1, 2. (1) ¿Kasa eeinjatka atuma talataa aaʼin chaa iipünaa? (2) ¿Kasa pütchi wekirajaainjatka anain?

 KAKALIA wayuu sünain yapain sutuma tü choʼujaakat süpülapünaa kasaalüin shia. Wekirajaainjatü anain jooluʼu nüchiki wanee aluwataai kaʼwayuuseinjachika otta alatüirü maʼaka 2.000 juya sünain yapain nutuma tü choʼujaakat süpüla kaʼwayuuseinjachin nia. Alüʼütsü maʼin nükalia süpüla kaʼwayuuseinjachin nia. Eejeerü muusika nipialuʼu chi Aluwataaikai otta eeʼirajeena na chakana iipünaa sünain maa: «Aleluya, anakaja waʼwaajüle [Jeʼwaa] chi Maleiwa Aluwataakai Pülashikai maʼi süka sülüʼülüin tü kaʼi niʼitaainjatkat oʼu tü aluwatawaakat nütüma. Anashi waʼwaajüle nia süka süpüshua waaʼin saaʼu alanaʼaleeinya nia sünain pülashin. Je anakaja müleka talatüle waaʼin, süka süntüitpain nükalia chi Anneetchonkai süpüla kaʼwayuusein nia. Je tü nuʼwayuuseinjatkat, yapasü süpüla nümaain shia» (Alat. Map. 19:​6, 7).

² «Chi anneetchon» saashajaakai achiki tü Wiwüliakat, nia Jesukürisüto. Eejeerü wanee talataa muloʼushaata chaa iipünaa sutuma kaʼwayuuseinjachin nia (Juan 1:​29, NM). ¿Jamüinjatü naʼanaaya süpüla kasaalüinjachin nia? ¿Jarat tü nuʼwayuuseinjatkat? ¿Kasa saaʼinraka tü nuʼwayuuseinjatkat süpüla yapainjatüin shia süpüla kasaalüü? ¿Joujeena kasaatka naya? Watüja aaʼu talateenain maʼin na chakana iipünaa sutuma tia. ¿Jama na kepiainjanakana saaʼu tü Mmakat, talateenache naya soʼu tia? Wekirajaa sünain tia pütchikalüirua sükajee tü sümakat Salmo 45.

3, 4. (1) ¿Jamüinjatü naʼanaaya Jesukürisüto süpüla kaʼwayuuseinjachin nia? (2) ¿Kasa talataleeka maʼin atuma naaʼin chi Aluwataaikai? (3) ¿Jaralii «na jieyuu nachonniikana na aluwataaliikana»? ¿Jarat «tü nuʼwayuusekat chi Aluwataaikai»?

³ ( Paashajeʼera Salmo 45:​8, 9.^[1]) Anasü maʼin naʼanaaya Jesukürisüto süpüla kaʼwayuuseinjachin nia. Alanaʼaleesia sünain anain maʼin tü niperfumesekat. Aainjuushi süka mirra otta casia. Tia, shia tü oʼyotunapuʼukat saaʼu nikii wanee wayuu aneekünaka nutuma Maleiwa chaa Israel (Éx. 30:23-25).

⁴ Sutuma tü muusika eekat nipialuʼu chi kaʼwayuuseinjachikai, talataleesia maʼin naaʼin süka sülüʼülüin nükalia süpüla kasaalüü. Akaʼaya «tü nuʼwayuusekat chi Aluwataaikai», tü nupueulose Maleiwa chakat iipünaa, talatüsü maʼin saaʼin. Saʼaka tü nupueulose Maleiwa chakat iipünaa, eeshii «na jieyuu nachonniikana na aluwataaliikana». Naainnua, naya na aapieekana. Anashaatasü aapajaa tü eeʼirajünakat: «Anakaja müleka talatüle waaʼin, süka süntüitpain nükalia chi Anneetchonkai süpüla kaʼwayuusein nia».

