Sainküin tü mmakat soʼu kashika tisienpüroʼu, eʼitaanüsü niyaakua Jesuu juʼletachoin suluʼu shiitain mürüt. ¿Ayatayüiche joʼuuin Jesukürisüto? ¿Jamüsü saaʼin pümüin?... * Jülüjeesü waaʼin nnojolin joʼuuin nia. Anashii wekirajaale palajana süchiki tü alatakat namüin wanee arüleejülii chaa süʼütpaʼa Belén.

Eeʼiyataashi wanee aapiee namüin na arüleejüliikana. Nümakalaka namüin: «Soʼu kaʼikat tüü, jemelichipa jümüin wane joʼuu toolo yaa suluʼu Belén». «Jünteechi anain chi joʼuukai koʼoyooin süka kuluulu sünain juʼletachoin suluʼu wane shiitain mürüt.» Nantalaa namakalaka mainma aapiee otta neeʼirajaka nümüin chi Maleiwakai.

¿Jamüsüjeʼe paaʼin paapüle neeʼirain na aapieekana?... Talatüsü maʼin naaʼin na arüleejüliikana. «Jooʼuya woʼunaiwa Belénmüin weʼrajaaiwa tü kasa alatakat», müshii joo naya. Shiasaʼa nantapa, neʼrüin joo «María je José ooʼulaka chi joʼuukai juʼletachoin suluʼu tü shiitainkat mürüt».

Süchikijee tia, nantapaataka joo waneeinnua wayuu chaa Belénmüin. Ponusü maʼin naaʼin na wayuukana tü naküjakat na arüleejüliikana. ¿Kamalainsü pümüin ekirajawaa nüchiki Jesuu?... Müshiʼiya wayakana, aikana apüla Maleiwa, kamalainsü wamüin. Wekirajaa jooluʼu jamüin talataka naaʼin na arüleejüliikana süka jemein Jesuu. Wekirajaa palajana süchiki tü alatakat sümüin María majayülüiwaʼaya shia.

Soʼu wanee kaʼi, antüshi chi aapieekai Gabriel sünainmüin María. Nüküjakalaka ipuoluinjatüin shia nümaa wanee joʼuu toolo. Naashin chi aapieekai kojutüinjachi chi joʼuukai nutuma chi Maleiwa Miyoʼushikai maʼin. Süchikijee tia, nüküjaka nuluwataainjachin Jesuu waneepia.

«¿Jamakuaippatkai taya kachoinjatüin sünain nnojolüin nünainpünaain taya wayuu toolo?», sümakalaka María nümüin chi aapieekai. Asouktüshi  joo chi aapieekai Gabriel: «Chi Maleiwa Miyoʼushikai maʼi, nuluwataainjachi chi Naaʼinkai pünainmüin. Niʼitaweetkalaka pümüin kachonwaa, süpüla ‹Pia Tachon Maainjalasaikai›, süpüla nümünüinjachin chi joʼuukai nütüma Maleiwa». Tia, shia wanee kasa pülasü naainjüinjatka Jeʼwaa. Nülatirüinjachi chi Nüchonkai suluʼumüin süchonla María süpüla wayuuinjachin nia.

¿Piʼrapuʼuin nayaakua na «reyes magos» münakana eere juʼletachoin niyaakua Jesuu?... Nnojotpejeʼe shiimain tia. Na «reyes magos» münakana wayuu wüinpüjeʼewalii naya. Atüjüshii saaʼu sukuwaʼipa tü jolotsükat. Nnojotsü nücheküin Jeʼwaa tü naʼyataakalü anain. ¿Kasa neʼraka wanaa sümaa nantüin eemüin Jesuu? Müsü tü Wiwüliakat: «Nantapa eemüin tü miichikat, eeshi napüla chi joʼuukai sümaa [María] tü niikat». Nnojoishi niiwaʼalin jemein Jesuu wanaa sümaa neʼrüin nia otta nnojoishi juʼletachoin suluʼu tü shiitainkat mürüt. Jintüi nia otta chajachi nia nipialuʼu José sümaa María.

¿Pütüjaa aaʼu jamakuwaʼipalin Jesuu napüla na wayuu wüinpüjeʼewaliikana?... Oʼunüshii naya süchiirua wanee jolotsü. Shiasaʼa süpülapünaa suʼunüin «tü jolotsükat» chaa Belénmüin, suʼunirüin naya palajana chaa eemüin wanee aluwataai kanüliakai Herodes. Saashin tü Wiwüliakat oʼutünee aaʼinchi Jesuu nutuma Herodes. ¿Jaraiche oʼuniraka «tü jolotsükat» eemüin Jesuu?... Nnojoishi niain Maleiwa, nia Satanaa, chi nüʼünüükai Maleiwa.

Keeʼireesü naaʼin Satanaa jülüjüinjatüin neʼe saaʼin wayuu joʼuuyulin Jesuu. Soto paaʼin tü nümakat chi aapieekai Gabriel sümüin María. Naashin chi aapieekai, aluwataainjachin Jesuu waneepia. Aluwataashi Jesuu maaʼulu chaa iipünaa. Choʼujaasü palitchon neʼe kaʼi süpüla najaʼttirüinjanain na nüʼünüükana Maleiwa. Shia jülüjüinjatka waaʼin waneepia tia otta wekirajüinjana na wayuukana sünain.