¿NEMANDUʼÁPA mbaʼéicha rupípa oiko vaʼekue peteĩ ánhelgui Satanás el Diablo?... Haʼe opensa vaʼekue ijehénte ha oipota ojeadora chupe, upéicha rupi opuʼã Ñandejárare. ¿Ha oĩpa rakaʼe ótro ánhel omoirũva chupe?... Oĩ. La Biblia heʼi umíva haʼeha ‘Satanás anhelkuéra’, térã demónio (Apocalipsis 12:9).

¿Ogueroviápa umi demónio oĩha Ñandejára?... La Biblia heʼi ogueroviaha (Santiago 2:19). Péro umi demónio okyhyje oikuaágui Ñandejára okastigataha chupekuéra umi mbaʼe vai ojapóvare ¿Mbaʼépa hína umíva?...

La Biblia omombeʼu koʼã ánhel oheja hague yvága ha ou ko yvy ape ári oiko kuimbaʼéicha. ¿Mbaʼérepa? Oguerekoségui rrelasión sexuál umi kuña iporãva ndive (Génesis 6:1, 2; Judas 6). ¿Mbaʼépa nde reikuaa pe rrelasión sexuálgui?...

 Peteĩ kuimbaʼe ha kuña oĩramo oñondive térã orekóramo rrelasión sexuál, pe kuña ikatu opyta hyeguasu ha oñepyrũ okakuaa hetepýpe peteĩ mitã. Ñandejára oipota umi omendáva añónte oreko rrelasión sexuál, ikatu hag̃uáicha pe sy ha túva oñangareko pe mitãre onase rire. Péro Jehová ndojapói umi ánhelpe oreko hag̃ua rrelasión sexuál.

Koʼã ánhel katu ou oĩ umi kuñándi ha upéi ifamília. Itaʼyrakuéra okakuaa ha tuichaitereive umi ótrogui, iñañaiterei ha ojapo mbaʼe vai hapichakuérare. Upéicha rupi Ñandejára ombou peteĩ ama guasu, térã dilúvio, ohundipaite hag̃ua koʼã ánhel raʼykuéra ha umi hénte añáme. Péro Ñandejára ojapoka Noépe peteĩ árka, térã peteĩ várko tuicháva, ojesalva hag̃ua umi hénte ivuénova saʼíramo jepe hikuái. Pe Mboʼehára Guasu heʼi vaʼekue iñimportanteha ñanemanduʼa mbaʼépa oiko upérõ (Génesis 6:3, 4, 13, 14; Lucas 17:26, 27).

¿Ndépa reikuaa mbaʼépa ojapo umi ánhel aña oúrõ guare pe ama guasu?... Oheja hikuái hete kuimbaʼe ha oho jey yvágape. Péro Jehová omboykéma chupekuéra, upévare oiko chuguikuéra Satanás ánhel térã demónio. ¿Ha mbaʼépa ojehu umi  itaʼýra tuichaitévape?... Omanombaite hikuái pe ama guasúpe, ha umi ótro hénte aña upéichante avei.

Pe dilúvio rire, Ñandejára ndohejavéima koʼã demónio oñembohete kuimbaʼe, upévare ndaikatúi jahecha chupekuéra. Péro koʼag̃aite peve ojapokase ñandéve mbaʼe vai. Koʼág̃a katu hetaiteve mbaʼe vai ojapo hikuái Ñandejára omosẽ rupi chupekuéra yvágagui.

¿Ndépa reikuaa mbaʼérepa ndaikatúi jahecha umi demóniope?... Pórke haʼekuéra ndahaʼéi peteĩ persóna ñandéicha. Péro jagueroviakuaa haʼekuéra oĩha. La Biblia heʼi Satanás ha idemoniokuéra ‘ombotavyha hína ko múndo kompletoitépe’ (Apocalipsis 12:9, 12).

¿Ikatúpa Satanás ha idemoniokuéra ñanembotavy avei ñandéve?... Ikatu nañañatendéiramo. Péro natekotevẽi jakyhyje chuguikuéra, Jesús heʼi vaʼekue Satanás ndaipuʼakaiha hese. Ha ñande ñaĩramo Jehová ykére, haʼe oñangarekóta ñanderehe ani hag̃ua Satanás ha idemoniokuéra ojapo ñanderehe ivaíva (Juan 14:30).