5. ¿Jarat tü nuʼwayuuseinjatkat chi Anneetchonkai?

⁵ ( Paashajeʼera Salmo 45:​10, 11.^[2]) Watüjaaitpa aaʼu jaralin chi Kaʼwayuuseinjachikai. ¿Jama tü nuʼwayuuseinjatkat, jarat shia? Nnojotsü wayuuin tü aashajaanakalü achiki. Shiyaakuayaa neʼe sutuma tü Wiwüliakat. Naya na 144.000 anoujüshii chainjanakana iipünaa. Süka jamüin, nekiipüʼüin Jesuu naya anoujüshiikana ( paashajeʼera Éfeso 5:​23, 24). Aluwataainjana naya nümaa Kürisüto suluʼu tü Nuluwataayakat (Luc. 12:32). Icheshii «naya waneepia nünain chi Anneetchonkai sooʼopünaa tü alatakat namüin» (Alat. Map. 14:1-4). Aʼaniraainjatü nakuwaʼipa nümaa Kürisüto maʼaka saʼaniraain sukuwaʼipa wanee wayuu nümaa suʼwayuuse. Chainjana naya iipünaa nümaa, eere kepiain nia (Alat. Map. 21:​9, NM; Juan 14:​2, 3).

6. (1) «Tü nüchonkat chi aluwataaikai», ¿jamüshii namünaka na anoujüshii chainjanakana iipünaa? (2) «Moto paaʼin pupueulose», ¿jamüshii namünaka?

⁶ «Tü nüchonkat chi aluwataaikai», münüsü tü nuʼwayuuseinjatkat chi Anneetchonkai (Sal. 45:​13, NM). ¿Jarai «chi aluwataaikai»? Nia Jeʼwaa. Nüneeküin na anoujüshii chainjanakana iipünaa süpüla nüchoinjanain naya (Roma 8:15-17). Müsü pütchi namüin naya anoujüshiikana: «Moto paaʼin pupueulose otta na püpüshikana [yaakana mmapaʼa] ». Jülüjüinjatü naaʼin tü kasa chakat iipünaa, nnojotsü shiainjatüin jülüjüin naaʼin tü kasa yaakat mmapaʼa (Col. 3:1-4).

7. (1) ¿Kasa naaʼinraka Kürisüto süpüla yapainjatüin nutuma tü nuʼwayuuseinjatkat süpüla kasaalüü? (2) ¿Kasa kojutüka sümüin tü nuʼwayuuseinjatkat Kürisüto?

⁷ Kakaliaichi maʼin Jesuu sünain yapain nutuma tü nuʼwayuuseinjatkat süpüla kasaalüinjanain naya. Müshi chi aluwataaushikai Pablo: «Watüjaa aaʼuchi Cristo sünain alin waya nüpüla, süka naapajiraain nukuaippa waaʼujee süpüla ouktaa, [müshii noʼoojitkai waaʼin sükajee] nünüiki chi Maleiwakai süpüla waaʼinrüinjatüin tü anasükat. Nükatalüin waya suulia waainjala sümaa nülaʼajaain woulia süpüla wuleinjatüin waaʼin. Naapajiraain nukuaippa Cristo süpüla maainjalainjanain waya soʼuweena tü kaʼikat washaʼwaleʼenneetkat oʼu nüʼütpaʼamüin sünain anashaatain maʼi waya nuʼupala [...] süka wuleinjatüin waaʼin» (Éf. 5:25-27). Müsü nünüiki Pablo namüin na anoujüshii chajanakana Corinto: «Nücheküin chi Maleiwakai jüpüleerua sünain maainjalainjanain jia nuʼupala soʼu tü kaʼi nüntajatkat oʼu Cristo nüchikua. Je sükajee tia, jülüjasü taaʼin waneepia jukuaippa süpüla lotüinjanain jia sünain tü jünoulakat, süka taneekünüin süpüla takaalinjainjanain jia sünain anoujaa» (2 Cor. 11:2). Sutuma anain maʼin sunoula nuʼupala Maleiwa tü nuʼwayuuseinjatkat Jesukürisüto, anachonleesia maʼin shia nümüin. Kojutüsü sümüin tü nuʼwayuuseinjatkat niain laülaain saaʼu otta ejepülaasü shia nümülatuʼu.

