¡ANAKATCHE MAʼIN TÜ WAʼATAPAJAKAT! Nüküjain wamüin chi Kakumalakai waya katüinjatüin woʼu waneepia yaa saaʼu tü Mmakat. Eepejeʼe na nnojoliikana anoujain sünain tia. Jülüjasü neʼe naaʼin outajanain waya soʼu wanee kaʼi otta aleinjatia neʼe tü outaakat naashin. Eeshii na anoujakana sünain kateerüin noʼu waneepia noʼunapa iipünaamüin. ¿Jamajaʼa saaʼin pümüin tia?

Süpülapünaa püküjain jamüin saaʼin pümüin tia. Wekirajaa sünain tü sümakat tü Wiwüliakat shiʼipajee asakiraakalüirua tüü: Anale maʼin wakumajia, ¿jeʼrainjana juya waya katüin woʼu? ¿Kasapülajatü nukumajaka Maleiwa tü Mmakat otta na wayuukana? ¿Jamüshii outaka waya?

Waʼwanaajireʼerüle wakuwaʼipa sümaa sukuwaʼipa süpüshuaʼa tü kasa nukumajakat Maleiwa yaa saaʼu tü Mmakat, weʼreerü naatain maʼin wakuwaʼipa suulia. ¿Kasa naatakalü aluʼu wakuwaʼipa noulia? Saashin tü Wiwüliakat, wayaʼala neʼe nukumajaka chi Maleiwakai sünain müin aka saaʼin nukuwaʼipa (Génesis 1:26, 27). ¿Suluʼu jamüin? Süka müin wakuwaʼipa maʼaka naaʼin Maleiwa, aipüralii waya wayuu otta mojushiisü wamüin saainjünüle wanee kasa mojusü.

Nukumajüin waya Maleiwa süpüla wasakireʼerüin waaʼin sünain wane kasa, süpüla wayaawatüin saaʼu tü anakat jee tü mojukat süpüla aaʼinnaa otta müsia niʼitaain Jeʼwaa suluʼu waaʼin keeʼireeinjatüin waaʼin weʼraajüin nia sümaa aleewain waya nümaa. Müsüjeseʼe eein süpüla wayaawatüin saaʼu tü kasa nukumajakat chaa iipünaa jee yaa mmapaʼa, kamalainsü wamüin tü muusikakat, epintajaa jee müsia tü poesiakat. Akatsaʼa naatain maʼin wakuwaʼipa suulia mürüt, wüchii jee tü waneirua kasa nukumajakat Maleiwa yaa mmapaʼa süka eein süpüla waʼwaajüin nia.

Püsakireʼera paaʼin sünain tüü: Müleka shiale keeʼireein naaʼin Maleiwa katüinjatüin woʼu motsomüin neʼe, ¿jamakaʼa anaka maʼin wakumajia nutuma? Shia keeʼireeka naaʼin talatüinjatüin waaʼin waneepia yaa saaʼu tü Mmakat.

Naashin waneinnua wayuu, nnojotsü keeʼireein naaʼin Maleiwa katüinjatüin woʼu waneepia yaa saaʼu tü Mmakat. Alatapünaashii neʼe waya naashin saaʼu tü Mmakat süpüla suuʼulakünüin waaʼin otta sütüjaanüin aaʼu jaraliin na anakana süpüla katüin oʼu waneepia chaa iipünaa eere chi Maleiwakai. Shiimainreje tia, niajaʼa mmata kasitka chi Maleiwakai tü kasa mojusü eekat yaa mmapaʼa. Nnojotpejeʼe pansaain tia sümaa nukuwaʼipa Maleiwa. Müsü tü Wiwüliakat nüchiki: «Lotusü sukuwaʼipa süpüshuaʼa tü kasa naainjakat Jeʼwaa otta ayatüsia nikeraajüin tü nümakat;  matüjainsai nia aainjaa kasa mojusü, lotusü nukuwaʼipa» (Deuteronomio 32:4).

Lotusü maʼin tü sümakat tü Wiwüliakat süchiki kasapülajatüin nukumajaka Maleiwa tü Mmakat. Müsü shia: «Nia kokoroloko Jeʼwaa süpüshuaʼa tü kasa chakat iipünaa, aluʼusaʼa tü mmakat naapüin shia namüin na wayuukana» (Salmo 115:16). Anasü maʼin sukumajia tü Mmakat nutuma Maleiwa süpüla kepiainjatüin wayuu waneepia saaʼu otta niʼitaain suluʼu süpüshuaʼa tü kasa choʼujaakat wamüin. Akaʼaya shia, süpülajatü talatüin waaʼin otta süpüla wayaawatüin saaʼu kasapülajanain wakumajünaka (Génesis 2:8, 9).

