Tü nüshajalakat Marcos 3:1-35
3 Nikeroloko nüchikuaʼa suluʼumüin tü ekirajüleekat wayuu nüchiki Maleiwa. Eejachika yala wanee wayuu joso ajapüchi.
2 Niʼrajaanaka maʼin Jesús natuma na fariseokana, natüjawee aaʼu aneechire chia wayuukai nutuma sükalioʼu eemerawaa süpüla süsalainjachin nia natuma sünainjee tia.
3 Nümakalaka Jesús nümüin chi wayuu joso ajapüchikai: «Pütamaa, anashi püshaʼwalaale yaa pasanain wanain».
4 Anuujeseʼe nünüiki Jesús namüin na fariseokana: «¿Kasache anaka süpüla aaʼinnaa sükalioʼu eemerawaa? ¿Shiache aaʼinnajatka wanee kasa eekai anain, shiataapa aaʼinnajatüin wanee kasa eekai mojuin? ¿Anasüche nuʼtteʼennüle wanee wayuu, shiataapa anain nuʼutunule aaʼin?». Koʼutakalaka neʼe naya nuulia.
5 Niirakaaka Jesús namüin na wayuu eejanakana nüʼütpünaa sümaa jashichin nia namüin. Aisü nümüin mamülialaain naya saalin wayuu. Nümakalaka Jesús nümüin chi wayuu joso ajapüchikai: «Piyurula pütüna». Anamaataka najapü chi wayuukai niyurutpa nütüna.
6 Noʼunakalaka na fariseokana nümaʼanajee Jesús jee noutkajaamaataka namaa na nümaajanakana Herodes süpüla natüjaainjatüin saaʼu tü naaʼinrajatkat shiiʼiree noʼutajachin naaʼin Jesús.
7 Nuʼunakalaka Jesús palaairükumüin namaa na nikirajüinkana, sukoʼulayaa sümaka wayuu nüchiirua. Eejatü wayuu Galileajeejatü otta eejatü wayuu chejeejatü Judea.
8 Saapaka wayuu watta saalii süchiki tü naaʼinrakat Jesús, makalaka süntüin wayuu sejetü Jerusalén, Idumea, wayuu sejetü wanee saʼata tü süchikat Jordán otta na kepiakana süʼütpünaa tü mmakat Tiro otta Sidón.
9 Nuchuntaka Jesús namüin na nikirajüinkana yapainjatüin natuma wanee anuwachon süpüla noʼotooinjachin suluʼu suulia pasanainjüin nia nanain na wayuu wattakana naalii.
10 Jee süka wattain naalii na wayuu aawalaakana nutuma Jesús, antüshii na eekai mayein sutuma wanee ayuulii eekai alin maʼin jee chentaawaka naya nünain Jesús shiiʼiree nepetteein nia.
11 Jaʼitakajeʼe tü wayuu kaleʼeruʼusükat yolujaa, süsapainkasü nümülatuʼu Jesús shiʼraiwaʼaya nia jee müsü sünüiki shikiisaluʼu: «Pia chi Nüchonkai Maleiwa».
12 Nüchiaawaipejeʼe naya suulia naküjaʼalüin nüchiki sümüin wayuu.
13 Süchikijee tia, nuʼunakalaka Jesús saaʼumüin wanee uuchi. Nuunejiraka chamüin na wayuu nüneekajalakana jee noutkajaakalaka nümaa chamüin.
14 Nüneekakalaka poloo piamamüin wayuu, «aluwataaushi» münüshii naya nutuma. Nümaataraliinjana naya otta nüjütüinjana naya sünain aküjaa pütchi.
15 Jee naapüinjatü laülawaa namüin süpüla nayuʼluinjatüin yolujaa süleʼeruʼujee wayuu.
16 Naʼaka na polookana piamamüin wayuu nüneekajalakana eejachi Simón, chi Pedrokai anülia nutuma.
17 Eejachi Santiago nümaa Juan chi nuwalakai, nüchonnii naya Zebedeo, Boanerges münüshii naya nutuma Jesús, «süchooin sütürüla juya» maluʼulu tia.
18 Eejachi Andrés, Felipe, Bartolomé, Mateo, Tomás, Santiago chi nüchonkai Alfeo, eejachi Tadeo, Simón «chi Yalayalakai aaʼin»
19 otta müshia Judas Iscariote, chi aapakai nikii Jesús mapa.
Shiasaʼa süchikijee tia, nikeroloko Jesús suluʼumüin wanee miichi.
20 Sukotchojooko watta saalii wayuu süchikuaʼa, nnojotka süpütaain kaʼi süpüla niküinjachin Jesús namaa na nikirajüinkana.
21 Naapapa na nüpüshikana süchiki tü kasa alatakat, noʼunakalaka sünain asaajawaa nia süka müin nanüiki mayaa: «Mamainnainjaʼa eera nia».
22 Nayasaʼa na karaloʼutamaajana antakana Jerusalénjee, müsü nanüiki nüchiki: «Nia maka atuma nia Belcebú,* ojuʼititshi yolujaa süleʼeruʼujee wayuu nükajee chi sülaülashikai yolujaa».
23 Neenajakalaka naya nünainmüin jee kayaawaseka nutuma tü nikirajakalü anain naya, müshi nia namüin: «¿Jamakuwaʼipai süpüla nujuʼitinnajachin Satanás nutuma neʼe Satanás?
24 Mojujiraale wanee wayuuirua suluʼu wanee mma jee suluʼu wanee pueulo, ajaʼlajaajiraweerü shia.
25 Jee shiale mojujiraain wanee wayuu sümaa süpüshi, ajaʼlajaajiraweerü.
26 Akaataajaʼa niale ojuʼitinnüin Satanás nutuma neʼe Satanás, nnojotsü paaʼinwaa suluʼu tia, ooʼulaweechi nia suulia aluwatawaa.
27 Jamüshijaʼa wanee wayuu eekai nüsaijeein nipia wanee wayuu katchinshi, nijinnajüinjachi palajana chi wayuu katchinshikai. Nüsaija nümeetka tü nipiakat süchikijee tia.
28 Shiimain sülatinneerüin saainjala wanee wayuu suulia, jaʼitasü kasain saaʼinralain otta jaʼitasü mojuin sünüiki.
29 Nnojotpejeʼe nülatirüin Maleiwa saainjala wanee wayuu müleka mojule sünüiki süchiki tü nüpülainkat, müiria nnojoluin motuin naaʼin saainjala».
30 Nüküjain tia Jesús süka müin nanüiki na karaloʼutamaajanakana nüchiki: «Yolujaasitshi neʼe makaʼa nia».
31 Süntakalaka tü niikat Jesús namaa na nuwalayuukana, yalajanaka naya anooipaʼa. Naluwataapejeʼe wanee wayuu süpüla suunejüin nia namüin.
32 Watta saalii wayuu eejatka joyojoyolüin nüʼütpaʼa Jesús. Nümünakalaka amüin: «Isaa tü piikat anooipaʼa namaa na puwalayuukana, asakitshii naya pünain».
33 Nusoutakalaka Jesús: «¿Jütüjaa aaʼulu jaralüin tü teikat namaa na tawalayuukana?».
34 Niirakaaka Jesús namüin na joyojoyotkana nüʼütpaʼa jee nümakalaka: «Nnaaʼasa tei namaa tawalayuu.
35 Na aaʼinrakana tü nuluwataakalü anain Maleiwa müshii aka naaʼin tawalayuu, tashunuu jee tei tamüin».
Noota
^ Jee niale «Beelzebub». Münüshi Satanás chi sülaülakai yolujaa.
