Tü nüshajalakat Mateo 18:1-35
18 Narütkaaka na nikirajüinkana Jesús nünainmüin sümaa namüin nümüin: «¿Jaraleechi wemiyoʼuseka nuluwataapeena Maleiwa chejee iipünaajee?».
2 Neenajaka Jesús wanee jintüi jee nüshaʼwaleʼeraka nia pasanain nanain.
3 Nümakalaka namüin: «Nnojorüle jiiʼiratüin jukuwaʼipa sümaa müin jukuwaʼipa maʼaka nukuwaʼipa wanee jintüi, nnojoleerü jiʼrüin tü kasa anasü eejeetkat nuluwataapeena Maleiwa chejee iipünaajee.
4 Chi eekai nnojoluin yaletüin naaʼin maʼaka nnojoluin yaletüin naaʼin jintüikai chii, nieechi miyoʼuka nuluwataapeena Maleiwa chejee iipünaajee.
5 Kamaneeshi tamüin wanee wayuu eekai kamaneein namüin na wayuu tajünalakana, na makana aka saaʼin nukuwaʼipa jintüikai chii.
6 Eekajasaʼa chi eekai nümalajeʼerüin nunoula wanee tekirajüin, shia anaka nümüin nujutunule pasanain sünain palaa sümaa shiʼitaanüin nunutpünaa wanee ipa miyoʼu maʼaka saaʼin tü ipa asirujia eʼitaanakat süpüla süʼleeyalüin shia püliikü.
7 »Aluʼutaʼaleesüjaʼa wayuu sainküinpünaa mmakat saaʼujee eein sutuma tü kasa amalajeʼerakat nanoula na anoujashiikana. Eejeetsaʼaya tü kasa sümalajaakalü atuma nunoula wanee anoujashi. Niapejeʼe mülialeejeechin chi wayuu amalajeʼerakai nanoula.
8 Kaainjarale pia süka pajapü jee süka puuʼui, müinjatü pushottakai saaʼin sümaa pujutuin shia wattamüin süpüla katüin poʼu. Shia anaka aluʼu katüle poʼu sümaa perain pütüna jee perain püsaʼa suulialeʼeya pujutunuin saʼaka tü siki matüjainkalü oyokojowaa.*
9 Akaataajaʼa kaainjarale pia sutuma piirakaain sümüin wanee kasa, müinjatü piyuʼlakai saaʼin poʼu sümaa pujutuin shia wattamüin. Shia anaka aluʼu katüle poʼu sümaa mochoin poʼu suulia amülouireeinña pia* sümaa tü piamasükat poʼu.
10 Jülerajaʼalayaai na wayuu nnojoliikana yaletüin aaʼin, jamüshiijaʼa na aapiee aaʼinmajawaikana naya, neʼrüin waneepia nuʼupünaa chi Tashi chakai iipünaa.
11 *
12 »Jamüshijaʼa kamüʼlüinre wanee wayuu poloo shikii anneerü jee amülouitaale waneesia nuulia, ¿aashin nüpüteerüin tü mekietsatkat shikii mekietsatmüin chaa uuchoʼu jee nüchajaweetka süchiki tü amülouisükat?
13 Mayaainjeʼe talatüin naaʼin sümaa tü mekietsat shikii mekietsatmüin anneerü nnojotkat machikin, talataleejeeria naaʼin sümaa tü aneerü amülouisükat nüntapa sünain.
14 Akaataajaʼa neʼe nukuwaʼipa chi Tashi iipünaajachikai, nnojotsü nücheküin süpüleerua seemiajaainjatüin nunoula wanee wayuu nnojoikai yaletüin aaʼin.
15 »Kaainjarale wanee puwala puulia, anakajaʼa paashajaale nümaa nümüiwaʼa jee püküja nümüin kasain mojuin nutuma. Kapüralejeʼe naaʼin pünüiki, anajiraweechi pia nümaa püchikuaʼa.
16 Akaajasaʼa nnojorüle kapülain naaʼin pünüiki, anashi püleʼejüle püchikuaʼa nümaʼanamüin sümaa pümaainjachin waneeshia jee nayale piamashii wayuu. Punoutajatü noʼupala piamashii jee apünüinshii wayuu tü mojujiraakalü aaʼujee pia nümaa puwala.
17 Nnojorülejeʼe kapülain naaʼin nanüiki naya wayuukana, püküjainjatü tia namüin na puwalayuukana jee nnojorülejeʼe jamajatüin nümüin nanüiki na puwalayuukana, anakajaʼa piirakaʼalaale nüka maʼaka wanee wayuu eekai manoujain* jee maʼaka naaʼin na achekajüliikana nneerü neʼipajee na sülaülakana mma.