«Nia kokoroloko Jehová süpüshuaʼa tü kasa chakat iipünaa, aluʼusaʼa tü mmakat naapüin shia namüin na wayuukana». (Salmo 115:16).

Süküjain tü Wiwüliakat kasapülajanain nukumajaka Maleiwa na wayuukana. Anuu nünüiki chi Maleiwakai nümüin chi palajaikai wayuu toolo jee tü palajatkat jierü: «Anakaja kachonniire jia, jouluiwa na juuʼuliwoʼukana sainküin mmakat süpüshua süpüla laülaainjanain jia saaʼu tü kasa [...] mmapaʼajatkat süpüshuaʼale» (Génesis 1:28). ¡Anakatche maʼin tü aʼyatawaa aapünakat namüin: naaʼinmajüinjatü tü Mmakat otta paʼaraiisüinjatü shia natuma! Kepiainjachi Adán, Eva otta na nuuʼuliwoʼukana yaa saaʼu tü Mmakat süpüla kaʼikat süpüshuaʼa. Nnojoishii chainjanain kepiain iipünaa.

Saashin tü Wiwüliakat, eʼrüijaashi wayumüin nümüin Maleiwa wanee aapiee nukumajaka. Satanaa münüshi nia mapa. ¿Kasa naaʼinraka?

Emeejünüshii Adán otta Eva nutuma Satanaa süpüla wanaawainjanain naya nümaa sünain eʼraa wayumüin nümüin Maleiwa. Nüküjain namüin sünain nüpülajüin Maleiwa kasa anasü noulia, nnojoliin naya nuuʼulaain sünain aneekaa süka naaʼin namüiwaʼa kasain anain jee mojuin süpüla naaʼinrüin. Wanaawashii naya sünain eʼraa wayumüin nümaa Satanaa, nnojoliika noonooin nümaa Maleiwa. ¿Kasa alataka namüin sünainjee tia? Nnojoliinnapa eein süpüla katüin noʼu waneepia saaʼu tü Mmakat jee outushii naya mapa (Génesis 2:17; 3:1-6; 5:5).

Kakaliairü wayuu eʼrüin müliaa sutuma moonooloin Adán sümaa Eva nümüin Maleiwa. Müsü tü nünüikikat Maleiwa süchiki tia: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Outusü wayuu süka nuuʼuliwoʼuin shia Adán sümaa Eva, nnojotsü matüjülin tia nutuma Maleiwa.

Mayaapejeʼe neʼrüin wayumüin nümüin Maleiwa Satanaa, Adán otta Eva, nnojotsü suʼwanajeʼerüin tia tü naaʼinrüinjatkat Maleiwa saaʼu tü Mmakat jee süpüleerua wayuu. Sükajee alin maʼin waya nüpüla Jeʼwaa jee lotuin maʼin nukuwaʼipa, nüchajaain maʼin sukuwaʼipa süpüla taashinjanain waya suulia süchepchia kaainjalaa jee outaa. Anuu nünüiki chi aluwataaushikai Pablo: «Walaasü tü waainjalakat outapa waya. Aluʼusaʼa nünainjee chi Wasenyotsekai Jesuu, naapüin Maleiwa wamüin kataa oʼuu» (Roma 6:23, TNM). Sutuma alin maʼin waya nüpüla Maleiwa naapüin «chi waneeshikai Nüchon süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM). Süka naapajiraain nikii Jesuu waaʼu, naakajirüin süpüshuaʼale tü kasa amülouikat paala nutuma Adán. a

Alüʼütsü süpüla shikeraajüin tü nümakat Maleiwa süchiki Paʼaraiisüinjatüin tü Mmakat. Süpüla suluʼuinjachin pia tü Paʼaraiisükat, oonooinjachi pia sümaa tü nümakat Jesuu: «Chi eekai nnojolüin nünoujain tanain, nnojoleechi ountüin ekeroloo chamüin eere nuluwataain Maleiwa. Wainmeerü wayuu mekerolüinkat süka nnojolüin nanoujain tanain. Müshii aka naya saaʼin wayuu eekai süneeküin oʼunaa suluʼu wopu eekai jerulüin saaʼu mapüleein napüleerua. Otta na anoujashiikana tanain, nnojoleena wainmain. Müshii aka naya saaʼin wayuu eekai süneeküin wopu eekai moulin jaʼitasü kapüleein napüleerua. Anakaja müle aka jia naaʼin na wayuu oʼunakana suluʼu wopu mouisü» (Mateo 7:13, 14). Pia neʼe aneeküinjachika süka paaʼin pümüiwaʼa tü paaʼinrajatkat. ¿Kaseerü püneekaka?