Julio: Jamayaa Ernesto, anii taya antüin tachikuaʼa. Anasü taaʼin sutuma tekirajaain pümaa tü Bibliakat semaanawai. a ¿Anayaashijeʼe pia?

Ernesto: Aniʼiya, anashi taya.

Julio: Sotusü paaʼin wanaa sümaa yaajachin taya, waashajaa achiki jamüin wamaka nuʼttuin Maleiwa sünain aluwatawaa soʼu tü juyakat 1914. b ¿Jülüjasü paaʼin tü wekirajaakalü anain suluʼu tü kapiitulokat 4 suluʼu tü karaloʼutakat Daniel?

Ernesto: Aa, tü nüʼlapüinkat Nabucodonosor.

Julio: Shiaʼaya tia. Aʼlapüjaashi nia sümaa wanee wunuʼulia miyoʼushaata maʼin antaleeka sirumatuʼumüin. Nüʼlapüinruʼu naapüin nünüiki wanee aapiee nümaʼanajeejachikai Maleiwa aküjakai sushottünüinjatüin tia wunuʼukat. Shiainjatü neʼe apütaaka tü shikiikat jee tü suuralakat. Shiasaʼa süchikijee tia, alatüsü «akaratshisü kaʼi» süpüla shimiyoʼulaain süchikuaʼa tia wunuʼukat. c Wekirajaa anainya shikeraajüin piantua tia ashajuushikat. ¿Sotusü paaʼin joujatüin tü palajatkat?

Ernesto: Aa, shia tü alatakat nümüin Nabucodonosor. Mamainnaapünaashi nia soʼutpünaa akaratshisü juya.

Julio: Shiimainsaʼaya. oʼulapünaashi suulia aluwatawaa sutumajee tia. Tü wane shikeraajiakat shia wanaa sümaa nnojotpünaain soʼutpünaa akaratshisü kaʼi na aluwataalii nünüliamaajanakana Jehová. Oʼttusü tia akaratshikai kaʼi wanaa sümaa sajaʼttinnüin Jerusalén soʼu tü juyakat 607 süpülapünaa wakalia. Soʼujee juyakat tia nnojoluinnapain eein na aluwataalii nüneekakana Maleiwa chayaa Jerusalén. Sajaʼttapa tia akaratshikat kaʼi, nüneeküinjachin Maleiwa wanee jekechi aluwataai, aluwataainjachi nia sirumatuʼujee. Tia maluʼulu sajaʼttapa tia akaratshikat kaʼi nuʼtteechin Maleiwa sünain aluwatawaa. Watüjaaitpa aaʼu joujatüin suʼttuin tia akaratshikat kaʼi. Jooluʼu wekirajaa sünain jeʼrain sükalia tü akaratshikat kaʼi süpüla watüjaain saaʼu joujachin nuʼttuin Maleiwa sünain aluwatawaa. ¿Piyaawatüin saaʼu Ernesto?

Ernesto: Aa, sotuitpa taaʼin tü wekirajaaitpakalü anain.

Julio: Anasü wekirajaale sünain jeʼrain sükalia tü akaratshisükat kaʼi. Süpülapünaa tantüin, tekirajaa anainrü tia süpüla taküjainjatüin shia pümüin. Kasataalejeseʼe piyaawatüin saaʼu.

Ernesto: Ajaa.

Julio: Sünain tü palajatkat shikeraajia tü akaratshisükat kaʼi, akaratshisü neʼe juya. Shia wanaa sümaa nuuʼulaapünaain Nabucodonosor suulia aluwatawaa. Akaajasaʼa tü wane shikeraajiakat, wanaa sümaa nuʼttuin Maleiwa sünain aluwatawaa kakaliasü shia.

Ernesto: ¿Jamüsü süpüla pütüjaain saaʼu tia?

Julio: Oʼttusü sünain ayaawajünaa sükalia tü akaratshisükat kaʼi soʼujee tü juyakat 607 süpülapünaa wakalia wanaa sümaa sajaʼttinnüin Jerusalén. Maʼaka wayaawajüle akaratshishü juya antaʼaleerü neʼe tia kaʼikat sünain tü juyakat 600. Nnojotsü kasain alatüin soʼutpünaa juyakat tia sünain sukuwaʼipa nuluwataaya Maleiwa otta müsia wainma juya süchikijee wanaa sümaa yaajachin Jesús nüküjain nnojoluin sajaʼttüin sükalia tü akaratshisükat kaʼi.

Ernesto: Aa, jülüjasü taaʼin tia.

Julio: Tü akaratshisükat kaʼi aküjünakat achiki suluʼu tü Bibliakat nnojotsü akaratshiisüin neʼe juya, kakaliasü shia.

Ernesto: Wainmala juya tia. ¿Jeʼraka maʼin shia?

Julio: Suluʼu tü karaloʼutakat Alateetkat Mapeena eesü wanee pütchi sünainpünaaka tü süküjakat tü karaloʼutakat Daniel. Wayaawateetka aaʼujee jeʼrain sükalia tü akaratshisükat kaʼi. Suluʼu tia ashajuushikat süküjain apünüin kaʼi süseʼeruʼupünaa antüsü saaʼu 1.260 kaʼi.  d Shiasaʼa piyaawajüle shia piantua tia akaratshisükat kaʼi antüsü saaʼu 2.520 kaʼi, ¿piyaawatüinya shia Ernesto?

