Tü sümakat tü Bibliakat

 Woutiisapa wanee wayuu emetinnüshi shiroku wüin. a Aküjünüsü suluʼu tü Bibliakat süchiki wainmain wayuu woutiisaka (Aluwataaushikana 2:41). Maʼaka saaʼin nukuwaʼipa Jesús soʼu woutiisain nia, emetinnüshi shiroku tü süchikat Jordán (Mateo 3:13, 16). Müsia neʼe nukuwaʼipa wanee wayuu chejeʼewaikai Etiopía, nuchuntuin woutiisain nia nüntapa sotpaʼamüin wanee wüin (Aluwataaushikana 8:36-40).

 Nüküjain Jesús woutiisainjanain na oushikajaakana süchiirua nukuwaʼipa (Mateo 28:19, 20). Nüküjainña chi aluwataaushikai Pedro shiainjatüin naaʼinrüin wanee wayuu tia (1 Pedro 3:21).

Anuu tü wekirajaainjatkalü anain sünain pütchikat tüü:

•  ¿Kasa kayaawaseka tü woutiisaakat?

•  ¿Süküjainche tü Bibliakat woutiisainjachin wanee joʼu?

•  ¿Jamaluʼutche woutiisain wanee wayuu saaʼu nünülia Maleiwa, saaʼu nünülia chi Nüchonkai otta saaʼu nüpülain Maleiwa?

•  ¿Mojusüche woutiisale wanee wayuu nüchikuaʼa?

•  Aküjünüsü suluʼu tü Bibliakat süchiki waneirua woutiisaa

•  Pütchi nnojotka shiimain süchiki tü woutiisaakat

 ¿Kasa kayaawaseka tü woutiisaakat?

 Wanaa sümaa woutiisain wanee wayuu jaʼyasü naaʼu niyaawajaain suulia naainjala otta nüpansaajüin nünüiki nümüin Maleiwa sünain naaʼinrajatüin tü nüchekakat jaʼitairü jamüin nukuwaʼipa. Oonooinjachi nia nümaa Maleiwa jee nümaa Jesús sünain süpüshuaʼa tü naainjakat. Shia tia tü naaʼinrajatkat wanee wayuu süpüla katüin noʼu waneepia.

 Nimetinnüle wanee wayuu shiroku wüin, müshi nüpütakai aaʼin süpüshuaʼa tü nukuwaʼipapuʼukat paala. Süküjain tü Bibliakat wanaa sümaa woutiisain wanee wayuu müshi nojoitünakai aaʼin (Roma 6:4; Colosas 2:12). Woutiisapa wanee wayuu müsü outakai saaʼin tü nukuwaʼipapuʼukat paala jee müsia jooluʼu jeketüitpa nukuwaʼipa süka naapüitpain naaʼin nümüin Maleiwa.

 ¿Süküjainche tü Bibliakat woutiisainjachin wanee joʼuu?

 Nnojotsü süküjain tü Bibliakat woutiisainjachin wanee joʼuu. b Süküjain wainmainjatüin tü kasa naaʼinrajatkat wanee wayuu süpülapünaa woutiisain nia.

 Niyaawatüinjatü saaʼu palajana tü pütchi mapüleekat aküjünaka suluʼu tü Bibliakat otta pansaainjatü nukuwaʼipa wanaapünaa sümaa tü sümakat. Ayaawajaainjachi nia suulia naainjala otta oʼuraajüinjachi nia nümüin Maleiwa süpüla naapüin naaʼin nümüin (Aluwataaushikana 2:38, 41; 8:12). Nnojotsü süpüla naaʼinrüinjatüin tia wanee joʼuu.

 ¿Jamaluʼutche woutiisain wanee wayuu saaʼu nünülia Maleiwa, saaʼu nünülia chi Nüchonkai otta saaʼu nüpülain Maleiwa?

