Tü nüshajalakat Juan 15:1-27
15 »Müshi taya maʼaka saaʼin suuʼulia tü uuwa shiimainsükat maʼin otta müshi chi Tashikai maʼaka naaʼin chi apünajüikai.
2 Meerü nüshottokoi tanainjee tü sütüna eekai machooin otta meerü nünaatakai saaʼin tü sütüna eekai kachooin maʼin süpüla kachonleeinjatüin maʼin shia.
3 Wuleitpa jukuwaʼipa sutuma tü pütchi taküjaitpakat jümüin.
4 Paaʼinwa jia tamaa, paaʼinweechikalaka taya jümaa. Maʼaka nnojoluin süpüla kachooin sütüna wanee uuwa nnojorüle sünain shia tü suuʼuliakat, akaweenaʼaya jiakana nnojoleerü juuntuin jaaʼinrüin kasa anasü nnojoliire paaʼinwain jia tamaa.
5 Müshi taya maʼaka saaʼin wanee suuʼulia uuwa otta jiakana müshii aka saaʼin tü sütünakat. Aaʼinreechi kasa anasü chi wayuu paaʼinwakai amaa taya, nnojoleetpejeʼe juuntuin jaaʼinrüin wanee kasa katatale jia toulia.
6 Nnojoire paaʼinwain wanee wayuu tamaa, meechi nujutunakai aaʼin maʼaka sujutunuin sütüna wanee wunuʼu otta ojulujaa müsüjaʼaya shia. Tia sütünakat wunuʼu akotchojünüsü, ojutuna münüsia shia soʼu siki.
7 Paaʼinwale jia tamaa otta jaaʼinrüle tü taluwataakalü anain jia, eesü süpüla juchuntuin tü juchunteekalü amüin, naapeetkalaka shia Maleiwa jümüin.
8 Kojuteechi chi Tashikai jaaʼinrüle waneepia kasa anasü otta jaʼyale jaaʼu tekirajanain jia.
9 Aishii jia tapüla maʼaka alin taya nüpüla chi Tashikai. Müinjatia jukuwaʼipa maʼaka saaʼin wayuu eekai alin tapüla.
10 Jaaʼinrüle tü taluwataakalü anain jia, aijeena jia tapüla maʼaka alin taya nüpüla chi Tashikai, jama taaʼinrüin tü nuluwataakalü anain taya.
11 »Taküjain jümüin tüü süpüla talataleeinjatüin maʼin jaaʼin maʼaka talatüin taaʼin tayakai.
12 Anuu tü taluwataakalü anain jia, aijiraainjana jia waneʼewai jukua maʼaka alin jia tapüla.
13 Alanaʼaleesia maʼin naalin naʼaleewainyuu wanee wayuu nüpüla naapajiraale nikii naaʼu.
14 Taʼaleewainjeena jia jaaʼinrüle tü taluwataakalü anain jia.
15 ‹Tachepchia›, nnojoluichipa müin taya jümüin süka nnojoluinjaʼa nütüjaain saaʼu wanee achepchiee tü naaʼinrakat chi nülaamainkai. ‹Taʼaleewainyuu›, müshi taya jümüin süka taküjain jümüin süpüshuaʼa tü nüküjakat tamüin chi Tashikai.
16 Nnojoishi tayain jüneekajalain, jia taneekajalaka. Taluwataain jia süpüla jaaʼinrajatüin waneepia kasa anasü.* Naapeetkalaka jümüin chi Tashikai kasa eekai eein juchuntule shia nümüin tanülialuʼu.
17 »Taluwataain jia sünain tia süpüla aijiraainjanain jia waneʼewai jukua.
18 Süʼürülale jia wayuu, soto jaaʼin süʼürülatüjülin taya palajana jüpüleerua.
19 Aishiije jia napüla na wayuukana wanaawalejeʼeya jaaʼin namaa. Naʼürülapejeʼe jia süka nnojoluin wanaawain jaaʼin namaa, jama taneekajalain jia naʼakajee.
20 Soto jaaʼin tü tamüitpakat jümüin, nnojoishi alanaʼaleein wanee achepchiee nuulia chi nülaamainkai. Mülialejeʼeya taya natuma, mülieenaʼaya jia natuma. Naaʼinrülejeʼeya tü tamakat namüin, naaʼinreeriaʼaya tü jümakat namüin.
21 Naaʼinreerü jümüin süpüshuaʼa tia saaʼujee tekirajanain jia, jama nnojolin neʼraajüin chi Kajünalakai taya.
22 Nnojoireje tantüin otta nnojoireje taashajaain namaa, nnojoishiije naya kaainjalain. Kaainjalapejeʼe naya maaʼulu süka natüjaain saaʼu tia.
23 Chi eekai üttüin naaʼin tanain, üttüsiaʼaya naaʼin nünain chi Tashikai.
24 Nnojoireje taaʼinrüin noʼupala kasa pülasü, tü nnojotyütkalia saaʼinrüin wayuu, nnojoishiije naya kaainjalain, naʼürülashi taya eerejeʼe neʼrüin taya otta naʼürülashi chi Tashikai.
25 Naaʼinrapejeʼe tia süpüla shikeraajüinjatüin tü sümakat tü Karaloʼuta Nüchikimaajatkat Maleiwa, tü makat mayaa: ‹Nnojotsü eein wanee kasa naʼürülakai anainjee taya›.
26 Nüjütapeena chi Tashikai jümüin tü nüpülainkat, tü akaalinjiainjatkat jia, jiyaawateerü aaʼu jaralin maʼin taya. Jütüjaajeerü aaʼu tü shiimainkat sükajee tü nüpülainkat chi Tashikai, jama nümaʼanajeejatüin shia.
27 Akaʼaya jiakana, aküjainjana jia tachiki, jama jiain eetüjüliin tamaa palajana.
Noota
^ «Süchon wunuʼu» maluʼulu tia suluʼu griego.
