Ohasáma un áño imédio Juan el Bautista heʼi hague Jesús haʼeha Ñandejára Ovecharaʼy. Upérõ Jesús oñepyrũ ipredikasión. Ha upe guive omoirũ chupe Andrés, Simón Pedro, Juan ha oiméne avei Santiago (Juan ermáno). Avei omoirũ chupe Felipe ha Bartolomé (oñehenóiva avei Natanael). Upe rire oĩ hetave omoirũva Jesúspe (Juan 1:45-47).

Koʼág̃a Jesús oiporavótama ijapostolkuerarã. Koʼã kuimbaʼe omoirũ meméta chupe, ha haʼe ombokatupyrýta chupekuéra. Péro oiporavo mboyve umi apóstolpe, Jesús ojupi peteĩ sérrope oĩva mar de Galilea ypýrupi, namombyrýi Capernáumgui. Upépe oñemboʼe peteĩ pyhare pukukue. Oiméne ojerure Ñandejárape omoarandu hag̃ua chupe ha ovendesi hag̃ua pe desisión ojapótava. Koʼẽmba rire, ohenói idisipulokuérape ha oiporavo ijapyteguikuéra 12 kuimbaʼe.

Umi 12 apytépe oĩ seis omoirũmava Jesúspe oñepyrũ guive opredika. Upéi oiporavo avei Matéope. Chupe ningo Jesús ohenói vaʼekue oĩrõ guare pe impuésto ojekovrahápe. Umi ótro cinco katu Judas (oñehenóiva avei Tadeo, térã “Santiago raʼy”), Simón (pe cananita), Tomás, Santiago (Alfeo raʼy), ha Judas Iscariote (Mateo 10:2-4; Lucas 6:16).

Koʼã 12 apóstol omoirũ meme kuri Jesúspe ha haʼe oikuaa porã chupekuéra. Ijapytepekuéra oĩ voi haʼéva Jesús pariénte. Por ehémplo, Santiago ha iñermáno Juan, haʼe hína Jesús prímo ermáno. Ha pe ótro apóstol Santiago haʼe vaʼekue avei Jesús prímo, pórke itúva hérava Alfeo haʼe vaʼekue José ermáno, ha José katu Jesús tuvanga.

Jesús naiprovlémai imanduʼa hag̃ua ijapostolkuéra rérare. Péro, ¿ikatúpa nde nemanduʼa herakuérare? Nemanduʼa vaʼerã oĩha mokõi hérava Simón, mokõi Santiago ha mokõi Judas. Simón Pedro ermáno héra Andrés, ha Santiago ermáno héra Juan. Koʼãva hína Zebedeo raʼykuéra. Péicha nemanduʼátama ocho apóstol rérare. Upéi hemby cuatro: Mateo, haʼe vaʼekue impuésto kovraha, Tomás katu pe oduda vaʼekue, Natanaélpe oñehenói vaʼekue oĩrõ guare peteĩ yvyramáta guýpe, ha iñamígo katu Felipe.

Once apóstol ningo Galileagua, pe lugár Jesús okakuaa hague. Natanael Canagua. Felipe, Pedro ha Andrés katu Betsaidagua; péro upéi Pedro ha Andrés ova Capernáumpe, ha amalisia Mateo upepegua avei. Santiago ha Juan oreko vaʼekue peteĩ negósio de péska ha oiko avei Capernáumpe, térã ag̃ui upégui. Amalisia Judas Iscariote añoite Judeagua; haʼe upéi otraisiona kuri Jesúspe.