 Anuu tü nuluwataakalü anain Jesús na nikirajüinkana: «Anashii juʼunule sünain ekirajaa wayuu [...]. Woutiiseena naya jutuma saaʼu nünülia chi Tashikai, saaʼu tanülia tayakai chi Nüchonkai otta saaʼu nüpülain Maleiwa. Jikirajeena naya süpüla noonooinjanain sümaa süpüshuaʼa tü taluwataakalü anain» (Mateo 28:19, 20). «Woutiiseena [...] saaʼu nünülia», tia maluʼulu niyaawatüin saaʼu wanee wayuu niain laülaain saaʼu kasakat süpüshuaʼa chi Maleiwakai jee chi Nüchonkai otta kojutusü nümüin tü naainjakat Maleiwa sükajee tü nüpülainkat. Anuu tü nüküjakat chi aluwataaushikai Pedro nümüin wanee wayuu joʼuujiraakai sümaa masaʼain: «Püshaʼwalaa jee puwarairaa saaʼu nünülia Jesucristo chi chejeʼewaikai Nazaret» (Aluwataaushikana 3:6). «Saaʼu nünülia Jesucristo», ¿jamüshiche nümaka Pedro? Shia süka nütüjaain saaʼu niain Cristo anain atuma chi wayuukai.

•   Tü pütchikat «chi Tashikai» nia süküjeeka achiki Jehová c chi Maleiwakai. Nia Kakumalakai waya, chi Katakai atuma woʼu otta chi Pülashikai maʼin. Müshijeseʼe niain chi Laülaakai saaʼu kasakat süpüshuaʼa (Génesis 17:1; Apocalipsis 4:11).

•   Tü pütchikat «chi Nüchonkai» nia süküjeeka achiki Jesucristo, chi aapakai nikii waaʼu (Roma 6:23). Acheküsü wayaawatüin saaʼu tü naainjakat Jesús süpüla nikeraajüin tü nüchekakat Maleiwa süpüla woʼttaainjanain (Juan 14:6; 20:31; Aluwataaushikana 4:8-12).

•   Tü pütchikat «nüpülain Maleiwa» shia süküjeeka achiki tü naaʼinrakalü akajee wanee kasa. d Wainma kasa nukumajaka sükajee, katüsü soʼu kasa nutuma, yootushi nia namaa na nünüikimaajanakana jee waneirua wayuu otta katchinsü naaʼin nutuma süpüla nekeraajüin tü nüchekakat (Génesis 1:2; Job 33:4; Roma 15:18, 19). Nüküjain namüin waneinnua wayuu sükajee tü nüpülainkat tü jülüjakat naaʼin jee tü nashajüinjatkat suluʼu tü Bibliakat (2 Pedro 1:21).

 ¿Mojusüche woutiisale wanee wayuu nüchikuaʼa?

 Wainma na wayuu aʼwanajaakana tü nanoujakalü anain. Woutiisaichipale wanee wayuu, ¿mojusüche woutiisale nia nüchikuaʼa suluʼu wanee iküleesia naata? Eeshii na «aa» makana sutuma nnojoluin nayaawatüin saaʼu tü sümakat Éfeso 4:5, eere sümüin: «Waneeshia neʼe chi Señotkai, wanaawasü tü wanoujakalü anain nüchiki jee waneesia neʼe sukuwaʼipa tü woutiisaakat». Nnojotsü süküjain tia pütchikat nnojoluin süpüla woutiisain wanee wayuu nüchikuaʼa. ¿Jamüsü watüjaaka saaʼu tia?

 Tü süküjakat. Wayaawatüle saaʼu tü süküjeekalü achiki Éfeso 4:5, watüjaajeerü aaʼu shiain naashajaain achiki Pablo paaʼinwainjanain na anoujashiikana. Na anoujashii shiimainshiikana wanaawainjatü tü nanoujakalü anain (Éfeso 4:1-3, 16). Paaʼinweena naya noushikajaale süchira nukuwaʼipa Jesús, wanaawale tü nanoujakalü anain otta nekeraajüle tü sümakat tü Bibliakat süchiki tü naaʼinrajatkat wanee wayuu süpüla woutiisain nia.

