Génesis 48:1-22
48 Upe rire oñemombeʼu Josépe itúa iporteʼipaitemaha. Upévare haʼe oho itúa rendápe ha ogueraha hendive itaʼýra Manasés ha Efraín.+
2 Ha Jacóbpe ojeavisa ouha hendápe itaʼýra, upémarõ haʼe oñehaʼãmbaite ha opuʼã oguapy hupápe.
3 Upéi Jacob heʼi Josépe:
“Ñandejára Todopoderóso oñeʼẽ* vaʼekue chéve Canaánpe, pe lugár héravape Luz. Upérõ haʼe chevendesi,+
4 ha heʼi chéve: ‘Che ambohetáta ne familiare. Ndehegui osẽta heta nasión,+ ha ne familiarépe ameʼẽta ko yvy ha opytáta peẽme hetaiterei tiémpore’.+
5 Umi mokõi nde raʼy onase vaʼekue Egíptope che aju mboyve ne rendápe, umíva opytáta chembaʼerã.+ Efraín ha Manaséspe arekóta avei che raʼy teéramo, haʼeháicha Rubén ha Simeón.+
6 Péro umi mitã onaséva ndéve koʼág̃a guive, umíva opytáta nembaʼerã. Ha chupekuéra otokáta avei pe erénsia oñemeʼẽtava Efraín ha Manaséspe.+
7 Che katu ajúrõ guare Padángui, nde sy Raquel omano+ chehegui Canaánpe rog̃uahẽ mboyvemi Efrátape.+ Upévare añotỹ chupe Efrata rapére, oñehenóiva avei Belén”.+
8 Upéi Israel ohecha José raʼykuérape ha oporandu chupe: “¿Koʼãva piko nde raʼy?”.
9 José heʼi itúape: “Si, koʼãva che raʼykuéra hína, Ñandejára omeʼẽ vaʼekue chéve ko lugárpe”.+ Jacob heʼi chupe: “Eguerúna koʼápe avendesi hag̃ua chupekuéra”.+
10 Upérõ ningo Jacob itujaitereíma ha ndohechaporãvéima, upévare José omoag̃ui itaʼyrakuérape hendápe. Upévo Jacob oañuã ha ohetũ chupekuéra.
11 Ha Israel heʼi Josépe: “Chéngo ni naimoʼãi kuri rohecha jeytaha.+ Péro Ñandejára opermiti chéve ahecha nde raʼykuérape* avei”.
12 Upéi José oapartaʼimi itaʼyrakuérape itúa ypýgui* ha oñakãity henondépe.
13 Upe rire José omoĩ mokõive itaʼýrape ijykére, Efraínpe+ omoĩ ideréchape ha Manaséspe+ katu omoĩ ijiskiérdape. Upéi okoloka chupekuéra itúa Israel renondépe, Efraín opyta Israel iskiérdape ha Manasés katu opyta ideréchape.
14 Péro Israel omoĩ ipo derécha Efraín akã ári, haʼéramo jepe pe imitãvéva. Ipo iskiérda katu omoĩ Manasés akã ári. Ha Israel a propósito ojapo upéicha, oikuaa porãramo jepe Manasés haʼeha pe ijypykue.+
15 Upémarõ haʼe ovendesi Josépe ha heʼi:+
“Ñandejára tee ningo hetáma oñangareko cherehe aikove aja entéro.+Chupe voi oadora+ vaʼekue che avuélo Abrahán ha che túa Isaac.
16 Haʼe ningo hiʼánhel rupive chepeʼa opa mbaʼe vai ahasávagui.+ Haʼe tovendesi koʼã mitãkuimbaʼépe.+
Koʼã mitãkuimbaʼe rupive umi hénte taimanduʼa cherehe, che avuélo Abrahán ha che túa Isaac rehe.Ha taifamília heta hikuái ko yvy ape ári”.+
17 Josépe ndogustái ohechávo itúa omoĩha ipo derécha itaʼýra Efraín akã ári, upévare oipeʼase Efraín akã árigui itúa po omoĩ hag̃ua Manasés akã ári.
18 Upémarõ José heʼi itúape: “Papa rejavy ningo, ko ótro hína la che raʼy ypykue.+ Emoĩna ko nde po derécha iñakã ári”.
19 Péro itúa heʼi chupe: “Aikuaángo che raʼy, aikuaa. Haʼéngo heta ifamíliata ha oikóta avei chugui peteĩ puévlo tuicháva. Péro iñermáno imitãvéva hetave ifamíliata+ ha oikóta voi chugui peteĩ nasión tuichaitereíva”.+
20 Upéi haʼe osegi ovendesi chupekuéra,+ ha heʼi:
“Umi israelita ovendesíta vove hapichakuérape oipurúta nde réra ha heʼíta:‘Ñandejára tanevendesi Efraín ha Manaséspe ovendesi haguéicha’”.
Péicha Jacob ovendesírõ guare chupekuéra, omotenonde Efraínpe ha ombotapykue Manaséspe.
21 Upéi Israel heʼi Josépe: “Amano mbotaitémango+ che raʼy. Ñandejára osegíta oĩ penendive ha pendegueraha jeýta pe lugár oiko haguépe yma ñande tuakuéra ypykue.+
22 Péro che katu koʼág̃a ameʼẽ ndéve hetave nde yvyrã ne ermanokuéragui. Upe yvy ningo che aipeʼa vaʼekue umi amorréogui che espáda, che árko ha flécha reheve”.