8. ¿Jamüsü süküjünaka sünain anashaatain maʼin shiyolojo nümüraajüin chi aluwataaikai?

⁸ ( Paashajeʼera Salmo 45:​13, 141.^[3]) «Anashaatasü maʼin shiyolojo» tü nümüraajüinkat chi aluwataaikai. Suluʼu Alateetkat Mapeena 21:​2, aʼwanaajireʼennüsü sümaa wanee pueulo, tü Jerusalén Jeketkat. Saashin tü Wiwüliakat, tia pueulokot müsü «aka wane jierü aʼanaaushikat nüpüla chi suʼwayuuseinjachikai». Süka eein chi Maleiwakai yala suluʼu tia pueulokot, «warattuuisü maʼi shia maa aka sümachera kakuuna eekai kojutshaatain maʼi, maa aka saaʼin tü kakuuna kanüliakat jaspe jorottokat maa aka saaʼin rouya» (Alat. Map. 21:​10, 11). Aküjünüsü suluʼu Alateetkat  Mapeena, anashaatain maʼin shiyolojo tü Jerusalén Jeketkat (Alat. Map. 21:18-21). Müshijeseʼe nümüin chi eeʼiraikai süchiki tü nümüraajüinkat Kürisüto: «Anashaatasü maʼin shiyolojo». Kaʼwayuuseinjatü shia chaa iipünaa, müsüjeseʼe anainjatüin maʼin shiyolojo.

9. (1) ¿Jara eʼikajaanaka amüin tü jierü kaʼwayuuseinjatkat? (2) ¿Kasa aʼanaanaka aka shia?

⁹ Eʼikajaanüsü shia nümüin Jesukürisüto, chi Aluwataaikai. Kakaliaichi nia sünain aʼwulejaa sukuwaʼipa, müsü noʼoojitkai saaʼin sükajee tü nünüikikat Maleiwa. Makalaka wulein saaʼin nuʼupala (Éf. 5:​26, 27). Aʼanaaushinjatü shia nüpüla chi suʼwayuuseinjachikai. ¡Shiaʼaya maʼin sünainka tü süsheʼinkat wanee wayuu eekai kasaalüinjatüin! «Eʼinuushi sotpünaajana süsheʼin süka ooro» otta «sünainjeerü tü süsheʼin eʼinuushikat sümaanapa eemüin chi aluwataaikai». Süpüla kasaalüinjatüin shia nümaa chi aluwataaikai, «aapünüitpa sümüin tü süsheʼinjatkat [...], tü kuluulu anasükat, tü kanüliakat lino, wane kuluulu kasuusü sümaa wulein maʼi. (Je tü [linokot], shia shiyaawase tü kasa anasü naaʼinrapüʼükat na anoujashiikana).» (Alat. Map. 19:⁠8.)

10. ¿Joujeechi kasaatka chi Anneetchonkai?

¹⁰ ( Paashajeʼera Alateetkat Mapeena 19:⁠7.) ¿Joujeechi kasaatka chi Anneetchonkai? Mayaapejeʼe süküjüin Alateetkat Mapeena 19:7 yapain tü nuʼwayuuseinjatkat süpüla kasaalüü nümaa, nnojotsü aashajaain tü wanee wetsiikulokolüirua süchiki tia. Shia saashajaaka achiki tü alatajatkat süpüla sujutaainjatüin tü mülia miyoʼushaatakat (Alat. Map. 19:11-21). ¿Kaʼwayuuseeiche Jesukürisüto, chi Aluwataaikai, süpülapünaa niyamülüin tü nüʼünüükalüirua? Nnojo. Süka jamüin, walakaain sukuwaʼipa tü aküjünakat suluʼu tü karalouktakat Alateetkat Mapeena. Aluʼusaʼa suluʼu Salmo 45, aküjünüsü kasaalüinjachin chi Aluwataaikai süchikijee nijittaain tü nüchajaruutsekat niatapünaa süpüla nuwateʼerüinjachin neʼejena süpüla nükanajüinjatüin tü atkawaakat (Sal. 45:​3, 4).