Ernesto: Mmm, nnojoliyütpejeʼe tayaawatüin maʼin saaʼu jamüin junoujaka sünain nuʼttuin Maleiwa sünain aluwatawaa soʼu tü juyakat 1914.

Julio: Anashii wekirajaale sooʼomüin. Saashajaapa tü Bibliakat süchiki wanee kaʼi eesü shiale wanee juya. e Maʼaka wayaawatüin saaʼu tü 2.520 kaʼi shia 2.520 juya. Wayaawajüle 2.520 juya soʼujee tü juyakat 607 süpülapünaa wakalia, wanaa sümaa suʼttuin tü akaratshisükat kaʼi, antüsü shia sünainmüin tü juyakat 1914. f Müsüjeseʼe wamüin sajaʼttüin tü akaratshisükat kaʼi soʼu juyakat tia jee müsia nüikalaain Jesús sünain aluwatawaa nutuma Maleiwa otta müsia soʼu tü juyakat 1914 oʼttusü sünain shikeraajüin tü sümakat tü Bibliakat süchiki sülüʼüluin sükalia sajaʼttajatka oʼu kasa mojusü.

Ernesto: ¿Kasa alataka?

Julio: Suluʼu Mateo 24:7 nüküjain Jesús kasainjatüin alatüin wanaa sümaa nuʼttuin sünain aluwatawaa chejee sirumatuʼu: «Atkaajiraajeerü wayuu suluʼujeejatü wanee pueulo sümaa waneʼeya, atkaajiraajeerü wayuu suluʼujeejatü wanee mma sümaa waneʼeya, aijeerü jamü otta akutkujaajeerü mma sainküinpünaa mmakat». Jülüja paaʼin nüküjain Jesús alinjatüin jamü jee sukutkujaainjatüin tü mmakat, ¿nnojotsüjasaʼa piʼrüin shikeraajüin tia soʼujee tü juyakat 1914?

Ernesto: Aa, shiimainsaʼaya tia.

Julio: Nüküjainña Jesús eeinjatüin atkawaa. Saashin tü karaloʼutakat Alateetkat Mapeena eejeerüin atkawaa sainküinpünaa tü mmakat. g ¿Sotusü paaʼin joujatüin sülatüin tü palajatkat atkawaa miyoʼu?

Ernesto: Aa, soʼu tü juyakat 1914. Shia soʼu tü juyakat püküjaka tamüin nuʼttuin Jesús sünain aluwatawaa. Eetaayaai jülüjain taaʼin wanaapünaain shia sümaa kaʼikat tia.

Julio: Pansaasü tia wamüin wanaa sümaa wayaawatüin saaʼu shikeraajia tü akaratshisükat kaʼi sümaa tü ashajünakat süchiki tü alatajatkat sülüʼütpa sükalia sajaʼttajatka oʼu kasa mojusü. Waya Aküjaliikana pütchi watüjaa aaʼu nüikalaain Jesús sünain aluwatawaa soʼujee tü juyakat 1914 jee kepiain waya sükalioʼu sajaʼttajatkalü oʼu kasa mojusü. h

Ernesto: Nnojotsü müin tayaawatakai saaʼu süpüshuaʼa tia.

Julio: Majatia takuwaʼipa wanaa sümaa tekirajünüin soʼu tü palajatkat takua. Kasataalejeseʼe jülüjain paaʼin tü wekirajaaitpakalü anain süchiki tü juyakat 1914 otta jamüin natüjaaka saaʼu na Aküjaliikana pütchi nuluwataain Jesús soʼujee juyakat tia. Süpüshuaʼa tü taküjaitpakat pümüin suluʼujeejatü shia tü Bibliakat.

Ernesto: Aa, ponusü maʼin taaʼin tü püküjakat tamüin süka piiʼiyatüin shia tamüin sükajee tü Bibliakat. Tasakirapa pia sünain wanee kasa, nnojoishi pia müin tamüin «saaʼin tamüin». Piiʼiyatüin tamüin tü sümakat tü Bibliakat, shiajaʼa neʼe nnojoluin müin tayaawatakai saaʼin. ¿Jamaka nnojoika nümüin Maleiwa nuʼttuinjachin Jesús sünain aluwatawaa soʼu tü juyakat 1914?

Julio: Anasü maʼin tü püsakitkalü anain taya Ernesto. Wainma kasa nnojotka süküjain tü Bibliakat uwatuwoʼushi. ¿Jamüsü maka sukuwaʼipa nutuma Maleiwa? Süpüla wekirajaainjatüin sünain jee wachajaain sukuwaʼipa süpüla wayaawatüinjatüin shia. ¿Jamüsü saaʼin pümüin wekirajaale süchiki tia soʼu tü wane semaanakat?

Ernesto: Anakajaʼa taʼatapajeechi pia.