Wayaawata aaʼu sutuma tü atkawaa chakat Ucrania, nootunüin na wayuukana sünain atkawaa natuma waneinnua anoujashii nünain Jesús. Jamüshiijaʼa na katooliko chakana Rusia nootuin na surulaat suluʼukana noumain sünain atkawaa, akaʼaya sukuwaʼipa natuma na chakana Ucrania, nootuin na surulaat suluʼukana noumainña. Anuu nanüiki:

•   «Kojutushii maʼin wamüin na surulaat eejiraakana maʼin suulia sushutunuin saaʼu tü noumainkat yaa Ucrania [...]. Oʼuraajüshii maʼin waya naaʼu süka süpüshuaʼa waaʼin nümüin Maleiwa süpüla nükaalinjain naya» (metropolitano Epifanio I de Kiev, shia kaküjalaka The Jerusalem Post, maatsoʼu 16, soʼu 2022).

•   «Chi shikiipüʼükai tü Iküleesia ortodoxa chakat Rusia outkajaashi nia namaa na surulaatkana süpüla nütütüleʼerüin naaʼin, rimiinkoʼulajatü tia. Müsü nünüiki namüin: «Ayataʼaya jütkaain saaʼu tü juumainkat». Nüküjain tia, sümaʼinruʼu sushutuin Moscú saaʼu Ucrania». (Reuters, aaʼuriiroʼu 3, soʼu 2022).

 ¿Sünainpünaainjanache atkawaa na anoujashiikana nünain Jesús? ¿Jamüsü sünüiki tü Bibliakat süchiki tia?

 Saashin tü Bibliakat nnojoishii sünainpünaainjanain atkawaa na shiimainshiikana anoujain nünain Jesucristo.

•   «Pünaajaa türa püchajaruutsekat, na wayuu atkaakana süka chajaruuta oʼutuneena aaʼin naya süka chajaruuta» (Mateo 26:52).

   Nnojotsü saaʼinrüin wanee wayuu tü nümakat Jesús müleka sünainpünaale shia atkawaa.

•   «Taluwataain jia sünain wanee kasa jeketü, aijiraainjana jia waneʼewai jukua maʼaka alin jia tapüla. Aijiraale jia waneʼewai jukua, shiyaawateerü aaʼu wayuu tekirajanain jia» (Juan 13:34, 35).

   Eere wanee wayuu anakai amüin sünainpünaain nia wanee atkawaa, ¿ shiimainchejeʼe nunoujain chia wayuukai nünain Jesús?

 Pütüjeere sooʼomüin paashajeʼera tü pütchikat «El cristianismo y la guerra: ¿son compatibles?»

 ¿Shiimainchejeʼe eein anoujashii nnojoliikana sünainpünaain atkawaa? Aa, süka süküjatüjülin tü Bibliakat eejeenain soʼu sükalia sajaʼttajatkalü oʼu kasa mojusü wayuu sainküinjeejana mma süpüshuaʼa nnojoliijeenakana ekirajaain sünain atkawaa. Shieerü naainjaka tü nikirajakalü anain Jesús (Isaías 2:2, 4).

•   Pütüjeere sooʼomüin paashajeʼera suluʼu Aapiria Wayuu tü pütchi kanüliakat «¿Jamüsüche nünüiki Maleiwa süchiki tü atkawaakat?»

 Nuluwataapeena Jehová, a «chi Maleiwakai aapakai jümüin anaa» nuʼtteʼereena na müliakana (Filipos 4:9; Salmo 72:14).

•   Pünaja süchiki tia suluʼu tü videokot ¿Kasa wayu tü Nuluwataayakat Maleiwa?