1. ¿Kasa tü wekirajaainjatkalü anain?

SAINKÜIN tü mmakat, wainma maʼin wayuu atüjaaka saaʼu tü nünüikikat Jesuu wanaa sümaa nikirajüin na nikirajüinkana sünain achuntaa nümüin Maleiwa. Anasü maʼin otta washatüinjatü shia naashin. Süpüla pütüjaain saaʼu tü shikirajakat maʼin tü Wiwüliakat, wekirajaa sünain tü apünüinsükat kasa nuchuntakat Jesuu palajana.

2. Püküja tü apünüinsükat kasa nachuntajatka na nikirajüinkana Jesuu.

² Müshi Jesuu namüin na nikirajüinkana: ‹Meena jia juchuntapa nümüin Maleiwa: Taata Maleiwa chi chakai sirumatuʼu, kojutüshaatashi pia watuma. Pünta maalü sünain aluwatawaa süpüla saainjünüin tü keeʼireekat paaʼin saaʼu tü Mmakat maʼaka chaaʼaya sirumatuʼu› (Mateo 6:9-13). ¿Jamaluʼulu tia apünüinsükat kasa nuchuntaka Jesuu?

3. ¿Kasa tü anakat maʼin süpüla watüjaain saaʼu süchiki Nuluwataaya Maleiwa?

³ Wekirajaaipa anain nünülia Maleiwa, Jeʼwaa. Otta müsia tü keeʼireekat naaʼin, tü kasa naainjakat otta tü naainjainjatkat mapeena wapüleerua. Akatsaʼa, ¿jamaluʼulu tü nünüikikat Jesuu: ‹Pünta maalü sünain aluwatawaa›?  ¿Kasa wayuu tü Nuluwataayakat Maleiwa? ¿Jamüsü wuleinjatka jee kojutüinjatka nünülia Maleiwa sutuma? ¿Jamüsü sünainpünaaka nuluwataaya Maleiwa saainjünüin tü keeʼireekat naaʼin?

4. ¿Kasa wayuu tü Nuluwataayakat Maleiwa? ¿Jarai chi Sülaülainjachikai?

⁴ Niʼitaala Jeʼwaa tü Nuluwataayakat otta chi Sülaülainjachikai nia Jesukürisüto. Miyoʼu nia noulia na sülaülashiikana mma. Müsü tü Wiwüliakat: Nia «chi müloʼushikai napüleerua napüshua na sülaülashiikana mma» (Alateetkat Mapeena 1:5). Naainjeerü Jesuu wainma kasa anasü noulia na sülaülashiikana mma otta noulia na atüjakana maʼin aluwatawaa.

5. ¿Jalejeeinjatü aluwataain Nuluwataaya Maleiwa? ¿Kasa suluwataainjatka aaʼu?

⁵ ¿Jalejeeinjatü aluwataain Nuluwataaya Maleiwa? ¿Jalashi eere Jesuu? Maʼaka wekirajaain paala, süchikijee ouktüin nia otta süsoʼiraain naaʼin, oʼunüshi nia sirumatuʼumüin. (Aluwataaushikana 2:33). Nuluwataaya Maleiwa ‹chasü iipünaa› (2 Timoteo 4:18). Mayaapejeʼe chain shia sirumatuʼu aluwataainjatü Mmapaʼa (paashajeʼera Alateetkat Mapeena 11:15).

6, 7. ¿Jamüshi anaka maʼin Jesuu süpüla Aluwatawaa?

⁶ Anashi maʼin Jesuu süpüla Aluwatawaa. ¿Jamüsü maka wanüiki? Shia süka matüjüin ouktaa nia. Saashin tü Wiwüliakat na sülaülashiikana mma ouktüshii naya, akaisaʼa Jesuu ‹nia neʼe matüjüinka ouktaa› (Hebreokana 7:16). Makalaka eeinjatüin waneepia tü kasa anasü naainjainjatkat otta watteerü saalii.

⁷ Müsü tü Wiwüliakat paala nüchiki Jesuu: ‹Eejeerü nütchin Jeʼwaa naaʼu, atüjeechi ayaawataa, achiawaa, pülasheechi, nnojoleerü süsalain wayuu saainjala nutuma  sükajee tü niʼrakat jee tü pütchi naapakat. Loteerü nutuma sukuwaʼipa tü naainjainjatkat napüleerua na anamiakana Mmapaʼa› (Isaías 11:2-4, TNM). Aluwataainjachi Jesuu naaʼu na wayuukana sümaa lotuin sukuwaʼipa tü naainjainjatkat otta nümüliajüinjana naya. ¿Pücheküin Nuluwataain paaʼu wanee wayuu eeka müin aka naaʼin?