11. ¿Kasa alatajatka süpülapünaa kaʼwayuusein Kürisüto?

¹¹ Sünainjee tü wekirajaakalü anain suluʼujee tü Wiwüliakat, watüja aaʼu meerüin sukuwaʼipa tü alatajatkat: palajana, ajaʼlajeʼennüinjatü Babilonia tü Miyoʼusükat, tü iküleesiairua nnojotkat shiimain (Alat. Map. 17:​1, 5, 16, 17; 19:​1, 2). Süchikijee tia, najaʼlajeʼereerü Kürisüto tü kasa nuluwataakalü aaʼu Satanaa yaa saaʼu tü Mmakat soʼu Armagedón, tü atkawaa eeinjatkat nutuma «chi Maleiwa Pülashikai maʼi» (Alat. Map. 16:14-16; 19:19-21). Süchikijee, nujuteechi Satanaa otta tü yolujaakalüirua suluʼu tü ishikat. Nnojoleena aaʼinrüin kasa mojusü. Meena ouktakai naaʼin nutuma (Alat. Map. 20:1-3).

12, 13. (1) ¿Joujeerü süntaka nükalia chi Anneetchonkai süpüla kaʼwayuusein nia? (2) ¿Jaralii talateenaka chaa iipünaa sutuma kaʼwayuusein chi Anneetchonkai?

¹² Maaʼulu yaa, wanaa sümaa ouktüin na anoujüshii chainjanakana iipünaa, asoʼiraamaatüsü naaʼin süpüla kepiaa chayaa. Shiasaʼa süchikijee sajaʼlajeʼennüin Babilonia tü Miyoʼusükat, süpülapünaa Armagedón, kotteena chaa iipünaa na 144.000 anoujüshii aluwataainjanakana nümaa Kürisüto (1 Tes. 4:​16, 17). Cheerü chaa iipünaa tü nümüraajüinkat Kürisüto süpülapünaa suʼttüin Armagedón. Sajaʼttapa Armagedón, anteerü nükalia chi Anneetchonkai süpüla kaʼwayuusein nia. ¡Eejeerü wanee talataa muloʼushaata soʼu tia! Müsü sünüiki Alateetkat Mapeena 19:9 süchiki tia: «Anataʼaleeshijaʼa maʼi chi wayuu eenajinnakai sünainmüin tü miʼiraa shikiirakat kaʼwayuusein chi Anneetchonkai». Talateerü maʼin saaʼin nümüraajüin Kürisüto. Akaʼaya niakai, talateerü maʼin naaʼin saaʼu yalain na aluwataainjanakana nümaa (Luc. 22:​18, 28-30). Nnojoliipejeʼe nayainjanain neʼe talatüin aaʼin namüiwaʼa.

¹³ Maʼaka wekirajaainnapain, watteena maʼin naalii na aapiee eeʼirajüinjanakana chaa iipünaa sünain maa: «Anakaja müleka talatüle waaʼin, süka süntüitpain nükalia chi Anneetchonkai süpüla kaʼwayuusein nia. Je tü nuʼwayuuseinjatkat, yapasü süpüla nümaain shia» (Alat. Map. 19:​6, 7). ¿Jama na aʼyataashiikana nümüin Jeʼwaa yaainjanakana Mmapaʼa, talateenache naya soʼu tia?

14. ¿Jaralii na majayünnüü sümaatalakana nümüraajüin Kürisüto aküjünaka achiki suluʼu Salmo 45?

