NAMÜINJATÜ NA KACHONSHIIKANA
7: Pikiraja püchonnii sünain kasa anasü
¿KASA SÜNAINPÜNAAKA?
Tü kasa pikirajakalü anain naya maaʼulu shieerü oʼuniraka nakuwaʼipa waneepia. Lotule pukuwaʼipa sünain süpüshuaʼa tü kasa paaʼinrakat, nashateerü shia na püchonniikana.
Nuʼunirüle nukuwaʼipa wanee wayuu sükajee tü kasa anasü ekirajünakalü anain nia nutuma nüshi jee nii, aʼyataaijeechi nia, kojuteerü wayuu nümüin jee kapüleerü naaʼin nakuwaʼipa na waneinnua. Naapaamaata amaalü na tepichikana tia akuwaʼipaakat nekirajünüle sünain tepichijaiwaʼaya naya.
TÜ SÜMAKAT TÜ WIWÜLIAKAT: «Pikiraja püchon wanaajiraa sümaa tü wopu kaluʼuinjachikalü nia; laülaapa nia nnojoleechi ojunujaain suulia» (Proverbios 22:6).
¿JAMÜSÜ CHOʼUJAAKA JAAʼINRÜIN TIA?
Nnojoishii anajüinjanain naya kasa mojusü. Anuu sünüiki Karyn: «Sükajee tü serulaatkat, tableta jee tü computadorkot, eesü süpüla mojuin tü kasa nanajakat otta tü naapajakat na wachonniikana. Eeshiijaʼa joyotule naya waʼütpaʼa sümaa nanajüin kasa mojusü wojuuna».
TÜ SÜMAKAT TÜ WIWÜLIAKAT: «Na wayuu laülaakana aaʼin sünain anoujaa, [...] nayaawatüin saaʼu anale jee mojule wanee kasa» (Hebreokana 5:14, TNM).
Kamaneeinjana waya. Wachuntajanapa wanee kasa «jalia maa tamüin» jee «anasia müin putuma», müinjana waya otta kapülainjatü waaʼin nakuwaʼipa na waneinnua. Maaʼulu yaa, shiaitpa kapülaka saaʼin wayuu tü serulaatkat suulialeʼeya wayuu.
TÜ SÜMAKAT TÜ WIWÜLIAKAT: «Anasü müleka jaaʼinrüle tü anasükat sümüin wayuu, maa aka jücheküin saaʼinreein tü anasükat jümüin» (Lucas 6:31).
¿KASA EEKA SÜPÜLA PAAʼINRÜIN?
Püküja namüin tü nnojotkalü anain süpüla naaʼinra. Naashin waneinnua wayuu ekirajaakana süchiirua nakuwaʼipa na tepichikana, eeshiijaʼa nnojoleenale namaʼüjiraain nakuwaʼipa na jimaʼalii ekirajünakana tepichijaiwaʼaya sünain mojuin tia.
PUUʼULAKA PAAʼINRÜIN TÜÜ: Paapüle süchiki wanee kasa alataka jekenainka yootoo pia nümaa püchon süchiki tia süpüla pikirajüin nia sünain kasa anasü. Jamüsüjaʼa paapüle süchiki nuʼutunüin aaʼin wanee wayuu eeshi süpüla pümüin nümüin: «Keemakatche maʼin tia. ¿Jamüshiiche eeka wayuu makana akuwaʼipa saaʼin pümüin?».
«Süpüla anainjatüin tü kasa naneekakat na püchonniikana, natüjaainjatü aaʼu tü kasa anasükat jee tü mojusükat» (Brandon).
Pikiraja na püchonniikana süpüla kamaneeinjanain naya. Jaʼitakajaʼa neʼe na tepichicheinkana eeshii süpüla namüin «jalia pümaa» jee «anasia müin putuma» otta pikiraja naya süpüla kapülain naaʼin nakuwaʼipa na waneinnua. Saashin wanee karaloʼuta, nayaawatüle saaʼu na tepichikana nnojoliin nayain neʼe namüiwaʼa kapülainjanain sümüin wayuu, keeʼireejeerü maʼin naaʼin naaʼinrüin kasa anasü napüleerua na waneinnua (Parenting Without Borders [Padres sin fronteras]).
PUUʼULAKA PAAʼINRÜIN TÜÜ: Puluwataa na püchonniikana sünain aaʼinraa waneirua kasa süpüla kiʼrain naya sünain akaalinjaa.
«Natüjale süpüleerua aaʼinraa wanee kasa na püchonniikana tepichijaiwaʼaya naya, nnojoleena müliain naya kepiapa namüiwaʼa. Kiʼreena naya sünain naaʼinrüin wanee kasa» (Tara).