8. ¿Jaralii na aluwataainjanakana nümaa Jesuu?

⁸ Wekirajaa sooʼomüin süchiki Nuluwataaya Maleiwa: nnojoishi Aluwataainjachin Jesuu nümüiwaʼa, aluwataainjana waneeinnua nümaa. Müshi Pablo nümüin Timoteo: ‹Wachecherüle waaʼin, aluwataweena waya nümaa› (2 Timoteo 2:12). Shiimain tia, Pablo, Timoteo otta waneeinnua nüneeküin Maleiwa süpüla aluwatawaa nümaa Jesuu chaaʼaya iipünaa. ¿Jeʼrainjana naya?

9. ¿Jeʼrashii na aluwataainjanakana nümaa Jesuu? ¿Joujana nüneeküin naya Jeʼwaa?

⁹ Maʼaka süküjünüin suluʼu ekirajaaya 7, niʼrüin Juan ‹chi Anneetchonkai [Jesukürisüto] shaʼwatüin saaʼu tü wutai kanüliakat Sión [eere Nuluwataain sirumatuʼu] sümaa watta saalii wayuu maʼaka 144.000›. ¿Jaralii na 144.000 wayuuinnua? Naashin Juan ‹naya na ichekana waneepia nünain chi Anneetchonkai sooʼopünaa tü alatakat namüin› (Alateetkat Mapeena 14:1, 4). Na aluwataainjanakana nümaa Jesuu naya na nikirajüin oonookana waneepia sümaa nünüiki. Süchikijee ouktüin jee süsoʼiraain naaʼin «sülaüleena naya wayuu» nümaa Jesuu (Alateetkat Mapeena 5:10). Soʼujee nakalia na aluwataaushiikana, nüneeküin Maleiwa na oonookana waneepia sümaa nünüiki süpüla keraain na 144.000 wayuuinnua.

10. ¿Jamüshi aipüraika Jeʼwaa sükajee niʼitaain Jesuu otta na 144.000 wayuuinnua süpüla naluwataain waaʼu?

¹⁰ Aipürai maʼin Jeʼwaa, makalaka niʼitaain Jesuu otta na 144.000 wayuuinnua süpüla naluwataain waaʼu. Naainjaka Jeʼwaa tia shia süka wayuuin Jesuu, nütüjaa  aaʼu sümüliala wayuu. Müshi Pablo: «Nieechi Jesuu amüliajaka waya saaʼu nülatirüitpain süpüshua tü ooʼulakünaakat aaʼin süka kasa mojusü, saaʼu wayuuin nia maa aka waya. Otta müshia niakai süka maainjalain» (Hebreokana 4:15; 5:8). Na aluwataainjanakana nümaa Jesuu neʼrüirü tü müliaakat, tü ayuuliikat otta nachecherüirü naaʼin suulia kaainjalaa. Makalaka natüjaajeerüin saaʼu tü kasa mojusü alatakat wamüin.

11. ¿Jamüshii nachuntajanaka na nikirajüinkana Jesuu süpüla saainjünüin tü keeʼireekat naaʼin Jeʼwaa chaaʼaya sirumatuʼu?

¹¹ Naashin Jesuu, nnojoishii achuntajanain neʼe na nikirajüinkana süpüla süntüin Nuluwataaya Maleiwa; achuntajana süpüla saainjünüin tü keeʼireekat naaʼin Jeʼwaa ‹saaʼu tü mmakat otta chaaʼaya sirumatuʼu›. Na aapiee oonookana sümaa nünüiki Maleiwa naainjain waneepia tü keeʼireekat naaʼin. Akatsaʼa suluʼu ekirajaaya 3 wekirajaa anainrü nnojoluin naainjain tü keeʼireekat naaʼin Maleiwa wanee aapiee, naainjirüin Adán otta Eva kasa mojusü. Suluʼu ekirajaaya 10 wekirajaajeerü anain sooʼomüin tü shikirajakat tü Wiwüliakat nüchiki chia aapiee kanüliakai Satanaa. Nuuʼulaain Jeʼwaa nia otta na yolujaakana chaaʼaya iipünaa soʼu palitchon kaʼi. Makalaka nnojoluin naainjain tü keeʼireekat naaʼin Maleiwa noʼutku na aapieekana soʼu nükalia Jesuu. Aʼwanajaainjatü tia Nuluwataapa Jesuu nutuma Maleiwa otta nütkaapa nümaa Satanaa (paashajeʼera Alateetkat Mapeena 12:7-9).