 Soʼu wanee kaʼi, nütütüleʼerüin Pablo naaʼin na anoujashiikana süpüla woutiisainjanain naya nachikuaʼa, süka woutiisain paala naya sümaa nnojoluin nayaawatüin saaʼu tü sümakat tü Bibliakat (Aluwataaushikana 19:1-5).

 Tü woutiisaa kojutukat nümüin Maleiwa. Süpüla kojutuin nümüin Maleiwa tü woutiisaa naaʼinrakat wanee wayuu, choʼujaasü niyaawatüin maʼin saaʼu tü shikirajaakalü anain tü Bibliakat (1 Timoteo 2:3, 4). Woutiisale wanee wayuu suluʼu wanee iküleesia nnojotka ekirajaain tü sümakat tü Bibliakat, müshi nnojoikai naaʼin woutiisain noʼuluʼu Maleiwa (Juan 4:23, 24). Eeshijaʼa woutiisale chia wayuukai süka alin Maleiwa nüpüla nnojotpejeʼe niyaawatüin saaʼu «tü nuchuntakat Maleiwa» (Roma 10:2). Süpüla kojutuin nümüin Maleiwa tü woutiisaa naaʼinrakat wanee wayuu, nikirajaainjatü anain tü Bibliakat, naaʼinrüinjatü tü sümakat, naapüinjatü naaʼin nümüin Maleiwa otta woutiisaa müinjachiaa nia nüchikuaʼa. Müle shia nutuma pansaajeerü tü woutiisaa naaʼinrakat.

 Aküjünüsü suluʼu tü Bibliakat süchiki waneirua woutiisaa

 Aküjünüsü suluʼu tü Bibliakat süchiki waneirua woutiisaa naataka suulia tü woutiisaa naainjakat na nikirajüinkana Jesús eere nimerotinnüin wanee wayuu shiroku wüin. Anuu shia:

 Tü woutiisaa naainjakat Juan chi awoutisaajüikai. e Nürütkaale nümaʼanamüin Juan wanee judío jee niale wanee wayuu aapaakai sümaa tü nanoujakalü anain na judíokana süpüla woutiisain nia nutuma, shia süka niyaawajaain suulia tü kasa mojusü naainjakat, tü aküjünakat sünain tü Pütchi Aapünakat nümüin Moisés. Tü woutiisaa naainjakat Juan shia süpüla nayaawatüin saaʼu na wayuukana jarai chi Mesíaskai jee nanoujain nünain. Chi Mesíaskai nia Jesús, chi chejeʼewaikai Nazaret (Lucas 1:13-17; 3:2, 3; Aluwataaushikana 19:4).

 Nuwoutisaajünapa Jesús. Awoutisaajünüshi Jesús nutuma Juan chi awoutisaajüikai, naatapejeʼe maʼin nukuwaʼipa Jesús noulia na waneinnua wayuu woutiisakana. ¿Süka jamüin? Süka lotuin nukuwaʼipa Jesús jee nnojoishi nia kaainjalain (1 Pedro 2:21, 22). Müshijeseʼe nnojoluin woutiisain nia sutuma niyaawajaain suulia naainjala jee shiale süpüla nuchuntuinjachin nümüin Maleiwa wuleinjatüin tü suluʼukat naaʼin (1 Pedro 3:21). Woutiisashi nia süpüla naaʼinrüinjatüin tü nüchekakat Maleiwa. Süka niain chi Mesíaskai, naapajiraainjachin nikii naaʼu napüshuaʼa na wayuukana (Hebreokana 10:7-10).

