upéva? Ñahekomboʼe porãramo la ñane konsiénsia ñanepytyvõta ani hag̃ua jajapo peteĩ mbaʼe noĩporãiva térã ikatúva ñandeperhudika. Jajapóramo peteĩ mbaʼe ivaíva katu, ñane konsiénsia ñanemomýita ñañarrepenti ha anivéma hag̃ua jajapo umíva. Jahechaháicha, ñantendéramo Ñandejára hustísia tuicha ñanevenefisia ha ñanemoag̃uive hese.

‘Ñandejára haʼe mborayhu’ (1 JUAN 4:8).

La Biblia ndeʼíri Ñandejára haʼeha podér, arandu ni hustísia, upéva rangue heʼi Ñandejára ohechaukaha umi kualida. Péro si heʼi Ñandejára haʼeha mborayhu. ¿Mbaʼérepa? Pórke Ñandejára orekóramo jepe podér ojapo hag̃ua la ojaposéva ha arandu ojapo porã hag̃ua umi mbaʼe, pe mborayhu hína la omomýiva chupe ojapo hag̃ua entéro mbaʼe. Opa mbaʼe Ñandejára ojapóva, ojapo ñanderayhúgui.

Jehová noikotevẽiramo jepe avavére ni mbaʼevére, pe mborayhu omomýi chupe ojapo hag̃ua pe yvága ha ko yvy, avei ojapo umi ánhel ha yvyporakuéra ikatu hag̃uáicha odisfruta imborayhúgui ha oñangareko hag̃ua hesekuéra. Mborayhúpe Ñandejára oprepara vaʼekue ko yvy ñandéve g̃uarã. Koʼag̃aite peve haʼe ohechauka ñanderayhuetereiha enterovetépe, pórke haʼe “oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã” (Mateo 5:45).

La Biblia heʼi voi “ Jehová ñanderayhuetereiha ha avei ñandeporiahuverekoha” (Santiago 5:11). Haʼe ohechauka omombaʼe ha ohayhuha umi ojapóvape tekotevẽva oikuaa hag̃ua chupe ha oñemoag̃ui hag̃ua hese. Ñandejára oikuaa káda uno umi ojapóvape hína upéicha, haʼe “noĩri voi mombyry ñandehegui” (Hechos 17:27).

¿Mbaʼéichapa ñanevenefisia Ñandejára mborayhu? Hetaiterei mbaʼe ningo jadisfruta Ñandejára ñanderayhu rupi, epensamíntena mbaʼeichaitépa jadisfruta jahechávo pe kuarahy reike, peteĩ mitãraʼy opukavýva, jahasa porã jave ñane hentekuérandi ha hetave mbaʼe. Añetehápe ningo koʼã mbaʼe nañaikotevẽi jaikove hag̃ua, péro si ñanembovyʼaiterei.

Ñandejára ningo ñanderayhúgui omeʼẽ avei ñandéve ótra kósa iporãitereíva: pe ñemboʼe. La Biblia heʼi: “Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe”. Ñande Ru Jehová oipota ñamombeʼu chupe entéro mbaʼe ñandepyʼapýva. Ha jajapóramo upéicha, haʼe opromete omeʼẽtaha ñandéve ‘pyʼaguapy tuichavéva opa mbaʼe ikatúvagui ñantende’ (Filipenses 4:6, 7).

Ko artíkulope jahecháma umi cuatro kualida iñimportantevéva orekóva Ñandejára. Umíva hína: podér, arandu, hustísia ha mborayhu. ¿Nepytyvõpa ko artíkulo reikuaa hag̃ua mbaʼeichagua persónapa Ñandejára? Reikuaasevéramo chupe, roinvita resegi hag̃ua relee ko rrevísta rehecha hag̃ua mbaʼe mbaʼémapa Ñandejára ojapo nderehehápe ha umi mbaʼe ojapótava amo gotyove.