ALATÜSÜ suulia 500 juya katüin noʼu Daniel süpülapünaa jemein Jesuu. Akaisaʼa Jeʼwaa, nüküjüin nümüin joujainjachin nüneeküin Jesuu süpüla niainjachin chi Mesíaskai jee chi Kürisütokai. Münüshi Daniel: «Pütüjaainjatü aaʼu soʼujee süküjünüin sukumajünajatüin süchikuaʼa Jerusalén nünainmüin chi Mesías Ekiipuʼukai, eeinjatü 7 semaana otta 62 semaana» (Daniel 9:25, TNM).

 ¿Jamüsü süpüla watüjaain saaʼu joujainjachin nüntüin chi Mesíaskai? Palajana, watüjaainjatü aaʼu joujatüin suʼttüin sünain ayaawajünaa tü nükaliakat süpüla antaa. Saashin tü Wiwüliakat shia wanaa sümaa «süküjünüin sukumajünajatüin süchikuaʼa Jerusalén». ¿Joujatü ‹aküjünüin sukumajünajatüin süchikuaʼa Jerusalén›? Naashin Nehemías, chi ashajakai süpüshi tü Wiwüliakat aküjünüsü shia soʼu «tü 20 juya nuluwataakalü oʼu Artajerjes» (Nehemías 2:1, 5-8, TNM). Naashin noʼutku na ashajüliikana süchiki kasa alatüirü, tü palajatkat juya nuluwataaka oʼu Artajerjes shia tü juyakat 474 süpülapünaa wakalia (sü.w.). Shiyaawajünüle tia, tü 20 juya nuluwataakalü  oʼu Artajerjes soʼujatü tü juyakat 455 sü.w. Makalaka shikeraajüin tü pütchi nüküjakat Daniel nüchiki Jesuu soʼujee tü juyakat 455 sü.w.

Nüküjüin Daniel jeʼrainjatüin juya alataka soʼujee tia sünainmüin tü juya nüntajatkalü oʼu chi «Mesías Ekiipuʼukai». Saashin tü Wiwüliakat alatajatü «7 semaana otta müsia 62 semaana», süpüshuaʼa tia 69 semaana. ¿Jeʼra juya tia? Maʼaka süküjüin shia waneeirua Wiwülia nnojotsü semaanain maʼaka 7 kaʼi, 7 juya shia. Natüjaa aaʼu na judíokana juyain tü semaana münakat. Süchikijee 7 juya eemeraashii naya suulia aʼyatawaa (Éxodo 23:10, 11). Tü 69 semaana sümakat tü Wiwüliakat 69 juya shia, ayaawajünüsü akaratshitua, süpüshuaʼa tia 483 juya.

Wayaawaja shia jooluʼu. Wayaawajüle 483 juya soʼujee 455 sü.w., antüsü sünainmüin tü juyakat 29  soʼu wakalia (so.w.), tü juya nuwoutisaajünakalü oʼu Jesuu otta niiʼiyataka oʼu niain chi Mesíaskai (Lucas 3:1, 2, 21, 22). * Ekeraajüsü tia pütchi aküjünakat paala suluʼu tü Wiwüliakat ¿aashimüin?