Nücheküin Maleiwa aleewain wayuu nümaa sükajee noʼuraajüin nümüin (1 Juan 5:14, 15). Tia, nnojotsü maluʼuluin naapüin Maleiwa nanüiki napüshuaʼa na wayuukana. Süküjüin tü Wiwüliakat nnojoluin kasajatüin nümüin Maleiwa nünüiki chi wayuu mojutükai amüin nuʼwayuuse (1 Pedro 3:7, TNM). Nnojotsü kasajatüin nümüin Maleiwa nanüiki na israeliitakana süka macheʼein naya süchiirua kaainjalaa. Na ooʼulaakana suulia naainjala, naapüin Maleiwa nanüiki. Püleeja Isaías 1:15 otta 55:7.

Pünaja tü videokot ¿Naapüinche Maleiwa sünüiki süpüshuaʼa wayuu suʼuraajapa?

Waʼwaajüin Jeʼwaa sükajee woʼuraajüin nümüin, makalaka niainjachin neʼe woʼuraajaka amüin nümüiwaʼa (Mateo 4:10; 6:9). Süka ouktüin Jesuu saaʼu waainjala otta süka kaainjaraliin waya, oʼuraajüinjana waya sükajee tü nünüliakat (Juan 14:6). Nnojotsü nücheküin Jeʼwaa weʼitirakuʼu wamüin wanüiki otta waashajeʼerüin shia suluʼujee wanee karaloukta. Shia nüchekaka waküjüin nümüin tü suluʼukat waaʼin. Püleeja Mateo 6:7, TNM otta Filipos 4:6, 7.

Naapüin wanüiki Maleiwa waashajaale nümaa suluʼu waaʼin (1 Samuel 1:12, 13). Nücheküin Maleiwa woʼuraajüin nümüin waneepia: wattaʼa maalü, aipaʼa, süpülapünaa weküin otta müleka sülatüle kasa mojusü wamüin. Püleeja Salmo 55:22 otta Mateo 15:36.

Naʼakashii waya na wayuu manoulakana otta nemeeʼerainpalasü tü nümakat Maleiwa, anajiraainjanain na wayuukana yaa saaʼu tü Mmakat. Sutuma tia, eesü süpüla mamalain wamüin warütkaain nünainmüin Maleiwa  (2 Timoteo 3:1, 4; 2 Pedro 3:3, 13). Makalaka woutkajaainjanain namaa na wawalayuukana süpüla katsüinjatüin waaʼin. Müshiʼiya nayakana, choʼujaasü katsüinjatüin naaʼin watuma. Püleeja Hebreokana 10:24, 25.

Arütkaweena maʼin waya nünainmüin Maleiwa woutkajaale namaa na wayuu aikana apüla nia. Katsüinjeerü waaʼin sutuma nanoula na aküjüliikana pütchi nüchiki Jeʼwaa woutkajaale namaa. Püleeja Roma 1:11, 12.

Jülüjüinjatü paaʼin tü pikirajaakalü anain nüchiki Maleiwa. Jülüja paaʼin tü kasa naaʼinrakat. Tü nüchiaakalü anain pia otta tü kasa naaʼinrajatkat mapeena. Jülüjüle paaʼin tia otta puʼuraajüle nümüin, piyaawateerü saaʼu aipüralin maʼin Maleiwa otta kekiin maʼin nia. Püleeja Josué 1:8 otta Salmo 1:1-3.

Paʼaleewainjeechi Maleiwa punoujüle nünain otta piʼitaale paaʼin nünain. Tü anoujaakat müsü aka saaʼin wanee pünajüt: choʼujaasü saaʼinmajünüin waneepia. Süpüla tia, jülüjüinjatü waaʼin kasain wanoujüin atuma. Püleeja Mateo 4:4 otta Hebreokana 11:1, 6, TNM.

Nükaaliinjeein maʼin Jeʼwaa na wayuu aikana apüla nia. Eesü süpüla naaʼinmajüin nanoula otta naaʼinmajüin nakuwaʼipa süpüla katüin noʼu waneepia (Salmo 91:1, 2, 7-10). Nüküjüin wamüin tü akuwaʼipaa mojukalü atuma waaʼin, tü ayuuikalü atuma waya otta jaralüin tü akuwaʼipaa anakat. Püleeja Salmo 73:27, 28 otta Santiago 4:4, 8.