Wawalayuu aishiikana wapüla:

Oʼunushii waya «sünain ekirajaa wayuu maʼleekalia sainküin tü mmakat» jee woutiisashii naya. Waaʼinrüin tia süka alin wapüla Maleiwa otta alin wapüla wayuu (Mat. 28:19, 20; Mar. 12:28-31). Müle saalin wayuu wapüla wakaalinjeena «na wayuu achekakana süchiki katüinjatüin noʼu waneepia» (Aluw. 13:48).

Shia wekiiruʼupuʼuka neʼe tü wanüikinjatkat sünain aküjaa pütchi otta waapüinjanain karaloʼuta sümüin wayuu. Shiapejeʼe waaʼinmaain maʼin maaʼulu watüjainjanain yootoo sümaa wayuu. Jaʼyeerü waaʼu alin wapüla wayuu yootule waya sümaa süchiki tü kasa kamalainkat sümüin. Jülüjeepejeʼe maʼin waaʼin kasain shapaain atuma saaʼin wayuu otta kasain kamalain sümüin. ¿Kasache waaʼinrajatka süpüla wountuin tia sükajee karaloʼutakat tüü?

Eesü poloo piamamüin ekirajaaya suluʼu karaloʼutakat tüü akaalinjaka waya süpüla alin wapüla wayuu otta wekirajüin shia. Waneʼewai sukua tü pütchikat suluʼujeejatü shia tü Bibliakat jee aashajaasü shia süchiki tü naaʼinrakat Jesús otta tü naaʼinrakat na anoujashii namaiwajanakana sünain aküjaa pütchi. Nnojotsü shiainjatüin wekiiruʼukuʼu wamüinjatüin tü wanüikinjatkat sünain aküjaa pütchi, wachajaainjatü sukuwaʼipa süpüla alin wayuu wapüla. Choʼujaasü maʼin müinjatüin wakuwaʼipa maʼaka süküjünüin suluʼu karaloʼutakat tüü süpüla yootuin waya sümaa wayuu, wouyantüin sümaʼanamüin jee wekirajüin shia.

Pikirajaapa sünain waneʼewai sukua tü pütchikat, jülüja paaʼin tü pukuwaʼipainjatkat sümüin wayuu püntapa shipialuʼumüin sünain aküjaa pütchi. Anasü kooʼomüinre naalin Jehová jee saalin wayuu püpüla. Puunteerü pikirajüin wayuu aire shia püpüla, nnojoleerü puuntuin neʼe tia sutuma pütüjain ekirajaa.

Kojutusü maʼin wamüin waʼyanaajiraain jümaa (Sof. 3:9). Kasataalejeseʼe jiʼrüin kasa anasü nutuma Jehová jee ayatüinña alin jüpüla wayuu sümaa jikirajüin shia.