1, 2. (1) ¿Kasa paaʼinreeka amüin paʼaraiisüpa tü mmakat? (Piirakaa sümüin tü ayaakuaakat.) (2) ¿Kasa maa talateetka atuma waaʼin?

NAASHIN Pablo, achecheraainjana waya süchiirua tü kataa oʼuu aapüneetkat wamüin. Sutumajee tia, sotojoosü waaʼin sümaa yaainjanain waya kepiain yaa mmapaʼa Paʼaraiisüpa shia (paashajeʼera 1 Timoteo 6:12, 19, TNM). Talatashaatasü paaʼin jülüjapa paaʼin tia, ¿aashi müin? Jamüsüjaʼa Paʼaraiisüpa tü mmakat, talateerü paaʼin waneepia, nnojoleerü kasain aijüin pünain, jimateerü paaʼin (Is. 35:5, 6). Aneerü paaʼin süka kottiraajeechin pia sümaa püpüshi, paʼaleewainyuu jee piʼreena nachikuaʼa na püpüshi asoʼiraainjanakana aaʼin (Juan 5:28, 29; Aluw. 24:15). Suluʼu tü Paʼaraiisükat, ekirajaweechi pia sünain tü kasa pütüjaweekalü aaʼu, eeshi süpüla pikirajaain sünain tü cienciakat, atalejaa guitarra, piano. Akumajeechi pia pipiaya.

² Talataleejeetpejeʼe paaʼin sutuma kojuteerüin sümüin wayuu tü nünüliakat Jeʼwaa sümaa nayaawateerüin saaʼu niain Jeʼwaa laülaakai saaʼu kasakat süpüshuaʼa (Mat. 6:9, 10, TNM). Talateerü paaʼin sutuma aneerüin wayuu süpüshuaʼa suluʼu tü Paʼaraiisükat. Ana ana meerü wakuwaʼipa shiʼipaʼaya otta aleeweena maʼin waya nümaa chi Maleiwakai (Sal. 73:28; Sant. 4:8).

3. ¿Kasa waaʼinrajatka suluʼuweere waya tü Paʼaraiisükat?

³  Weʼitaain maʼin waaʼin sünain nikeraajeerüin Jeʼwaa süpüshuaʼa tü nümakat. Naashin Jesuu, «nnojotsü kapüleein nümüin Maleiwa» naainjain wanee kasa (Mat. 19:25, 26). Naashin Pablo, achecheraainjana waya süchiirua tü kataa oʼuu aapüneetkat wamüin. Pejechechonsü sükalia süpüla sajaʼttinnüin tü kasakat süpüshuaʼa, müsüjeseʼe weeʼiyatüinjatüin süka wakuwaʼipa eejüin waaʼin süpüla tia. Suluʼuweere waya tü Paʼaraiisükat, eejüinjatü waaʼin maaʼulu yaa. Wekirajaa sünain tü waaʼinrajatkat süpüla eejüin waaʼin.

4. ¿Kasa naaʼinraka wanee wayuu nukolojooinjachire suluʼumüin wanee mma naata?

⁴ ¿Kasa waaʼinrajatka maaʼulu yaa suluʼuweere waya tü Paʼaraiisükat? Nukolojooinjachire wayuu suluʼumüin wanee mma naatajatü, ekirajaainjachi nia sünain nanüiki na wayuu kepiakana chayaa süpüla nütüjüinjachin süpüleerua, ekirajaainjachi nia sünain tü nakuwaʼipakat. Jee müsia eesü süpüla nüʼlakajaain tü eküülü shikaajakat wayuu chayaa süpüla nuuʼulaküin seʼeje. Akaataajaʼa wayakana, keraainjatü watuma wakuwaʼipa maaʼutpünaa süpüla suluʼuinjanain waya tü Paʼaraiisükat. Wekirajaa sünain tü kasa waaʼinrajatkat.

5, 6. ¿Jamüshii kiʼrainjanaka waya sünain jüüjüwaa sümüin tü nupueulosekat Jeʼwaa?

⁵ Maaʼulu yaa, watta naalii na oonookana sümaa nünüiki Satanaa. Naashin nayakana, nnojotsü choʼujaain noonooin sümaa nünüiki Maleiwa. Suluʼujee tia, eʼrüshii müliaa naya jee mojusü nakuwaʼipa (Jer. 10:23). Eekajasaʼa wayakana, nia woonooka amaa anüiki Jeʼwaa süka niain wanee aluwataai aipürai maʼin. Suluʼu tü Paʼaraiisükat, aneerü wayuu süpüshuaʼa süka soonoweerüin sümaa nünüiki Maleiwa.

