Aa. Pikirajaa sünain pienchisü pütchi suluʼuka tü Bibliakat süpüla pütüjaain saaʼu tü paaʼinrajatkat kojuyaarale pia jee masetaainre pünneetse.

1.   Piisatta pünneetse. «Chi wayuu jülüjakai aaʼin palajana tü kasa naainjainjatkat, aneerü sukuwaʼipa nutuma. Aluʼusaʼa chi wayuu ashapajaakai aaʼin sünain tü naainjainjatkat, mojeerü sukuwaʼipa nutuma» (Proverbios 21:5). Piyaawata saaʼu tü kasa piyaʼlajüinjatkat, jaʼitairü jayain shia. Jülüja paaʼin tü nneerü pükataajüinjatkat.

2.   Nnojo pujuyaajüin nneerü nnojorüle choʼujaain shia pümüin. «Chi wayuu achajaakai aʼanapajaa, achepchieeshi nutuma chi wayuu aʼanapajirakai» (Proverbios 22:7). Kojuyaarale pia sümaa isain püchiki puwalaajüin shia, püma namüin na kojuyaalakana oulia pia püchajaweerüin sukuwaʼipa süpüla puwalaajüin nanneetse. Anuu tü sümakat tü Bibliakat namüin na ojuyaajakana nneerü sümaa isain nachiki nawalaajüin shia: «Süka pujutuuin najapuluʼu chia wayuukai puʼuna nünainmüin jee paashajaa nümaa süpüla punouteʼerüin sukuwaʼipa. Paaʼinramaata shia, nnojo putunkuin suulia» (Proverbios 6:1-5, TNM). Isaleje püchiki pukumajüin sukuwaʼipa tia soʼu palajatkat pukua, puuʼulaka shia süchikuaʼa. Pukumaja sukuwaʼipa süpüla puwalaajüin tü nneerü pujuyaalakat.

3.   Nnojo kachiiruain paaʼin tü nneetkat. «Chi wayuu kapülakai aaʼin nukuwaʼipa nümüiwaʼa, shia neʼe jülüjaka naaʼin washireein nia. Nnojotpejeʼe nütüjaain saaʼu mojeerüin nukuwaʼipa sünainjee tia» (Proverbios 28:22). Kachumuraire wanee wayuu otta washireere nia, maʼletseechi nia otta eemiajaweerü nunoula.

4.   Talata paaʼin sümaa tü eekat pümaʼana. «Müleka eere tü wekakat, eere washeʼin, talatüinjana waya sümaa tia» (1 Timoteo 6:8). Nnojotsü shiain talatüin atuma naaʼin wanee wayuu tü nneetkat. Eeshii wayuu talataka maʼin aaʼin mayaainjeʼe nnojoluin washirüin naya. Naya wayuukana, aishii naya napüla napüshi, naʼaleewainyuu otta aleewashii nümaa Maleiwa (Proverbios 15:17; 1 Pedro 5:6, 7).