12. ¿Jarat tü piamasükat kasa aküjünaka suluʼu Alateetkat Mapeena 12:10?

¹² Müsü tü alatajatkat: ‹Taapakalaka wanee pütchi iipünaajee sünain maa: «Sütüjaajeerü aaʼu wayuu sünain niain pülashin süpüla aluwatawaa. Akaajaa Cristo oʼttuichipa nia sünain aluwatawaa. Nnojoluichipa eein chi  Yolujaakai nümülatuʼu Maleiwa sünain eperulaajaa na wawalayuukana soʼu kaʼi jee saʼwai. Ojutunuichipa nia»› (Alateetkat Mapeena 12:10). ¿Jarat tü piamasükat kasa aküjünaka suluʼu pütchikat tüü? Palajana, oʼttüsü Nuluwataaya Maleiwa sünain aluwatawaa nükajee Jesuu. Tü wanee ojutünüshi Satanaa sirumatuʼujee Mmapaʼamüin.

13. ¿Kasa alataka sutuma nujutünüin Satanaa sirumatuʼujee?

¹³ Ekeraajüsü tia pütchikat otta wekirajaajeerü anain shia mapeena. ¿Kasa alataka sutuma nujutünüin Satanaa? Waashajeʼera tü alatakat sirumatuʼu: ‹Anakajaʼa talatüle waaʼin yaakana iipünaa nümaa Maleiwa› (Alateetkat Mapeena 12:12). Talatüshii na aapiee oonookana sümaa nünüiki Jeʼwaa sükajee nujutünüin Satanaa namaa na Yolujaakana. Napüshuaʼa na apütaakana sirumatuʼu oonooshii sümaa nünüiki Jeʼwaa, kottiraashii otta jimatajiraashii naya. Aainjünüitpa tü keeʼireekat naaʼin Maleiwa sirumatuʼu.

14. ¿Kasa alataka Mmapaʼa sükajee nujutünüin Satanaa?

¹⁴ ¿Kasa alataka Mmapaʼa? Müsü tü Wiwüliakat: ‹Jia kepiakana sainküin tü mmakat, müleʼo maʼin tü müliaa jiʼreetkat süka nujutünüichipain chi Yolujaakai jaʼakamüin. Jashichishaatashi maʼin nia süka sülüʼülüin nükalia süpüla ataʼünnaa› (Alateetkat Mapeena 12:12). Jashichishi maʼin Satanaa sükajee nujutünüin sirumatuʼujee otta sülüʼülüin nükalia süpüla ataʼünaa. Sutuma tia, aainjashi maʼin nia kasa mojusü Mmapaʼa. Suluʼu tü wanee ekirajaayakat wekirajaajeerü anain sooʼomüin tia. Sutuma tü wekirajaaitpakat anain eeshii süpüla wasakiraain: ¿kaseerü saainjaka Nuluwataaya Maleiwa süpüla saainjünüin Mmapaʼa tü keeʼireekat naaʼin?

15. ¿Kasa keeʼireeka naaʼin Maleiwa süpüleerua tü Mmakat?

¹⁵ Soto paaʼin tü keeʼireekat naaʼin Maleiwa süpüleerua tü Mmakat. Maʼaka pikirajaain suluʼu ekirajaaya 3, nüküjüin Jeʼwaa chaaʼaya Edén keeʼireein naaʼin paʼaraiisüin otta  piratüin shia wayuu anamia sümaa nnojoluin ouktüin naya. Naainjirapa Satanaa Adán otta Eva kasa mojusü, nnojotsü ekeraajüin tü keeʼireekat naaʼin Maleiwa süpüleerua tü Mmakat. Akatsaʼa nnojoluin aʼwanajaain tia. Keeʼireesü naaʼin Jeʼwaa shikeraajüin tü sümakat Salmo 37:29, TNM: «Na lotokana akuwaʼipa, nayeena kepiaka saaʼu tü mmakat süpüla kaʼika süpüshuaʼa». Ekeraajeerü tia sutuma nuluwataaya Maleiwa. ¿Jameerü sukuwaʼipa?

