WAINMA na wayuu nnojoliikana anoujüin sünain müliain wayuu nutuma Maleiwa, akatsaʼa eein na anoujakana sünain niain kasirüin Maleiwa tü müliaakat.

Na katakana oʼu süchikijee sülatüin wanee wawai otta süchikijee sukutkujaain mma, müshii naya: «¿Jamüshiiche niyüülajaka waya Maleiwa süpüla tia? ¿Maaliinsaliiche waya nüpüla?».

Otta eeshii na mojushiikana amüin tü naashajeʼerakat suluʼu tü Wiwüliakat süchiki wayuu ouktakalüirua, maʼaka nükalioʼu Noé. «Airejeʼe wayuu nüpüla Maleiwa, ¿jamakaʼa nuʼutaka saaʼin? ¿Shiataa sutuma niʼreein müliain wayuu?», müshii naya.

¿Antüirü suluʼumüin paaʼin tia? ¿Isairü püchiki jamüinjatüin pünüiki püsakinnüle sünain tia? Mülejeʼeya pukuwaʼipa, pikirajaa sünain pütchikat tüü.

Shia süka watüjaain saaʼu kasain anain otta kasain mojuin. Nukumajüin Maleiwa na wayuukana «sünain müin aka nakuaippa wanaa nümaa» (Génesis 1:27). Tü kasa mojukat nümüin Maleiwa mojusü wamüin otta tü kasa anakat nümüin anasü wamüin. Eesü süpüla washatüin nukuwaʼipa Maleiwa. Airejeʼeya wamüin sümüliala wayuu, ¿niaka kasashin wayuu Maleiwa süpüla nnojoluinjatüin alin nümüin sümüliala wayuu?

Nnojoishi niain kasirüin Maleiwa tü müliaakat otta pansaasü shia sümaa tü nümakat suluʼu tü Wiwüliakat: «Tü jülüjakat taaʼin wattasü suulia tü jülüjakat jaaʼin jiakana, tü takuwaʼipakat naata suulia tü jukuwaʼipakat» (Isaías 55:9, NM). Weʼitaale Maleiwa sünain niain kasirüin tü müliaakat, nnojotsü pansaain waaʼin sümaa tia pütchikat. Müshii wamakai aaʼin nümüin Maleiwa: «Tü jülüjakat taaʼin wattasü suulia tü jülüjakat paaʼin». Nnojotsü anain müle wanüiki süpülapünaa watüjaain saaʼu waneeirua kasa. Nnojotsü anain wasakiijakuʼu wamüle jamüin müliaka wayuu nutuma Maleiwa shia anaka aluʼu wekirajaale sünain jamüin müliaka wayuu nutuma Maleiwa saaʼin wamüin. Wekirajaa sünain kasain sünainpünaain müliaa atumaa wayuu.

Waliʼrajüle wanee wayuu sünain müliain wayuu nutuma, mojusü wanüiki nüchiki süka nnojoluin watüjaain saaʼu jamüin naainjaka tia. Chi wayuu müliakai atuma wayuu, talatsü naaʼin sutuma niʼrüin sümüliala wayuu otta matüjüinsai amüliajaa. Jamüshijaʼa wanee wayuu nüchiaale nüchon shiiʼiree naapülijüin nia, müliashi nutuma, aluʼusaʼa anainjaʼaya nüchiaale chi nüchonkai shiiʼiree nunoukteʼerüin nukuwaʼipa. Eesü süpüla mojuin wanüiki nüchiki wanee wayuu süka nnojoluin watüjaain saaʼu jamüin naainjaka wanee kasa, ¿mojuirü pütchi püchiki?

Wekirajaa süchiki piamasü kasa naliʼrajaka anain Maleiwa na wayuukana sünain müliain wayuu nutuma. Wekirajaapa sünain, ¿piʼreetche talatüin naaʼin Maleiwa sutuma müliain tü wayuukalüirua?