⁶ Suluʼuweere waya tü Paʼaraiisükat, jüüjüüchoinjana waya maaʼulu yaa sümüin tü suluwataakalü anain waya tü nupueulosekat Jeʼwaa. Waainjüle tia, woonoojeerü amaa tü aluwataaneenakalü anain waya paʼaraiisüpa tü mmakat. Jamüsüjaʼa suluʼu tü Paʼaraiisükat, aküjüneerü wamüin tü waaʼinrüinjatkat süpüla anachoinjatüin watuma tü Mmakat, aküjüneerü wamüin tü waaʼinrüinjatkat süpüla wekirajüin nüchiki Jeʼwaa na wayuu asoʼiraainjanakana aaʼin. Anasü jülüjüle waaʼin tüü: «Suluwataale taya tü nupueulosekat Maleiwa sünain aaʼinraa wanee kasa mamalainka tamüin, ¿jüüjüweeiche  taya? ¿Taainjataajeetpa mojusheeka tia aluwataanakalü anain taya?».

7, 8. (1) ¿Jamüshii jüüjüüinjanaka waya sümüin tü nupueulosekat Jeʼwaa maaʼulu yaa? (2) ¿Kasa aluwataanaka anain waneeinnua wawalayuu? (3) ¿Jameerü waaʼin suluʼupa waya tü Paʼaraiisükat?

⁷ Suluʼuweere waya tü Paʼaraiisükat, talatüinjatü waaʼin sümaa tü aʼyatawaa eʼitaanakat wajapuluʼu. Jüüjüüchonle waya sümüin tü nupueulosekat Jeʼwaa maaʼulu yaa, nnojoleerü kapüleein wamüin aaʼinraa tü aküjüneetkat wamüin suluʼu tü Paʼaraiisükat (paashajeʼera Hebreokana 13:17). Wanaa sümaa nantüin na israeliitakana suluʼumüin tü Mma naapakat Jeʼwaa namüin, nnojoishii nayain aneeküin jalainjanain kepiain, aneekünüsü namüin tia (Núm. 26:52-56; Jos. 14:1, 2). Jamüshiijaʼa suluʼupa waya tü Paʼaraiisükat, eesüjaʼa süpüla süneeküneerüin wamüin tü mma eeinjanale kepiain waya. Talatüle waaʼin maaʼulu yaa sümaa tü aʼyatawaa shiʼitaakat wajapuluʼu tü nupueulosekat Jeʼwaa, ayateeria müin wakuwaʼipa paʼaraiisüpa tü mmakat.

⁸ Talateerü maʼin waaʼin sünain aʼyatawaa nümüin Maleiwa suluʼu tü Paʼaraiisükat. Müshiijeseʼe jüüjüüin waya sümüin tü nupueulosekat maaʼulu yaa. Eepajaʼa süpüla waluwataanüin wattamüin sünain aʼyatawaa nümüin Maleiwa. Jamüsüjaʼa chaa Estados Unidos, aluwataanüshii waneeinnua weteeliita süpüla naʼyataainjanain sünain aküjaa pütchi. Eeshii waneeinnua wawalayuu alapalaapuʼuka waaʼu, pürekutsoolüinnapa pesiaat maaʼulu yaa saaʼu laülaayuuinnapain naya. Talatüsü maʼin naaʼin naya wawalayuukana sünain aʼyatawaa nümüin Jeʼwaa jee anasü nakuwaʼipa nutuma Jeʼwaa. Müleka talateere waaʼin sünain aʼyatawaa nümüin Jeʼwaa sümaa anain wakuwaʼipa, ¿kasa waainjüinjatka? Wachunta kaaliinwaa nümüin Jeʼwaa otta müsia talata waaʼin sümaa tü aʼyatawaa eʼitaanakat wajapuluʼu (paashajeʼera Proverbios 10:22). Müleka waainjüle tia, mapüleejeerü wamüin aaʼinraa tü münakat wamüin suluʼu tü Paʼaraiisükat. Suluʼupa waya tü Paʼaraiisükat, talatüinjatü waaʼin süka nüneeküin waya Jeʼwaa süpüla kepiainjanain waya suluʼu. Jaʼitashii jalainjanain waya kepiain sutuma nupueulose maleiwa, jaʼitashii kasain waʼyateʼennüin anain (Neh. 8:10).

9, 10. (1) ¿Jamüshii nnojoliinjanaka kashapajaaraliin waya suluʼu tü Paʼaraiisükat? (2) ¿Kasa waaʼinrajatka süpüla nnojoluinjatüin süshapalaain waaʼin maaʼulu yaa?