¹⁴ ( Paashajeʼera Salmo 45:​12, 142, 15.^[4]) Nüküjatüjülia Zacarías, chi nünüikimaajachikai Maleiwa, tü alatajatkat sülüʼütpa süpüla sajaʼlajaainjatüin tü kasa mojusükat. Nüküjüin wainmainjatüin wayuu sainküinjee mmaka süpüshuaʼa aʼyataainjanakana  nümüin Jeʼwaa wanaa namaa na anoujüshii chainjanakana iipünaa. Müshi nia: «Soʼu kaʼikat tia, eejeena polooshii wayuu tooloyuu achecheraainjanakana sünain nüsheʼin wanee wayuu judío. Meerü nanüiki: ‹Oʼuneena waya jümaa süka waapüin jüchiki sünain eein Maleiwa jümaa›» (Zac. 8:​23, NM). Na «polooshii wayuu tooloyuu» aküjünakana achiki, shia «tü nüchonkat Tiro» otta «na wayuu washitkana maʼin suluʼujee tia pueulokot» sümaka amüin Salmo 45:12. Nakaaliinjüin na anoujüshii chainjanakana iipünaa. Nachajaain sukuwaʼipa süpüla anainjanain naya noʼuluʼu otta süpüla nakaaliinjünüinjanain sünain aʼyatawaa nümüin Jeʼwaa. Soʼujee juyaka 1935, watta maʼin naalii wayuu nantitka na anoujüshii chainjanakana iipünaa sünainmüin «tü lotookalü akuwaʼipa» (Dan. 12:​3, NM). Naya wayuukana, naʼwulejüin nakuwaʼipa, nanoula otta waneepiashii naya namaa na anoujüshii chainjanakana iipünaa. Makalaka nayain na majayünnüü sümaatalakana nümüraajüin Kürisüto. Naapüitpa naaʼin nümüin Jeʼwaa otta ayatüshii naya waneepiain nümaa Jesukürisüto, chi Aluwataaikai.

15. Püküja kasain naaʼinrüin na majayünnüü sümaatalakana nümüraajüin Kürisüto.

¹⁵ Na anoujüshii chainjanakana iipünaa yaayüliika yaa Mmapaʼa, talatüshii maʼin naya namaa na majayünnüü sümaatalakana nümüraajüin Kürisüto. ¿Jamüshii talataka naya namaa? Sutuma nakaaliinjüin naya sünain aküjaa «tü pütchi anasükat» sainküin Mmaka süpüshuaʼa (Mat. 24:14). Nnojoishi niain neʼe chi naaʼinkai Maleiwa otta tü nuʼwayuuseinjatkat chi Anneetchonkai «Jalaina», müin. «Jalaina» müshii «na wayuu aapakana tü ashajünakat suluʼu tü karalouktakat» (Alat. Map. 22:17). Tü wanee anneetkalüirua naapüin nanüiki na anoujüshii chainjanakana iipünaa sünain «Jalaina» namüin, makalaka «Jalaina» namüin wanaa namaa sümüin wayuu sainküin tü Mmakat (Juan 10:16).

16. ¿Kasa naapaka Jeʼwaa sümüin tü wanee anneetkalüirua?

¹⁶ Aisü maʼin tü wanee anneetkalüirua napüla na anoujüshii chainjanakana iipünaa yaayüliika Mmapaʼa. Talatüshii naya süka naapüinjatüin Jeʼwaa wanee kasa anasü sümüin tü wanee anneetkalüirua:  talatüinjatüin saaʼinrua kaʼwayuusepa chi Anneetchonkai. Aküjünatüjülia nachiki wayuukana naainnua, namaanüinjanain sümaa «talatüin naaʼin». Talateerü maʼin saaʼin tü anneetkalüirua wanaa namaa na chakana iipünaa kaʼwayuusepa chi Anneetchonkai. Saashin Alateetkat Mapeena, eejeena na wayuu wattakana naalii aʼyataakana nümüin Jeʼwaa yaa saaʼu tü Mmakat. Shaʼwashawalüinjana «nümülatuʼu chi joyotakai saaʼu tü einaseekat je nümülatuʼu chi Anneetchonkai». Aʼyataashii naya nümüin Maleiwa suluʼu süpaatiase tü aʼwaajüleekat (Alat. Map. 7:​9, 15).

