Jesús omboʼe hína umi héntepe pe sóna héravape Cesarea de Filipo, opytáva 25 kilómetrorupi pe sérro Hermóngui. Peichaháguinte heʼi peteĩ mbaʼe osorprendéva ijapostolkuérape: “Añetehápe haʼe peẽme, koʼág̃a oĩ pende apytépe umi nomanomoʼãiva ohecha mboyve pe Yvypóra Raʼy oúrõ hína Irréinope” (Mateo 16:28).

Oiméne umi disípulo oñeporandu mbaʼépa heʼise raʼe. Una semánarupi upe rire, Jesús ojupi peteĩ sérro ijyvatévape Pedro, Santiago ha Juan ndive. Amalisia pyharéma, ajeve umi disípulo hopehyijoa. Jesús oñemboʼe aja, iñapariénsia oñepyrũ okambia. Umi mbohapy apóstol ohecha pe hova kuarahýicha omimbiha ha umi ijao katu morotĩ asy ha ojajaipa.

Upéi ojeaparese mokõi kuimbaʼe ha oñepyrũ oñemongeta Jesús ndive. Umíva hína “Moisés ha Elías”. Haʼekuéra “oñeʼẽ umi mbaʼe Jesús ohasátavare Jerusalénpe” (Lucas 9:30, 31). Oñemongeta hikuái Jesús muérte ha irresurreksiónre. Jesús voi ramoiténte omombeʼu hague oikotaha hese upéva (Mateo 16:21). Umi mbaʼe heʼíva hikuái ohechauka ndoikomoʼãiha Pedro oipota haguéicha, síno ojeapoʼi ha ojejukámante vaʼerãha Jesúspe.

Koʼã mbaʼe omombayete umi disípulope ha oñemoĩ oñatende porã hikuái la oikóvare. Ko visión ohecháva hikuái haʼete voi rreál, upévare Pedro oñepyrũma avei oñeʼẽ ha heʼi: “Mboʼehára, iporãite ningo ñaime koʼápe, romopuʼãta mbohapy óga kárpa: peteĩ nembaʼerã, ótro Moiséspe ha pe ótro katu Elíaspe g̃uarã” (Marcos 9:5). ¿Omopuʼãsépa raʼe Pedro umi óga kárpa oipotágui pe visión ipukuve?

Pedro oñeʼẽ aja gueteri, peteĩ arai omimbipáva ojahoʼi chupekuéra. Ha pe araígui oñehendu peteĩ heʼíva: “Kóva hína che Raʼy ahayhuetéva ha aguerohorýva, pehendúke chupe”. Umi apóstol ohendúvo Ñandejára oñeʼẽha, oñesũ ha oñakãity, ha okyhyjeterei hikuái. Péro Jesús heʼi chupekuéra: “Pepuʼã katu ha ani pekyhyje” (Mateo 17:5-7). Opuʼãvo hikuái, opáma pe visión ha Jesús añóntema oĩ hendivekuéra. Koʼẽ rire, oguejy hikuái pe sérrogui, ha Jesús heʼi chupekuéra: “Aníke pemombeʼu avavépe ko pehecha vaʼekue, oñemopuʼã jey peve pe Yvypóra Raʼy umi omanóva apytégui” (Mateo 17:9).

Pe visiónpe ningo ojehecha kuri Elíaspe, upévare umi disípulo oporandu: “¿Mbaʼére piko upéicharõ umi mboʼehára leipegua heʼi Elías raẽ ou vaʼerãha?”. Jesús ombohovái: “Elías oúma [...], péro haʼekuéra ndohechakuaái” (Mateo 17:10-12). Jesús oñeʼẽ hína Juan el Bautístare, ojapo vaʼekue peteĩ tembiapo ojoguáva Elías ojapo vaʼekuépe. Elías oprepara vaʼekue Eliseo raperã, ha péicha avei Juan oprepara kuri Cristo raperã.

Katuete ningo pe visión tuicha omombarete Jesúspe ha idisipulokuérape. Jaʼekuaa pe visión rupive ojehechaha mbaʼeichaitépa Cristo ipoderósota ogoverna vove. Jesús opromete haguéicha, umi disípulo “ohecha [...] pe Yvypóra Raʼy oúrõ hína Irréinope” (Mateo 16:28). Umi apóstol oĩ aja Jesús ndive pe sérrope, haʼekuéra ohecha “hekomimbipa tuichaitéva”. Oiméne ñanemanduʼa umi fariséo ojerure hague Jesúspe peteĩ milágro, ohechauka hag̃ua haʼeha pe Rréi Ñandejára oprometéva. Péro haʼe ndohechaukái chupekuéra mbaʼeve. Umi disípulo omoirũ meméva Jesúspe katu ohecha ko visión tuichaitéva, oaseguráva oñekumplitaha umi profesía oñeʼẽva pe Rréinore. Upévare, tiémpo rire Pedro oskrivi: “Upéicha rupi jajerovia mbareteve umi profesíare” (2 Pedro 1:16-19).