⁹ Suluʼu tü Paʼaraiisükat, nnojoliinjana waya kashapajaaraliinjanain. Jamüsüjaʼa süsoʼiraale  naaʼin palajana napüshi waneeinnua wayuu, talateena maʼin naya weʼrüin sutuma tia. Eepajaʼa süpüla kakaliain waya sünain aʼatapajaa süsoʼiraainjatüin naaʼin wapüshi jee waʼaleewainyuu. ¿Talateetche waaʼin namaa na asoʼiraainjanakana aaʼin apüshi? ¿Ashapalaataajeetpa waaʼin sünain aʼatapajaa? (Roma 12:15.) Müleka waʼatapajüle maaʼulu yaa nikeraajüin Jeʼwaa tü keeʼireekat naaʼin, ayateeria müin wakuwaʼipa watta kaʼi (Ecl. 7:8).

¹⁰ Suluʼuweere waya tü Paʼaraiisükat, nnojoluinjana waya ayüülajaain müleka süpansaajinnüle wamüin wanee pütchi suluʼujee tü Wiwüliakat. ¿Wekirajaaitpache anain tü pütchi apansaajünüitpakat suluʼujee tü Wiwüliakat? Müleka nnojorüle wayaawatüin saaʼu süpüshuaʼa tü apansaajünakat, ¿ayüülajaainjanache waya saaʼujee tia? Nnojoliire kayüürajaaraliin waya maaʼulu yaa, oonoojeena waya sümaa tü nümakat Jeʼwaa wamüin suluʼu tü Paʼaraiisükat (Prov. 4:18; Juan 16:12).

11. ¿Jameerü wakuwaʼipa suluʼu tü Paʼaraiisükat müleka motule waaʼin saainjala wayuu maaʼulu?

¹¹ Wanee kasa anaka süpüla waaʼinrüin maaʼulu yaa, shia motowalinjatüin waaʼin saainjala wayuu. Soʼu tü miit juya nuluwataainjatkalü oʼu Kürisüto, ana ana meerü shiʼipaʼaya tü wakuwaʼipakat jee nakuwaʼipa na asoʼiraainjanakana aaʼin (Aluw. 24:15). Saainjüle kasa mojusü wayuu wamüin, ¿moteetche waaʼin saainjala? ¿Aijeenache naya wapüla? Müleka motule waaʼin saainjala wayuu maaʼulu yaa, anajiraajeena waya namaa na wayuu yaajeenakana suluʼu tü Paʼaraiisükat (paashajeʼera Colosas 3:12-14).

12. ¿Jamüsü waaʼinrajatka tü nikirajakalü anain waya Jeʼwaa maaʼulu yaa?

¹² Tü nikirajakalü anain waya Jeʼwaa maaʼulu yaa, shieerü waainjaka suluʼupa waya tü Paʼaraiisükat. Suluʼupa waya tü Paʼaraiisükat, eesüjaʼa süpüla nnojoleerüin saapünüin wamüin süpüshuaʼa tü keeʼireekat waaʼin. Eesüjaʼa süpüla kamaʼajeerüin süpüla saapünüin wamüin tü kasa wachuntakat. Talatüinjanapajaʼa waya sümaa tü naapeetkat wamüin Jeʼwaa soʼu tia. Waainjüle tia maaʼulu yaa, weeʼiyatüin sünain suluʼuweein waya tü Paʼaraiisükat otta woonoweein sümaa nünüiki Jeʼwaa (Heb. 2:5; 11:1).

13. ¿Kasa palajanainjatka watuma suluʼu tü Paʼaraiisükat?

¹³ Suluʼu tü Paʼaraiisükat, talateerü maʼin waaʼin süka nnojoleerüin kasain choʼujaain wamüin. Talataleejeetpejeʼe waaʼin süka naʼaleewainjeenain waya Jeʼwaa (Mat. 5:3). Paʼaraiisüpa tü mmakat, palajaneerü watuma tü waʼyataainkat nümüin Jeʼwaa jee talateerü waaʼin sünain aaʼinraa shia (Sal. 37:4). Suluʼuweere maʼin waya tü Paʼaraiisükat, shiainjatü palajanaka watuma aʼyatawaa nümüin Jeʼwaa maaʼulu yaa (paashajeʼera Mateo 6:19-21).

14. ¿Kasa jülüjüinjatka naaʼin wanee jimaʼai jee wanee majayüt?

¹⁴ Süpüla talatüinjatüin maʼin waaʼin sünain aʼyatawaa nümüin Jeʼwaa, kooʼomüinjatü watuma tü waʼyataainkat nümüin. Jimaʼaire pia, anashi piʼyataale nümüin Jeʼwaa suluʼu kaʼikat süpüshuaʼa. Püchajaa maʼin sukuwaʼipa süpüla piʼyataainjachin waneepia nümüin. Suluʼu tü karalouktairua eekat wamaʼana, puusüteerü anain tü paainjüinjatkat süpüla puuntüin tia. * Püsakira na wawalayuu kakaliainnakana sünain aʼyatawaa nümüin Jeʼwaa. Piʼyataale nümüin Jeʼwaa waneepia maaʼulu yaa, wainmeerü tü kasa pütüjakat süpüla watta kaʼi suluʼupa pia tü Paʼaraiisükat.