17, 18. (1) ¿Kasa eejeetka süchikijee kasaalüin chi Anneetchonkai? (2) ¿Jaralii na nüchonniijeenakana Kürisüto soʼutpünaa tü Miitkat Juya?

¹⁷ ( Paashajeʼera Salmo 45:16.^[5]) Talataleejeeria maʼin naaʼin «na majayünnüü sümaatalakana» nümüraajüin Kürisüto süchikijee kasaalüin shia. Süka jamüin, neʼreerüin tü kasa anasü eejeetkat suluʼu tü mma jeketkat. Jesukürisüto, chi Aluwataaikai, nüsoʼireʼerüinjatü naaʼin «na kooʼuliwoʼukana» nia yaa saaʼu tü Mmakat otta nüchoinjeena naya (Juan 5:25-29, NM; Heb. 11:​35, NM). Noʼutku na wayuu «kooʼuliwoʼukana» nia, nüneekeena süpüla laülaashiinjanain sainküin mmaka süpüshuaʼa. Eeshiijaʼa süpüla nüneeküin noʼutku na laülaashiikana maaʼulu süpüla noʼunirüinjatüin sukuwaʼipa wanee kasa suluʼu tü mma jeketkat (Is. 32:1).

¹⁸ Soʼutpünaa tü Miitkat Juya Nuluwataainjachika oʼu Kürisüto, nieechi nashika waneeinnua wayuu. ¿Suluʼu jamüin? Napüshuaʼa na kepiainjanakana saaʼu tü Mmakat, kateerü noʼu süpüla kaʼika süpüshuaʼa sutuma nanoujüin sünain naapajiraain nikii Jesuu naaʼu (Juan 3:​16, NM). Sutuma tia, nieechi Jesuu chi «Nashikai süpüla Kaʼika Süpüshuaʼa» (Is. 9:​6, 7, NM).

19, 20. ¿Kasa naaʼinreeka na anoujüshiikana maaʼulu sutuma tü aküjünakat suluʼu Salmo 45?

¹⁹ ( Paashajeʼera Salmo 45:​1, 17.^[6]) Tü wekirajaaitpakalü anain, shiiʼiyatüin sünainpünaain nakuwaʼipa na anoujüshiikana tü aküjünakat suluʼu Salmo 45. Na anoujüshii chainjanakana iipünaa yaayüliika yaa Mmapaʼa, talatüshii maʼin naya sutuma nalüʼülüin süpüla kottüinjanain naya namaa na nawalayuukana otta nümaa Jesukürisüto. Keeʼireeshaatasü saaʼin tü anneetkalüirua jüüjüüin shiairua nümüin chi Aluwataaikai. Talatüsü maʼin saaʼinrua sutuma shiʼyataajiraain namaa na anoujüshii chainjanakana iipünaa yaayüliika yaa Mmapaʼa. Kaʼwayuusepa Kürisüto, anashaateerü maʼin sukuwaʼipa wayuu saaʼu tü Mmakat nutuma otta natuma na anoujüshii aluwataainjanakana nümaa (Alat. Map. 7:17; 21:1-4).

²⁰ Sutuma jülüjüin waaʼin tü «kasa anashaatasü» nünainpünaakat Jesukürisüto, chi Aluwataaikai, waküjeein maʼin süchiki tü nünüliakat sümüin wayuu. ¡Kojutü wamüin chi Aluwataaikai «waneepia otta süpüla kaʼika süpüshuaʼa»!