Tekotevẽ jaikuaa mbaʼe mbaʼépa ojapokase ñandéve umi demónio. ¿Nemanduʼápa umi mbaʼe vai ojapo vaʼekue haʼekuéra oĩrõ guare ko yvy ape ári?... Ou mboyve pe ama guasu, haʼekuéra oreko vaʼekue rrelasión sexuál umi kuña ndive, ha upéva ndovaléi kuri ojapo. Koʼág̃a avei Jehová heʼi máva añoitépa ikatu oreko rrelasión sexuál, ¿nemanduʼápa?... Umi omendáva añoite. Ha oĩramo nopenáiva Ñandejárare ko mbaʼépe, umi demónio ovyʼa.

Koʼág̃arupi heta mitãrusu ha mitãkuña nomendáiva ojuehe oreko rrelasión sexuál, ha upéva oĩ vai. Ñandejára omeʼẽ vaʼekue pe órgano sexuál kuña ha kuimbaʼépe oreko hag̃ua rrelasión sexuál omenda rire, ha upéicha ovyʼa oñondive. Péro umi demónio ovyʼa  oĩ jave ojapóva Ñandejára ndoipotáiva, por ehémplo, peteĩ mitãʼi térã mitãkuñaʼi opokóramo hapicha órgano sexuál rehe ohuga hag̃ua guaʼu oñondive. Ha nde nerembovyʼaséi umi demóniope ¿ajépa?...

Oĩ avei peteĩ mbaʼe vai demoniokuérape ogustáva, péro Jehovápe ndogustaietéva. ¿Ndépa reikuaa mbaʼépa?... Umi demónio ovyʼa ohechávo umi hénte oiko vai, oñorairõ ha ojahéi hapicháre (Salmo 11:5). Oiméne nemanduʼa péicha oiko hague yma umi demónio raʼykuéra.

Umi demónio oipota avei umi hénte okyhyje, ha ovyʼa voi ojapóvo upéva. Upévare heta vése ohaʼanga umi omano vaʼekuépe ha oñeʼẽ haʼekuéraicha. Péicha ombotavy umi héntepe ha ogueroviaka chupekuéra umi omanóva ohoha oiko ótro hendápe, ha ikatuha oñeʼẽ ñanendive. Upévare oĩ okyhyjéva umi omano vaʼekuégui.

 La Biblia heʼi porã ñandéve Satanás ha idemoniokuéra oipotaha ñapensa haʼekuéra ivuenoha (2 Corintios 11:14, 15). Péro péva japu, umi demónio iñañaiterei ha oipota jajogua chupekuéra. Upévare ñañatende vaʼerã, cháke ikatu ñanembotavy hikuái. Jahechamína koʼág̃a mbaʼépa ikatu oiporu upearã.

¿Moõguipa nde ere umi hénte oaprendeha oñorairõ, oĩha póra, oreko rrelasión sexuál Ñandejára oproivíva ha umícha?... Satanás oiporu rrevistakuéra omombeʼúva istória oñeʼẽva koʼã mbaʼére, avei ojevale téle, videohuégo ha Internet rehe. ¿Ñanemoag̃uítapa Jehováre térãpa Satanás rehe jahecha ha jaleéramo koʼã mbaʼe? ¿Mbaʼépa nde repensa?...

¿Mávapa umi oipotáva ñahendu ha jahecha mbaʼe vai?... Satanás ha idemoniokuéra. Upéicharõ, ¿mbaʼépa ikatu jajapo?... Jalee, ñahendu ha jahecha umi mbaʼe ñanepytyvõtava jajapo hag̃ua Jehová oipotáva. ¿Mbaʼépa hína umíva?...

Jajapóramo umi mbaʼe iporãva, natekotevẽi jakyhyje umi demóniogui. Jesús ipoderosove chuguikuéra ha haʼekuéra okyhyje chugui. Peteĩ jey, umi demónio sapukaihápe oporandu Jesúspe: “¿Reju piko orerundi hag̃ua mbaʼe?” (Marcos 1:24). ¿Ajépa javyʼaitéta Jesús ohundipa vove koʼã demóniope?... Péro koʼág̃ama voi Jesús ikatu oñangareko nderehe reñemoag̃uíramo hese ha Itúvare.