Eeshii na wayuu makana nnojoluin watüjaain saaʼu jaraliin na ashajakana tü Bibliakat. Akatsaʼa süküjain wamüin tü Bibliakat nanülia na ashajakana shia. Eesü sümüle tü Bibliakat mayaa: «Anuu nünüiki Nehemías», «tü niʼrakat Isaías» otta «tü nünüikikat Jehová nümüin Joel» (Nehemías 1:1; Isaías 1:1; Joel 1:1).

 Naashin na ashajakana tü Bibliakat, shia nashajakat tü münakat namüin nutuma Jehová, chi waneeshikai jee chi shiimainshikai sünain Maleiwain otta nia oʼuniraka tü nakuwaʼipakat. Na ashajakana tü pütchikat süka Hebreo, alatüsü suulia 300 naküjain tü pütchi makat: «Anuu tü nümakat Jehová» (Amós 1:3; Miqueas 2:3; Nahúm 1:12). Eeshii na aküjünakana amüin tü pütchikat natuma na aapieekana (Zacarías 1:7, 9).

 Ashajünüsü tü Bibliakat natuma 40 wayuu soʼutpünaa 1.600 juya. Naʼakajee naya wayuukana eeshi na ashajakana kojuyasü karaloʼuta. Eesü 66 karaloʼuta suluʼu tü Bibliakat. Saʼakajee tiairua eesü 39 karaloʼutairua ashajünaka süka Hebreo, tü Antiguo Testamento münakat otta 27 karaloʼutairua ashajünaka süka Griego, tü Nuevo Testamento münakat.