 Woutiisaa sükajee nüpülain Maleiwa. Juan chi awoutisaajüikai jee müshia Jesús aashajaashii süchiki woutiisaa sükajee nüpülain Maleiwa (Mateo 3:11; Lucas 3:16; Aluwataaushikana 1:1-5). Tia nnojotsü müin aka saaʼin woutiisain wanee wayuu saaʼu nüpülain Maleiwa (Mateo 28:19). ¿Jamüsü nnojotka wanaawain shia?

 Palitchon na nikirajüinkana Jesús woutiisakana sükajee tü nüpülainkat Maleiwa. Naya na anoujashii aneekünakana sükajee tü nüpülainkat Maleiwa süpüla naluwataainjanain nümaa Cristo chaa iipünaa otta süpüla sacerdoteinjanain naya saaʼu tü mmakat f (1 Pedro 1:3, 4; Apocalipsis 5:9, 10). ¿Jaralii na naluwataainjanakana aaʼu? Naaʼu na wattakana saalii nikirajüin Jesús kepiainjanaka saaʼu tü mmakat süpüla kaʼikat süpüshuaʼa paʼaraiisüpa shia (Mateo 5:5; Lucas 23:43).

 Woutiisashii naya süpüla paaʼinwajiraain nümaa Cristo otta süpüla müin outakai naaʼin wanaa nümaa. Na woutiisakana sükajee nüpülain Maleiwa woutiisashii naya süpüla paaʼinwajiraain nümaa Cristo (Roma 6:3). Na makana akuwaʼipa naya na nikirajüin Jesús aneekuushikana süpüla naluwataain nümaa Cristo chaa iipünaa. Müshiijeseʼe woutiisain naya süpüla paaʼinwajiraainjanain naya nümaa Cristo. Saashin tü Bibliakat müshi Jesús maʼaka saaʼin nekii jee müshia nayaka müshii aʼaka saaʼin niʼiruku (1 Corinto 12:12, 13, 27; Colosas 1:18).

 Na anoujashii aneekünakana nutuma Maleiwa woutiisashii naya süpüla müin outakai naaʼin wanaa nümaa Jesús (Roma 6:3, 4). Maʼaka naaʼin Jesús, oonooshii naya nümaa Maleiwa otta wainma tü kasa nooʼulaaka maʼaka saaʼin katüin noʼu saaʼu tü mmakat süpüla kaʼikat süpüshuaʼa. Ekeraajeerü tia woutiisaka outapa naya otta nasoʼireʼennapa naaʼin süpüla kepiainjanain chaa iipünaa sümaa meʼrujuin naya (Roma 6:5; 1 Corinto 15:42-44).

 Woutiisaa sükajee siki. Anuu nünüiki Juan chi awoutisaajüikai: «Woutiiseena jia nutuma [Jesús] sükajee nüpülain Maleiwa otta sükajee siki. Nümaʼanaitpa tü awaajiakat otta wuleerü nutuma tü niyüüjainkat. Nükotchojeerü tü trigokat otta nünaajeerü shia suluʼu tü anaajaaleekat süchon pünajüt, akaajasaʼa tü suʼutalakat naʼajeerü shia süka wanee siki matüjainka ayokojowaa» (Mateo 3:11, 12). Wayaawata aaʼulu sükajee tia, naata maʼin sümüin woutiisale wanee wayuu süka siki jee woutiisale nia sükajee nüpülain Maleiwa. ¿Kasa nüküjeeka achiki Juan sükajee tü nümakat?

 Naya kayaawasekana tü trigokat na wayuu aapajakana tü nümakat Jesús jee noonooin sümaa. Eeshii süpüla woutiisain naya sükajee nüpülain Maleiwa. Na kayaawasekana tü suʼutalakat naya na wayuu nnojoliikana aapajeein tü nümakat Jesús. Woutiiseena naya sükajee siki, tia maluʼulu najaʼlajeʼenneenain süpüla kaʼikat süpüshuaʼa (Mateo 3:7-12; Lucas 3:16, 17).