18 »Shiimain tü tamakat jümüin, tü kasa kapükat jutuma yaa saaʼu tü mmakat, kapeerü shia chaa iipünaʼaya. Tü kasa taashikat jutuma yaa saaʼu tü mmakat, taasheerü shia chaa iipünaʼaya.
19 Otta eere piamashii wayuu jaʼakajee yaa mmapaʼa paaʼinwakana sünain achuntaa wanee kasa, aapüneerü tia namüin nutuma chi Tashi iipünaajachikai.
20 Müleka eere piamashii jee apünüinshii wayuu jutkatüin sükajee tekirajalain naya, eejeechiaʼaya taya namaa».
21 Nürütkaakalaka Pedro nünainmüin Jesús sümaa nümüin nümüin: «Señotkalee, eere naainjala wanee tawala tamüin, ¿jeʼratuainjatü motuin taaʼin tü naainjalakat? ¿Akaratshituainjatü?».
22 Nümaka Jesús nümüin: «Nnojotsü akaratshituainjatüin neʼe, akaratshituainjatü shikii akaratshimüin.
23 »Aluwataajeechi Maleiwa chejee iipünaajee. Tia müsü aka nukuwaʼipa wanee aluwataashi eenajirakai na nüchepchiakana süpüla nüchekajüinjatüin namüin tü nojuyaalakat.
24 Wanaa sümaa yalajachin nüchekajüin, nüntinnaka nümüin wanee nüchepchia kojuyaalashi nuulia 10.000 ‹talento›.*
25 Isakalaka nüchiki chi achepchieekai nuwalaajüinjatüin tü nujuyaalakat. Naapünaka ekii nutuma chi nülaamainkai süpüla nuikünajachin sümaʼaleeya nuʼwayuuse, nüchonnii jee müsia tü kasa eekat nümaʼana süpüla nuwalaajüinjatüin tü nujuyaalakat.
26 Nüsapainkaka chi achepchieekai nümülatuʼu chi aluwataashikai sümaa nuchuntuin nümüin. ‹Anashi paawarüle paala taya, tawalaajeeria pümüin süpüshuaʼa tü tojuyaalakat›, nümaka nümüin.
27 Sümülialaakalaka naaʼin chi nülaamainkai naalin sümaa nuuʼulaain nuʼunuin chi nüchepchiakai. Nnojotka nüchekajüin piantua tü nujuyaalakat.
28 Nuʼunaka chi achepchieekai jee nüntiraaka nümaa wanee wayuu achepchiee wanaa nümaa kojuyaalakai nuulia 100 ‹denario›.* Nüülaka nia sümaa nümüin nümüin: ‹Puwalaaja tamüin süpüshuaʼa tü pujuyaalakat›.
29 Nüsapainkaka chia wayuukai nümülatuʼu sümaa nuchuntuin nümüin. «Anashi paawarüle paala taya, tawalaajeeria tojuyaala puulia», nümaka nümüin.
30 Nnojoipejeʼe nia naawalüin, nüpüreesajirüin neʼe nuwalaajaleepa süpüshuaʼa tü nujuyaalakat nuulia.
31 Nayasaʼa na wayuu achepchieekana wanaa nümaa, naashichijaakalaka naapaiwaʼaya süchiki tia naaʼinrakat. Naküjaka nüchiki nümüin chi nalaamainkai.
32 Neenajinnaka chi achepchieekai nutuma chi nülaamainkai jee nümaka nümüin: ‹Wainmataʼaleejaʼa maʼin tü pümaʼülakat. Mataashi nnojoikai tachekajüin piantua tü pujuyaalakat saaʼu puchuntuin tamüin taawalüinjachin pia.
33 Eetaayaai neʼe sümülialaain paaʼin naalin chira wayuu achepchieekai wanaa pümaa maʼaka sümülialaain taaʼin paalin›.
34 Naashichijaaka chi nülaamainkai nümüin jee nüpüreesajitka nia nuwalaajaleepa süpüshuaʼa tü nujuyaalakat nuulia.
35 Nnojoleerü motuin naaʼin chi Tashi iipünaajachikai tü jaainjalakat nnojorüle motuin jaaʼin naainjala na juwalayuukana juulia».
Noota
^ «Ajaʼttinnaleeinjachia» maluʼulu tia suluʼu griego.
^ «Gehena» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ «Wayuu nnojoliikana judíoin» maluʼulu tia suluʼu griego.
^ 60 miyoone «denario» tia makat. Pünaʼla tia suluʼu tü kanüliakat «Sooʼomüin pütchi B14».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
