Anamiainjana waya naashin Jesús. Anuupejeʼe nünüiki namüin na aluwataaushikana: «¿Aluwataaushi taya, saaʼin jümüin, süpüla achiajawaa wayuu atkaasü yaa mmaluʼu? Nnojoishi süpülajachin taya tia. Süpülajachi mojujiraainjatüin wayuu tatüma [...]. Aʼülüjeechi wane wayuu nümüin chi nüshikai. Aʼülüjeerü wane wayuu sümüin tü shiikat. Aʼülüjeerü wane wayuu sümüin tü saʼütkat» (Mat. 10:34, 35). ¿Kasa nüküjeeka achiki Jesús sükajee tia?

Nnojotsü keeʼireein naaʼin Jesús natkaajiraain na wayuukana sümaa napüshi. Nütüjaapejeʼe saaʼu eein süpüla sülatüin tia sutuma tü nikirajakalü anain. Jülüjainjatü naaʼin na oushikajaweekana süchiirua nukuwaʼipa Jesús jee na woutiiseekana eein süpüla mojushiin tia namüin napüshi. Watüjaa aaʼu kapüleein nümüin wanee wayuu nuushikajaain süchiirua nukuwaʼipa Cristo shiyoutunule nüpüleerua tia sutuma nuʼwayuuse jee shiale sutuma wanee nüpüshi.

Anuu sünüiki tü Bibliakat namüin na anoujashiikana: «Anakaja müleka kamaneere jia sümüin wayuu süpüshua suulia paʼürülaawajirawaa» (Roma 12:18). Mojujiraapejeʼe wayuu sümaa napüshi sutuma tü nikirajakalü anain Jesús. Alatüsü tia wanaa sümaa naapaain wanee wayuu sümaa tü nikirajakalü anain Jesús jee nayoutuin shia na wane nüpüshikana. Ekeraajüsü nünüiki Jesús, tü makat: «Aʼülüjiraweena na apüshiikana maa aka natkaain wayuu eekai paʼünüüwajiraain» (Mat. 10:36).

Na nikirajüinkana Jesús kepiakana sümaa napüshi naatakana anoula, eesü kaʼi kapüleejeetka oʼu namüin noonooin sümaa tü nümakat Jehová otta Jesús. Eeshii napüleeruaanüle aaʼin süpüla noʼunuin sünain tü miʼiraa saainjakat tü iküleesia kaluʼukat naya. Soʼu tia naneeküinjatü jaralinjachin noonooin amaa. Anuu nünüiki Jesús: «Nnojoleerü kasain jaamüin tamüin müleka aire jüpüla chi jüshikai je tü jiikat [...] suulialeʼeya alin taya jüpüla» (Mat. 10:37). Nnojotsü nüküjeein achiki Jesús sükajee tia maalinjachin nüpüla wanee wayuu nüshi jee nii süpüla nuushikajaain süchiirua nukuwaʼipa. Tü nüküjeekalü achiki Jesús shia niyaawatüinjatüin saaʼu wanee wayuu tü naaʼinmaainjatkat maʼin. Ayataʼaya alin wapüla wanee wapüshi nnojoikai Nüküjalin pütchi ayoutakai wapüleerua waʼwaajüin Jehová. Niainjachipejeʼe Maleiwa alanaakai aalin wapüla.

Mojusü maʼin waaʼin jashichire wamüin wapüshi saalinjee wanoujain. Jülüjainjatpejeʼe waaʼin tü nümakat Jesús, tü makat: «Chi wayuu eekai niyouktalaa nümüin taya niʼrapa müliaa sümaa mmoluu sheema oʼutinnaa aaʼin tanainjee, nnojoishi wanaain sümaa niainjachin wane tekirajüin» (Mat. 10:38). Makalaka wayaawatüin saaʼu wayakana anoujakana mülieenain waya woushikajaale süchiirua nukuwaʼipa Jesús, maʼaka süpüleeruaaneerüin waaʼin natuma na wapüshikana. Eepejeʼe süpüla anain wakuwaʼipa noʼupala süpüla suʼwanajaain tü jülüjakat naaʼin wachiki otta süpüla kamalain namüin tü shikirajakat tü Bibliakat (1 Ped. 3:1, 2).