Waʼwaajüin Jehová woutkajaapa jee woʼunapa sünain tü outkajawaakat miyoʼu. Waʼwaajüinña nia wekirajaapa wamüiwaʼa jee sümaa wapüshi. Anuu waneirua kasa eeka süpüla pikirajaain anain pümüiwaʼa jee sümaa püpüshi:

• Yapa pia süpüla tü outkajawaakat. Eesü süpüla pikirajaain sünain eeʼirajaa tü jayeechikalüirua otta pükaalinja na püpüshikana süpüla yapain natuma wanee pütchi süpüla nasoutuin sünain tü outkajawaakat.

• Paashajeʼera wanee aküjalaa suluʼujee tü Bibliakat. Pipintaja shiyaakua tü pikirajaakalü achiki jee shiale püshajüin wanee kasa pütüjaka sünainjee.

• Pikirajaa suluʼujee tü Bibliakat nünüiki wanee wayuu oʼuraajakai nümüin Maleiwa otta jülüja paaʼin tü paaʼinrajatkat süpüla anain pünüiki puʼuraajapa.

• Pünaja wanee video suluʼujee jw.org. Yooto pia süchiki tia namaa na püpüshikana jee shiale püshajüin wanee kasa kamalainka pümüin.

• Yapa pia süpüla püküjain pütchi. Puuʼulaka tü pünüikinjatkat namaa na püpüshikana.

• Jülüja paaʼin tü kasa nukumalakat Jehová jee püsakira paaʼin sünain tü pütüjakat nüchiki sünainjee. a