Mateo 11:1-30
11 Jesús omeʼẽ rire umi instruksión umi 12 idisípulope, haʼe osẽ oho omboʼe ha opredika umi ótro siudáre.+
2 Péro Juan el Bautista oĩ kárselpe,+ ha oñemombeʼu chupe umi mbaʼe Cristo ojapóva. Upémarõ Juan omondo idisipulokuérape Jesús rendápe.+
3 Haʼekuéra oho oporandu hag̃ua Jesúspe: “¿Nde piko hína pe Ñandejára opromete vaʼekue omboutaha, térãpa oúta ótro kuimbaʼe?”.+
4 Jesús okontesta chupekuéra: “Peho pemombeʼu Juánpe koʼã mbaʼe pehecha ha pehendúva:+
5 umi siégo koʼág̃a ohecha,+ umi ndoguataporãiva oguata porãma, umi iléprava+ okuera, umi nohendúiva ohendu, umi omanóvape oñemopuʼã jey ha umi imboriahúvape oñemombeʼu umi notísia porã.+
6 Ovyʼa pe ojeroviáva cherehe ha ndodudáiva ni michĩmi”.*+
7 Koʼãva oho rire, Jesús oñepyrũ heʼi umi héntepe Juan rehe: “¿Máva piko raʼe pe kuimbaʼe peẽ pesẽva pehecha pe desiértope?+ ¿Pe kuimbaʼe piko ikangy ha ojogua peteĩ takuára yvytu ombokacha vaipávape? Nahániri.+
8 ¿Máva piko upéicharõ? ¿Peteĩ kuimbaʼe omondéva ao porã ha omimbipáva piko? Nahániri. Umi oipurúva ao iporãva ningo oiko umi rréi rógape.
9 Añetehápe, ¿máva piko upéicharõ pe kuimbaʼe? ¿Peteĩ proféta piko? Si, haʼe peteĩ proféta, ha iñimportanteve jey hína peteĩ profétagui.+
10 Ñandejára Ñeʼẽme ojeskrivi voi hese: ‘Che amondo hína ne renonderã che mensahéro, haʼe opreparáta ndéve nde raperã’.+
11 Añetehápe haʼe peẽme: ndaipóri ko yvy ape ári* ni peteĩ persóna tuichavéva Juan el Bautístagui, péro pe michĩvéva pe Rréino yvagapeguápe, tuichave hína chugui.+
12 Juan el Bautista tiémpo guive, koʼág̃a peve, umi hénte oñehaʼã ohupyty pe Rréino yvagapegua, ha umi oñehaʼãmbaitéva, okonsegi upéva.+
13 Juan tiémpo peve, kompléto pe léi ha umi Proféta, omombeʼu la oikótava.+
14 Ha peẽ ndapegueroviaséiramo jepe: haʼe hína ‘Elías, umi proféta heʼi vaʼekue outaha’.+
15 Pe ikatúva ohendu, ojapysaka porã vaʼerã.
16 ¿Mávarepa ikatu akompara ko henerasión?+ Ojogua hikuái umi mitã oguapývape merkádope,* ha heʼíva iñamigokuérape:
17 ‘Rombopu peẽme fláuta pejeroky hag̃ua, ha ndapejerokýi, ore roñelamenta péro peẽ napeñembyasýi’.*
18 Upéicha avei, Juan oajuna ha ndoʼúi víno, péro peẽ peje hese: ‘Péva oñendemonia’.
19 Che, pe Yvypóra Raʼy katu akaru ha haʼu víno,+ ha peẽ peje: ‘¡Pévango ikaʼu* ha okaruhárente voi oiko, ojeheʼa umi pekadór ha umi okovrávare impuésto!’.+ Péro amo ipahápe, umi mbaʼe porã ojapóva peteĩ persóna la ohechaukáva iñaranduha”.+
20 Upéi Jesús oñepyrũ ojaʼo umi hénte oikóvape umi siuda haʼe ojapo haguépe hetave milágro, pórke haʼekuéra noñarrepentíri. Haʼe heʼi:
21 “¡Aichejáranga Corazín! ¡Aichejáranga Betsaida! Pórke umi milágro ojejapo vaʼekue pende siudápe ojejapórire Tiro ha Sidónpe, umi hénte upepegua yma oñarrepenti vaʼerãmoʼã. Haʼekuéra omondétama kuri ao ohechaukáva oñembyasyha ha oguapy tanimbúpe.+
22 Upévare haʼe peẽme: pe Día de huísiope peẽ pejekastiga vaivéta Tiro ha Sidóngui.+
23 Ha nde Capernaúm,+ ¿reimoʼã piko Ñandejára nderupitaha yvága peve? Nahániri, haʼe nemboguejýta pe Sepultúra* peve.+ Pórke umi milágro ojejapo vaʼekue nde siudápe ojejapórire Sodómape, upe siuda oĩ vaʼerãmoʼã koʼág̃a peve.
24 Upévare haʼe peẽme: pe Día de huísiope peẽ pejekastiga vaivéta Sodómagui”.+
25 Upérõ Jesús heʼi: “Che Ru, nde hína yvága ha yvy Ruvicha. Che rombotuicha enterove renondépe reñomi haguére koʼã mbaʼe umi iñarandu ha ivalévagui, ha reikuaauka umi iñumíldevape mitãicha.+
26 Nde reipotágui che Ru, upéicha oiko.
27 Che Ru ningo omoĩ che poguýpe opa mbaʼe.+ Che Túa añoite chekuaa porã,*+ ha che añoite aikuaa porã che Túape. Ha che amombeʼuséramo peteĩ persónape mávapa che Túa, upéva oikuaa porãta avei chupe.+
28 Peju che rendápe enterove peẽ penekaneʼõva ha pendekárga pohýiva, ha che pombopiroʼýta.
29 Pehupi pende ári che júgo ha peaprende chehegui. Che ningo ndachepochyreíri ha cheumílde che pyʼaite guive,+ upévare katuete pombopiroʼýta.*
30 Che júgo napendeforsamoʼãi* ha che kárga ivevýi”.
Nóta
^ Griégope: “noñepysangáiva”.
^ Griégope: “onaséva kuñanguéragui”.
^ Térã: “plásape”.
^ Térã: “ndapejepytiʼanupãi ñembyasýgui”.
^ Griégope: “hoʼu meme víno”.
^ Griégope: “oikuaa porã pe Taʼýrape”.
^ Térã: “ambopiroʼýta pene álma”.
^ Térã: “ndahasýi jagueraha hag̃ua”.