16, 17. ¿Kasa aküjünaka süchiki Nuluwataaya Maleiwa suluʼu Daniel 2:44?

¹⁶ Müsü tü karalouktakat Daniel 2:44, TNM: ‹Soʼutpünaa naluwataaya na wayuukana niʼitaajeerü Maleiwa wanee aluwataaya nnojoluinjatka ajaʼttinnüin. Nnojoleerü alatinnüin suluʼumüin wanee mma. Sajaʼttireerü süpüshuaʼa tü aluwataayakalüirua otta shiainjatü eeka waneepia›. ¿Kasa aküjünaka süchiki Nuluwataaya Maleiwa?

¹⁷ Palajana, aküjünüsü eeinjatüin Nuluwataaya Maleiwa «soʼutpünaa naluwataaya na wayuukana». Piama, shiainjatü eeka waneepia. Nnojoleerü ajaʼttinnüin sutuma wanee aluwataaya. Apünüin, atkaainjatü Nuluwataaya Maleiwa sümaa naluwataaya na wayuukana otta shiainjatü akanajaka. Mapa shiainjatü waneesüka sünain aluwatawaa naaʼu na wayuukana otta shieerü anaka maʼin.

18. ¿Kasaichi sünülia tü kaʼi sütkaainjatkalü oʼu Nuluwataaya Maleiwa sümaa naluwataaya na wayuukana?

¹⁸ Wainma pütchi süküjaka tü Wiwüliakat süchiki sütkaainjatüin Nuluwataaya Maleiwa sümaa suluwataaya wayuu. Maʼaka saaʼin tü alatajatkat süpülapünaa najaʼttirüin Maleiwa tü kasa mojusükat, aküjüinjana alawaa na yolujaakana süpüla nemeejüin «na sülaülashiikana mma». ¿Kasapülajatü tia? ‹Süpülajatü nakotchojiraain na wayuu namaajanakana süpüla atkawaa nümaa chi Maleiwa Pülashikai maʼin›. Akotchojünajana naya ‹suluʼumüin wane mma kanüliasü Armagedón› (Alateetkat Mapeena 16:14, 16).  Tü kaʼi sütkaainjatkalü oʼu Nuluwataaya Maleiwa sümaa naluwataaya na wayuukana Armagedón sünülia.

19, 20. ¿Jamüsü nnojotka saainjünüin maaʼulu tü keeʼireekat naaʼin Maleiwa?

¹⁹ ¿Kaseerü eeka sutuma Nuluwataaya Maleiwa sükajee Armagedón? Soto waaʼin tü keeʼireekat naaʼin Maleiwa süpüleerua tü Mmakat. Paʼaraiisüinjatü shia otta piratajatü wayuu maainjalasat otta anamia süpüla shiʼyataain nümüin. ¿Jamüsü nnojotka saainjünüin tü keeʼireekat naaʼin Maleiwa maaʼulu? Palajana kaainjaralii waya, makalaka ayuulin jee ouktüin waya. Suluʼu ekirajaaya 5, wekirajaa anainrü ouktüin Jesuu waaʼu süpüla katüin woʼu waneepia. ¿Sotusü paaʼin tü nüküjakat Juan? Müshi nia: ‹Naapüin Maleiwa chi Nüchonkai waaʼu. Chi eekai nunoujain nünain eejeechi nümaa Maleiwa süpüla kaʼikat süpüshua [kateerü noʼu waneepia, TNM]› (Juan 3:16).

²⁰ Piama, shia sutuma wainmain wayuu mojulaasü. Aküjüshii alawaa, emeejüshii otta yarüttüsü nakuwaʼipa. Nnojotsü naainjeein tü keeʼireekat naaʼin Maleiwa. Akanasaʼa na aainjakana kasa mojusü oukteena soʼu Armagedón, tü kaʼi nütkaainjatkalü oʼu Maleiwa (paashajeʼera Salmo 37:10). Apünüin, shia natuma na sülaülashiikana mma, nnojoishii naainjirüin na wayuukana tü keeʼireekat naaʼin Maleiwa. Eeshii eeka nnojoluin anamiain jee mojulaashii naya. Müsü tü Wiwüliakat nachiki: «Chi wayuukai aluwataashi naaʼu na wayuukana süpüla numojujüin nakuwaʼipa» (Eclesiastés 8:9, TNM).

