Karaloʼuta namüinjatka na chajanakana Galacia 5:1-26
5 Taashitpa wakuwaʼipa nutuma Cristo, ayataʼaya katchin junoula jee nnojoishii achepchieeinjanain jia jüchikuaʼa.
2 Anuu tanüiki tayakai Pablo jümüin, jüchoteʼerüle süta jukorolo* nnojotsüjaʼamata kasain saamüin jümüin tü naaʼinrakat Cristo.
3 Anuu jooluʼu tanüiki tachikuaʼa namüin na wayuu achoteʼerakana süta nakorolo, chi wayuu achoteʼerakai süta nükorolo naaʼinrüinjatüjaʼamata süpüshuaʼa tü sümakat tü Pütchi Aapünakat nümüin Moisés.*
4 Jia wayuu loteekana akuwaʼipa sünainjee tü Pütchi Aapünakat nümüin Moisés, nnojoliinnapa paaʼinwain jia nümaa Cristo. Jiyouta achikit kamaneeinjachin nia jümüin.
5 Eekajasaʼa wayakana, waʼatapajüin maʼin tü kaʼi lotuinjatkalü oʼu wakuwaʼipa noʼuluʼu Maleiwa, wounteerü tia sükajee eein tü nüpülainkat Maleiwa waaʼu jee sükajee kanoulain waya.
6 Sutuma paaʼinwain wanee wayuu nümaa Cristo Jesús, nnojotsü kasain saamüin nümüin nüchoteʼerüle süta nükorolo jee nnojorüle nüchoteʼerüin shia. Aluʼu shiainjaʼa anain aire wayuu nüpüla sutuma kanoulain nia.
7 Anapuʼusü maʼin jukuwaʼipa sümaiwa paala,* ¿jara ataʼülaka jukuwaʼipa süpüla nnojoliinjanain ayatüin jaapaain sümaa tü pütchi shiimain ekirajünakalü anain jia?
8 Türa ekirajünakalü anain jia, nnojotsü nümaʼanajeejatüin chi Maleiwakai, chi kaneekajalakai jia.
9 Kaainjarale wanee wayuu müsü aka saaʼin tü soolojiakat pan, oolojoʼoleesia süpüshuaʼa tü ariinakat sutuma.
10 Tatüjaa aaʼu wanaaweerüin jaaʼin tamaa sünain tü taküjaitpakat, jama paaʼinwain jia nümaa chi Señotkai. Süsaleechipejeʼe naainjala atumawaa chi kamaʼülapalakai jia, jaʼitashi jaralin maʼin nia.
11 Tawalayuwaa, ayatayüireje taya ekirajüin sünain nüchoteʼerüinjachin süta nükorolo wanee wayuu, nnojoishijeʼe müliain taya atumawaa. Jee ayatayüireje taya ekirajüin süchiki nuʼutunuin aaʼin Jesús sünain tü wunuʼu akacheʼennakalü anain wayuu,* nnojotsüjeʼe mojushiin tia sümüin wayuu.
12 Kasataalejeseʼe nakapajirüin na wayuu emeejeekana jia.
13 Tawalayuwaa, aneekuushi jia süpüla taashinjatüin jukuwaʼipa, nnojotpejeʼe taashin jukuwaʼipa süpüla jaaʼinrajatüin tü kasa mojusü suchuntaakat jiʼiruku. Anashii nachepchiale jia na waneinnua süka alin naya jüpüla.
14 Shia saaʼinka maʼin tü Pütchi Aapünakat nümüin Moisés tü pütchi makat mayaa: «Alinjatü püpüla wayuu maʼaka alin pia püpülajiraa».
15 Eerejeʼe jütüjaain saaʼu tia, ayatataashii neʼe jia atkaajiraain, eejeesü jaaʼin suulia jajaʼlajiraain.
16 Anuu tanüiki jümüin jooluʼu: juuʼulaainjachi niain Maleiwa oʼunirüin jukuwaʼipa sükajee tü nüpülainkat, nnojoleetka jaainjain tü kasa mojusü suchuntaakat jiʼiruku.
17 Tü kasa mojusü suchuntaakat niʼiruku wanee wayuu, müsü peʼipaakai saaʼin sümaa tü nüpülainkat Maleiwa. Sutuma peʼipaain shia, nnojotsü jaainjain tü jaainjeekalü amüin.
18 Niale oʼunirüin jukuwaʼipa Maleiwa sükajee tü nüpülainkat, nnojoishii jia oonooin sümaa tü Pütchi Aapünakat nümüin Moisés.
19 Nnojotsü mochoojuin soʼu wayuu tü kasa mojusü suchuntaakat niʼiruku wanee wayuu, aʼluwajiraweeshi nukuwaʼipa,* yarüttüsü nukuwaʼipa, maapülinsai nia sünain aaʼinraa kasa mojusü,*
20 aʼwaajüshi maleiwayaasü, eeʼirajitshi ouutsü, mojujiraashi sümaa wayuu, katkaarai, kachunrai, kaashichijaarai, aʼülüjiraashi sümaa wayuu, nnojotsü paaʼinwain wayuu nutuma, oushikajaashi süchiirua sukuwaʼipa wayuu,
21 nüliratüin wayuu, epeʼrüi, maaʼin aaʼinchi sünain miʼiraa jee naaʼinrüle waneirua kasa makat aka saaʼin tia. Taküjain jümüin jüchikuaʼa maʼaka taküjain paala shia jümüin, na wayuu aaʼinrakana kasa makalaka tia, nnojoleena eʼrüin kasa anasü nuluwataapeena Maleiwa.
22 Eekajasaʼa chi wayuu eekai aaʼu nüpülain Maleiwa, aisü wayuu nüpüla, talatüshi, jimatüsü naaʼin, nnojoishi kashapajaaralin, kamaneeshi, anamia, kanoulashi,
23 matüjainsai aashichijawaa jee atüjashi achecheraa naaʼin. Nnojotsü eein wanee pütchi aluwataanakalü anain ataʼülaka sukuwaʼipa tia.
24 Na wayuu oushikajaakana süchiirua nukuwaʼipa Cristo Jesús müsü nachitakai saaʼin tü nakuwaʼipapuʼukat (tü kasa kamalainkat namüin, tü kasa suchuntaakat naaʼin) sünain tü wunuʼu eejachire nüchitünüin Cristo.
25 Woʼuninnülejeʼeya akuwaʼipa nutuma Maleiwa sükajee tü nüpülainkat, ayataʼaya woʼunirüin tü wakuwaʼipakat sükajee tü nüpülainkat Maleiwa.
26 Nnojoishii waya aʼwaataainjanain suluʼu wakuwaʼipa, nnojoishii waya ayoujireʼerüinjanain wakuwaʼipa jee nnojoishii waya achumujiraainjanain.
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Anapuʼusü maʼin juwatira paala» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