15. ¿Kasa maa waaʼinrüinjatka süpüla kooʼomüin watuma waʼyataain nümüin Jeʼwaa?

¹⁵ Wayakana wapüshuaʼa eesü süpüla kooʼomüin watuma tü waʼyataainkat nümüin Jeʼwaa. Eesü süpüla wekirajaain sünain tü wanüikinjatkat sünain aküjaa pütchi, eesü süpüla weʼitaain maʼin suluʼu wakuwaʼipa tü sümakat tü Wiwüliakat.  Wanee kasa eeka süpüla waaʼinrüin, shia anale watuma süleejia karaloukta, kemeʼeriain wanüiki wasouktapa shiʼipajee tü asakinnakalü anain waya otta anain wekirajia sünain tü outkajawaakat. Kooʼomüinre watuma tü waʼyataainkat nümüin Jeʼwaa, tütpüijeena waya otta keraajeerü watuma wakuwaʼipa süpüla suluʼuinjanain waya tü Paʼaraiisükat.

16. ¿Jamüsü watüjaaka saaʼu anain maʼin aʼyatawaa nümüin Jeʼwaa?

¹⁶ Nnojotsü amülain tü waainjakat süpüla keraainjatüin watuma wakuwaʼipa süpüla suluʼuin waya tü Paʼaraiisükat. Anashaatasü aʼyatawaa nümüin Jeʼwaa. Nnojoishii waya aʼyataain nümüin Jeʼwaa mojusheeka, nnojoishii waya aʼyataain nümüin shiiʼiree woʼtteʼennüinjanain sajaʼttinnapa tü kasakat süpüshuaʼa. Talatüshii waya sutuma waʼyataain nümüin Jeʼwaa jee sutuma naʼaleewain waya. Jee müsia anasü wakuwaʼipa süka alin waya nüpüla Jeʼwaa jee süka niain oʼunirüin wakuwaʼipa (paashajeʼera Salmo 63:1-3). Müleka waʼwaajüle Jeʼwaa süka süpüshuaʼa waaʼin, talateena maʼin waya. Naashin na wawalayuu kakaliainnakana sünain anoujaa nünain Jeʼwaa, anaʼleesia maʼin aʼyatawaa nümüin Jeʼwaa suulialeʼeya wanee kasa (Sal. 1:1-3; Is. 58:13, 14).

17. ¿Ashaitteenache waya sümaa weemeraajeenain suluʼupa waya tü Paʼaraiisükat?

¹⁷ ¿Ashaitteenache waya sümaa weemeraajeenain suluʼupa waya tü Paʼaraiisükat? Jamüsaʼa shia. Soto waaʼin nukumajüin waya Jeʼwaa süpüla talatüinjatüin waaʼin waneepia. Naashin Jeʼwaa, naapeerü wamüin süpüshuaʼa tü keeʼireekat waaʼin (Sal. 145:16; Ecl. 2:24). Talataleepajaʼaya maʼin waaʼin müleka aleewale maʼin waya nümaa Jeʼwaa. Suluʼupa waya tü Paʼaraiisükat, ashaitteena waya jee eemeraajeena waya. Shiainjatpajaʼa waaʼinmaain maʼin tü waʼyataainkat nümüin Jeʼwaa. Makalaka anain maʼin waaʼinmaale tü waʼyataainkat nümüin Jeʼwaa maaʼulu yaa jee jülüja waaʼin tü kasa anasü weʼrakat suluʼujee tia (Mat. 6:33, TNM).

18. ¿Kasa waaʼinrüinjatka müleka suluʼuweere waya tü Paʼaraiisükat?

¹⁸ Aneerü maʼin wakuwaʼipa suluʼupa waya tü Paʼaraiisükat. Waʼyataa maʼin süchiirua süpüla keraainjatüin watuma wakuwaʼipa süpüla suluʼuin waya. Waaʼinra tü nikirajakalü anain waya Jeʼwaa maaʼulu yaa otta tütüinjana waya sünain aküjaa tü nünüikikat. Waʼyataa maʼin süka süpüshuaʼa waaʼin nümüin Jeʼwaa. Paʼaraiisüpa tü mmakat, nikeraajeerü Jeʼwaa süpüshuaʼa tü nümakat wamüin. Ayataʼaya waaʼinrüin tü nüchekakat Maleiwa wapüleerua süpüla suluʼuin waya tü Paʼaraiisükat.