21. ¿Kasa saainjüinjatka Nuluwataaya Maleiwa süpüla saainjünüin tü keeʼireekat naaʼin Mmapaʼa?

²¹ Süchikijee Armagedón shia neʼe aluwataainjatka saaʼu wayuu Nuluwataaya Maleiwa. Ekeraajeerü tü keeʼireekat naaʼin Maleiwa sutuma otta antireerü wainma kasa anasü. Oʼutüneechi aaʼin Satanaa otta na yolujaakana (Alateetkat Mapeena 20:1-3).  Sunoʼuteʼereerü sukuwaʼipa wayuu sükajee ouktüin Jesuu waaʼu. Sutuma tia, na wayuu oonookana waneepia sümaa nünüiki Maleiwa nnojoleena ayuulin jee ouktüin. Kateerü noʼu waneepia (paashajeʼera Alateetkat Mapeena 22:1-3). Otta müsia, paʼaraiiseerü tü Mmakat sutuma. Sükajee tia, aainjüneerü tü keeʼireekat naaʼin Maleiwa Mmapaʼa otta wuleerü nünülia sutuma. ¿Jamaluʼulu pütchikat tia? Sutuma Nuluwataaya Maleiwa, kojuteerü sümüin wayuu tü nünüliakat Jeʼwaa.

22. ¿Jamüsü watüjaaka saaʼu nnojoluin süntüin Nuluwataaya Maleiwa wanaa sümaa yaajachin Jesuu Mmapaʼa otta süchikijee süsoʼiraain naaʼin?

²² Wanaa sümaa nümüin Jesuu namüin na nikirajüinkana: ‹Juchunta nüntai Maleiwa maalü sünain aluwatawaa›. Nnojotsü antüin tü Nuluwataayakat soʼu kaʼikat tia. ¿Antüsüche shia nuʼunapa Jesuu sirumatuʼumüin? Nnojo. Naashin Pedro otta Pablo, ekeraajüsü nünain Jesuu tü suluʼukat Salmo 110:1 süchikijee süsoʼiraain naaʼin: ‹Müsü nünüiki Jeʼwaa nümüin chi Tasenyotsekai: «Püikkalaa tekialuʼujee sümaʼinruʼu tayamülüin tü püʼünüükalüirua»› (Aluwataaushikana 2:32-35; Hebreokana 10:12, 13). Aʼatapajüinjachi Jesukürisüto süpüla aluwatawaa.

23. (1) ¿Joujatü oʼttüin sünain aluwatawaa Nuluwataaya Maleiwa? (2) ¿Kasa wekirajaainjatka anain suluʼu tü wanee ekirajaayakat?

²³ ¿Jeʼrainjatü nükalia Jesuu sünain aʼatapajaa? Soʼutpünaa  tü juyakat 1800 otta 1900, nayaawata aaʼu shiʼipawai palitchon wayuu ekirajaalii sünain tü Wiwüliakat, naʼatapajüinjatüin süntüin tü juyakat 1914. (Paashajeʼera tü pütchikat «1914 otta tü sümakat tü Wiwüliakat».) Tü kasa alatakat sainküin tü mmakat soʼujee 1914 shiiʼiyatüin shiimain tü nayaawatakat aaʼu na ekirajaaliikana sünain tü Wiwüliakat. Sükajee shikeraajüin tü sümakat tü Wiwüliakat shiiʼiyatüin nuʼttüin Kürisüto sünain Aluwatawaa soʼujee tü juyakat 1914. Makalaka kepiain waya soʼu tü kaʼi ‹alüʼütkat oʼu nükalia Satanaa süpüla ataʼünaa› (Alateetkat Mapeena 12:12; Salmo 110:2). Otta müsia, alüʼütsü tü Nuluwataayakat Maleiwa süpüla saainjirüin Mmapaʼa tü keeʼireekat naaʼin Maleiwa. ¿Anasüche sümaa shiimain pümüin pütchikat tia? Suluʼu tü wanee ekirajaayakat wekirajaajeerü anain tü shikirajakat maʼin tü Wiwüliakat süchiki tia.